Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Ǘrüwa-hati irumu 2017

 ABAHÜDAGUNI LUÁGUTI IBAGARI

Íderagua lumutina néibugun hama gürigia ha chuti hau

Íderagua lumutina néibugun hama gürigia ha chuti hau

HARITAGUA nágili aban binaafin diliti saragu irumu guentó Brookings (Dakota del Sur, Estados Unidos). Gayarati meha nasandiruni yarafaali lan lidaani lidiliga. Lídanñadina meha aban fulasu le ñein lubéi hemeraagua animaalugu úara hama fiú gürigia, súngubei wagía wadadagaruña. Lóubagiñeñadiwa meha aban óunwenbu ágeidinaü buin lau duna, ani diliti meha duna ligía. Ígira humá lun nabahüdagun murusun katei hun luagu nibagari ábame gunfuranda humani ka lan uagu ñéinñadiwa lubéi.

NIDUHEÑU

Alfred le niyaurite luma núguchi

Aban weyu 7 lidan ǘrüwa-hati lidan irumu 1936 nágurahoua. Au meha amuleñibei hádangiñe gádürü isaanigu. Dakota del Sur meha weredera, lidan aban fulasu le ñein lubéi meha wábunagua ani agüriaha wagía animaalugu. Súdiniti meha wadagimanu le wadügübei lidan fulasu ligía houn niduheñu, gama lumoun mama meha ligía súdinitimabei. Gefentiña meha luagu Heowá nagübürigu. Badiseihaña meha lidan irumu 1934. Derege hamaali meha habagari lun Heowá, ligíati, súdinitimati meha houn hadügüni lugundan Bungiu. Clarence meha liri núguchi. Furumiñe aba leseriwidun núguchi ani lárigiñe aba leseriwidun Alfred le niyaurite keisi íbiri le arihibei lau hawadigimari wéiyaaña lidan afiñeni lidan liraüraü wani damuriguaü lidan fulasu le gíribei Conde (Dakota del Sur).

Ñüdüntiña meha niduheñu adamuridagua hama gefentiña luagu Heowá ani apurichihatiña meha muna tuagu muna lun hadimurehan houn gürigia luagu lubuidun emenigini le tídanbei Bíbülia. Íderagua lumutiwa hani wagübürigu hénpulu luma le harufudahabei woun lun línsiñedun Heowá woun. Dandu au kei Dorothy to nitu, gumesetiwa apurichiha dan le 6 lubéi irumu wau. Lidan irumu 1943 aba nabürüdǘn tidan Leskuela Kristiánu lánina Apurichihani, sun liña meha tagumeserun leskuela tuguya.

Eseriwida kei prekursoru lidan irumu 1952

Súdiniti meha adamurini woun. Haritagua nágili adamurini le adügǘbei lidan irumu 1949 Sioux Falls  (Dakota del Sur). Lidan adamurini ligía, aba líchuguni íbiri Grant Suiter yanu le gíribei “¡Es más tarde de lo que usted piensa!” (Létitimahali sügǘ lau le hasaminarubei). Ariñagati sun lan kristiánugu ha badiseihaña mosu lan hayusuruni habagari lun hapurichihani uganu buiti luáguti Larúeihan Bungiu. Lárigiñe adamurini ligía, aba nederegeruni nibagari lun Heowá. Aba nabadiseirun lidan leweñegua adamurini sirkuitu le adügǘbei Brookings 12 lidan unsu-hati irumu 1949. Ligía meha lídanñadina lubéi fulasu diliti le ñein lubéi hemeraagua animaalugu le buga uágubei nayanuha. Hámañadina meha ǘrüwa gürigia ñein, wabadiseira meha lidan aban ágeidinaü lauti gürabu.

Lárigiñe aba desidírü nan neseriwidun kei prekursoru. Aba nagumeserun 1 lidan eneru lidan irumu 1952, dan le 15 lubéi irumu nau. Ariñagatu Bíbülia: “Ha óundaragutiña hama chu tau, lachuuduba hau”, ani añahein meha bandi gürigia ha chuti hau hadan niduheñu, gúndaatiña meha lau desidírü nan neseriwidun kei prekursoru (Ariñawagúni 13:20). Furitina burí meha apurichiha luma Julius, le niyaurite, 60 meha irumu lau. Íbini díseeli lan meha laweiridun nuéi, hínsiñeti meha woun wapurichihan úara. Furendeitina meha bandi katei lúmagiñe. Fiú dan lárigiñe, aba giñe teseriwidun Dorothy kei prekursora.

