Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Widü-hati irumu 2016

 ABAHÜDAGUNI LUÁGUTI IBAGARI

Ruti níchugun houn amu ugundani nun

Ruti níchugun houn amu ugundani nun

DUUSU meha irumu nau dan le níchugun fe anihein lan aban katei le gayarabei níchuguni houn amu. Aba meha lálügüdünina aban íbiri lidan aban adamurini anhein busén nubéi náfuridun apurichiha luma. Mapurichihánñahagidina meha, íbini ítara, ariñagatina lun náfuriduba lan luma. Dan wachülürünbei lidoun fulasu le ñeinba lubéi wapurichiha, aba líchugun íbiri ligía fiú garüdia to ayanuhaboun luagu Larúeihan Bungiu nun. Ábati lariñagun nun lun napurichihan luéigiñe aban louba üma ligíame apurichiha luéigiñe le aban. Lau anufudei, aba nagumeserun apurichiha tidan burí muna. Lidan murusun oura, aba nederegerunu sun garüdia to númaboun houn gürigia. Furanguti meha busén hamani gürigia le gayaraabei níchuguni houn.

Lidan irumu 1923 nágurahoua, lidan aban fulasu gíriti Chatham, Kent (Inglaterra). Fiú irumu meha lubaragiñe, ligía lagumuchun Furumiñeti Wuribu Wéiriti ani hagurabahaña meha gürigia laranseragun katei ubouagu. Gama lumoun masuseredunti le hagurabubei, adügati lira lun heferidiruni saragu haguraasun. Sandiguatiña giñe nagübürigu houngua ítara. Adügatiña fádirigu bautista lun heferidiruni nagübürigu haguraasun ladüga meha weiri lan háluahan fádirigu ha uéiriguni hóuniwagua. Dan meha le gúnfulihadina kéiburi nefu irumu, aba tagumeserun núguchu abasiha tidan Luban Hadamuridagun gefentiña luagu Heowá. Lidan meha fulasu ligía hadamuridagua gefentiña luagu Heowá lun haturiahanu Bíbülia. Yusu tumutu meha aban íbiri Bíbülia tuma líburu El Arpa de Dios lun tarufudahan houn irahüñü. Wéiriti meha línsiñe le nafurendeirubei nun.

FURENDEITINA SARAGU HÁMAGIÑE ÍBIRIGU DEREBUGUHAÑA

Dan le nibureingidina, hínsiñeti meha nun napurichihan houn gürigia luagu emenigini le tídanbei Bíbülia. Gídidatina meha apurichiha tidan burí muna au nábugua. Ani furendeitina meha saragu dan le napurichihan hama amu íbirigu. Kéiburi dan le nídinbei luma aban íbiri derebuguhali tidan wabeikin lidoun fulasu le ñeinba lubéi wapurichiha. Dan le wásügürünbei yarafa lun aban fádiri, aba nariñagun: “Aningira aban gábara”. Aba lararamunu íbiri lubeikin, aba lariñagun nun busén lan lálügüdünina aban katei. Ábati lálügüdünina: “Kati íchugubei üma bun lun desidírü bani ka lan gábarabei? Gunda wamá lau wapurichihani uganu buiti, ígira waméi aguseragüdüni lúhaburugu Heowá”. Lidoun dan ligía, furendeitina gúndaatima lan le íchugubei sügǘ lau le eresibirubei (Matéu 25:31-33; Adügaü 20:35).

Arufudahati amu íbiri nun anihein lan dan megei lan gürigia gurasu luma awanduni lun gunda lan dan le líchugun. Mínsiñetiña meha Gefentiña tun lani weiriou. Aban weyu, aba lamisurahanina eiga lúbiñe. Safagu tiña meha lani weiriou ladüga furihali lan apurichiha, ábati tagumeserun achamuragua saragu pakü lagei ti wawagun. Magañidunti tuma, apaküharügü lumuti ti ligía hayañu. Aban irumu lárigiñe, ibiha lumuti lafayeiruaha luagu luguraasun lau tabadiseirun lani weiriou keisi gefentu luagu Heowá.

