Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Ǘrüwa-hati irumu 2016

Aranseedibu san lun babadiseirun?

Aranseedibu san lun babadiseirun?

“Anhein aritagua aban hídangiñe ladügün aban wáyelesi, mañuurunbei funagia furumiñe asaminara átiribei lan lagastarun lun larihini anhein gabafubei lubéi lun lagumuchuni?” (LÚKASI 14:28).

UREMU 6, 34

Ka mini lubéi ederegeraguni unguaü ani ka uagu amu lubéi luéi badisei?

1, 2. a) Ka agundaaragüdübaliña lubúeingu Bungiu uguñe weyu? b) Ka gayarabei hadügüni agübürigu hama wéiyaaña lidan afiñeni lun gunfuranda hamani nibureintiña ida luba lan habagari danme le badiseihaña?

DUUSU meha irumu lau Christopher ani busenhali meha labadiseirun. Aba lariñagun aban wéiyaali lidan afiñeni lun: “Subudi numutibu lúmagiñe biñüraü. Ani gúndaatina lau busén ban babadiseirun, gama lumoun, busentina nálügüdünibu: ka uagu busén bubéi babadiseirun?”. Garichati meha wéiyaali lidan afiñeni ligía lun lálügüdüni. Gúndaatiwa dan le warihin sagü lan irumu habadiseirun saragu milu nibureintiña (Apurichihati 12:1). Gama lumoun, mosu hachoururuni agübürigu kristiánu hama wéiyaaña lidan afiñeni ka lan uagu busén habéi nibureintiña habadiseirun ani luagu gunfuranda hamani ka lan mini lubéi katei le.

2 Ariñagatu Bíbülia dan le lan lederegeruni aban gürigia libagari lun Heowá ani aba labadiseirun, aba lan lagumeserun aban  iseri ibagari keisi lubúein Bungiu. Mini lan le leresibiruba lan saragu abinirúni lúmagiñe Heowá, gama lumoun, liábinba giñe saragu óuchawaguni lúmagiñe Satanási (Ariñawagúni 10:22; 1 Féduru 5:8). Ligía mosu lubéi hasagarun agübürigu dan lun híderaguniña hasaanigu lun gunfuranda hamani le mini lubéi lani hamá Kristu disipulugu. Ánheinti mama lubéi gefentiña luagu Heowá lagübürigu aban nibureinti? Ábame híderaguni wéiyaaña lidan afiñeni lau ínsiñeni lun gunfuranda lani le mini lubéi ederegeraguni unguaü luma badisei (aliihabéi Lúkasi 14:27-30). Dan le busén lan aban gürigia lábunagun aban muna, mosu laranserun buidu. Ítarameme, anhein busén lubéi aban nibureinti labadiseirun, mosu giñe laranserun buidu. Ítarati, gayarabei úaragua lan lun Heowá “darí lumoun lagumuhóun” (Matéu 24:13). Kaba íderaguaña nibureintiña lun heseriwidun lun Heowá lun súnwandan? Ariha waméi.

3. a) Ka meha lariñagubei Hesusu luma Féduru luagu badisei? (Matéu 28:19, 20; 1 Féduru 3:21). b) Kaba burí álügüdahani wakutiha lidan arütíkulu le? c) Ka uagu súdini lubéi wadügüni álügüdahani burí le wóuniwagua?

3 Nibureingidibu san ani busentibu babadiseirun? Buiti katei le! Aban óunwenbu chansi lúmagiñe Heowá gayara lan babadiseirun lun aban ban Gefenti. Arufudahati Hesusu mosu lan habadiseirun sun kristiánugu. Ani ariñagati apostolu Féduru súdini lan badisei lun gayara lan wesefurun lidan óunwenbu asufuriruni (Matéu 28:19, 20; 1 Féduru 3:21). Lidan arütíkulu le wakutihaba ǘrüwa álügüdahani le lunbei líderagunibu arihei anhein aranseedibu lubéi lun babadiseirun: “Derebuguti san nafiñen? Ka san uagu busén nubéi nabadiseirun? Gunfuranda numuti san ka lan mini lubéi ederegeraguni unguaü lun Heowá?”. Súdiniti lun badügüni álügüdahani burí le búniwagua. Ka uagu? Ladüga danme le babadiseirun, barufudubei füramase háadibu lan lun Heowá beseriwiduba lan lun lun súnwandan. Líderagubadibu álügüdahani burí le lun bagunfulirun lau bani füramasei.

“DEREBUGUTI SAN NAFIÑEN?”

4, 5. a) Ka uagu mama lubéi mosu lagunfulirun aban nibureinti 18 irumu o lóugiñe lubá labadiseirun? b) Ka mini lubéi derebugu lan lisaminan luma lafiñen aban gürigia?

