Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Widü-hati irumu 2016

Ariha wamuti san megei wamá warufudahan houn amu?

Ariha wamuti san megei wamá warufudahan houn amu?

“Buiti sun le narufudahabei hun” (ARIÑAWAGÚNI 4:2).

UREMU 50, 1

1, 2. Ka uagu mosu lubéi wíderagun amu lun gayara lan hídehan lidan damuriguaü?

ÁFAAGUATI meha Hesusu lun lapurichihani uganu buiti luagu Larúeihan Bungiu. Gama lumoun, sügüti giñe bandi dan arufudaha houn lani disipulugu. Arufudahati meha houn lun garufudahadi hamá ha buítiña ani lun hetenirun houn lumutuniña Bungiu buidu buidu (Matéu 10:5-7). Wéiriti meha beresegu lan Felipe apurichiha. Gama lumoun arufudahati giñe houn lisaanigu lun gapurichihadi hamá (Adügaü 21:8, 9). Uguñe weyu, lunti giñe warufudahan houn amu. Ka uagu?

2 Lidan burí damuriguaü le lídanbei sun ubóu añahein gürigia ha málügili hafurendeiruni inarüni le tídanbei Bíbülia ani mabadiseirungiña. Mégeitiña gürigia ha lun wíderaguniña. Mosu wíderaguniña lun gunfuranda hamani ka lan uagu buidu lubéi hafurendeirun aliihoun luma aturiahoun Bíbülia hábugua. Mosu giñe warufudahan houn lun hapurichihan ani arufuda hameime uganu luáguti Larúeihan Bungiu. Íbirigu ha málügili habadiseirun mégeitiña larufudahóun houn lun gayarabei lan heseriwidun keisi ídehatiña lidan damuriguaü ani keisi wéiyaaña lidan afiñeni.  Sun lílana damuriguaü gayarati hadügün saragu katei lun híderaguniña iseri íbirigu (Ariñawagúni 4:2).

ARUFUDAHA WAMÁ HOUN HA MÁLÜGIÑABAÑA LIDAN DAMURIGUAÜ LUN HATURIAHANU BÍBÜLIA HÁBUGUARÜGÜ

3, 4. a) Según Pábulu, ida liña úara lan taturiahóun Bíbülia luma apurichihani? b) Lun wínchahaniña amu lun haturiahanu Bíbülia hábuguarügü, ka lunbei wadügüni?

3 Súngubei wagía le eseriwidubei lun Heowá mosu waliihanu Bíbülia ani aturiaha wamounme lun wasubudiruni ka lan lugundanbei Bungiu. Ariñaga lumuti apostolu Pábulu katei le houn íbirigu uburugu Kolosa. Ariñagati houn: “Meredeti wayumuragun lun Bungiu huagu, luma wamuriahan luma lun lasubudiragüdüni lugundan hun buidu”. Ka uagu mosu lubéi meha haliihanu ani aturiaha hamóun kristiánugu hagía Lererun Bungiu? Ladüga líchuguba lan meha katei le lichú au houn, ani líderagubaña giñe lun “hagaburidun keisi lunti lan hagaburidun lánigu Wabureme”. Líderagubaña giñe lun hadügüni “le aubei lagundaara” Heowá, dántima le houdin apurichihei uganu buiti (Kolosana 1:9, 10). Ligíati, danme le wíchugun külase tídangiñeti Bíbülia lun somu gürigia, íderagua wamaña lun gunfuranda hamani líderagubaña lan haliihanu luma haturiahanu Bíbülia súnwandan lun gayara lan heseriwidun lun Heowá.

4 Anhein busén wabéi wínchahaniña gürigia ha aturiahabarun Bíbülia wama lun haturiahanu Lererun Bungiu, mosu giñe wadügüni. Waliihanu Bíbülia sagü weyu ani samina wagíame luagun le waliihabei líderagubadiwa lidan wabagari luma lidan apurichihani. Kéiburi dan le ladügün aban gürigia somu álügüdahani hénrenguti woun, gayarabei wóunabuni tau Bíbülia. O dan le waliihan luagu áfaagua lan Hesusu, Pábulu hama amu lidan apurichihani, aba busén wamá wasigirun apurichiha íbini hénrengu lan. Dan le wabahüdagun houn amu luagu le wafurendeirubei lidan waturiahanu Bíbülia luma ida liña lan líderaguniwa, háfuga busenbaña lan haturiahanu buidu buidu lun hasagarun buiti tídangiñe.