Lidan nefu-hati irumu 1939, aba hagumeserun lílana Gran Bretaña awuribuha hama lílana ageiraü Yámani.  Disisi meha irumu nau. Badiseitina úara tuma núguchu uburugu Dover lidan ǘrüwa-hati, irumu 1940. Lídanmeme irumu ligía, lidan sisi-hati, narihei lúmagiñe tubenari waban ida liña lan tásüühan óunwenbu burí durugu buin hau súdara. Hagía meha erederubaña wínwanñu lídangiñe wuribu le ageindawagubei Dunkerque. Arihúati meha luagu hagibu wuriba lan hasandiragun houngua. Busentina meha nayanuhan houn luagu le lunbei ladügüni Larúeihan Bungiu hawagu gürigia ámuñegü. Irumuméme ligía, aba hagumeserun yámanina awuribuha hama lílana Gran Bretaña. Sagü meha guñoun tariramahan hárumate yámanina lóugiñe fulasu le ñein lubéi wawinwanda. Wéiriti meha anufudei le wasandirubei dan waganbuni tamuri bonba dan le tábürühan. Sagü meha larugadun warihinu saragu muna to günringua wáaruboun. Íderagua lumutina lira lúntima nachoururuni Larúeihanrügüñein lan Bungiu emenigini lubá ámuñegü.

NAYUSURINI NIBAGARI LUN NESERIWIDUN HOUN AMU

Lidan irumu 1941, gumesetina eseriwida lidan dan dayarüti. Ñein nagumesera anüga aban ibagari le adügaalibei lun nagundaarun saragu. Luagu meha aban dan, nadagimeintina meha tidan aban fábürika uburugu Chatham le ñein lubéi larufudahóua tadügǘn waporu nun. Gíbetiña meha gürigia busén hamuti wadagimanu ligía lugundun fáyeiti. Ánhañati lubúeingu Bungiu subudi wamuti meha moun lumuti lan gadan lániwa wuribu. Kéiburi lidoun irumu 1941, gunfuranda wamuti giñe moun lumuti lan hídehan kristiánugu lidan tadaawagún áruma (Huan 18:36). Adaawagúatu meha giñe waporu to éibuguboun lábugiñe barana tidan fábürika to ídanboun nawadigimarida, ligía nígirubalin wadagimanu ligía lun netenirun lun neseriwidun lun Heowá. Cirencester meha liri furumiñeti uburugu le ídounbei nounahóua eseriwida, ma meha lubuidun uburugu ligía ani lumúanruguñein meha fulasu le gíribei Cotswolds.

Dan meha 18 lubéi irumu nau, sügütina 9 hati furisunrugu ladüga numahan nasudarahan. Ma luriban nasandiragun nungua dan le háhuchurunbalin tubenari furisun lun hadaürünu nau ñein nábuguarügü. Gama lumoun, fiu dan lárigiñe, aba hagumeserun súdara hama amu adaürǘtiña álügüdaguana ka lan uagu anaha lubéi ñein. Ma meha lueirin nugundan dan le gayara lan nayanuhan houn luagu nafiñen.

Lárigiñe náfuridun furisunrugúgiñe, apurichihatina lidan saragu lídangiñe uburugu le lídanbei departamentu le gíribei Kent úara luma íbiri Leonard Smith. * Lídangiñetiwa departamentu le biángubei wagía. Lidoun dan ligía, aba hagumeserun yámanina ageindagua hama lílana Alundu. Lun tachülürün awión burí to hóunahaboun yámanina Alundun, mosu meha táhamahan lóugiñe Kent. Lúmagiñe irumu 1944, héiguatu tóugiñe 1,000 bonba luagun departamentu Kent. Awión meha to ídantu ua hamá arünei ani buin tiña tau bonba. Dan meha le waganbun lámanichun tumahina awión, subudi wamaali meha tábürüha lan fiú segundu lárigiñe ani taduucha lan. Aba meha wanufudedagun sun wagía. Lidoun meha dan ligía, wíchuguña meha aturiahani tídangiñeti Bíbülia houn aban feru maríeitiña luma houn  ǘrüwagubei hasaanigu. Anihein meha dan wañuurun lábugiñe aban dábula gürabu le adügǘbei lun gayara lan waramudagun lábugiñe luéidügü tábürühan somu bonba tuagun muna to ñein wabéi. Lau lásügürün dan, badiseitiña súngubei hagía.