4 Mariñagun tumuti Bíbülia átiribei lan irumu hau gürigia lubá gayara lan habadiseirun. Ariñagati Ariñawagúni 20:11: “Luagu ligaburi hóuserun nibureintiña lasubudirúa anhein lídanñanu lubéi ísuruni”. Ligíati, íbini aban irahü le aweirideinati gayarati lasubudiruni le buídubei lumoun le wuribabei, ani gunfurandaleime le mini lubéi ederegeraguni unguaü lun Heowá. Ligíati, anhein arufuda aban nibureinti luagu gayara lan desidírü lan buidu ani deregeguaali lungua lun Heowá, buiti lun labadiseirun (Ariñawagúni 20:7).

5 Ka mini lubéi derebugu lan lisaminan luma lafiñen aban gürigia? Mama mosu  aban lan gürigia le gúnfulihali 18 irumu o lóugiñe. Según tariñaguni Bíbülia, hagía gürigia ha “subudihabúbaña tun Lererun Bungiu buidu, subudi haméi [...] le buídubei lumoun le wuribabei” (Ebüréu 5:14) (arihabéi rekuáduru “Ka mini lubéi?”). Mini lan wasubudiruni le buídubei ani busén wagíame wadügüni tídangiñe sun wanigi. Aban gürigia le derebuguti lafiñen áfaaguati lun méiguadun lan lidoun óuchawaguni ani memegeirunti lun ñein lan aban gürigia ariñagei lun lun ladügüni le buídubei. Ánhabu abadiseira, agurabúati lun gabafu ban lun badügüni le buídubei íbini danme le marihin hamanibu bagübürigu ni amu gürigia (konparárü huméi luma Filipuna 2:12).

6, 7. a) Ka burí óuchawaguni úmabei lagagibudagua Danieli Babilónia? b) Ida liña meha larufudun Danieli aban afiñeni derebuguti?

6 Gayarati san larufudun aban nibureinti derebuguhali lan lidan lafiñen? Samina humá luagun aban lubúein Bungiu gíriti Danieli. Háfuga ábanrügügili lan meha nibureinti le aweirideinati dan le lanügǘnbei uburugun Babilónia lábuguarügü sin lagübürigu. Gagibuguati luma saragu óuchawaguni ñein. Haganaguañein meha gürigia ha maganbaditiña lun Bungiu. Ani aba giñe hagumeserun óuserei kei aban gürigia espechaliti. Darí lun ligía lan aban hádangiñe nibureintiña ha anuadirúbaña lun heseriwidun lun urúei (Danieli 1:3-5, 13). Genegeti meha gayara lan buídutima lan lawinwandun Danieli Babilónia sügǘ lau Ísüraeli.

7 Gama lumoun, ráramati Danieli lun óuchawaguni burí ligía lau lichú aau. Ida liña ladügüni? Mígirunti lun hadügün babilóniana lun lasansirun lisaminan o lun maganbadi lan lun Heowá. Ariñagatu Bíbülia desidírühali lan meha Danieli lun ‘mawiyedagun  lan lungua’. Lidan amu dimurei, desidírühali meha mádaragun lan lungua lidoun ni kata le lídangiñeti relihión mama inarüniti (Danieli 1:8). Ítara liña meha larufuduni derebugu lan lafiñen.

Nibureintiña ha derebuguti hafiñen móuseruntiña kei lumadagu Bungiu tidan luban adamuridaguni ani kei lumadagu ubóu leskuelarugu. (Arihabéi párafu 8).

8. Ka gayarabei bafurendeiruni lídangiñe lani Danieli hénpulu?

8 Ka gayarabei bafurendeiruni lídangiñe lani Danieli hénpulu? Anhein lan aban bubéi nibureinti le derebuguti lafiñen, mosu gaganbadi ban lun Heowá íbini lidan lénrengunga. Siñati ítara ban kei aban animaalu gíriti kamalión, sansi lumuti animaalu ligía likolorun lun aban lan larihín kei katei le geyegubei lau. Siñati bóuserun kei aban lumada Bungiu tidan luban adamuridaguni ani bóuserame kei lumada ubóu leskuelarugu. Lubaragiñe lira, mosu úaragua ban lun Bungiu íbini danme lidan ban lénrengunga (aliihabéi Éfesuna 4:14, 15).

Anhein aban bubéi nibureinti le derebuguti, gaganbadibadibu lun Heowá íbini lidan lénrengunga

9, 10. a) Ka uagu mosu lubéi basaminarun ida liña lan bóunabun dan le lagumuhóun bagagibudagun luma óuchawaguni? b) Ka san badiseibei?

