Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Sisi-hati irumu 2017

Hínsiñehabu wamá lun katei burí gebegiti le líchugubei Heowá woun

Hínsiñehabu wamá lun katei burí gebegiti le líchugubei Heowá woun

“Le ñein lumuti hisirin, ñeinboun giñe hanigi” (LUK. 12:34).

UREMU: 153, 9

1, 2. a) Írida humá fiú irisini le ru láalibei Heowá woun. b) Kaba wakutiha lidan arütíkulu le?

ÚATI rísitimati luéi Bungiu; lani sun le aniheinbei (1 Kro. 29:11, 12). Ani aban giñe Úguchili le gíchigaditi, ligía líchugunbalin irisini le lúmabei houn ha arihibalin lueirin lebegi. Anihán fiú lídangiñe irisini ligía: 1) Larúeihan Bungiu, 2) apurichihani luma 3) inarüni gebegiti le tídanbei Lererun. Ma wéiriti weteingiradi luagu katei burí le? Gama lumoun, ánhawa móunigi, gayarabei lachülürün dan lun marihin wamani kei katei le gebegiti ani gayarabei íbini meberesen wamá lau. Lun masuseredun lan ítara, mosu wasagarun buiti lídangiñe ani gánwoungüda wameime wínsiñehabu luagu. Ariñagati Hesusu: “Le ñein lumuti hisirin, ñeinboun giñe hanigi” (Luk. 12:34).

2 Akutiha waméi ida luba lan wakipuruni ani gánwoungüda wameime wínsiñehabu luma weteingiradi luagu Larúeihan Bungiu, luagu apurichihani luma luagu inarüni. Danme le wadügüñein lan, samina wamá ida luba lan waganwoundagüdüni ínsiñeni le wasandirubei luagu irisini lúmagiñeti Bungiu le.

 ÍTARA LIÑA LARÚEIHAN BUNGIU KEI ABAN PÉRÜLA LE WÉIRITI LEBEGI

3. Ka meha katei aranseñu lubéi alugurahati lun ladügüni lun libihin aban pérüla le wéiriti lebegi? (Ariha huméi dibuhu le lídanbei lagumeseha arütíkulu).

3 (Aliiha huméi Matéu 13:45, 46). Abahüdaguati meha Hesusu luagu aban alugurahati le áluahabei pérüla. Luagu saragu irumu, chóuruti agañeiha lan ani aluguraha ligía saragu pérüla. Luagu aban weyu, aba ladarirun wügüri ligía aban pérüla le wéiriti lubuidun ani hínsiñeti lun saragu. Aranseti meha lun laluguruni sun le lúmabei lun lagañeinhani pérüla ligía, ligíati, gayarati wasaminarun luagun lueirin lebegi pérüla ligía lun gürigia ligía.

4. Anhein weiri lubéi lebegi Larúeihan Bungiu woun kei meha lebegi pérüla lun alugurahati, kaba wadüga?

4 Ka uagu lunti lubéi súdini lan abahüdaguni le woun? Ítara liña inarüni luáguti Larúeihan Bungiu kei pérüla ligía. Anhein weiri lubéi lebegi woun kei pérüla ligía lun alugurahati, wígiruba furumiñeguarügü katei lun lílana wamá Larúeihan Bungiu (aliiha huméi Márükosu 10:28-30). Ayanuha wamá hawagu bián gürigia ha adügübalin katei le.

5. Ka ladügübei Sakéu luagu Larúeihan Bungiu?

5 Aban meha wügüri súdiniti le aguburahabalin liseinsuna gumadi Sakéu, ani rísihali meha ladüga lasagarun saragu seinsu hámagiñe gürigia lóugiñe le lunbei hafayeiruni (Luk. 19:1-9). Gama lumoun, dan le laganbunbalin Hesusu ayanuha luagu Larúeihan Bungiu, aba líchugun fe weiri lan lebegi ani aba lariñagun: “Nabureme, níchiga lamidan le númabei houn gudemetiña; ani anhein íweruhaadina lubéi luéi somu gürigia lau eyeeraguni, náguyugüdüba gádürü wéiyaasu sügǘ lau lun”. Aranseti meha lun lagiribudagüdüni le líweruhabei ani aba lígiruni igaaduaü.