NAPURICHIHANI UGANU BUITI LIDAN BURÍ AMU AGEIRAÜ

Awisaha luagu adamurini dan meha neseriwidunbei keisi prekursoru Irlanda (ǘnabu).

Lárigiñe wuribu, seriwitina bián irumu kei prekursoru luagun suru libiti Irlanda. Apurichihatiwa meha ariñageina houn gürigia misionerugu lan wagía, álügüdaha wagía luagu somu fulasu le ñein lumuti gayara lan werederun. Apurichihatiwa meha tau burí garüdia ǘmada. Gama lumoun, mítaranti meha katei Irlanda kei Inglaterra. Gíbetiña meha asaminarutiña libidiounigan lan aau lasaminarúniwa hánharuba lan gürigia lun uganu buiti lidan aban ageiraü le ídanbei katoliku hamá hiibe-agei gürigia. Dan meha le lariñagunbei aban wügüri woun ladügüba lan wuribati woun, aba nidin ariñagei lun aban súdara. Ábati lariñagun súdara ligía nun: “Ma funagia lunti hagurabuni lira?”. Ibidiñeti yebe woun weiri lan habafu fádirigu lidan fulasu ligía. Anhein meha ánhara somu gürigia tun líburu to wederegeruboun lun, aba meha lasagarún lídangiñe luadigimari. Ligía mosu lubéi meha wáfuridun lídangiñe fulasu le ídanbei wawinwanda.

Dan lárigiñe, aba wíchugun fe dan le lan wachülürün lidoun somu fulasu luagu furumiñeti wéiyaasu, buídutima lan wagumeserun apurichiha lidan fulasu le ídanbei ibidiñe wamá lun fádiri. Ligía mosu lubéi meha wagumeserun apurichiha houn gürigia ha awinwandubaña dise luéi fulasu le ídanbei wawinwanda. Lárigiñe, aba wapurichiha houn gürigia ha awinwandubaña yarafa. Aturiahatiwa meha ǘrüwa wéiyaasu luagu dimaasu luma aban nibureinti uburugu Kilkenny. Súnwandan meha wíchugun aturiahani lun lau sun meha siadi hamaniwa sétanu gürigia fásitiña. Kei meha weiri lubéi línsiñe nun narufudahan tídangiñe Bíbülia houn amu, busentina meha nibihin furendei lun neseriwidun keisi misioneru. Ligía nabuinchagüdünbei gárada lun namisurahóun tidoun Leskuela Galaadü to tani Watchtower.

Ugunei meha Sibia wábanboun dan meha le weseriwidunbei keisi misioneru lúmagiñe irumu 1948 darí irumu 1953 (luéigiñe óunwenren).

Amisurahóuatina lun naturiahan luagu seingü hati tidan leskuela to uburugu Nueva York. Lárigiñe neresibihan tídangiñe, ounahóuatina úara hama ǘrüwa íbirigu lidoun burí ubouhu létima ñǘburibei barana Karibe. Lidan unsu-hati irumu 1948, aba wáfayarun Newayorugiñe tidan aban waporu lautu bira gíritu Sibia, 59 ugudi (18 méturu) tueirin. Wéiriti meha nugundan ladüga máfayahanñahagidina meha baranaha. Aban meha arünei le sásaamu haali Gust Maki aban hádangiñe íbirigu ha eresibihabaña úara numa. Arufudahati fiu lídangiñe katei le lunbei ladügǘniwa lidan áfayahani woun, kéiburi látulerawagun bira, lararirawagüdün, ida liña lan layusurún kónpasi luma lafayahóun lubaroun garabali. Abugaha lumutu Gust waporu buidu luagu 30 weyu le waubei áfayaha labadinagua aban lanarime lérouga darí wachülürün lidoun ubouhu burí le gíribei Bahamas.

