Keimon lidoun ariñahani

Keimon lidoun tila

Luéigiñe wamá lóubadina liricha Heowá lun larúeihan

Luéigiñe wamá lóubadina liricha Heowá lun larúeihan

“Wabureme, Wabungiute, garichatibu lun beresibiruni uéiriguni, inebesei, luma ubafu, ladüga buguya adügübalin sun katei” (ARUF. 4:11).

UREMU: 2, 49

1, 2. Ka katei lunbei wachoururuni? (Ariha huméi dibuhu le lídanbei lagumeseha arütíkulu).

KEI warihini lidan arütíkulu le lubaragiñebei le, ariñagati Mafia lau ichouruni maricha lan Heowá lun larúeihan ani buídutimabei lan hamuga lidin houn gürigia ánhaña agumadiragua houngua. Inarüni san katei le? Samina wamá lun hamuga hawinwandun gürigia ha desidírübaña hagía lan agumadiragua houngua lun súnwandan. Buídutimabei hamuga san lidin houn lun hamuga Bungiu lan agumadiha? Saminatün san gúndaatimabadün lan hamuga lun hamuga gayara lan hadügüni sun le habusenrun ani winwan hugía lun súnwandan?

2 Siñati lóunabun amu gürigia huagu. Sun wagía lunti wasaminarun buidu luagun katei le. Lunti wachoururuni luagu Bungiu lan garichabei lun lagumadihan ani larúeihan lan buídutimabei ani lunti lan wíchuguni wídehan lun. Rutu Bíbülia resun buiti woun lun wachoururuni katei le. Kei hénpulu, ariha waméi le tariñagubei woun luagu liricha Heowá lun larúeihan.

GARICHATI HEOWÁ LUN LARÚEIHAN

3. Ka uagu Heowárügüñein lubéi garicha lun larúeihan?

3 Heowárügüñein garicha lun larúeihan, ladüga ligía Búngiubei le suntigabafu ani le adügübalin sun katei (1 Kro. 29:11; Adü. 4:24). Lidan aban arufudúni, ariñagatiña 144,000 ha lúnbaña  hagumadihan luma Kristu: “Wabureme, Wabungiute, garichatibu lun beresibiruni uéiriguni, inebesei, luma ubafu, ladüga buguya adügübalin sun katei; lau bugundan badügei, lau giñe bugundan anihein lubéi sun le aniheinbei” (Aruf. 4:11). Heowá adügübalin sun katei, ligía garicha lubéi lun ligía lan harúeite gürigia hama ánheligu.

4. Ka uagu wayusuruñein lubéi chansi le wibihibei lun wanúadahan wuriba dan le webedaagun lun liricha Heowá lun larúeihan?

4 Marichati Satanási lun lagumadihan ladüga madügünti ni kata. Dan le lebedaagunbei lun liricha Heowá lun larúeihan úara hama furumiñetiña wagübürigu, óuseratiña lau lanarime íñuguni (Her. 10:23). Inarüni líbüretiña lan meha lun hanúadahan ani ligía gayara lubéi meha desidírü hamá hadisedun luéi Bungiu, gama lumoun, garichatiña meha san lun hadügüni? Uá. Ruti líbürei le chansi woun lun desidírü wamá buidu sagü weyu, gama lumoun, míchuti lúgaaru woun lun webedaagun lun le adügübaliwa. Furanguti dan le lan webedaagun lun Heowá wayusuruñein lan chansi le wibihibei lun wanúadahan wuriba. Sun gürigia mégeitiwa lun Bungiu lan warúeite.