6. Ka burí meha asansiruni tadügübei Rose, ani ka uagu?

6 Wayanuha tuagu aban würi to lunboun wagúarun tun Rose. Tawinwanduña meha Rose tuma aban würi keisi úmarigu dan le taganbunbalin uganu luáguti Larúeihan Bungiu. Ani tuguya meha tábutiboun aban óundaruni to ageindaguboun luagu haricha würiña ha agamaridubaña würiña háledigu o wügüriña ha agamaridubaña wügüriña háledigu. Dan le taturiahanbarun Bíbülia, aba tarihini lueirin lebegi inarüni luáguti Larúeihan Bungiu ani aba tíchugun fe mosu lan tadügün asansiruni lidan tibagari (1 Ko. 6:9, 10). Aba tínchahanu tanigi lun tígiruni ubaraü ligía ani lun tígiragun tuma würi to meha úmaboun tawinwanda. Aba tabadiseirun lidan irumu 2009, ani aban irumu lárigiñe, aba teseriwidun kei prekursora to adügüboun 70 oura. Héretimati meha ínsiñeni le tasandirubei luagu Heowá luma luagu Larúeihan sügǘ lau luriban tayumahan (Mar. 12:29, 30).

7. Ka katei lunbei wóunigiruni lun meferidirun wamani ínsiñeni le wasandirubei luagu Larúeihan Bungiu tau sun wanigi?

7 Saragu wádangiñe adügaadiwa giñe óunwenbu burí asansiruni lidan wabagari lun gayara lan wawinwandun lábugiñe Larúeihan Bungiu (Rom. 12:2). Ani magumugili wáfaagun. Lunti duari wamá lun ua lan ni kata edebilidagüdüti ínsiñeni le wasandirubei luagu Larúeihan Bungiu, ni labusenrúniwa umegeguni ni agamariduni le kóntürati luagu lilurudun Bungiu (Ari. 4:23; Mat. 5:27-29). Rúhali giñe Heowá ábanya irisini le wéiriti lebegi woun lun líderaguniwa lun hínsiñememe lan Larúeihan woun tau sun wanigi.

SEFU LUMUTI APURICHIHANI IBAGARI

8. a) Ka meha uagu lariñaga Pábulu ítara liña lan wani ministeriu kei “irisini” lidan “aban sóudieru lauti múa”? b) Ida liña meha larufuduni Pábulu hínsiñe lan ministeriu lun?

8 Haritagua waméi ru lan Hesusu gumadi woun lun wapurichihani ani arufudaha wameime uganu buiti luáguti Larúeihan Bungiu (Mat. 28:19, 20). Ariha lumuti Pábulu lueirin lebegi ministeriu. Ariñagati ítara liña lan ministeriu lánina iseri daradu kei aban “irisini” lidan “aban sóudieru lauti múa” (2 Ko. 4:7;  1 Tim. 1:12). Íbini gafigoun wamá, ani ítara waña kei sóudieru lauti múa, gayarati ladügün uganu le wapurichihabei lun wibihin ibagari magumuchaditi ani ibiha hameime gürigia ha aganbubaliwa. Ligía meha lariñagunbei Pábulu: “Nadügüni sun le luagu línsiñe uganu le lánina asalbaruni nun, lun gafanranbadina lan lidan” (1 Ko. 9:23). Hínsiñeti meha apurichihani lun Pábulu, ani ligía meha lawadigimaridunbei saragu lun ladügün disipulugu (aliiha huméi Rómana 1:14, 15 luma 2 Timotéu 4:2). Íderagua lumuti ínsiñeni le lasandirubei luagu uganu buiti lun lawanduni éibaahouni le wéiritimabei (1 Tesa. 2:2). Ida luba san warufudun aban ínsiñeni libe lira?

