Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Ǘrüwa-hati irumu 2016

Nadagimein wamá lun ñein lan úarani lidan damuriguaü

Nadagimein wamá lun ñein lan úarani lidan damuriguaü

“Sun wagía le lúgubu Kristu, úaraguatiwa lidan aban lábugiñe lagumadihan Kristu; kada aban wádangiñe gayaraati wíderaguniña ha wíbirigu. Ítara luba gayara lan wawanserun súngubei lidan wéibugun luma Kristu” (ÉFESUNA 4:16).

UREMU 53, 16

1. Ka igaburi aniheinbei hawagu gürigia lúmagiñe furumiñeti dan?

ÑÉINGUBEIÑEIN úarani lúmagiñe lagumeserun sun katei. Lúmagiñe furumiñeti dan nadagimeinti Heowá luma Hesusu lidan úarani. Hesusu ladügübei Heowá furumiñe. Lárigiñe, aba lawadigimaridun Hesusu lóubuagu Heowá keisi aban “nadagimeinti hemeniti” (Ariñawagúni 8:30TNM). Ítarameme, nadagimeingubeiñanu giñe lubúeingu Bungiu úara lun hagunfulirun lau wadagimanu le líchugubei houn. Kei hénpulu, nadagimeinti meha Noé hama liduheñu lun hadügünu árüka. Saragu irumu lárigiñe, nadagimeintiña meha ísüraelina úara lun hadügünu sanduariu, lun haragachagunu luma lun hanügünu lídangiñe aban fulasu lidoun amu dan le haweiyasuhan lidan fulasu mageirawati. Dan le anuheinharu ténpulu, áfaratiña ísüraelina úara ani eremuha hagía lubuidun burí uremu lun halawahani Heowá. Adüga hamaali lubúeingu Bungiu sun katei burí le ladüga lídanñanu lan aban súnwandan ani nadagimeintiña úara (Agumesehani  6:14-16, 22; 1 Lúrudu 4:4-32; 1 Krónikasi 25:1-8).

2. a) Ka hagaburi kristiánugu ha lánina furumiñeti sígulu aweiridagüdübarun wanigi? b) Kaba wariha lidan arütíkulu le?

2 Nadagimeintiña meha giñe furumiñetiña kristiánugu úara, ani wéiritu wanigi luagu katei le. Ariñagati meha apostolu Pábulu ámuñegueinarügüti lan habafu kristiánugu ani rua lan ámuñegueinarügü wadagimanu lun kada aban, gama lumoun lídanñanu lan aban ladüga hafalaruñein lan súngubei hagía Kristu. Konparárü lumutiña meha Pábulu luma lumegegun úgubu, íbini ámuñegueinarügü lan luadigimari kada aban, nadagimeinti lidan aban (aliiha huméi 1 Korintuna 12:4-6, 12). Agia wagía? Ida luba san wakipurun úarani lidan wapurichihan, wadamuridagun luma hadan waduheñu? Warihibei lidan arütíkulu le.

KIPU WAMÁ ÚARANI LIDAN APURICHIHANI

3. Ka meha larihibei Huan lidan aban arufudúni?

3 Lidan aban ókaasion, adügati Heowá lun larihin apostolu Huan sedü ánheligu ínwiroun hafidun. Dan le línwirunbarun haseingün ánheligu lifidun, aba larihin Huan “aban waruguma éiguadutu siélugiñe lun múarugun”. Yúsutu “waruguma” tuguya aban geléin lun tadaaruni lubenari aban óunwenbu huyu wéiriti ani búriti le subudiwabei kei “fusu mébehati”. Ábati láfuridun bandi gumuleli lídangiñe fusu ligía. Ani lídangiñe gumuleli ligía aba háfuridun bandi animaalugu ha gíribaña chagagaru. Gama lumoun, madügüntiña animaalu hagía dañu lun burí tídibu wewe ni lun híduru, houn gürigia ha “úabei liseinin Bungiu hereberugu” hadüga dañu (Arufudúni 9:1-4). Subudi lumuti meha Huan gayarabei lan hadügün chagagaru saragu dañu, kei meha hadügün Ehiptu lidan lidaani Moisesi (Áfuriduni 10:12-15). Sun chagagaru ha meha larihibaña Huan aban meha sínbolu hani kristiánugu anuadirúaaña ha apurichihabaña aban uganu dǘgüdati kóntüra relihión mama inarüniti. Ani resibitiña ídemuei hámagiñe saragu míñunu gürigia ha agurabubaña hawinwandun lun súnwandan ubouagu. Súngubei nadagimeintiña úara lidan wadagimanu le ídehabei lun hesefurun bandi gürigia lídangiñe relihión mama inarüniti luma lábugiñegiñe lubafu Satanási.

