Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Widü-hati irumu 2016

Ida luba buidu lan lidin houn kristiánugu maríeitiña?

Ida luba buidu lan lidin houn kristiánugu maríeitiña?

“Kada [...] aban hídangiñe lunti [...] hínsiñe tan lúmari lun kei línsiñegua lungua, lun giñe inebe lan túmari würi tun” (ÉFESUNA 5:33).

UREMU 18, 3

1. Íbini lau lan saragu ugundani lagumesera maríei, ka gayarabei hagurabuni ha amarieidubaña? (Ariha humóun iyawaü to lídanboun lagumeseha arütíkulu).

AGANWOUNDEINA liña ínsiñeni le hasandirubei gürigia ha gadaradunbaña darí lun desidírü hamá hamarieidun. Dan le lachülürün luéyuri maríei ani aba larihinu wügüri tubuidunraü ladari, aba hagundaarun biángubei hagía. Aba füramase hamá úaraguabaña lan hóuniwagua. Gama lumoun, lárigiñe maríei mosu hadügün asansiruni lun herederun úara. Heowá adügübalin maríei, ani busenti lun gunda hamá sun maríeitiña ani lun buidu lan lidin houn lidan hamarieidun. Ligía líchugunbei adundehani buiti houn tidan Bíbülia (Ariñawagúni 18:22). Íbini ítara, súngubei wagía charatiwa. Ligía tariñagunbei Bíbülia sun lan ha amarieidutiña “ñeinbei lan saragu lénrengunga houn”, lidan amu dimurei, gaturobulinbaña (1 Korintuna 7:28). Ka gayarabei hadügüni maríeitiña lun mibe lan haturóbulin? Ani ka gayarabei hadügüni lun buidu lan lidin houn lidan hamarieidun?

2. Ka burí luwuyeri ínsiñeni lunbei ñein lan hadan maríeitiña?

 2 Arufudahatu Bíbülia aban lan igaburi súdiniti ínsiñeni. Gama lumoun, anihein ámuñegueinarügü luwuyeri ínsiñeni le lunbei harufuduni gürigia maríeitiña hóuniwagua. Kei hénpulu, mosu harufuduni ínsiñeni le lánina umadaguaü luma aban luwuyeri ínsiñeni le hasandirubei sun maríeitiña hawougua. Ani anhein gasaanigu habéi, súdinitimati lun harufuduni ínsiñeni le hasandirubei gürigia hawagu haduheñu. Gama lumoun anihein aban luwuyeri ínsiñeni le súdinitimabei lun buidu lan léibugun katei lidan maríei, ínsiñeni le ñǘbuinbei lídangiñe lafalarún adundehani le tídanbei Bíbülia. Ayanuhati apostolu Pábulu luagu ínsiñeni ligía dan le lariñagun: “Kada [...] aban hídangiñe lunti [...] hínsiñe tan lúmari lun kei línsiñegua lungua, lun giñe inebe lan túmari würi tun” (Éfesuna 5:33).

LANI WÜGÜRI TUMA WÜRI MARÍEITIÑA BULIGASION

3. Darí halíaba lébeda ínsiñeni le hasandirubei maríeitiña hawougua?

3 Abürühati Pábulu: “Hínsiñeta lúmari wügüri lun kei lueirin wínsiñe lun Kristu, [...] aba líchuguni libagari wawagu” (Éfesuna 5:25). Uguñe weyu, falá hamuti kristiánugu lani Hesusu hénpulu lau hínsiñegua hamá houngua kei meha hínsiñe lani Hesusu disipulugu lun (aliiha huméi Huan 13:34, 35; 15:12, 13). Darí halía lébeda ínsiñeni le hasandirubei kristiánugu maríeitiña hawougua? Mosu wéiribei lan ínsiñeni ligía darí lun gayara lan híchuguni habagari tuagu hani weiriou o luagu hani weiriei. Gama lumoun, dan le anihein lan turóbuli le wéinamuti, háfuga hasaminarun saragu maríeitiña manarime lan lere ínsiñeni le hasandirubei. Ka gayarabei líderaguniña? Ínsiñeni le hibihibei lídangiñe haturiahanu Bíbülia. Ka uagu? Ladüga “súfuri lumuti le hínsiñehabubei sun katei; afiñe lumuti sun katei; aguraba lumuti sun katei; ani awanda lumuti giñe sun katei” (1 Korintuna 13:7, 8). Lunti haritaguni maríeitiña füramase hamá luagu hínsiñeguabaña lan hóuniwagua ani úaraguabaña lan hóuniwagua. Línchahabaña katei le lun háluahani lídehan Heowá ani lun hawadigimaridun úara lun haransehan furumiñeguarügü turóbuli.