“ADIMUREHA HUMÁ LIDAN BURÍ KOSU LE DÍSEBURIBEI”

Lárigiñe wapurichihan fiú hati lidan burí ubouhu le gíribei Bahamas, aba wáfayahan lidoun ubouhu burí le gíribei Sotavento luma Barlovento. Dariwati ubouhu burí le labadinagua yarafa lun 500 maili (800 kilómeturu) barana le aniheinbei lúmagiñe ubouhu le gíribei Vírgenes darí le gíribei Trinidad. Séingüñein irumu wau apurichiha lidan burí ubouhu díseti le, le ñein lubéi ua hamá Gefentiña. Anihein meha dan siñá lan wóunahan o weresibirun gárada. Íbini ítara, wéiriti meha wagundan lau wadimurehan luagu Heowá “lidan burí kosu” le burí lídanbei ubouhu (Heremíasi 31:10).

Gádürügubei misionerugu tidan Sibia (agumesereina luéigiñe ubaünaü): Ron Parkin, Dick Ryde, Gust Maki luma Stanley Carter.

Sagü meha wachülürün lidoun aban ubouhu, ábaha hagundaarun lílana, ábatiha hóundaragun luagu wafu lun hasubudiruniwa. Añahein meha hádangiñe marihinñahagiña meha aban ugunei lautu bira kei to wani o aban gürigia haruti. Gamadóuntiña meha gürigia hagía subudihabu hagía tuagu Bíbülia. Ábaha hedewehan úduraü woun, wagadi tuma gagawadi (maní). Lau sun meha ñüraü tan wagune, ñein meha wábougua, warumuga chibá wamóun wadaüragun.

Aba meha wararirun tídangiñe waporu lun wabisidahaniña gürigia sun weyu. Ábaha wariñagun houn lichugúba  lan aban yanu tídangiñeti Bíbülia. Dánhati le laguñeedun, ábaha wadaünrüni raüwa le tídanbei wagune. Ma meha lubuidun warihini hachülürün gürigia. Aba meha ligaburi laríawagun halanpun kei saragu waruguma ararira luéigiñe burí wübü. Anihein meha dan hachülürün kéiburi san gürigia, ábatiha hadaagun saragu álügüdahani woun darí láriebudun. Kei meha weiri lubéi línsiñe houn heremuhan, ábaha wabürüdüni liletüran fiú lídangiñe uremu burí le wayusurubei lun walawahani Heowá lun wíchuguni houn. Wagía, gádürügubei misionerugu, adüga wamuti meha sun wayaraati lun weremuhan buidu. Lárigiñe, aba meha hagumeserun gürigia eremuha wama, ma meha lubuidun hamalali! Ma meha lubuidun dan ligira!

Lárigiñe meha waturiahan, añahein meha hádangiñe gürigia ha aturiahabarun Bíbülia ñǘdüntiña úara wama abisidaha amu iduheñu lun gayara lan hasigirun afurendeira tuagu Bíbülia. Lárigiñe wásügürün fiú dimaasu lidan somu fulasu, mosu meha woudin lidoun amu. Ani liibe-agei dan, amuriahatiwa meha hama aturiahatiña Bíbülia hátima arufudubaña busén hamá hafurendeirun lun hasigirun aturiahoun Bíbülia hama ha híbiri darime wagiribudun. Hingí hamutu meha wanigi lau warihini gúnfuli hamá lau le wamuriahabei hama.

Uguñe weyu, buin liña ubouhu burí le hau asariñahatiña. Anhein méhati lidoun dan ligía, darangilugati meha lidan burí fulasu le. Lagunurügüñein meha le dínguti le bérüdeyumati lidunari ñein, lubuidun burí beya tuma burí tídibu fáluma. Liibe-agei dan, áfayahatiwa meha guñoun lídangiñe aban ubouhu lidoun amu. Áfulihatiña meha sígüri áhurereina touba touba wagune. Lamurirügüñein meha duna dan le tásügürün wagune waganba. Aban meha ligaburi larihíniwa liyawadi Hati ligibuagu duna kei aban émeri lauti pülata wabá wabá.