Lun gayara lan wapurichihan lidan sun ubóu, mosu lidan wamá aban ani nadagimein wagíame úara

4. a) Ka wadagimanu mósubei hagunfuliruni kristiánugu? b) Ka lunbei wadügüni lun wagunfuliruni?

4 Rúhali Heowá aban óunwenbu wadagimanu woun. Mosu wapurichihani uganu buiti luáguti Larúeihan lidan sun ubóu lubaragiñe liabin lagumuchagüle ubóu (Matéu 24:14; 28:19, 20). Mosu wamisurahaniña sun gürigia ha mágürabubaña lun hatun lídangiñe “duna le íchugubei ibagari”. Lidan amu dimurei, mosu warufudahani inarüni le tídanbei Bíbülia houn sun ha busenbaña hafurendeiruni (Arufudúni 22:17). Lun gayara lan wagunfulirun lau wadagimanu le, mosu lidan wamá aban ani lun wawadigimaridun úara lidan damuriguaü (Éfesuna 4:16).

5, 6. Ka burí katei arufudubalin nadagimein wamá, wagía gefentiña luagu Heowá, úara lun wapurichihan?

 5 Mosu ñein lan aransehani le buiti waganagua lun gayara lan wanügüni uganu houn sun gürigia ha wayaraatiña. Líderagubadiwa adundehani le wibihibei lidan damuriguaü lun gayara lan wagunfuliruni, kéiburi le wibihibei lidan adamuridaguni le lánina apurichihani. Seremei adundehani burí ligía gayarati wapurichihani uganu luáguti Larúeihan Bungiu lidan sun ubóu luma lun wíchugun saragu míñunu agumeiraguagüdüni tídangiñetu Bíbülia houn gürigia. Anihein giñe dan lamuriahóun wama lun gadan lániwa somu wadagimanu espechaliti lánina apurichihani. Dan le wadügüni wadagimanu le, wawadigimariduña úara hama saragu míñunu íbirigu ha giñe anügübalin ligiaméme uganu lidoun sun ubóu. Wawadigimariduña giñe hama ánheligu, ladüga ídehatiña giñe lidan apurichihani (Arufudúni 14:6).

6 Chóuruti gunda wamá saragu dan le waliihan tidan Anuario luagu lawanserun apurichihani lidan sun ubóu. Íderagua lumutiwa giñe adamurini le ǘrüwati weyu lun lidan wamá aban. Sagü irumu, fiú weyu lubaragiñe lagumeserun adamurini, amisuraha wamutiña gürigia lun houdin. Ani lidan adamurini, súngubei wagía aganba wamuti ligiaméme ariñahani. Íderagua lumutiwa yanu, sügǘ burí luma dürama le arufudúbei ñein lúntima wíchuguni le buídutimabei wámagiñe lun Heowá. Íderagua lumutiwa giñe Aritaguagülei le wefeduhabei sagü irumu weyu 14 lidan hati nisán, según kalendariu huríu (1 Korintuna 11:23-26). Saragu dimaasu lubaragiñe wefeduhani, furitiwa amisurahaña sun gürigia ha wadarirun lun hachülürün lidoun adamuridaguni espechaliti ligía. Lárigiñe, súngubei wagía aba wadamuridagun ligiaméme weyu lárigiñe lálüdün Weyu. Ítara liña gaganbadi wamá lun gumadi le líchugubei Hesusu ani aba warufuduni lun Heowá seremei waña lan lun luagu le ladügübei wawagu.