5. Írida humá aban igaburi le ídanbei gayara lan harufudahan lun aturiahati lun léchudun aturiahoun Bíbülia lábuguarügü.

5 Háfuga álügüdagua wamá woungua ida luba lan wíderaguniña gürigia ha aturiahabarun Bíbülia wama lun héchudun aturiahoun Bíbülia. Gayarati warufuduni houn ida luba lan haranseruni ariñahani le lunbei waturiahani. Kei hénpulu, gayarati wamuriahan luma lun láluahani sun bérusu le áfuachubei lidan kada párafu. Anhein waturiahañoun lubéi líburu Kátima san, gayarati wamuriahan luma lun laliihani lanwoun ariñahani le tídanbei líburu.  Lárigiñe, gayarati warufuduni lun ida luba lan laranserun lubá adamuridaguni, gayara láamuga lóunabun lidan. Gayarabei giñe wínchahani lun laliihanu sun Garüdia Awisahatu tuma ¡Despertad! to áfuridutu sagü hati. Ani gayarabei giñe warufudahan lun ida luba lan ladeiruni óunabagülei lun álügüdahani burí tuáguti Bíbülia, háfuga lau programa tani konputadora le gíribei Watchtower Library o Tani Watchtower LÍBURU-AGEI LIDAN INTERNET. Danme le lóuchuni aturiahati Bíbülia igaburi le lun laturiahanu Bíbülia, chóuruti gúndaabei lan ani busenbei lasigirun afurendeira.

6. a) Ida luba híderaguniña gürigia ha aturiahabarun Bíbülia huma lun tínsiñedun Lererun Bungiu houn? b) Ka gayarabei ladügüni aturiahati anhoun ínsiñeda Lererun Bungiu lun?

6 Dan le waturiahanu Bíbülia luma somu gürigia, busentiwa lun líchugun fe gebegi tan Bíbülia saragu ladüga íderagua tumutiwa lun wasubudiruni Heowá buidu. Arufudaha wamá lun aturiahati lun lagundaarun lau laturiahanu Bíbülia, ani mafosura waméi. Éibume laganwoundun lisubudin tuagu Bíbülia, hínsiñetimabei lun laturiahanu. Ábameti lasandiragun lungua kei abürühati sálumu le ariñagubei: “Ánheinti au, nayarafahóuba lun Bungiu, ladüga anihán lubuidun-ágeibei katei nun. Buguya, Nabureme, buguya naramudaguagülebei” (Sálumu 73:28). Chóuruti líderagubei lan sífiri sandu aturiahati le busenbei ladügün umadaguaü luma Bungiu.

ARUFUDAHA WAMÁ HOUN HA MÁLÜGIÑABAÑA LIDAN DAMURIGUAÜ APURICHIHA LUMA ARUFUDAHA HOUN AMU

7. Ida liña meha larufudahan Hesusu houn lani disipulugu lun hapurichihan luagu Larúeihan Bungiu? (Ariha humóun iyawaü to lídanboun lagumeseha arütíkulu).

7 Gayarati wafurendeirun saragu lídangiñe ligaburi larufudahan Hesusu houn apostolugu. Apurichihati meha hama ani ariha hamuti ida liña lan larufudahan houn gürigia. Ruti giñe adundehani furanguti houn luagu apurichihani (Matéu, kapítulu 10) [1] (ariha huméi abürüdǘni lidan lagumuha arütíkulu). Lidan murusun dan, furendeitiña apostolugu arufudahei inarüni luagu Bungiu (Matéu 11:1). Ariha wamá bián katei le gayarabei warufudahani houn iseri íbirigu dan le wapurichihaña lan.

8, 9. a) Ida liña meha layanuhan Hesusu hama gürigia? b) Ida liña gayara lan wíderaguniña iseri apurichihatiña lun hayanuhan hama gürigia, kei meha ladügüni Hesusu?

