Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Widü-hati irumu 2016

Lisuuni maríei luma lagumeseha

Lisuuni maríei luma lagumeseha

“Lariñaga Wabureme Bungiu: ‘Mabuidunti lun lábuguarügü lan wügüri. Nadüga aban ídemuei lun’” (AGUMESEHANI 2:18).

UREMU 36, 11

1, 2. a) Ida liña lagumeseha maríei? b) Ka gunfuranda lubéi furumiñeti wügüri tuma furumiñetu würi luagu maríei? (Ariha huméi dibuhu le lídanbei lagumeseha arütíkulu).

MARIBANTI lun hamarieidun gürigia. Ida liña lagumeserun maríei, ani ka lisuunibei? Líderagubadiwa wasubudiruni katei le lun warihini maríei luma katei buiti le lanügübei keisi lubudubu. Dan le ladügünbalin Bungiu Adán, aba lariñagun lun lun líchugun hiri sun animaalugu. Aba larihini Adán gouba hamá sun animaalugu, “lau sun lira úati ni aban hádangiñe eseriwiduti ídemueime lun”. Ligía lábürügüdübalin Bungiu Adán lidoun aban idabagu huliliti, aba lasagarun aban lídangiñe luruhure. Lau uruhurei ligía ladügoun Bungiu würi ani aba líchugunu lun Adán lun lánime weiriou. Ítara liña lagumeseha maríei (aliiha huméi Agumesehani 2:20-24). Kei aubei warihei, aban idewesei lúmagiñeti Heowá maríei.

2 Saragu irumu lárigiñe, águyuguagüda lumuti Hesusu dimurei le lariñagubei Heowá lidan fuluri-agei Edén: “Ligía lígirubei lubéi wügüri lúguchi tuma lúguchu lun laganóuniwa tuma lúmari, ábame herederun kei ábanrügü gürigia” (Matéu 19:4, 5). Kei le aba lubéi layusurun Bungiu aban lídangiñe luruhure Adán lun ladügünu Ewa, háfuga gunfuranda hamuti busén lan Heowá lun herederun hámagua lun súnwandan. Mabusenrungubeiti Bungiu lun hígiragun maríeitiña ni lun gibe hama hámarigu.

 ABAN FÁNRENTI LÍDANGIÑE LISUUNI BUNGIU MARÍEI

3. Ka meha lisuunibei Bungiu dan le líchuguni maríei?

3 Gúndaati meha Adán tuma lani weiriou, to unboun lagúara Ewa. Aban meha ídemuei Ewa lun Adán. Mini lan le anihein lan meha igaburi buiti tuagu le úati luagu Adán ani mégeiwati lun buidu lan lidin houn haduheñu. Gúndaabaña yebe hámagua (Agumesehani 2:18). Aban lídangiñe lisuuni maríei lun labuinchagüdüniwa Ubóu hau gürigia (Agumesehani 1:28). Ani lau sun hínsiñebaña lan hagübürigu isaanigu hagía houn, lachülürüba meha dan lun hígiruniña hagübürigu lun hamarieidun ani lun gasaanigu hamá. Habuinchagüdübei meha gürigia Ubóu ani adüga hameime ábame paraísu.

4. Ida liña lidin houn furumiñetiña maríeitiña?

4 Wuribati meha lidin lun Adán tuma Ewa lidan hamarieidun dan le maganbadi hamá lun Heowá. Aba lariñagun Satanási tun Ewa anhoun lan eiga tídangiñe tin tídibu wewe to lánina lasubudirúniwa le buídubei luma le wuribabei, gayarabei lan desidírü tani le buídubei luma le wuribabei. Luagu aban oubaü, aba desidírü tan Ewa teigin tídangiñe tídibu wewe tuguya sin tayanuhan luma tani weiriei. Lau tadügüni lira, tarufuduña mineben lan Adán tun keisi ichügüdinaü. Ánheinti Adán, aba léiginu furuda to tíchuguboun lani weiriou lun. Lau ladügüni lira, aba maganbadi lan lun Bungiu (Arufudúni 12:9; Agumesehani 2:9, 16, 17; 3:1-6).