7. Ka burí katei ibiha wamaalibei lau wawadigimaridun súngubei lidan úarani?

7 Aban chagagaru tábugua madügüntu saragu. Ítarameme, siñati giñe wapurichihan lidan sun ubóu wábuguarügü. Gama lumoun, ítara kei chagagaru, nadagimeintiwa úara. Ítara liña gayara lan wachülürün hamoun saragu míñunu gürigia lun wayanuhan houn luagu Heowá luma lun wíderaguniña lun halawahani Heowá ani ru hagíame inebesei lun.

KIPU WAMÁ ÚARANI LIDAN DAMURIGUAÜ

8, 9. a) Ka hénpulu layusurubei Pábulu lun lafuranguagüdüni súdini lan úarani? b) Ka gayarabei wadügüni lun wakipuruni úarani le lídanbei damuriguaü?

8 Afuranguagüda lumuti meha Pábulu houn kristiánugu éfesuna ida liña lan aransehani lidan damuriguaü ani aba lariñagun houn mosu lan “wawanserun lidan sun luwuyeri lidan aban luma Kristu” (aliiha huméi Éfesuna 4:15, 16). Yusu lumuti hénpulu lánina hágubu gürigia lun lafuranguagüdün sun lan kristiánugu gayarati wídehan lun ñein lan úarani lidan damuriguaü ani lun wafalaruni Kristu, le lichügüdinabei úgubu. Ariñagati Pábulu nadagimein lan sun lumegegun úgubu ladüga gáfadaragun lan ani gayarati labaruchagun. Ligíati, meberesenga anhein nibureingidiwa lubéi o wéiyaadiwa lan, anhein buidu lubéi wátuadi o wuriba lan, ka gayarabei wadügüni lun ñein lan úarani lidan damuriguaü?

9 Írida laaña Hesusu wéiyaaña lidan afiñeni lun halidihani damuriguaü. Ani busenti lun inebebaña lan woun ani lun wafalaruni  adundehani le híchugubei woun (Ebüréu 13:7, 17). Furanguti aniheinbei lan dan hénrengu lan. Gama lumoun, ánhawa amuriaha ídemuei luma Heowá, líchugubei lani sífiri sandu woun ani líderagubadiwa lun gaganbadi wamá. Ánhawa gaganbadi ani nadagimei wagíame úara hama wéiyaaña lidan afiñeni, húubadiwa saragu lidan damuriguaü. Lídanbadiwa aban sun wagía ani hínsiñeguatimabadiwa woungua eibu dan.

10. Ida liña lídehan hawadigimari ídehatiña lidan damuriguaü lun ñein lan úarani lidan damuriguaü? (Ariha huméi dibuhu le lídanbei lagumeseha arütíkulu).

10 Ídehatiña giñe ídehatiña lidan damuriguaü akipurei úarani le lídanbei damuriguaü. Áfaaguatiña lun híderaguniña wéiyaaña lidan afiñeni, ani teinki wamutiña luagu ídemuei le híchugubei. Kei hénpulu, áfaaguatiña lun ñein tan agumeiraguagüdüni to buídurügütu lun wapurichihan. Ru hamuti lubuidun achülürüni houn gürigia ha achülürübaña tidoun Luban Adamuridaguni. Nadagimeintiña giñe lidan tarumadahóun luma taransehóun Luban Adamuridaguni. Dan le wíderaguniña íbirigu ha ídehatiwa giñe lun ñein lan úarani lidan damuriguaü luma lun heseriwidun sun íbirigu lun Heowá keisi lubudubu (konparárü huméi luma Adügaü 6:3-6).