8 Ayanuha hama gürigia. Mámarügüñein meha houn saragu gürigia lidan aban lapurichiha Hesusu. Arufudahati meha giñe houn gürigia aban aban. Hínsiñehabuti meha súnwandan. Kéiburi dan le layanuhanbei tuma aban würi to ñǘdünboun adabura duna lídangiñe aban fusu yarafa lun uburugu Síkarü (Huan 4:5-30). Lidan amu ókaasion, ayanuhati luma aban aguburahati liseinsuna gumadi gíriti Matéu Lewí. Amisuraha lumuti Hesusu lun lani lan disipulu, ani aba lánharun Matéu. Lárigiñe, aba lagunbirahani wügüri ligía Hesusu hama amu gürigia eiga lúbiñe. Ayanuhati Hesusu hama saragu gürigia lidan ókaasion ligía (Matéu 9:9; Lúkasi 5:27-39).

Ánhawa arufuda ínsiñehabuni luma amu lubuidun igaburi houn gürigia, chóuruti haganbubadiwa lan

9 Ayanuhaali meha aban wügüri gíriti Natanaéli saragu katei mabuidunti hawagu gürigia ha awinwandubaña Nasarétü, le lageira  Hesusu. Íbini ítara, óusera lumuti Hesusu wügüri ligía buidu. Kei resultóu, sansi lumuti Natanaéli ligaburi lisaminan luagun Hesusu ani aba meha busén lan lafurendeirun luagu (Huan 1:46-51). Ka wafurendeirubei lídangiñe lani Hesusu hénpulu? Ánhaña lan wóusera gürigia buidu, ménrenguntimabei haganbuniwa [2] (ariha huméi abürüdǘni lidan lagumuha arütíkulu). Arufudaha wamá houn iseri íbirigu lun hóuseruniña amu gürigia buidu. Ítara luba gúndaatima hamá lidan apurichihani.

10-12. a) Ka meha ladügübei Hesusu lun busentima hamá gürigia hasigirun aganbei uganu? b) Ida luba gayara lan wíderaguniña iseri apurichihatiña lun buídutima lan harufudahani inarüni?

10 Arufudaha houn ha busenbaña haganbun. Bereseguheiti meha Hesusu. Gama lumoun, dan le meha busén hamá gürigia haganbuni, ígirati dan lun larufudahan saragu katei houn. Kei hénpulu, lidan aban ókaasion chülütiña bandi gürigia lárurugun aban lagunu lun haganbuni. Aba ládinun Hesusu luma Féduru tidoun aban guríara ani aba larufudahan houn sun gürigia ñéingiñe. Lárigiñe lira, busenti meha giñe larufudahan aban leksióun lun Féduru. Adügati aban milaguru lau líderaguni adiga saragu úduraü. Lárigiñe aba lariñagun lun: “Lúmagiñe guentó gürigiahañame badíaha”. Ariñagatu Bíbülia aba lan látürün Féduru hama ha úarabaña luma “aban hígiruni sun katei, aba houdin luma Hesusu” keisi lani disipulugu (Lúkasi 5:1-11).

11 Busenti meha giñe aban wügüri gíriti Nikodému laganwoundagüdüni lisubudin luagu Hesusu. Gama lumoun, lídangiñeti meha liñun-agei lúrudu huríu wügüri ligía. Hanufudeti meha luéi le gayarabei hariñaguni amu anhein hariha ayanuha luma Hesusu. Ligía lídinbei áluahei Hesusu guñoun. Resibi lumuti Hesusu lau sun lugundan, ani aba lasagarun dan lun lafuranguagüdün saragu inarüni súdiniti lun (Huan 3:1, 2). Aranseñu liña meha Hesusu súnwandan lun lasagarun dan lun larufudahani inarüni houn gürigia luma lun léredagüdüni hafiñen. Wagía sun, mosu aranseñu wamá lun wagiribudun hábiñoun gürigia lidan aban oura le hínsiñetimabei houn lun wíderaguniña gunfurandoun Bíbülia.