Lárigiñe seingü irumu apurichiha lidan burí ubouhu, aba woudin Puerto Rico lun wibihin aban waporu to lautu máhina. Dan le wachülürünbei ñein, aba nasubudirun aban misionera magadiñetu gíritu Maxine Boyd... aba tínsiñedun nun! Apurichihatu meha Maxine lau saragu ubebeni lúmagiñe tiñüraü. Seriwitu meha keisi misionera lidan ageiraü Dimaasu darí irumu 1950. Lidan irumu ligía habugoun gumadimatiña katoliku ñéingiñe. Kei meha áfayahati lan tidan aban waporu au, ábanrügüñein meha hati gayara lan nerederun Puerto Rico. Lárigiñe, mósume buga nagiribudun lidoun burí ubouhu luagu fiú irumu. Ábati nariñagun núnguarügü: “Ronald, anhein busén bubaroun würi to, mosu badügüni le lunbei badügüni reiti guentó”. Ǘrüwa dimaasu lárigiñe, aba namuriahan tuma lun tamarieidun numa, sísibei dimaasu lárigiñe, maríeihadiwa. Aba hígiruniwa eseriwida keisi misionerugu ñein Puerto Rico. Ligía mádinun naaru lubéi iseri waporu.

Gumesetina eseriwida keisi óunigiruti sirkuitu lidan irumu 1956. Wéiriti meha línsiñe woun wagía biángubei wabisidahaniña íbirigu. Gudemetiña meha saragu hádangiñe. Kéiburi iduheñu ha meha awinwandubaña lidan aban liraüraü aüdü gíriti Potala Pastillo, biámañanu meha iduheñu Gefentiña ñein ani gíbetiña meha harahüñü. Héchutina meha áfara uremu houn lau nifidun. Hilda meha tiri aban hádangiñe irahüñü ha ñéinbaña, aban weyu, aba nálügüdünu anhein busén tubéi tidin apurichiha wama. Aba tariñagun woun: “Busentina, gama lumoun siñati nidin. Masabaduntina”. Aba wagañeinhan aban feru sabadu tun ábati tidin apurichiha wama. Saragu irumu lárigiñe, aba nidin tuma Maxine ebeluha uburugu Brooklyn lidan irumu 1972. Ñein tabusuragua aban íbiri woun, sun liña meha teresibihan tídangiñe Leskuela Galaadü. Tóunahouña meha eseriwida keisi misionera Ecuadórun. Ábati tariñagun woun: “Bulíei humaadina, adián? Nuguya meha irahü to masabaduboun lidan fulasu le gíribei Pastillo”. Hilda meha! Ma meha lueirin ugundani le wasandirubei darí lun wayahun.

Lidan irumu 1960, aba wagumeserun eseriwida tidan Beteli to Puerto Rícoboun, to meha tídanboun aban tiraüraü muna lidan aban fulasu gíriti Santurce (San Juan). Lidan lagumeseha, áurügüñein meha luma aban íbiri gíriti Lennart Johnson adügei liibe-agei wadagimanu le adügǘbei ñein. Ligía meha tuma lani weiriou ábanbaña hádangiñe furumiñetiña gefentiña luagu Heowá lidan ageiraü Dimaasu. Lídanti irumu 1957, háguya Puerto Ricun. Óunaha tumutu meha Maxine garüdia houn gürigia ha amuriahabarun tídangiñe sukursáli. Óunahatu meha tóugiñe 1,000 sagü dimaasu. Gúndaatu meha lau tuadigimari lugundun saminatu meha hafurendeiruña lan sun gürigia ha luagu Heowá.

Gúndaatina lau nuadigimaridun Betelirugu lugundun ruti chansi nun lun nayusuruni nere lun neseriwidun lun Heowá. Íbini ítara, anihein dan hénrengu lan. Kéiburi dan le mosu lubéi meha naransehani sun katei lubá furumiñeti adamurini hounti lílana amu ageiraü le adügǘbei Puerto Rico lidan irumu 1967. Ibidiñe meha nun kaba lan nadüga. Lidoun dan ligía, aba liabin íbiri Nathan Knorr Puerto Rico. Ligía meha arihibei hau gefentiña luagu Heowá lidoun dan ligía. Adügaadina meha aransehani lun ñein tan ugunei habá misionerugu ha lúnbaña hayabin, gama lumoun laganóun meha lun íbiri Knorr madügün nani ítara. Ábati lererehan nun ariñaga ligía nun adügaadina lan lun lasandiragun lungua wuriba ladüga magunfulirun nan lau le lagurabubei númagiñe. Mabusenruntina meha nasigenehan luma, íbini ítara, sanditina  móuserun lánina lau irichaü. Gáñitina luma íbiri Knorr luagu saragu dan. Íbini ítara, amisuraha lumutina úara tuma nani weiriou eiga luma lirumunrugu danya le waríagunbei woungua fiú dan lárigiñe, ani ligía ábougubei.