ÍDERAGUA HAMUTINA ÓUNIGIRUTIÑA SIRKUITU

Dan meha le ñǘraügidina, héchutiña meha nagübürigu amisurahaña óunigirutiña sirkuitu tuma hani weiriou lun herederun wábiñe. Anihein aban feru maríeitiña gíritiña Jesse tuma Lynn Cantwell íderagua hamutina meha saragu ani saminatiña meha nuagun. Dan le meha habisidahan aban damuriguaü le yarafati, anihein meha dan hamisurahanina lun nidin apurichiha hama. Hínsiñeti meha nun násügürün dan hama. Busentina meha beresegu nan saragu lidan neseriwidun lun Heowá kei hagía, ani seriwi au kei prekursoru.

Le aban óunigiruti sirkuitu le abisidahabaliwa Bud Miller meha líribei. Joan meha tiri lani weiriou. Dan le habisidahanbalin wani damuriguaü, 18 meha irumu nau. Lidan dan ligía lunti meha nidin arufudagua nungua tidan áfisi to ñein lubéi hanúadahoua ha lúnbaña houdin asudaraha. Busentiña meha lun nadügün aban katei le subudi numuti kóntüra lan luagu gumadi le líchugubei Hesusu lun mádaragun wamá woungua lidoun politika (Huan 15:19). Gama lumoun, busentina meha napurichihani uganu buiti luáguti Larúeihan Bungiu. Ligía aba lubéi namuriahan lun niridún keisi minisi lánina relihión.

Aba nagundaarun dan le lariñagunbei íbiri Miller nun lídinba lan numa lidan adamuridaguni tidan áfisi  tuguya. Úati meha haburi lan íbiri ligía, ani manufudeti hawéi gürigia. Ani subuditu meha Bíbülia lun buidu buidu. Ruti meha gurasu nun nasubudiruni lídinba lan numa. Ka resultóubei? Lidan lagumuha lubachouga lidan irumu 1954, aba lánharun óundaruni ligía lun niridún keisi minisi lani relihión. Ítara liña meha gayarahali lan naganwoundagüdüni neseriwidun lun Heowá.

Murusun dan lárigiñe nachülürün Betelirugun, tóubagiñe aban óunwenbu karü lídangiñetu fulasu ñein lubéi wóunigirei ábunaguni hama animaalugu

Fiú dan lárigiñe, aba namisurahóun lun neseriwidun Betelirugu, tidan Watchtower to lídanboun uburugu Staten Island (Nueva York) ñein lubéi saragu ábunaguni luma hagüriahóun animaalugu. Rédeitina ñein kéiburi ǘrüwa irumu. Susereti saragu katei buiti nun lidan nawadigimaridun hama saragu “gürigia ha chuti hau”.

NESERIWIDUN BETELIRUGU

Luma íbiri Franz tidan WBBR

Tidan sukursáli tuguya ñeinñoun meha radiu to gíriboun WBBR. Yusu hamutu gefentiña luagu Heowá radiu tuguya lúmagiñe lidan irumu 1924 darí 1957. Kéiburiñadiwa meha 15 o 20 íbirigu nadagimein óunigirei ábunaguni hama animaalugu lidan fulasu ligía. Besafu wádangiñe nibureingidiwa meha ani míbeti meha wasubudin, gama lumoun anihein meha aban íbiri derebuguhali wama ñein, aban kristiánu anuadirúaali íbiri ligía, Eldon Woodworth líribei. Ítara liña meha kei aban úguchili woun ani arufudahati saragu katei woun. Dan le meha ñein lan somu turóbuli waganagua, ábaha lariñagun: “Le linarün katei, wéiriti lubuidun le adüga láalibei Wabureme lau murusun katei”.

Harry Peterson apurichiha lau ubebeni

Ñéinñein giñe íbiri Frederick Franz wama ani íderagua lumutiwa saragu. Chuti meha lau íbiri le ani wéiriti meha lisubudin tuagu Bíbülia. Nidiheriti meha luagu kada aban wádangiñe. Harry Peterson meha liri wagusinerun. Papargyropoulos meha lúgububei liri, gama lumoun ménrenguntimati meha woun wariñagun Peterson. Aban meha giñe kristiánu anuadirúaali íbiri ligía, ani hínsiñeti meha apurichihani lun. Adüga lumuti meha luadigimari Betelirugu buidu ani mígirun lumuti meha lapurichihan. Ígirati meha saragu garüdia háhaburugu gürigia sagü hati. Ani wéiriti meha giñe lisubudin tuagu Bíbülia ani óunabati meha saragu lídangiñe wálügüdahan.