9 Súngubei wagía charatiwa, dandu nibureingiña kei wéinamuhaña (Apurichihati 7:20). Gama lumoun, anhein busén bubéi babadiseirun, mosu bálügüdagun bungua anhein inarüni lubéi desidírühadibu lan badügüni le labusenrubei Heowá súnwandan. Barühadibu san fiú dan arufudei gaganbadi ban lun Heowá? Saminabá ida liña lan bóunabun dan le lagumuhóunbei bagagibudagun luma óuchawaguni. Gabafutibu san lun desidírü ban badügüni le buídubei lidan ókaasion ligía? O háfuga lídanñadibu lan aban sügǘ libe le meha lásügürübei Danieli. Háfuga lariñawagún bun lun lan bayusuruni lichú bau lun bibihin aban ibagari buiti lidan ubóu le. Dan le bagagibudagun luma óuchawaguni libe burí le, gabafutibu san lun gunfuranda bani ka lan labusenrubei Heowá lun badügüni? (Éfesuna 5:17).

10 Súdiniti lun badügüni álügüdahani burí le búniwagua ladüga líderagubadibu arihei weiri lan liseriun badisei. Ítara liña barufuduni houn amu füramase háadibu lan lun Heowá hínsiñebei lan bun ani beseriwiduba lan lun tau sun banigi lun súnwandan (Márükosu 12:30). Sun le abadiseiruti mosu desidírü lan lagunfulirun lau füramasei le ladügübei lun Heowá (aliihabéi Apurichihati 5:4, 5).

“KA SAN UAGU BUSÉN NUBÉI NABADISEIRUN?”

11, 12. a) Anhein basaminaruña lubéi babadiseirun, ka lunbei bachoururuni? b) Kaba íderaguabu lun barihini badisei kei larihini Heowá?

11 Ariñagatu Bíbülia heseriwiduba lan lubúeingu Bungiu lun “lau sun hagundan”, íbini nibureintiña (Sálumu 110:3TNM). Ligíati, anhein basaminaruña lubéi babadiseirun, mosu bachoururuni badügüñein lan ladüga ligía lan babusenrubei. Súdiniti katei le dántima haganagua lan biduheñu gefentiña luagu Heowá bagüriara.

12 Dan le aweirideina ban chóuruti ariha ban habadiseirun fiú gürigia. Háfuga badiseihaña fiú bumadagu o bíbirigu. Gama lumoun, lunti duari ban. Masaminarabá  mosu lan babadiseirun ladügarügü wéiriadibu lan o ladüga habadiseirun amu. Kaba íderaguabu lun barihini badisei kei larihini Heowá? Ígiraba dan lun basaminarun ka lan uagu súdini lubéi badisei. Badariruba buiti resun lidan arütíkulu le luma lidan le aban.

13. Ida luba basubudiruni anhein inarüni lubéi busén ban babadiseirun?

13 Ida luba basubudiruni richati lan resun le uágubei babusenra babadiseirun? Furumiñe mosu bakutihani furíei le badügübei. Álügüdaguaba bungua: “Furíeitina san lun Heowá saragu wéiyaasu o murusunrügüñein? Ayanuhatina san lun furangu o luágurügüñein katei le úati súdini lan nayanuha lun?”. Líderagubadibu le lun barihini anhein buidu lubéi bumadagua luma Bungiu (Sálumu 25:4). Anihein dan óunaba lani Heowá furíei tidan Bíbülia. Ligíati, lun bachoururuni anhein buidu lubéi resun le uágubei babusenra babadiseirun mosu bakutihani ligaburi baturiahanu Bíbülia (Hosué 1:8). Álügüdaguaba bungua: “Héchutina san aturiahoun Bíbülia aban wéiyaasu lidan dimaasu? Hínsiñeti san nun lun lidan nan áhuduraguni keisi iduheñu?”. Líderagubadibu álügüdahani burí le lun barihini anhein richá lubéi resun le uágubei babusenra babadiseirun, lidan amu dimurei, lun barihini anhein badügüñein lubéi ladüga desidírühadibu lan lumada ban Heowá ani lun beseriwidun lun tau sun banigi.