4, 5. a) Ka lánibei wügüri maríeiti buligasion lidan maríei? b) Ida liña lunti lan tarihini würi maríeitu tidasin lidan maríei? c) Ka asansiruni lunbei meha hadügüni aban feru maríeitiña?

4 Afuranguagüda lumuti Pábulu lani wügüri maríeiti luma tani würi maríeitu buligasion. Ariñagati: “Lunti deregeguñu tan würi tungua lun túmari kei lun Wabureme Hesukrístu, lugundun wügüri tichügüdinabei lúmari ítara kei Kristu lan tichügüdinabei liligilisin” (Éfesuna 5:22, 23). Aban kristiánu maríeiti lunti hínsiñehabu lan kei meha Hesusu, ‘le lichügüdinabei’ damuriguaü. Masaminaruntu würi maríeitu adüga lan lilurudun tani weiriei lun mebegi tan ni kata. Ariñagati Heowá súdini lan tubara würi. Ariñagati: “Mabuidunti lun lábuguarügü lan wügüri. Nadüga aban ídemuei lun” (Agumesehani 2:18). Lunti tíderaguni würi maríeitu tani weiriei lun aban lan ichügüdinaü le buiti. Dan le hínsiñehabu lan kei Hesusu, chóuruti tasandiragun tungua. Ani ménrenguntimati giñe tun inebe lan tun ani íderaguatei lidan le desidírü lubéi.

Ladügǘniwa katei kei aubei lariñagei Heowá adügati lun ñein lan úarani lidan maríei

5 Ariñagatu aban íbiri gíritu Cathy: “Dan le meha mamarieidungidina, adüga numuti le nabusenrun ani góunigiguatina nungua. Gama lumoun, dan le namarieidunbei, mosu meha nafurendeirun ayanuha luma nani weiriei luagu sun katei”. Ariñagatu anihein lan dan hénrengu lan, gama lumoun, dan le lan hadügüni katei kei lariñaguni Heowá ábatima úara hamá lidan sun katei [1] (ariha huméi abürüdǘni  lidan lagumuha arütíkulu). Fred liri tani weiriei ani ariñagati: “Hénrengugubeiñein nun desidírü nan somu katei. Ani hénrengutimati lidan maríei, ladüga mosu basaminarun hawagun bián gürigia. Gama lumoun, eibu lásügürün dan ménrenguntimahali, ladüga amuriahatina ídemuei luma Heowá ani aba naganbuni ka lan tisaminanbei nani weiriou lau duari. Sanditina buidu lan wadügüni katei úara”.

6. Ida liña líchuguni ínsiñeni “sun katei lidan aban” dan le anihein lan turóbuli lidan maríei?

6 Ka hemegeirubei maríeitiña lun here lan hamarieidun? Ariñagatu Bíbülia: “Gaguraasun humá hubaruagua, ferudunagua huguyame húmawagua”. Kei le gafigoun habéi biángubei, dandu wügüri kei würi hachararuba ani gaturobulinbaña. Danme le lasuseredun le, gayarabei hafurendeirun lídangiñe hachara, ani ábame hafurendeirun lun ferudunagua hamá hóuniwagua luma lun harufudun ínsiñeni hóuniwagua. Ínsiñeni ligía “íchugubalin sun katei lidan aban” (Kolosana 3:13, 14). Gayarati harufuduni maríeitiña ínsiñeni le lau gaguraasun hamá ani hínsiñehabu hagíame ani lau máguyuguagüdün hamá “wuribani luagu wuribani” (1 Korintuna 13:4, 5). Lunti háfaagun lun haransehani turóbuli lau lóufudagun, lubaragiñe lálüdün weyu (Éfesuna 4:26, 27). Mégeiwati ǘnabuguni luma ganigi lun wariñagun: “Sarí numuti le nadügübei”. Gama lumoun, ídehati lamuriahóun ferudun lun laransehóun turóbuli ani adügati lúntima hínsiñegua hamá maríeitiña houngua.