FURENDEITINA HÁMAGIÑE ÍBIRIGU WÜRIÑA HA CHUBAÑA AU

Ñein lidan wawadigimari, aransehatiwa meha furuda tuma fagudia lun wareidunu. Sagü irumu buíngüdatiwa meha 45,000 lata le anügüti yarafa lun 1 líturu lun layusurúniwa Betelirugu. Tuma meha Etta Huth nawadigimarida, aban íbiri chuti tau. Tuguya meha abürüdübalin ida luba lan taransehóun furuda  tuma fagudia. Ñüdüntiña meha saragu íbirigu würiña lídangiñe damuriguaü le burí yarafabei lun hawadigimaridun wamá, ani aba meha tíderaguniña Etta lun haransehani hawadigimari. Íbini meha subudi tani Etta buidu ida liña lan tichugún furuda lidoun lata, súnwandan meha inebehabu tan houn íbirigu ha arihibaña lau wadagimanu ñein. Rutu meha aban hénpulu buiti woun sun wagía.

Angela, Au tuma Etta Huth

Anuhein meha giñe aban nibureintu ñüdüntu íderaguawa, Angela Romana (Angie) tíribei. Etta meha íderagubarun Angie asubudirei Heowá. Aba namarieidun tuma Angie lidan gádürü-hati lidan irumu 1958, ani seriwihadiwa lun Heowá úara luagu 58 irumu. Adügati úaraguni le tarufudubei Angie lun léredun wamarieidun. Aban würi chuti tau Angie, ani gayarati nafiñerun tuagu sunsuinagubei, meberesenga ka lan asuseredubei.

SERIWITIWA KEI MISIONERU ANI KEISI ÓUNIGIRUTIÑA SIRKUITU LUMA DISTRITU

Dan le talugurúnbei WBBR to lídanboun uburugu Staten Island lidan irumu 1957, seriwitina luagu fiú dan tidan Beteli Brooklyn. Dan le namarieidunbei tuma Angie, aba nígiruni neseriwidun Betelirugu. Aba weseriwidun kei prekursorugu Staten Island luagu ǘrüwa irumu. Nadagimeintina luagu fiú dan houn iseri taburiña radiu, to asansiruboun iri lun WPOW.

Dandu Angie kei au sensiyuti meha wabagari, ladüga busentiwa meha lun líbüre wamá lun woudin lidoun furumiñeguarügü fulasu le ñein lumuti wemegeirúa. Ligíati, lidan irumu 1961, aba wamisurahóun lun woudin eseriwida kei prekursorugu espechalitiña Falls City (Nebraska) ani aba wánharun. Murusun dan lárigiñe wachülürün ñéinhin, aba wamisurahoun luagu aban hati lun woudin tidan Leskuela houn Wéiyaaña hama Ídehatiña South Lansing (Nueva York). Gúndaatiwa meha lau arufudahani le wibihibei ani saminatiwa yebe danme lan tagumuchun leskuela aba lanme wagiribudun Nebraska. Ligía aba lubéi taweiridun wanigi dan le wóunahounbei eseriwida keisi misionerugu Camboya. Lidan lubuidun ageiraü ligía, le Asiabei, arihatiwa meha, aganba ani hóucha wagía iseri burí katei. Busentiwa meha tídangiñe sun wanigi wapurichihani uganu buiti luáguti Larúeihan Bungiu lidan ageiraü ligía.

Tuma Angela lidan irumu 1975 lubaragiñe ladügǘn fiú álügüdahani woun tidan bigibigitu

Gama lumoun, aba lasansiragun katei lánina politika Camboya, ani mosu meha woudin Vietnam del Sur. Bián irumu lárigiñe aba ladagarun aban lanarime sandi nuagu, ani mosu meha wagiribudun Merigoun. Sügüti meha saragu dan lubá nareidagun. Dan le nasandiragunbei nungua buidu, ábaya weseriwidun kei prekursorugu.