12 Dan le wapurichihan hama iseri íbirigu, gayarati warufudahan houn ida luba lan hadüga lun hagiribudun hábiñoun gürigia ha busentiña hasigirun afurendeira. Gayarati giñe wamisurahaniña lun houdin wama bisidei somu gürigia le ayanuhañahaadiwa luma luma íchiga aturiahani. Ítara luba hafurendeirun arufudaha tuagu Bíbülia ani gúndaabaña giñe lau híderagun amu gürigia asubudirei Heowá. Lárigiñe, hagíañaame ñüdün abisidahaña gürigia lun híchugun aturiahani tídangiñeti Bíbülia houn. Hafurendeiruba giñe arufuda gurasu luma lun mabuchadun lan hawagu furese danme le madarirun hamaniña gürigia hábiñe (Galasiana 5:22) (ariha huméi rekuáduru “ Meferidirun lumuti luguraasun”).

ARUFUDAHA WAMÁ HOUN ISERI ÍBIRIGU LUN HESERIWIDUN HOUN HA HÍBIRI ÍBIRIGU

13, 14. a) Ka wafurendeirubei hawagu lubúeingu Heowá ha adügübaña sákürifisiu hawagu amu? b) Ida luba gayara lan warufudahan houn nibureintiña luma houn iseri íbirigu arufuda ínsiñeni houn amu íbirigu?

13 Busenti Heowá lun hínsiñegua hamá lubúeingu houngua ani íderagua hagíame houngua keisi íbirigu (aliiha huméi Lúkasi 22:24-27 luma 1 Féduru 1:22). Ariñagatu Bíbülia áfaaguati lan meha Hesusu saragu lun líderaguniña gürigia. Darí lun líchuguni libagari wawagu (Matéu 20:28). Hínsiñeti meha tun aban kristiána gíritu Dórukasi tadügün katei  buiti hawagu amu (Adügaü 9:36, 39). Ani ámuya kristiána gíritu María adügatu saragu katei buiti hawagu tíbirigu ha Rómabaña (Rómana 16:6). Ida luba wíderaguniña iseri íbirigu lun gunfuranda hamani súdini lan wadügün katei buiti hawagu íbirigu?

Arufudaha wamá houn iseri íbirigu lun harufudun ínsiñeni houn amu luma lun hadügün katei buiti hawagu. (Ariha huméi párafu 13, 14).

14 Gayarati wamisurahaniña iseri apurichihatiña lun houdin wama abisidahaña íbirigu ha wéiyougaaña hama ha sándibaña. Gayarati hanügüniña agübürigu hasaanigu dan le hadügüni bisida ligía, sagü gayara lan. Gayarati hamuriahan wéiyaaña lidan afiñeni hama nibureintiña lun híderaguniña anüga éigini houn ha wéiyougaaña o lun houdin aranseha somu katei hábiñe. Anhein hariha nibureintiña hama iseri íbirigu góunigigua hamá íbirigu hóuniwagua, hafurendeiruba adügei ligiaméme. Ariha waméi le meha ladügübei aban wéiyaali lidan afiñeni. Dan le meha lapurichihan lidan somu aüdü, aba meha lidin ariha ida haña lan íbirigu ha erederubaña ñein. Seremei lun lani hénpulu, furendeiti aban nibureinti le meha ñǘdünbei luma asaminara ida luba lan líderaguniña íbirigu (Rómana 12:10).

15. Ka uagu súdini lubéi lun hasaminarun wéiyaaña lidan afiñeni luagu hawanserun lílana damuriguaü?

15 Yúsuti Heowá wügüriña lun larufudahani Lererun lun damuriguaü. Ligía súdini lubéi lun hafurendeirun íbirigu arufudaha buidu. Gayarati híderaguniña wéiyaaña lidan afiñeni lun habuiduragüdüni ligaburi harufudahan. Kei hénpulu, gayarati haganbuni aban ídehati lidan damuriguaü dan le lasayahaña lan aban yanu (Neemíasi 8:8) [3] (ariha huméi abürüdǘni lidan lagumuha arütíkulu).

16, 17. a) Ida liña meha larufuduni Pábulu berese lan lau Timotéu lun lafurendeirun buidu? b) Ka lunbei hadügüni wéiyaaña lidan afiñeni lun harufudahan houn ha lúnbaña harihin lau damuriguaü ámuñegü?