5. Ka uagu gayara lubéi wachoururuni luagu richá lan sun le desidírü lubéi Heowá?

5 Anihein ámuya resun le uágubei garicha lan Heowá lun larúeihan: agumadihati lau irichaü le úaraguati. Ligía guánarügü ariñagubei: “Au [...] Aburemeibei, le adügübalin sun katei ubouagu lau ínsiñehabuni, irichaü luma úarani, lugundun ligía katei le aubei nagundaara” (Her. 9:24). Lúmagiñe Heowá liabin irichaü. Memegeirunti lakutihan ni aban lúrudu lídangiñe le hadügübei wügüriña gafigountiña lun desidírü lani le richabei. Ani sun lúrudu bürüwarügüti le líchugubei houn gürigia irichaü úaraguati lébunabei. Ariñagatu Bíbülia: “Derebuguñu liña lálana barúeihan luagu irichaü”. Ligía gayara lubéi wachoururuni sun lan lilurudun, ladundehan luma sun le desidírü lubéi richati (Sal. 89:14; 119:128). Ánheinti Satanási, le ariñagubei mabuidun lan ligaburi lagumadihan Heowá, siñaguati lungua lun ladügün aban ubóu le ídanbei anihein lan irichaü súnwandan.

6. Ka uagu Heowá lubéi garichabei lun larúeihan ubouagu?

6 Ábanya resun le uágubei garicha lan Heowá lun ligía lan Urúei, ladüga anihein lan subudi luma lichú aau le mégeiwabei luagu lun lóunigiruni sun le ladügübei. Samina wamá san luagun ubafu le líchugubei lun Liráü lun lareidaguagüdün sandi le siñá lumuti ni aban surusia areidaguagüda (Mat. 4:23, 24; Mar. 5:25-29). Lun Bungiu, mama meha aban milaguru le ladügübei Hesusu, ladüga subudi lumuti Bungiu ida liña lan lawadigimaridun úgubu ani gayarati lareidaguagüdüni. Subudi lumuti giñe ka lan mégeiwabei lun hasaarawagüdün hilaaña luma ida luba lan lararamúniwa chagaguaü le lánina liñawan dan.

7. Ka uagu íñutima lubéi lichú lau Heowá sügǘ lau lichú aau le lídanbei ubóu le lani Satanási?

7 Aniheingua ubóu le lábugiñebei lubafu Satanási áluaha ida luba lan lagumuchun lau turóbuli le burí lídanbei ábanrügü ageiraü luma le lídanbei sun ubóu. Heowárügüñein asubudirei ida luba lan lanügün darangilaü lun sun ubóu (Isa. 2:3, 4; 54:13). Eibu laganwoundun wasubudin luagu lisubudin luma luagu lichú lau Bungiu, ábatima wasandiragun woungua kei apostolu Pábulu le ariñagubei: “Lueirin lareini Bungiu, luma lichú lau! Siñati wasubudiruni lisaminan, siñá gunfuranda wamani lémeri” (Rom. 11:33).

LAGUMADIHAN HEOWÁ BUÍDUTIMABEI

8. Ka ánhingichubarun hanigi lídangiñe ligaburi larúeihan Bungiu?

8 Mámarügüñein liricha Heowá lun larúeihan tarufuda Bíbülia. Arufuda tumuti giñe ka lan uagu buídutima lubéi lagumadihan sügǘ hau ha híbiri. Aban lídangiñe, ladüga lau lan  ínsiñeni lagumadiha. Le linarün katei, hingí lumutu ligaburi lagumadihan wanigi. Ariñagati: “Gudemehabutina, gaguraasuntina, wéiritina lidan ínsiñeni luma inarüni” (Afu. 34:6). Óusera lumutiña gürigia ha eseriwidubaña lun lau inebesei. Buítimati lóunigiruniwa sügǘ lau wóunigiragun woungua. Mítaranti kei lariñaguni Satanási, maramudun lumuti Heowá katei buiti hawéi lubúeingu ha úaraguabaña lun. Le súdinitimabei, ru lumuti liráü lun wibihini emenigini lun wawinwandun lun súnwandan (aliiha huméi Sálumu 84:11 luma Rómana 8:32).