SÚDINITI LUN HÓUSERAGUN HOUNGUA LAU ÍNSIÑENI

7, 8. a) Ka adundehani tíchugubei Bíbülia libügürü agamariduni lidan maríei? b) Ka uagu lunti lubéi hóuseragun maríeitiña hóuniwagua lau ínsiñeni?

7 Rutu Bíbülia adundehani buiti lun tíderaguniña maríeitiña lun harihini agamariduni lidan igaburi le richabei (aliiha huméi 1 Korintuna 7:3-5). Lunti gabaroun lani kada aban hádangiñe le lasandirubei luma le lasaminarubei le aban. Anhoun móuserun lan wügüri lani weiriou lau ínsiñeni, gayarabei hénrengu lan tun tasandiruni ugundani le lanügübei tarounrun luma tani weiriei. Ariñagatu Bíbülia: “Huguya giñe wügüriña, áfaagua humá lun gunfuranda humaniña húmarigu” (1 Féduru 3:7). Moun lumuti lafosurunu wügüri maríeiti lani weiriou lun tarounrun luma. Lunti hadügüni dan le busén hamá biángubei hagía. Libe-agei dan, wügüri maríeiti abusenrubei larounrun tuma lani weiriou, ánhounti würi mama súnwandan busén tan. Gama lumoun lunti hadügüni dan le buidu lan hasandiragun biángubei hagía houngua.

8 Mariñagun tumuti Bíbülia ka burí lan katei lunbei hadügüni maríeitiña lun harufudun ínsiñeni hámagua. Gama lumoun arufudahatu lunti lan harufudun ínsiñeni hóuniwagua (Uremu 1:2; 2:6). Kei aubei warihei, lunti hóuseragun kristiánugu maríeitiña houngua lau ínsiñeni.

9. Ka uagu mabuidun lubéi hawamadirun maríeitiña amu gürigia luéi hani weiriei o hani weiriou?

9 Añahein saragu maríeitiña gadei hamaali hamarieidun ladüga héiguadun lidoun échuni lánina taríawagun iyawaü o bidéu lánina agamariduni o ladüga hawamadirun amu gürigia. Mabuidunti katei le, ani lunti wáfaagun  lun méiguadun wamá lidoun. Anhein here lubéi ínsiñeni le wasandirubei luagu Heowá luma hawagu amu gürigia, mígirunbadiwa lun ñein lan somu katei agünrinchaguti wamarieidun. Moun lumuti wadügün lun ñein lan katei le adügüti lun hasaminarun amu wadarihaña lan amu gürigia tuéi wani weiriou. Larufuduñein hamuga lira lilouguan ínsiñeni. Haritagua waméi subudi lani Bungiu ka lan lídanbei wasaminan luma le wadügübei. Ítara luba wederebudagüdüni wayumahan lun wagundaaragüdüni ani úaragua wagíame lun wani weiriei o wani weiriou (aliiha huméi Matéu 5:27, 28; Ebüréu 4:13).

DAN LE ANIHEIN LAN TURÓBULI

10, 11. a) Kamaniti san larihíniwa hafanreinragun maríeitiña uguñe weyu? b) Ka tariñagunbei Bíbülia luagu afanreinraguni? c) Ka gayarabei líderaguniña maríeitiña lun mafuresehan hamá afanreinragua?

10 Añahein gürigia aba desidírü hamá hafanreinragun o hígiragun dan le siñá lan haransehani turóbuli wéinamuti. Lidan fiú ageiraü, lóugiñe hamidan maríeitiña aba hígiragun. Le linarün katei, mama aban turóbuli kamaniti le hadan gefentiña luagu Heowá. Gama lumoun eibu dan gíbetimahaña maríeitiña gefentiña luagu Heowá agagibudagutiña luma turóbuli wéinamuti.