“LE MINI LUBÉI EDEREGERAGUNI UNGUAÜ LUN HEOWÁ”

14. Ka ederegeragunibei unguaü lun Bungiu ani ka badiseibei?

14 Añahein nibureintiña ariñagutiña deregeguaaña lan houngua lun Heowá, ani maranserungiña lan lun habadiseirun. Gama lumoun, siñati lasuseredun le. Le linarün katei, úati gunfuranda hamani nibureintiña hagía ida liña lan amu lan ederegeraguni unguaü lun Heowá luéi badiseibei. Mini lan ederegeraguni unguaü aban furíei le ídanbei füramase lan gürigia lun Heowá leseriwiduba lan lun súnwandan. Lárigiñe, aba babadiseirun lun hasubudiruni sun gürigia derege baali lan bibagari lun Heowá. Ligíati, lubaragiñe babadiseirun mégeitibu gunfuranda bani buidu ka lan mini lubéi ederegeraguni unguaü lun Bungiu.

15. Ka mini lubéi ederegeraguni unguaü lun Bungiu?

15 Dan le bederegeragun bungua lun Heowá, bariñaguña lun bayusurubei lan bibagari lun beseriwidun lun. Dan le bederegeragun bungua badügüña aban füramasei lun Bungiu le ídanbei bariñaga lun úabei lan amu katei súdinitimati bun luéi beseriwidun lun (aliihabéi Matéu 16:24). Ligía weiri lubéi lisudinin badisei (Matéu 5:33). Ida luba barufuduni subudi bani lánihali lan Bungiu bibagari? (Rómana 14:8TNM).

16, 17. a) Afuranguagüdabei lau aban hénpulu ida luba lan barufuduni mámaali lan bun yu lan bibagari. b) Dan le lederegeruni aban gürigia libagari lun Heowá, ka lariñagubei lun?

16 Ida luba barufuduni mámaali lan bun yu lan bibagari? Saminabá luagun hénpulu le. Saminabá aba lan ledewehan aban bumada aban karü bun. Aba líchugunu tigaradan karü bun ani aba lariñagun bun bániharu lan. Lárigiñe aba lariñagun bun lúmabei lan gelein ani ligíarügübei lan abugahoun. Bariñaguña hamuga san edeweha laaru lan bun? O lánimemegiru karü tuguya?

17 Dan le lederegeruni aban gürigia libagari lun Bungiu, lariñaguña lun: “Bánihali nibagari”. Ani garichati Heowá lun lagurabahan  lagunfulirubei lan gürigia ligía lani füramasei. Gama lumoun, saminabá aba lan lagumeserun gürigia ligía áfurida aramudaguarügü tuma aban gürigia to meseriwiduntu lun Heowá. O aba lan lánharun lun aban wadagimanu le lóuguati lígirun dan lun lun láfuridun apurichiha o lun ladamuridagun. Mama hamuga lagunfuliruña gürigia ligía lau füramasei le ladügübei lun Bungiu. Ítara liña hamuga kei umadaü le erederubei lau tigelein karü. Ligíati, ánhabu ariñaga lun Heowá lánihali lan bibagari, mosu badügüni le lariñagubei súnwandan, íbini aniheinbei lan dan mabusenrun ban badügüni. Mosu wóuserun kei meha Hesusu. Ariñagati: “Mama niábiña siélugiñe lun nadügüni nugundan; niábiña lun nadügüni lugundan le óunahabalina” (Huan 6:38).

Aban katei sériuti badisei ani aban giñe lubuidun chansi

18, 19. a) Ka tariñagubei Rose luma Christopher luagu badisei? b) Ka basaminarubei luagun badisei?

18 Chóuruti aban lan katei sériuti badisei. Aban óunwenbu chansi gayara lan wederegeragun woungua lun Heowá ani badisei wagía. Anhein hínsiñe lubéi Heowá bun ani gunfuranda bumuti le mini lubéi ederegeraguni unguaü, chóuruti babadiseiruba lan. Ani masakürihanbadibu lárigiñe. Ariñagatu aban nibureintu gíritu Rose: “Hínsiñeti Heowá nun ani úati amu katei íchuguti saragu ugundani nun kei neseriwidun lun. Dan le desidírü nubéi nabadiseirun, chouru numuti meha ligía lan nabusenrubei nadügün”.

19 Lidan furumiñeti párafu ayanuhatiwa luagu aban nibureinti gíriti Christopher. Badiseiti dan le 12 lubéi irumu lau. Ida liña san lasandiragun lungua guentó? Ariñagati gunda lan. Dan le 17 lubéi irumu lau aba leseriwidun kei prekursoru le adügübei 70 oura, lau 18 irumu aba liridún kei ídehati lidan damuriguaü. Guentó anihein Betelirugu. Ariñagati: “Buiti meha desidírü nan nabadiseirun. Nawadigimariduña lun Heowá luma tun lóundarun, ani úati ugundani wéiritimati”. Agia buguya? Basaminaruña san babadiseirun? Anhein ítara liña lubéi, ida luba gayara lan baranserun? Warihibei lidan le aban arütíkulu.