9. Ida liña wasubudiruni berese lan Bungiu lau kada aban wádangiñe?

9 Nidiheriti Heowá luagu ida liña lan lidin houn lumutuniña keisi sétanu, gama lumoun, bereseti giñe lau kada aban wádangiñe. Samina wamá san luagun le asuseredubei Ísüraeli lidan hadaani alidihatiña. Kéiburi luagu ǘrüwa-san irumu, yúsuti Heowá alidihatiña lun lesefuruniña ísüraelina hawéi háganiñu. Ani íbini gibe lan turóbuli lidan dan ligía, téniti tun Rudu, aban würi mama ísüraelina to adügüboun saragu sákürifisiu lun hádangiñe tan lumutuniña Heowá. Biní lumutu Heowá lau líchugun aban tani weiriei luma aban tiráü. Ani danme le táguyugun Rudu lídangiñe óunweni, tasubudirubei hádangiñe lan ladügawagun tisaani liabin Mesíasi. Ani tíchuguba giñe fe luagu anihein lan abahüdaguni luagu tibagari tidan aban líburu tidan Bíbülia to anügübalin tiri. Samina humá san ida luba lan tasandiragun tungua! (Rudu 4:13; Mat. 1:5, 16).

10. Wéiriti san lidere ligaburi larúeihan Heowá? Afuranguagüda huméi.

10 Mama aban urúei le dereti lugumadin Heowá. Ha gürigia ha lábugiñebaña lugumadin líbüreti hasandiragun houngua ani gúndaatiña (2 Ko. 3:17). Ariñaga lumuti Dawidi lau dimurei burí le: “Anihein óunwenbu larugounga liñúarü! Anihein ubafu luma ugundani lúbiñe” (1 Kro. 16:7, 27). Ariñagati aban abürühati sálumu gíriti Etán: “Fuleseiwatiña gürigia ha galawahadibaña bun lau ugundani ani harugoungadagüdabei hémeri lau bigemeri, ha gúndaabaña lidan biri sun dan gunda hagía lau búaragun” (Sal. 89:15, 16).

11. Ka gayarabei wadügüni lúntima wachoururuni luagu ligaburi lan lagumadihan Bungiu buídutimabei?

11 Éibume wasaminarun luagun lareini Heowá, ábatima wíchugun fe luagu lagumadihan lan buídutimabei. Wasandiraguba woungua kei abürühati sálumu le ariñagubei: “Buítimati lerederúniwa aban weyu lidan bibürürün sügǘ lau milu bóugudi luéi!” (Sal. 84:10). Siñati mítaranbei lan. Heowá adügübaliwa, ligía subudi lubalin ka lan wemegeirubei lun gunda wamá ani ru lumuti woun lau areini. Sun le lamuriahabei wama lunti wabuidun guánarügü, ani dan le gaganbadi wamá lun, adügati lúntima gunda wamá, íbini anhein mosu lubéi wadügün somu sákürifisiu (aliiha huméi Isaíasi 48:17).

12. Ka resun méinitimabei lun luéigiñe wamá lóubadina liricha Bungiu lun larúeihan?

12 Ariñagatu Bíbülia lárigiñe lanme Milu Irumu lánina Larúeihan Kristu, hebedaaguba lan fiú gürigia kóntüra liricha Heowá lun larúeihan (Aruf. 20:7, 8). Kaba uagu hadügei lira? Ladüga láfuriduba lan Satanási lídangiñe ladaürǘn, ani lóuchuba ladügün lun hawouguounrügü lan gürigia hasaminara lun gayara lan leyeeduniña, kei ladügüni súnwandan. Háfuga láluguba lan ladügün lun hasaminarun gürigia gayara lan hawinwandun lun súnwandan sin gaganbadi hamá lun Heowá. Furanguti siñati lan lasuseredun lira. Gama lumoun, lunti wálügüdagun woungua anhein hínsiñebei lubéi liyeeni Satanási le woun. Anhein hínsiñe lubéi Heowá woun ani seriwitiwa lun ladüga buidu lan luma ladüga ligía lan garichabei lun larúeihan, iyereegubei liyeeni Satanási ligía woun. Súnwandan  busenbadiwa lan wawinwandun lábugiñe larúeihan Bungiu, le inarünitibei ani le ídanbei anihein lan ínsiñeni.