Lidan ǘrüwa-hati lidan irumu 1965, aba nagumeserun eseriwida kei óunigiruti sirkuitu. Luagu 33 irumu, seriwitina tuma Angie lidan ámuñegueinarügü sirkuitu luma distritu, ani ídehatiwa giñe lidan burí adamurini. Hínsiñeti meha wadagimanu ligía nun saragu, lugundun súnwandan aban lan katei espechaliti adamurini nun. Luagu fiú irumu, abisidahatiwa damuriguaü lidan uburugu Nueva York luma yarafa lun, ani gíbeti meha adamurini wadügün lidan fili táhureragüle bali le gíribei Yankees.

WAGIRIBUDUN BETELIRUGUN LUMA TIDOUN BURÍ LESKUELA HOUN LUBÚEINGU HEOWÁ

Dandu Angie kei au resibitiwa saragu dasi hénrenguti lidan sun burí irumu le. Lidan irumu 1995 aba namisurahóun lun níchugun külase tidan Leskuela to aransehabaliña íbirigu lun aban ministeriu espechaliti.  Ǘrüwa irumu lárigiñe, aba wamisurahóun lun weseriwidun Betelirugu. Lárigiñe 40 irumu, gúndaatina meha luagu nagiribudun Betelirugun, ñein lubéi nagumeserei eseriwiduni espechaliti lidan dan dayarüti. Nadagimeintina luagu fiú dan lidan Departamentu lánina Eseriwidúni luma keisi máisturu tidan burí saragu leskuela. Lidan irumu 2007, aba ladügüni musu úaraguati Departamentu tani Leskuela lun Larufudahóun houn lubúeingu Bungiu lun gayara lan laransehóun tuáguti leskuela burí to adügüboun Betelirugu. Luagu fiú dan, au arihibei lau departamentu ligía.

Gíbeeli katei asansiruti tidan burí leskuela to adügǘboun Betelirugu lidan lagumuhóun burí irumu. Gumesetu Leskuela hountu Wéiyaaña lidan afiñeni lidan irumu 2008. Lidan bián irumu le asigirubei, ñüdüntiña hóugiñe 12,000 wéiyaaña lidan afiñeni tidan leskuela tuguya Patterson luma tidan Beteli Brooklyn. Anuheingua leskuela to ichugúa lidan amu burí fulasu. Lidan irumu 2010, aba lasansirún tiri Leskuela to aransehabaliña íbirigu lun aban ministeriu espechaliti, ani guentó Leskuela kristiánu houn wügüriña mamarieidungiña tíribei, ani gumesetu giñe aban iseri leskuela to gíriboun Leskuela Kristiánu houn Maríeitiña.

Lidan nefu-hati lidan irumu 2014, aba tóundarawagun bián leskuela to lun tadügǘn ábanrügü leskuela to gíriboun Leskuela houn Apurichihatiña Larúeihan Bungiu. Guentó tidan leskuela to gayarati ñein hamá maríeitiña hama mamarieidungiñe dandu wügüriña kei würiña. Lidan sun ubóu, gíbetiña íbirigu agundaarutiña dan le hasubudiruni tichugúba lan giñe leskuela to lidan hageira. Gúndaatiwa lau wasubudiruni gíbetimatiña lan gürigia gayarati houdin tidan leskuela to. Gúndaatina lau nasubudirun saragu íbirigu ha adügübaña asansiruni lidan habagari lun gayara lan houdin tidan leskuela to.

Dan le nasaminarun luagu ida liña lan nibagari lúmagiñe nabadiseirun lidan lidili fulasu ligira darí lumoun guentó, rútina seremei lun Heowá luagu nasubudirun saragu gürigia ha chuti hau. Hagía íderagubalina asubudirei Bungiu buidu ani lun buídutima lan neseriwidun lun. Añahein meha hádangiñe nibureintimagiña nuéi, hama amu ha wéinamuhaña nuéi. Gíbetiña meha lídangiñetiña amu échuni. Gama lumoun arufudati ligaburi hawinwandun nun luagu hínsiñe lan Bungiu houn lau sun hanarün. Gúndaatina luagu gamadagu nan tidan lóundarun Heowá ha chuti hau ani ha gayarati nafurendeirun hámagiñe.

Hínsiñeti nun nasubudirun aturiahatiña ha lídangiñetiña sun ubóu