Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Ǘrüwa-hati irumu 2016

Mégeitiña san wíbirigu wíderaguniña lidan somu katei ani lun wíchugun dǘgüdaguaü houn tau Bíbülia?

Gayarati san hídehan lidan hani damuriguaü?

Gayarati san hídehan lidan hani damuriguaü?

LUBARAGIÑEBEI lagiribudun Hesusu sielun, ariñagati houn lani disipulugu hapurichihaba lan “chülǘ lumoun lidise-agei fulasu ubouagu” (Adügaü 1:8). Ida luba meha san gayara lan hapurichihan lidan sun ubóu?

Ariñagati aban máisturu le nadagimeinbei tidan aban luban furendei íñuti luagu amu hamá kristiánugu ha meha awinwandubaña lidan lidaani hagumadihan rómana hawéi lílana le líbiri relihión, íbini hawéi huríu. Ka meha san uagu amu habéi? Ladüga ñüdün hamá kristiánugu lidan sun fulasu apurichiha houn gürigia. Ani ligía meha ladügübei Hesusu. Ani falá hamuti meha giñe lani disipulugu lani hénpulu. Apurichiha hamuti “uganu le luáguti larúeihan Bungiu” lidan sun fulasu. Áluaha hamutiña meha gürigia ha busenbaña hafurendeiruni inarüni (Lúkasi 4:43). Ligía tariñagunbei Bíbülia añahein lan meha apostolugu, o gürigia ha ‘óunahouabaña’ adüga somu wadagimanu (Márükosu 3:14). Ariñagati meha Hesusu houn lani disipulugu: “Heiba lubeiti habügürü gürigia ha lílana sun fulasu, adüga humaña nánime disipulugu” (Matéu 28:18-20).

Inarüni úaaña lan lani Hesusu apostolugu ya ubouagu, gama lumoun falá hamuti saragu lubúeingu Heowá hani hénpulu. Ida? Lau hánharun lun amisurahani lun houdin ñein lubéi mégeiwa lan ídemuei lun apurichihani. Ariñagatiña: “Anahán, óunahabana” (Isaíasi 6:8). Añaheinhaña fiú águyutiña lidoun burí ageiraü díseti. Ligía hadügübei saragu íbirigu ha ñǘdünhañabaña tidan Leskuela Galaadü. Añahein amu, aba houdin lidoun amu fulasu lidan guánarügü hageira. Ani añahein amu furendeihaña amu iñeñein lun hídehan lidan somu damuriguaü o sétanu. Inarüni hénrengu lan houn fiú hadügüni asansiruni burí le. Gama lumoun, adügatiña íbirigu ha sákürifisiu ladüga línsiñe Heowá houn.  Adügatiña aransehani lau duari ani yusu hamuti hadaani, haseinsun luma here lun houdin apurichiha ñein lumuti hemegeirúa (Lúkasi 14:28-30). Súdiniti wadagimanu le hadügübei.

Furanguti mama lan sun wagía lun gayara lan wafurendeirun aban iseri iñeñein o wáguyun ñeinhin lubéi mégeiwa lan ídemuei lun lapurichihóun. Gama lumoun, sun wagía gayarati ítara wamá kei misioneru lidan guánarügü damuriguaü le ñein wabéi. Ida? Ariha waméi.

ÍTARA WAMÁ KEI MISIONERU LIDAN DAMURIGUAÜ LE ÑEIN WABÉI

Ida luba gayara lan wíderaguniña wíbirigu?

Hibe-agei furumiñetiña kristiánugu mama meha misioneru, lidan guánarügü meha hageira hapurichiha. Ani apurichihatiña meha sun hagía lau ubebeni. Falá hamuti meha adundehani le líchugubei Pábulu lun Timotéu: “Rúguaba bungua lun bapurichihani uganu le lánina asalbaruni, gúnfuliba buidu lau buadigimari” (2 Timotéu 4:5). Wagía, lunti giñe wafalaruni adundehani le. Sun wagía mosu gaganbadi wamá lun gumadi lun wapurichihani uganu luáguti Larúeihan Bungiu ani adüga wagíame disipulugu. Le linarün katei, gíbeti katei gayarati wadügüni lun weseriwidun keisi misioneru íbini lidan damuriguaü le ñein wabéi.