ÍDEHA WAMÁ LAU ÚARAGUNI LUN LAWANSERUN LARÚEIHAN BUNGIU

13. Ida liña genegegua lan wáyeihani Bungiu lumoun wídehan lun lawanserun larúeihan?

13 Kei aubei warihei, Heowá garichabei lun larúeihan, ani ligaburi larúeihan buídutimabei. Furanguti lunti lan wídehan lau sun wagundan lidan lawanserun larúeihan. Ídehatiwa dan le weseriwidun lun tau sun wanigi luma lau úaraguni. Luma giñe dan le wadügüni katei kei labusenruni. Dan le wadügüni ítara, mama ídeharügütiwa lun lawanserun larúeihan, arufuda wamuti giñe hínsiñe lan lagumadihan woun (aliiha huméi Éfesuna 5:1, 2).

14. Ida liña gayara lan háyeihani hachügüdina iduheñu hama wéiyaaña lidan afiñeni Heowá?

14 Arufudahatu Bíbülia woun lau lan ínsiñeni lagumadiha Heowá. Ligíati, sun ichügüdinaü hadan iduheñu hama wéiyaaña lidan afiñeni ha hínsiñehabubaña lun larúeihan Heowá málugunbaña héredun hawagu amu, kama hamuga gánitiña ámuya arúeihani le hani houngua. Áyeiharügü habéi Heowá. Ítara liña meha ladügüni Pábulu, áyeiha lumuti Bungiu luma Liráü (1 Ko. 11:1). Madügünti lun hasandirun amu busiganu ani méredun ligía hawagu lun hadügüni le buídubei, ínchaharügü lumutiña lau ínsiñeni (Rom. 12:1; Efe. 4:1; Fil. 8-10). Ítara liña ladügüni Heowá katei. Ani ítara liña giñe lunti lan hadügüni ha hínsiñehabubaña lun lagumadihan.

15. Ka uagu arufuda wabalin hínsiñe lan liricha Bungiu lun larúeihan woun dan le inebehabu wamá lun aransehani le adügǘbei tidan lóundarun?

15 Ka amu igaburi ídanbei wídeha lidan lawanserun larúeihan Bungiu? Lau wíderaguniña ha únbaña líchiga ubafu lau inebesei. Wídehaba lidan aransehani le adügǘti tidan lóundarun Bungiu íbini anhein ua lubéi gunfuranda  wamani buidu o anhein múaran wabéi lau le desidíruabei. Amu igaburi le luéi le arihíbei ubouagu, gama lumoun ligía ligaburibei ladügǘn katei lábugiñe lugumadin Bungiu (Efe. 5:22, 23; 6:1-3; Ebü. 13:17). Ánhawa gaganbadi, buídubei lidin woun, ladüga busén lumuti Heowá le buídutimabei woun.

16. Ka lébunabei desidírü hamá ha luéigiñebaña lóubadina larúeihan Heowá?

16 Arufuda lumuti giñe le desidírü wabéi anhein luéigiñeñadiwa lubéi lóubadina larúeihan Bungiu. Mariñagun lumuti woun ka lan lunbei wadügüni lidan kada kesi. Lubaragiñe lira, subudigüda lumuti woun ida liña lan lasaminarun. Kei hénpulu, míchugunti aban lísüta woun tau daüguaü to lunboun wadaürünu, ariñagarügüti woun busenti lan lun buidu lan wasansiragun keisi mínisi kristiánu (1 Tim. 2:9, 10). Mabusenrunti giñe lun wachugeraguagüdün amu ni lun ladügün le desidírü wabéi lun hasandiragun amu houngua wuriba (1 Ko. 10:31-33). Arufuda wamuti hínsiñe lan ligaburi lagumadihan woun ani ídehatiwa lidan dan le masaminarun wamá luágunrügü le hínsiñebei woun, lubaragiñe lira, aba gabaroun wamani le lasaminarubei Heowá dan le desidírü wamá.