Ñǘdüntiwa Inglaterra saragu wéiyaasu abisidahaña niduheñu. Mánharunti meha núguchi lun inarüni le tídanbei Bíbülia dan meha le nánharunbei lun au tuma núguchu. Gama lumoun, amisuraha tumutiña meha núguchu íbirigu ha eseriwidubaña Betelirugu wábiñoun dan meha le hachülürün abisidahei fulasu. Ariha lumuti meha núguchi ǘnabugu hamá íbirigu ha arihibaña tau Beteli. Menegeguagubeitiña meha hama fádirigu ha adügaañabaña lun leferidiruni luguraasun saragu irumu lubaragiñe. Aba labadiseirun lidan irumu 1962.

Tuma Maxine Puerto Rico murusun dan lárigiñe wamarieidun luma lidan irumu 2003 dan le wagunfulirunbei 50 irumu lúmagiñe wamarieidun.

Lidan irumu 2011, aba tounwen nani weiriou. Memeniha nanigi narihinu danme le táguyugun. Adügati nasaminarun luagun lira lun nagundaarun. Lidan sun 58 irumu le waubei maríeiñu, ariha wamuti haganwoundun gefentiña luagu Heowá ha Puerto Rícobaña lúmagiñe kéiburi 650 darí 26,000. Lidan irumu 2013, aba tóundarun sukursáli to Puerto Rícoboun tumoun to Merigaboun. Ábati hamisurahanina eseriwida tidan to lídanboun uburugu Wallkill (Nueva York). Lárigiñe násügürün 60 irumu lidan ubouhu le, sandiguaadina meha nungua kei aban puertoríkuna ítara kei hua to unboun hagúaha coquí, to kamaniboun lidan ubouhu le ani dan le laguñeeduña lan eremuhatu: “kokí, kokí!”. Hésebetina meha Puerto Rico, gama lumoun, chülüti oura lun náguyun lidoun iseri fulasu le ídounbei nounahóua eseriwida.

“HÍNSIÑEHABUTI BUNGIU LUN LE ÍCHUGUBEI LAU UGUNDANI”

Hínsiñememegili nun neseriwidun lun Bungiu Betelirugu. Gúnfulihadina lóugiñe 90 irumu ani níchugun dǘgüdaguaü houn ha híbiri betelina nuadigimaribei. Lúmagiñe nachülürün uburugun Wallkill, íderaguaadina hóugiñe 600 íbirigu. Ñǘbuintiña hádangiñe arihana lun hayanuhan nun luagu haturóbulin dandu hámagua kei hábiñe. Añahein amu, amuriahatiña adundehani numa lun buidu lan lidin houn lidan heseriwidun Betelirugu. Añahein amuriahatiña adundehani ladüga málügili lan lúmagiñe hamarieidun o ladüga ounahóuaaña lan eseriwida keisi prekursorugu. Aganba numutiña sun ha busentiña hadimurehan numa. Anihein dan, aba nariñagun houn: “‘Hínsiñehabuti Bungiu lun le íchugubei lau ugundani’. Ligía lubeiti gundaabá lau buadigimari lugundun lun Heowá badügei” (2 Korintuna 9:7).

Anhein busén wabéi gunda wamá Betelirugu o lidan furumiñeguarügü amu fulasu, mosu waritaguni ka lan uagu súdini lubéi wadagimanu le wadügübei. Sagüráuti sun wadagimanu le wadügübei Betelirugu. Lau wawadigimari, íderagua wamuti “musu úaraguati” íchiga ariñahani le ítarabei kei éigini houn íbirigu ha lídanbaña sun ubóu (Matéu 24:45). Meberesenga halía lan weseriwida lun Heowá, gachansintiwa lun walawahani. Gunda wamá lau wadügüni le lamuriahabei wama, lugundun “hínsiñehabuti Bungiu lun le íchugubei lau ugundani”.

^ par. 13 Abahüdawagúati luagu Leonard Smith tidan Garüdia Awisahatu to lánina 15 lidan gádürü-hati, irumu 2012.