Lun buidu lan lidin houn maríeitiña, mosu gaganbadi hamá lun Heowá, ani óunaba hagíame luagu le hadügübei

5. Ka wafurendeirubei lídangiñe óunabagülei le líchugubei Adán tuma Ewa lun Heowá?

5 Dan le lálügüdünbaliña Heowá Adán tuma Ewa luagu le hadügübei, aba líchuguni Adán duru tuagun Ewa. Ariñagati: “Würi to bíchuguboun nun lun númarime, tuguya íchuguboun tídangiñe tin wewe tuguya nun, aba néiginu”. Aba giñe tíchuguni Ewa duru tuagun hewe luagu teyeedunu (Agumesehani 3:12, 13). Ma lirun! Aba maganbadi lan Adán tuma Ewa ani aba giñe hebedaagun. Ligía aba lubéi lasiadiruniña Heowá. Ka wafurendeirubei lídangiñe lani Adán tuma Ewa hénpulu? Anhein lan busén habéi maríeitiña lun buidu lan lidin houn, lunti lan gaganbadi hamá lun Heowá ani lunti giñe hóunabun luagu le hadügübei.

6. Ida luba hafuranguagüdüni Agumesehani 3:15?

6 Lau sun le ladügübei Satanási lidan fuluri-agei Edén, adügati Heowá lun hibihin gürigia aban emenigini lubá ámuñegü. Dariwati emenigini ligía lidan furumiñeti profesía le tídanbei Bíbülia, lidan Agumesehani 3:15 (aliiha huméi). Según profesía le, layusurubei meha Heowá ‘tadügawagun’ aban “würi” lun lagumuchun lau Mafia. Añahein bandi ánheligu úaraguatiña sielu ha buíduti hamadagua luma Bungiu. Ligía tariñagunbei Bíbülia ítara haña lan kamá hamuga lani Bungiu weiriou. Lanúadiruba meha Heowá aban hádangiñe lun lagumuchun lau Satanási ani lun hibihini gürigia ha gaganbadibaña le leferidirubei Adán tuma Ewa. Gachansinbaña meha gürigia lun hawinwandun lun súnwandan ubouagu, kei meha labusenruni Heowá lúmagiñe furumiñe (Huan 3:16).

7. Ka asuseredubei lidan maríei lúmagiñebei lebedaagun Adán tuma Ewa? b) Ka gumadi tíchugubei Bíbülia houn maríeitiña?

 7 Barüti hebedaagun Adán tuma Ewa saragu turóbuli houn lidan hamarieidun luma giñe houn maríeitiña ha ñǘbuinbaña hárigiñe. Kéiburi Ewa hama ha híbiri würiña wéiribei meha gáriti le lunbei hawanduni dan le hágurahan. Ani wéiribei meha giñe hemegeirun lun letenirun hani weiriei houn luma lun larufuduni houn hínsiñe hamá lun. Luagu amu oubaü, hagumadirubaña wügüriña maríeitiña hánigu weiriou ani lidan saragu kesi hóuserubaña wuriba, ítara kei warihini uguñe weyu (Agumesehani 3:16). Ariñagati Heowá tidan Bíbülia hawagu wügüriña mosu lan ichügüdinaü hamá ha hínsiñehabutiña ani mosu lan inebe lan lilurudun tani würi weiriei tun (Éfesuna 5:33) (ariha huméi rekuáduru “ Ka mini lubéi?”). Dan le hídehan kristiánugu maríeitiña hámagua, maturóbulintiña saragu.

MARÍEI LÚMAGIÑE LIDAANI ADÁN DARÍ GURAN

8. Afuranguagüda huméi ida liña lan meha maríei lúmagiñe Adán darí Guran.

8 Gasaaniguti meha Adán tuma Ewa lubaragiñe hounwen (Agumesehani 5:4). Kaín meha furumiñetibei hasaani. Maríeiti meha tuma aban würi hádangiñe liduheñu. Ani Lamekü aban hádangiñe ladügawagun Kaín. Según tariñaguni Bíbülia, ligía meha furumiñeti wügüri le biánguabei úmari (Agumesehani 4:17, 19). Lúmagiñe lidaani Adán darí lidaani Noé, fiúrügüñanu meha gürigia áhuduragutiña lun Heowá. Anihán hiri fiú hádangiñe: Aweli, Enoku, luma Noé hau liduheñu. Ariñagatu Bíbülia lidan lan lidaani Noé, aba lan hagumeserun ánheligu arihei “luagu buidu burí hamá würiña”. Ariñagatu giñe Bíbülia aba lan hagumeserun amarieida hama saragu hádangiñe würiña hagía. Kei le moun lumuti lubéi hamarieidun ánheligu hama gürigia, ligía furunde habéi hasaanigu ani wéinamu hagía kei hígandei. Lidan dan ligía, hanarimeti meha “hariban gürigia ha ubouagubaña” ani luágunrügüñein katei wuribati hasaminara gürigia (Agumesehani 6:1-5).