Luéigiñe wamá lóubadina larúeihan Bungiu hadan waduheñu luma dan le desidírü wamá. (Ariha huméi párafu 16 darí 18).

17, 18. Írida humá fiú igaburi ida liña lan harufuduni maríeitiña luéigiñeñanu lan lóubadina liricha Heowá lun larúeihan.

17 Ariha waméi ida luba lan gayara lan hídehan maríeitiña kristiánugu lidan ligaburi lagumadihan Bungiu. Añahein maríeitiña, hénrenguti hasandiruni ibagari lidan maríei sügǘ lau le hagurabubei, ani añahein sandiguatiña houngua wuriba. Ka gayarabei hadügüni? Gayarati hasaminarun luagun lumadagua Heowá hama ísüraelina. Konparárüguati lungua luma aban wügüri maríeiti (Isa. 54:5; 62:4). Aban meha maríei hénrenguti lira. Gama lumoun, mabuchadunti luagu lau lumenrengun. Feruduna lumutiña ísüraelina saragu wéiyaasu ani úaraguati meha lun daradu le ladügübei hama (aliiha huméi Sálumu 106:43-45). Ma achawaha lumutiwa línsiñehabu Heowá luouguoun?

18 Ha kristiánugu maríeitiña ha hínsiñehabubaña lun Heowá áfaaguatiña lun háyeihani. Máluguntiña hadügün katei le siádiwati tidan Bíbülia lúnrügü hagumuchun lau aban maríei hénrenguti. Gunfuranda hamuti Heowá lan óundarubaliña ani busenti lan lun hasigirun hámagua. Ariñagatu Bíbülia dánrügüñein lan léiguadun aban hádangiñe maríeitiña lidoun agabarahani ligíarügüñein gayara lan hígiragun lun gayara lan hamarieidun luma amu gürigia (Mat. 19:5, 6, 9). Lau hadügüni sun hayaraati lun buidu lan léibugun katei lidan hamarieidun, ídehatiña lidan larúeihan Heowá.

19. Ka lunbei wadügüni dan le wachararun?

19 Kei le gafigoun wabéi, ñeinbei dan wadügün katei le mínsiñeti lun Heowá. Subudi lumuti, ligía lóunahanbalin Liráü lun líchuguni libagari lebegime wasalbarun ladüga hínsiñe wamá lun. Ligía lunti lubéi wamuriahan luma Heowá lun feruduna lániwa dan le wachararun (1 Huan 2:1, 2). Masufurira wamá luagu wachara, áfaagua wamá lun wafurendeirun lídangiñe. Ánhawa eredera yarafa lun Bungiu, feruduna lubadiwa ani líderagubadiwa areidaguagüdei wagarigu luma iñuragua lídangiñe sügǘ libe burí le ámuñegü (Sal. 103:3).

20. Ka uagu lunti lubéi luéigiñe wamá lóubadina larúeihan Heowá?

20 Lagumadihaba Heowá lidan iseri ubóu, ani sun wagía wafurendeirubei lémeri le richabei (Isa. 11:9). Gama lumoun, gumeseediwa afurendeira saragu luagu. Ani yarafaali dan lun úaali lanme ni aban álügüdahati anhein garicha lubéi Heowá lun larúeihan. Anihán lidaani woudin luéigiñe lóubadina larúeihan lau gaganbadi wamá lun, lau weseriwidun lun lau úaraguni luma lau wadügüni sun wayaraati lun wáyeihani lidan sun le wadügübei.