11 Ariñagatu Bíbülia: “Ánhaña ha maríeihañabaña, ariñagatina houn lun mígirun tani würi túmari. Gumadi le, lidan lubudubu mama nugumadin, lugumadin Wabureme. Lau sun lira, anhein tígira würi túmari, lunti terederun mámariga, o tarandarun lan luma túmari. Moun lumuti giñe lígirunu wügüri lúmari” (1 Korintuna 7:10, 11). Añahein maríeitiña saminatiña wéinamuya lan haturóbulin darí lun mosu lan hafanreinragun. Gama lumoun arufuda lumuti Hesusu seriu lan afanreinraguni. Águyuguagüda lumuti le meha lariñagubei Bungiu luagu maríei ani lárigiñe aba lariñagun: “Ligía moun lubéi lafanreinraguni wügüri le ladunraguagüdübei Bungiu” (Matéu 19:3-6; Agumesehani 2:24). Furanguti busén lan Heowá lun herederun maríeitiña hámagua (1 Korintuna 7:39). Súngubei wagía lunti waritaguni laguseragüdübadiwa lan Heowá luagu le wadügübei. Líderagubadiwa katei le lun waransehani waturóbulin lau lóufudagun, lubaragiñe laweiridagun.

Aranseha hamuti kristiánugu maríeitiña haturóbulin ladüga hígirun lun ladundehaniña Bungiu

12. Ka uagu añahein habéi maríeitiña saminatiña hafanreinragun?

12 Ka uagu anihein lubéi turóbuli wéinamuti hadan fiú maríeitiña? Añahein hagía aba hasafaragun o hírudun ladüga mítaran lan hamarieidun kei yebe hagurabuni. Anihein dan, gaturobulintiña ladüga amu lan ligaburi hagüriarúnua o ladüga amu lan ligaburi lóunabun kada aban lun turóbuli. Anihein burí dan gaturobulintiña hama haduheñu, luagu seinsu o luagu ligaburi hagüriahaniña hasaanigu. Gama lumoun buiti lun warihini hibe-agei lan kristiánugu maríeitiña daritiña ida luba lan haransehani haturóbulin ladüga hígirun lun ladundehaniña Bungiu.

13. Ka resun aniheinbei lun hafanreinragun maríeitiña?

13 Gayarati ñein lan resun wéiriti lun hafanreinragun maríeitiña. Añahein afanreinragutiña ladüga turóbuli wéinamuti kéiburi dan le lamahadun wügüri líchuguni hemegeirun liduheñu houn, ladüga lagayuahan tuagu lani  weiriou o dan le lídanñein lan peliguru tumadagua luma Heowá. Dan le anihein lan turóbuli wéinamuti, mosu hamuriahan maríeitiña ídemuei hama wéiyaaña lidan afiñeni. Wéiriti hasubudin wügüriña ha ani gayarati híderaguniña lun hasigiruni ladundehan Bungiu. Ánhaña amuriaha maríeitiña luma Heowá lun líchuguni lani sífiri sandu houn, ménrenguntimabei houn hasigiruni adundehani le tídanbei Bíbülia ani arufuda hagíame igaburi kristiánu (Galasiana 5:22, 23) [2] (ariha huméi abürüdǘni le lídanbei lagumuha arütíkulu).

14. Ka tariñagunbei Bíbülia houn íbirigu ha maríeibaña luma aban gürigia le mama Gefenti?

14 Arufudahatu Bíbülia anihein lan resun buiti lun mafanreinragun hamá maríeitiña ni dan le máhuduragun lan somu hádangiñe lun Heowá (aliiha huméi 1 Korintuna 7:12-14). Le mámabei Gefenti barüwati kei “sandu” ladüga maríei lan tuma aban gürigia o luma aban gürigia le seriwiti lun Heowá. Ani barüwatiña giñe hasaanigu “kei sandu”, ligía aba lubéi letenirun Heowá houn. Ariñagati Pábulu houn kristiánugu: “Kagia basubudirubei, buguya würi, ánheindügü gayara lubéi basalbaruni búmari? O kagia basubudirubei, buguya wügüri, ánheindügü gayara lubéi basalbarunu búmari?” (1 Korintuna 7:16). Anihein saragu hénpulu hani kristiánugu ha íderagua hamaaru hani weiriou o hani weiriei lun aban lan gefenti luagu Heowá.