9. a) Ka meha ladügübei Heowá hau gürigia wuribatiña lidan lidaani Noé? b) Ka wafurendeirubei lídangiñe katei le?

9 Óunahati Heowá aban guran ubouagun lun lagumuchun hau sun gürigia wuribatiña. Lubaragiñe lira, apurichihati meha Noé houn lun lawisaruniña luagu le lunbei lasuseredun. Ligía tariñagunbei Bíbülia luagu Noé ‘apurichihati lan houn gafigountiña’ (2 Féduru 2:5). Gama lumoun, madügüntiña meha gürigia hagía gasu lau ladüga beresegutiña adaagua amu katei, kéiburi amarieidagua. Ariñagati meha Hesusu ítara luba lan wadaani kei lidaani Noé (aliiha huméi Matéu 24:37-39). Uguñe weyu, wapurichihaña houn gürigia lun wawisaruniña luagu lagünrinchagubei lan Heowá ubóu wuribati le. Gama lumoun, hibe-agei gürigia madügüntiña gasu wau dan le wanügüni uganu buiti luáguti Larúeihan Bungiu houn. Ka wafurendeirubei lídangiñe le asuseredubei lidan lidaani Guran? Luagu moun lumuti lan wígirun lun ladügün katei kéiburi wamarieidun o gasaanigu wamá lun wabulieiduni yarafaali lan luéyuri Heowá.

MARÍEI LÚMAGIÑE GURAN DARÍ LIDAANI HESUSU

10. a) Ida liña meha harihini lílana saragu néchani agamariduni le kóntürati luma lilurudun Bungiu? b) Ka lubuidun hénpulu líchugubei Abüraámü tuma Sara lidan hamarieidun?

10 Dandu Noé kei ǘrüwa lisaanigu ábanrügüñoun meha lani kada aban hádangiñe  weiriou. Gama lumoun lárigiñe Guran, aba hagibedun wügüriña ha gíbetiña hánigu weiriou. Lidan saragu néchani kamaniti meha hadügün gürigia figóu lánina agamariduni le kóntürati luma lilurudun Bungiu. Ani adüga hamuti lun háhuduragun houn habungiutegu. Dan le meha láguyunbei Abüraámü tuma Sara Kanáun, ariha hamuti adaagua hamá gürigia figóu lánina agamariduni ani mineben lan maríei houn. Ligía lagünrinchagubalin Heowá Sodoma luma Gomora. Mítaranti meha Abüraámü kei gürigia hagía. Aban meha hachügüdina iduheñu le buiti ligía. Ani rutu meha giñe Sara aban lubuidun hénpulu, lugundun inebeti meha tani weiriei tun (aliiha huméi 1 Féduru 3:3-6). Adügati Abüraámü lun lamarieidun Isaakü, le liráü, tuma aban würi to áhuduragutu lun Heowá. Ani ligiaméme giñe ladügübei Isaakü lun Hakobu le liráü. Hadügawagun meha lisaanigu Hakobu lílana 12 lani Ísüraeli türibu.

11. Ida liña meha lóunigiruniña lilurudun Moisesi ísüraelina?

11 Dan lárigiñe, adügati Heowá aban daradu hama ísüraelina. Aba líchuguni lilurudun Moisesi houn, le íderagubaliña lun hóunigiruni hamadagua luma Bungiu. Kei hénpulu, anihein meha lúrudu luáguti échuni lidan maríei, kéiburi le luáguti mamarieidun hamá hama bandi würiña. Anihein meha giñe aban lúrudu le ariñaguti moun lumuti lan hamarieidun hama gürigia ha áhuduragubaña houn amu búngiugu (aliiha huméi 2 Lúrudu 7:3, 4). Anhein meha gaturóbulin habéi bián gürigia maríeitiña, gayarati meha híderaguniña wéiyaaña mutu. Anihein meha giñe lúrudu luáguti múaraguni, emeidini luma luagu lasaminarúniwa wuriba hawagu amu. Ani anihein meha lúrudu lun gayara lan hígiragun maríeitiña ani le óunigirubalin wügüri o würi maríeitu. Kei hénpulu, gayarati meha lígirunu wügüri maríeiti lani weiriou anhein adarira “katei le magundanti lau tuagu” (2 Lúrudu 24:1). Katei burí san katei ligía? Mariñagun tumuti Bíbülia. Gama lumoun, moun lumuti meha lígirunu wügüri maríeiti lani weiriou luágurügü lirahüñü charati (Fádirigu 19:18).