11. Ka gayarabei hadügüni nibureintiña lun hídehan lun ñein lan úarani lidan damuriguaü?

11 Añahein wéiyaaña lidan afiñeni ha nadagimeinhaaña luagu saragu irumu lidan damuriguaü. Ani háfuga haweiyaduña lan ani siñá hadügün saragu katei kei meha furumiñe. Ánhaña arufudaha íbirigu ha houn ha nibureingiñabaña, gayarabei híderaguniña lidan saragu katei. Ani ánhaña áfaagua ídehatiña lidan damuriguaü lun hadügüni hawadigimari buidu, lau lásügürün dan gayarabei heseriwidun kei wéiyaaña lidan afiñeni (1 Timotéu 3:1, 10). Añahein fiú wéiyaaña lidan afiñeni ha nibureingiña ani awanseeña saragu darí lun heseriwiduña lan guentó kei óunigirutiña sirkuitu ani híderaguñanu íbirigu lidan saragu damuriguaü. Sun wagía rútiwa seremei luagu añahein lan íbirigu nibureingiña ha busentiña heseriwidun houn amu (aliiha huméi Sálumu 110:3 luma Apurichihati 12:1).

KIPU WAMÁ ÚARANI HADAN WADUHEÑU

12, 13. Ka gayarabei hadügüni iduheñu lun ñein lan úarani hadan?

12 Ka gayarabei hadügüni iduheñu lun lidan hamá aban? Súdiniti lun hadügüni áhuduraguni keisi iduheñu aban wéiyaasu luagu dimaasu. Ánhaña ásügüra agübürigu dan hama hasaanigu afurendeira luagu Heowá, hínsiñeguatimabaña houngua eibu dan. Lidan dan ligía gayarati hasayahani le lunbei hariñaguni lidan apurichihani. Lídehaba le lun aransetima hamá. Dan le hayanuhan iduheñu luagu Heowá ani aba harihini busén hamá sun hagía hadügüni lugundan Heowá, ábatima ñein lan úarani hadan.

Anhein hínsiñe lubéi Heowá houn biángubei maríeitiña, héretimabei hamarieidun ani gúndaabaña

13 Ka gayarabei hadügüni wügüriña hama würiña maríeitiña lun lidan hamá aban? (Matéu 19:6). Anhein hínsiñe lubéi Heowá houn biángubei ani seriwitiña lun úara,  héretimabei hamarieidun ani gúndatimabaña. Súdiniti lun hínsiñegua hamá biángubei hagía houngua ani lun hóuseragun houngua buidu, ítara kei meha Abüraámü tuma Sara, Isaakü tuma Rebeka luma Elikaná tuma Ana (Agumesehani 26:8; 1 Samueli 1:5, 8; 1 Féduru 3:5, 6). Ítara luba lidan hamá aban ani lumadagu hagíame Bungiu (aliiha huméi Apurichihati 4:12).

Gayarati líderaguniña áhuduraguni keisi iduheñu dandu nibureintiña kei wéinamuhaña lun lidan hamá aban. (Ariha huméi párafu 12 luma 15).