16 Mosu larufudahóun houn saragu íbirigu lun hanügüni ubaraü lidan damuriguaü (ariha huméi rekuáduru “ Ka mini lubéi?”). Arufudahati meha Pábulu lun Timotéu ani aba lariñagun lun lun lan larufudahan houn amu. Aba líchuguni adundehani le lun: “Resibibá erei lídangiñe abiniruni le wibihibei lau lídanñadiwa lan aban luma Hesukrístu. Le katei le aganba báalibei nariñagun hagibugiñe saragu gefentiña arufudahabéi houn wügüriña ha afiñewati hawagu, ha gayaraati harufudahani houn amu” (2 Timotéu 2:1, 2). Gíbeti meha katei lafurendeirun Timotéu lúmagiñe Pábulu, aban wéiyaali lidan afiñeni ani apostolu. Arufudahati lun ida luba lan labuiduragüdüni ligaburi lapurichihan luma ida luba lan líderagun amu lidan damuriguaü (2 Timotéu 3:10-12).

17 Sügüti Pábulu saragu dan arufudaha lun Timotéu ladüga busén lan lachoururuni  gabafuhali lan lun ladügüni luadigimari buidu (Adügaü 16:1-5). Ida luba háyeihani wéiyaaña lidan afiñeni lani Pábulu hénpulu? Lau hamisurahaniña fiú ídehatiña lidan damuriguaü dan le hadamuridagun hama íbirigu lun híchugun gurasu houn. Ítara luba hafurendeirun ídehatiña lidan damuriguaü ida luba lan harufudahan houn amu, luma lun gaguraasun hamá ani hínsiñehabu hagíame. Hafurendeiruba giñe áluahei ladundehan Heowá lun hetenirun houn lubúeingu (1 Féduru 5:2).

SÚDINITI LUN HARUFUDAHAN HOUN AMU

18. Ka uagu súdini lubéi warufudahan houn amu lun heseriwidun lun Heowá?

18 Lidan lagumuhóun dan le, gíbetiña iseri apurichihatiña mégeitiña híderawagun lun habuiduragüdüni ligaburi hapurichihan. Ani mégeiwatiña giñe íbirigu lun hafurendeirun ida luba lan hóunigiruniña íbirigu lidan damuriguaü. Busenti Heowá lun hafurendeirun sun lubúeingu ani ru laali chansi woun lun wíderaguniña iseri íbirigu. Ligía mosu lubéi wáfaagun lun warufudahan houn amu, kei meha hadügün Hesusu luma Pábulu. Mosu warufudahan houn sun ha wayaraatiña, lugundun gíbegili katei lunti wadügüni lidan apurichihani lubaragiñe liabin lagumuchagüle ubóu.

19. Ka uagu chouru hubalin buídubei lan resultóu le lunbei lanügüni áfaaguni le hadügübei lun harufudahan houn iseri íbirigu?

19 Mégeiwati dan luma áfaaguni lun larufudahóun houn iseri íbirigu. Gama lumoun, gayarati wachoururuni líderagubadiwa lan Heowá luma Hesusu lun warufudahan houn buidu. Gúndaabadiwa danme warihini háfaagun iseri íbirigu lun hawadigimaridun saragu lidan damuriguaü luma lidan apurichihani (1 Timotéu 4:10). Ani ligibuagun lira, áfaagua wamá lun wawanserun lidan weseriwidun lun Bungiu, lun wabuiduragüdüni wagaburi keisi kristiánugu luma lun buídutima lan wamadagua luma Heowá.

^ [1] (párafu 7): Kei hénpulu, ariñagati meha Hesusu houn lani disipulugu lunti lan hadügüni katei burí le: 1) hapurichihani uganu luáguti Larúeihan Bungiu; 2) hafiñerun luagu líchuguboun lan Heowá daüguaü luma éigini le hemegeirubei houn; 3) lun masigenehan hamá hama gürigia; 4) lun hafiñerun luagu Heowá dan le hasufurirun éibaahouni, ani 5) lun manufudedun hamá luéi le gayarabei hadügüni gürigia houn.

^ [2] (párafu 9): Ariha humóun líburu Benefíciese de la Escuela del Ministerio Teocrático, páhina 62 darí 64. Ñein hadariruba adundehani buiti lun hayanuhan hama gürigia lidan apurichihani.

^ [3] (párafu 15): Ariha humóun líburu Benefíciese de la Escuela del Ministerio Teocrático, páhina 52 darí 61. Hadariruba adundehani buiti ñein lun habuiduragüdüni ligaburi harufudahan lidan damuriguaü.