ÚARAGUA WAMÁ LIDAN WAMARIEIDUN SÚNWANDAN

12, 13. a) Ida liña meha hóuseruniña saragu huríu hánigu weiriou lidan lidaani Malakíasi? b) Kaba asusereda anhein agabarahan aban íbiri badiseihali tuma aban gürigia maríeiharu ani aba lamarieidun tuma?

12 Lidan meha lidaani profeta Malakíasi, asagahatiña meha saragu huríu sun luwuyeri katei lun hígiruniña hánigu weiriou. Aba meha hígiruniña lun hamarieidun hama würiña nibureintiña o hama ha máhuduragunbaña lun Heowá. Lidan lidaani Hesusu, adügameme hamagili meha huríu katei le (Matéu 19:3). Iyereeguti meha ígiraguni libe le lun Heowá (aliiha huméi Malakíasi 2:13-16).

13 Uguñe weyu, mosu úaragua hamá lumutuniña Heowá houn gürigia ha úmabaña hamarieida. Gama lumoun, samina wamá lun hamuga léiguadun aban wügüri maríeiti le badiseihali lidoun agabarahani tuma aban gürigia maríeitu ani aba lígiragun tuma lani weiriou lun lamarieidun tuma gürigia tugía. Anhein masakürihan, labugúba lídangiñe damuriguaü (1 Korintuna 5:11-13). Anhein busén lubéi lagiribudun lidoun damuriguaü, mosu larufuduni asakürihaali lan tídangiñe sun lanigi (Lúkasi 3:8; 2 Korintuna 2:5-10). Átiribei san dan ásügürüti lun gayara lan lanharún lun lidan damuriguaü? Úati aban dan iridúati. Gama lumoun gayarati lásügürün aban irumu o lóugiñe darí lun larufuduni gafigounti  asakürihaali lan tídangiñe sun lanigi ani lun lanharúniwa lun lidan damuriguaü. Íbini ítara, lararamuba “ligibugiñe” Bungiu lun lagufeserun (Rómana 14:10-12; ariha humóun garüdia La Atalaya to lánina 15 lidan bián-hati irumu 1980, páhina 29, 30).

MARÍEI HADAN KRISTIÁNUGU

14. Ka meha un hu lan lilurudun Moisesi?

14 Lóugiñe meha 1,500 irumu lau lilurudun Moisesi hama ísüraelina. Íderagua lumutiña lúrudu ligía saragu. Kei hénpulu, ídehati meha lun líchugun adundehani houn lun hasubudiruni ida luba lan haransehani haturóbulin keisi iduheñu. Ídehati giñe lun ladundehaniña lumoun Mesíasi (Galasiana 3:23, 24). Dan le lóunwenbei Hesusu, ñein lagumucha Lúrudu ligía. Ábati ladügün Bungiu ábanya daradu hama lubúeingu (Ebüréu 8:6). Gama lumoun, mígirunti daradu le lun hadügün kristiánugu saragu katei le meha gayarabei hadügüni lábugiñe Lilurudun Moisesi.

15. a) Ka lúrudubei houn maríeitiña lidan damuriguaü kristiánu? b) Lidan ka sügǘ gayara lan hígiragun kristiánugu maríeitiña?

15 Lidan aban ókaasion, aba hálügüdüni fariséugu Hesusu luagu maríei. Aba lariñagun Hesusu houn ígira lan meha Bungiu lun hígiragun maríeitiña lábugiñe lilurudun Moisesi, íbini mama lan ligía lisuunibei Heowá furumiñe (Matéu 19:6-8). Arufuda lumuti le lariñagubei Hesusu lunti lan hafalaruni kristiánugu furumiñeti lúrudu le líchugubei Bungiu luáguti maríei (1 Timotéu 3:2, 12). Kei ítara haba lubéi maríeitiña “kei ábanrügü gürigia”, agurabúati lun herederun hámagua lun súnwandan. Lun lidan hamá aban, mosu hínsiñe lan Heowá houn, hínsiñegua hagíame hámagua. Ánhaña ígiragua bián maríeitiña úouga agabarahani, siñati lamarieidun ni aban hádangiñe luma ni aban gürigia (Matéu 19:9). Gayarati desidírü lan aban maríeiti feruduna lanu lani paaná to achararuboun. Ligía ladügübei profeta Oseasi tuma Gómerü, to lani weiriou. Ani ligiaméme giñe ladügübei Heowá hama ísüraelina ha asakürihabaña (Oseasi 3:1-5). Luagu amu oubaü, ánhaña íchiga gürigia maríeitiña fe hagabarahóuña lan ani aba desidírü hamá harounrun hámagua, mini lan lira ferudunaguaña lan hámagua. Ani úaali resun lun hígiragun.