14. Anhein meseriwidun lubéi hani weiriei o hani weiriou lun Heowá, ka gayarabei hadügüni lun héredagüdüni hamarieidun?

14 Ariñagatu Bíbülia furangu moun lumuti lan wamarieidun hama gürigia ha meseriwiduntiña lun Heowá (2 Korintuna 6:14). Íbini ítara, añahein íbirigu maríeitiña hama gürigia ha meseriwiduntiña lun Heowá. Ka uagu? Añahein hagía aba gefén hamá luagu Heowá dan le maríeihaña, ani máhati meha hani weiriei o hani weiriou lun inarüni. Añahein amu háfuga aba hamarieidun luma aban gefenti luagu Heowá ani dan lárigiñe aba mámaali lan Gefenti. Anhein ítara liña lubéi gádantiwa, ka gayarabei wadügüni lun wéredagüdüni wamarieidun? Mosu gaganbadi wamá lun adundehani le tídanbei Bíbülia, íbini anihein lan dan hénrengu lan. Ariha waméi le asuseredubei tun Mary luma Dawidi le tani weiriei. Gefentiña meha luagu Heowá biángubei, gama lumoun, sódini aba mídinhali lan Dawidi adamuridagua. Aba táfaagun Mary lun aban tan würi to buitu ani lun tarufudun igaburi kristiánu. Arufudahatu luagu Heowá houn sisi tisaanigu ani mígirun tumuti tadamuridagun. Lau lásügürün dan, aba haweinamudun tisaanigu ani aba houdin múnadagiñe. Hénrengutimahali meha tun Mary teseriwidun lun Heowá tábuguarügü, gama lumoun kíputu úaraguni. Aba burí meha tígirun garüdia lidan saragu fulasu múnada lun larihinu tani weiriei. Luagu aban weyu, aba lagumeserun aliihoun. Lau lásügürün dan, ábaya lagumeserun ñüdün adamuridagua. Gabaritiña meha aban irahü sisi irumu lau le areidubei haláü lubá Dawidi súnwandan. Ani dan le machülü lan Dawidi, aba lariñagun irahü ligía lun: “Náruguti, álugatina bugatia buagu lidan adamuridaguni”. Lárigiñe 25 irumu, ábaya leseriwidun Dawidi lun Heowá.  Guentó, leseriwiduña lun Bungiu úara tuma lani weiriou ani gúndaatiña.

15. Ida liña gayara lan híderaguniña maríeitiña ha wéinamuhaña maríeitiña ha nibureingiñabaña?

15 Lafanreinraguñanu Satanási iduheñu. Ligía mosu lubéi lidan hamá aban maríeitiña ha eseriwidubaña lun Heowá. Meberesenga átiri lan dan hau lúmagiñe hamarieidun lunti hasaminarun ka lan gayarabei hadügüni o hariñaguni lun laganwoundun ínsiñeni le hádanbei. Gayarati híchugun maríeitiña ha wéinamuhaña aban hénpulu buiti houn ha nibureingiñabaña. Háfuga gayarabei hamisurahan aban feru maríeitiña ha nibureingiña lidoun háhuduragun kei iduheñu. Ítara luba gayara lan harihini ha nibureingiñabaña íbini lan lásügürün saragu irumu, lunti lan ñein lan úarani hadan ani lunti lan hasigirun óuseragua houngua lau ínsiñeni (Titu 2:3-7).

“HIGOUGU, WARÍ WAMÁ LUAGUN LUWÜBÜRI WABUREME”

16, 17. Kaba abinirúni wibiha?

16 Dan le meha haweiyasuhan ísüraelina Herusaléun lun hefeduhani hafedun, nadagimeintiña meha sun hagía úara. Aranseha hamuti meha sun le hemegeirubei ani íderagua hagía hóuniwagua lidan wéiyaasu. Dan le meha hachülürün ténpulurugu, aba háhuduragun lun Heowá ani alawaha haméi úara (Lúkasi 2:41-44). Waranseruña lubá wawinwandun lidan iseri ubóu. Ligía súdini lubéi lun giñe lidan wamá aban ani lun wawadigimaridun úara. Anihein san somu katei le gayarabei wadügüni lúntima wíderaguniña wíbirigu?

17 Anihein fánreinguaü hadan gürigia ubouagu ani ageindaguatiña luagu furumiñeguarügü katei. Ánheinti wagía, seremei lídehan Heowá, anihein darangilaü wadan ani gunfuranda wamuti arufudahani le tídanbei Bíbülia. Ma seremei wamuti Heowá luagu katei le? Lidan sun ubóu, huduguatiña lubúeingu Bungiu lun kei aubei labusenra. Ani úaratimatiwa lidan lagumuhóun dan le. Ítara kei lariñaguni profeta Isaíasi luma Mikeasi, sun wagía wawariruña “luagun luwübüri Wabureme” (Isaíasi 2:2-4; aliiha huméi Mikeasi 4:2-4). Ánhawa akipuragua woungua lidan úarani, wibihiba saragu abinirúni. Málühali weyu lun háhuduraguba lan sun gürigia lun Heowá úara.