15, 16. a) Ka adundehani tíchugubei Bíbülia tun würi to maríeiboun luma aban gürigia le meseriwidunti lun Heowá? b) Ida liña gádanti kristiánu anhein desidírü le mámabei kristiánu lafanreinragun?

15 Ariñagati apostolu Féduru houn würiña maríeitiña lun lan inebe hamá hánigu weiriei houn, “gayara láamuga hayabin lun hafiñerun luagu Kristu, luágurügü [housan], láurügüme harihini lubuidun hóuserun lau inebesei luma laruman [ha]gaburi”. Mosu tarufudun würi maríeitu “aban sífiri gálumati” lugundun ligía katei gebegibei ligibugiñe Bungiu. (1 Féduru 3:1-4). Anhein tasigira aban kristiána adundehani le, chóuruti tíderagubei lan tani weiriei lun  aban lan Gefenti, sügǘ lau terederun ayanuha lun luagu tafiñen sun dan.

16 Gama lumoun, kaba asusereda anhein desidírü maríeiti le mámabei Gefenti lafanreinragun? Ariñagatu Bíbülia: “Anhein busén lubéi úmari le mafiñenbei luagu Kristu lun lígirunu lúmari, o würi to mafiñenboun lun tígiruni túmari, ígiragua hamá. Lidan oubaü lira, moun lumuti hafosuruniña ha afiñebaña ha mafiñenbaña lun herederun hama, lugundun wáhali Bungiu woun lun wabagaridun lidan darangilaü” (1 Korintuna 7:15). Kei aubei warihei, moun lumuti lálugun le Gefenti lafosuruni le mámabei Gefenti lun lerederun. Ani íbini barǘ lan afanreinraguni murusun darangilaü múnadoun, ariñagatu Bíbülia siñati lan lamarieidun le Gefenbei luma o tuma amu. Lau lásügürün dan, másiñati desidírü lan le mámabei Gefenti lagiribudun lun laransehani lamarieidun. Ani ámuñegü, gayarabei íbini liabin lun aban lan gefenti luagu Heowá.

KA SÚDINITIMABEI LIDAN ABAN MARÍEI?

Anhein wóunigira wáhuduragun lun Heowá, gúndaatimabadiwa lidan wamarieidun. (Ariha huméi párafu 17).

17. Ka lunbei súdinitima lan houn kristiánugu maríeitiña?

17 Kei wawinwanduña lubéi lidan “lagumuhóun dan”, hénrengutimahali katei ubouagu uguñe weyu (2 Timotéu 3:1-5). Ligía mosu lubéi wóunigiragun woungua lau wakipuruni wamadagua luma Heowá. Ariñagati Pábulu: “Murusunrügaali dan wabá”. Ani lárigiñe aba lariñagun: “Ha maríeibaña” lunti hóuserun “kamá hamuga mamarieiduntiña”, ani “ha gadan lubaña katei lánina ubóu le, lunti habagaridun kamá hamuga madan lumutiña” (1 Korintuna 7:29-31). Mama lariñaguña Pábulu ya lunti lan metenirun lan aban kristiánu lun lamarieidun. Gama lumoun kei le wawinwanduña lubéi lidan lagumuhóun dan, mosu wíchuguni weseriwidun lun Heowá lidan furumiñeti lúgaaru lidan wabagari (Matéu 6:33).

18. Ida luba hagundaarun kristiánugu lidan habagari keisi maríeitiña?

18 Lidan dan hénrenguti le, wuribati lidin houn saragu maríeitiña. Ida liña gayara lan hagundaarun maríeitiña ani lun buidu lan lidin houn lidan hamarieidun? Lau herederun yarafa lun Heowá luma houn lumutuniña, ani lau gaganbadi hamá lun le tariñagubei Bíbülia ani lau hígirun lun ladundehaniña sífiri sandu. Anhein hadüga ítara, harufuduña inebesei luagu “le lóundarubei Bungiu” (Márükosu 10:9).

^ [1] (párafu 5): Sánsiwati iri.

^ [2] (párafu 13): Ariha humóun líburu “Redei humá lidan línsiñehabu Bungiu”, lanwoun ariñahani “Ka tariñagubei Bíbülia luagu ígiraguni luma fánreinguaü?”.