16. Ka meha lariñagubei Hesusu luagu mamarieiduni?

16 Ariñagati Hesusu dánrügüñein lan ñein lan agabarahani hadan maríeitiña ligíarügüñein gayara lan hígiragun. Lárigiñe aba layanuhan hawagu ha ‘únbaña líchiga Bungiu ubafu lun gayara lan herederun mámariga’ ani aba lariñagun: “Le gabafubei lun magamaridun lan, magamaridalá” (Matéu 19:10-12). Gíbetiña kristiánugu desidírütiña herederun mamarieidunga ladüga busén hamá lun ua lan ni kata adarasahatiña lidan heseriwidun lun Bungiu. Ani lunti wariñagun houn buidu lan hadüga.

17. Kaba íderaguei aban kristiánu lun desidírü lan anhein lamarieiduba lubéi o mamarieidunbei lan?

17 Ka gayarabei líderaguni aban kristiánu lun desidírü lan anhein lamarieiduba lubéi o mamarieidunbei lan? Mosu desidírü lan anhein gabafubei lubéi lun lerederun lábugua. Ariñagati apostolu Pábulu buidu lan mamarieiduni. Ani ariñagati giñe kamani lan hadügün gürigia magíaguni. Ligía lariñagunbei “buítimati [lan] lun wügüri lun lagamaridun, lun giñe tagamaridun würi”. Lárigiñe ábaya lariñagun: “Anhein siñá lubéi hágüdaagun houngua, maríei hamá, ladüga buítimati hamarieidun sügǘ lau hágudun lau ayumahani”. Ligía gayara lubéi desidírü lan  aban kristiánu lamarieidun lun méiguadun lan lidoun agamariduni mamarieidunga o lidoun échuni le mabuidunti. Íbini ítara, ha mamarieidungiñabaña lunti hasaminarun anhein buíduhali lubéi harumudiri lun gayara lan hamarieidun. Ariñagati Pábulu anhein lan lasaminaruña lubéi aban gürigia dánhali lan lun lamarieidun, ani garumudirihali, lun lan lamarieidun (1 Korintuna 7:2, 9, 36TNM; 1 Timotéu 4:1-3). Moun lumuti wínchahan aban nibureinti o nibureintu lun hamarieidun ladügarügü hanarime lan hayumahan hagamaridun ladüga harumudiri. Ka uagu? Ladüga gayaraati mederebugugili lan hasaminan buidu lun hetenirun lun buligasion le lanügübei maríei.

18, 19. a) Kaba uma hamarieida kristiánugu inarünitiña? b) Kaba wakutiha lidan le aban arütíkulu?

18 Lun buidu lan lagumeserun aban maríei, mégeiwati aban wügüri tuma aban würi ha badiseihaña ani hínsiñe ligía Heowá houn tídangiñe sun hanigi. Ani mosu giñe hínsiñegua hamá hámagua darí lun busén hama herederun hámagua lun sun habagari. Labinirubaña Heowá luagu hafalaruni adundehani lun hamarieidun lúmarügü aban gefenti luagu Heowá (1 Korintuna 7:39). Anhein hasigira adügei le tarufudahabei Bíbülia, buídubei lidin houn lidan hamarieidun.

19 Wawinwanduña lidan ‘lagumuhóun dan, ani añahein saragu gürigia magaburi hamuti igaburi burí le mégeiwabei lun buidu lan lidin houn lidan hamarieidun (2 Timotéu 3:1-5). Lidan le aban arütíkulu wakutihaba fiú bérusu tídangiñeti Bíbülia le gayarabei líderaguniña kristiánugu lun gunda hamá lidan hamarieidun íbini gaturóbulin hamá. Líderagubaña katei le lun hasigirun lidan üma le anügübei lidoun ibagari magumuchaditi (Matéu 7:13, 14).