Dan le lidin aban íbiri eseriwida kei misioneru lidan amu ageiraü, mosu léchudun luagu iseri libagari. Anhein wagía háfuga siñati wáguyun lidoun amu fulasu. Gama lumoun, gayarati san wafurendeirun amu luwuyeri apurichihani? Kéiburi lidan irumu 1940 ligía furumiñeti lamuriahóun hama íbirigu lun hapurichihan ǘmadarugu aban weyu luagu dimaasu. Agia wagía, apurichihaadiwa san houn gürigia ha wadarirun ǘmadarugu? Hóuchaadiwa san amu luwuyeri apurichihani, kéiburi lau tarufudaagüle agumeiraguagüdüni?

Lau wínchahaniña lun hapurichihan.

Anhein buidu lubéi wagaburi, wapurichihaba lau ubebeni. Sun íbirigu ha afurendeirubaña amu iñeñein o ha águyubaña lidoun amu fulasu ídehatiña saragu lidan damuriguaü le ñein lubéi heseriwida. Hagía furumiñetiñabaña lidan apurichihani. Gíbetiña misioneru etenirutiña lun damuriguaü darí lun gayara lan hadügüni íbirigu ha lílana fulasu. Anhein aban hubéi wügüri le badiseihali, gayarati san heseriwidun lidan hani damuriguaü keisi ídehati lidan damuriguaü o keisi wéiyaali lidan afiñeni? (1 Timotéu 3:1).

 ÍDERAGUA HUMAÑA ÍBIRIGU ANI RU HUMÁ EREI HOUN

Lau wíchuguni katei burí le hemegeirubei houn.

Anihein amu katei le gayarabei wadügüni lun wídehan lidan damuriguaü. Dandu wügüriña kei würiña, nibureingiña kei wéinamuhaña, súngubei wagía gayarati wídehan lun wíchugun iderebugu houn wíbirigu (Kolosana 4:11).

Mosu wasubudiruniña íbirigu lun gayara lan wíderaguniña. Ariñagatu Bíbülia mosu lan wasaminarun luagun le hemegeirubei wíbirigu dan le woudin adamuridagua (Ebüréu 10:24). Gama lumoun, moun lumuti wádaragun woungua lidoun habagari. Lúnrügüñein wáfaagun lun gunfuranda wamani ida liña lan hasandiragun houngua luma ka lan hemegeirubei. Háfuga mégeitiña wíderaguniña lidan somu katei o lun wíchugun gurasu houn tau Bíbülia. Furanguti anihein lan katei le ídanbei wéiyaañarügüñanu lan lidan afiñeni o ídehatiña lidan damuriguaü gayara hídehan (Galasiana 6:1). Sun wagía gayarati wíderaguniña wíbirigu derebuguhaña o iduheñu ha gaturobulinbaña.

Lau wíderaguniña ha gaturobulinbaña.

Samina wamá luagun aban íbiri gíriti Salvatore. Maseinsunhali meha, darí lun mosu lan laluguruni lani bísinisi, luban luma amu burí katei. Wéiriti meha lidiheri hawagun liduheñu. Lidan damuriguaü aba híchugun ámuya iduheñu fe luagu le gádanbalin. Ábati híchugun somu seinsu lun Salvatore ani aba híderaguni ani íderagua hamóun lani weiriou lun hadarirun wadagimanu. Sügütiña meha saragu weyu aganbei luma íchiga dǘgüdaguaü lun Salvatore hama liduheñu sagü rábounweyu. Aba gamadagua hamá súngubei hagía. Ani guentó haritagua hamuti dan hénrenguti le hásügürübei úara lau saragu ínsiñeni.

Súnwandan aranseñu haña lan kristiánugu inarünitiña lun hapurichihan houn amu. Mosu wafalaruni lani Hesusu hénpulu lun wayanuhan houn sun gürigia luagu lubuidun burí füramasei le ladügübei Bungiu. Añahein ha gayarati háguyun ñeinhin lubéi mégeiwa lan ídemuei. Añahein amu siñati háguyun. Gama lumoun, sun wagía gayarati wáfaagun lun wíderaguniña íbirigu ha lídanbaña damuriguaü le ñein wabéi (Galasiana 6:10). Anhein wadüga katei le, gúndaabadiwa ani wasigiruba arufuda “sun luwuyeri igaburi buiti” (Kolosana 1:10; Adügaü 20:35).