Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Widü-hati irumu 2016

Álügüdahani burí le hadügübei aliihatiña

Álügüdahani burí le hadügübei aliihatiña

Ka meha uagu weiri lubéi lisudinin houn láganiñu Hesusu hachibuni háhabu?

Anihán aban lídangiñe saragu katei le meha uágubei hayanuhan láganiñu Hesusu wuriba hawagu lani disipulugu. Ariñagati meha lilurudun Moisesi anihein lan katei le adügübei lun wiye lan gürigia ligibugiñe Bungiu. Fiú katei kéiburi lasandirun gürigia lau lépüra, o laguurun lúgubu aban gürigia hilaali o lúgubu aban animaalu hilaali. Ka lunbei meha ladügüni aban gürigia lun larumadun? Ariñagati meha Lúrudu gayarati lan ladügün somu sákürifisiu lánina arumani o achibúni (Fádirigu, kapítulu 11 darí 15; 1 Lúrudu, kapítulu 19).

Fidí hamuti lábutigu relihión huríu halurudun guánarügü lanwoun lilurudun Moisesi. Ariñagatu aban líburu aba lan híchugun lúrudu luagu ida liña lan gayara lan lawiyedun aban gürigia luma ida luba lan lawiyeduniña amu gürigia. Adügatiña meha giñe aban lísüta lau umegeguni le gayarabei haruma lan o wiye lan. Ani aba giñe hadügün somu katei le lunbei hasigiruni gürigia lunya haruma hamá.

Aba hálügüdaguni láganiñu Hesusu: “Ka san uagu mafala habalin bani disipulugu binadu hagaburi wagüchagu, héiginbei lau liwiye háhabu?” (Márükosu 7:5). Mámarügüñein hayanuhan luagu lachibún úhabu. Hayanuhaña meha luagu aban binadu échuni le ñein lubéi meha hésera duna luagu lúhabu gürigia le lunbei leigin. Líburu to uáguboun wayanuha lidan le aban párafu ariñagatu asigeneha hamá meha fariséugu luagu kaba lan burí ágeidinaü ayusurúa, kaba lan luwuyeri duna hayusura, kaba lan éserei luma darí halíaba lan lébeda hachibuni háhabu.

Ka lisaminanbei Hesusu luagun lúrudu burí le hasagahabei gürigia? Ariñagati houn lábutigu relihión huríu: “Linarün profeta Isaíasi, dan le lariñagunbei huagu luagu biangua lan higibu. Lariñahare: ‘Gürigia ha, hayumárurügüñein híchiga inebesei nun, ánhounti hanigi, dísetu nuéi [lidan amu dimurei, luéi Heowá]. Málati háhuduragun nun, ladüga lérügüñein hagumadin wügüriña harufudaha’. [...] Ígira humaali lugumadin Bungiu lun hafalaruni binadu hagaburi binadu gürigia” (Márükosu 7:6-8).