9. Ida liña san gayara lan warufuduni weiri lan lebegi ministeriu woun?

9 Arufuda lumuti meha Pábulu weiri lan lebegi ministeriu lun lau layusuruni sun chansi le ladarirun lun layanuhan houn amu gürigia. Ítara kei meha apostolugu hama amu kristiánugu ha lánina furumiñeti sígulu, ru wamuti uganu houn gürigia íbini dan le mama lan wapurichihaña, dan le wapurichihan lidan guririguaü o muna tuagu muna (Adü. 5:42; 20:20). Áluaha wamá ida luba lan wapurichihan houn sun gürigia ha wayaraatiña. Anhein gayara lubéi, seriwi wamá keisi prekursorugu ídehatiña o ha adügübaña 70 oura luagu hati, furendei wamá amu iñeñein o woudin eseriwida lidan amu fulasu lidan guánarügü wageira o lidan amu ageiraü (Adü. 16:9, 10).

10. Ka burí abinirúni tibihibei Irene luagu áfaaguni le tadügübei lun tapurichihani uganu buiti?

10 Samina wamá tuagun Irene, aban íbiri mamarieidungiru Meriga, to meha busenboun tapurichihan houn terencha ha ayanuhabaña ruso. Dan le meha tagumeserunbei lidan irumu 1993, kéiburirügüñanu meha wein apurichihatiña lidan sétanu le ñein lubéi layanuhóua ruso Newayoru. Nadagimein haaru saragu lidan iñeñein le luagu 20 irumu ani ariñagatu mayanuhan tágiili lan ruso buidu buidu. Gama lumoun, biní laali Heowá ubebeni le tarufudubei luma giñe le harufudubei amu íbirigu ha adügübalin ligiaméme. Guentó anihein sisi damuriguaü lidan iñeñein ruso Newayoru. Badiseitiña keinsi gürigia ha aturiahabarun Bíbülia tuma Irene ani fiú hádangiñe heseriwiduña Betelirugu, añahein amu heseriwiduña keisi prekursorugu o kei wéiyaaña lidan afiñeni. Abahüdaguatu: “Anihein dan nasaminarun luagun amu katei le gayarabei hamuga meha nadügüni, gama lumoun, chouru numuti úabei lan hamuga ni aban lídangiñe íchuguti saragu ugundani nun”. Chóuruti weiri lan lebegi tani ministeriu tun.

Ariha humuti san ministeriu kei aban irisini ani arufuda humuti san lau hígirun dan lun háfuridun apurichiha kada dimaasu? (Ariha huméi párafu 11 luma 12).

11. Ka resultóubei dan le wasigirun apurichiha íbini anihein lan éibaahouni?

11 Anhein weiri lubéi lebegi wani ministeriu woun, wasigiruba apurichiha íbini wéibaahoun, ítara kei meha ladügüni Pábulu (Adü. 14:19-22). Lidoun burí meha irumu 1930 luma lidan lagumeseha 1940, gagibuguatiña meha wíbirigu merigana luma saragu éibaahouni. Gama lumoun, keisi Pábulu,  kíputiña úaraguni ani mígirun hamuti hapurichihan. Lun hóunigiruni haricha lun hapurichihan, ñǘdüntiña ligibugiñe lúrudu saragu wéiyaasu. Lidan irumu 1943, ariñagati íbiri Nathan Knorr luagu aban agañeiruni ligibugiñe Liñun-agei Lúrudu Meriga: “Lau hídehan wagañeirei aguseruni le. Lun hamuga meha masigirun hamá íbirigu apurichiha, siñati hamuga warufudun ni aban kesi ligibugiñe Liñu-agei Lúrudu; seremei hugía wagañeirunbalin éibaahouni, dandu apurichihatiña kei íbirigu ha lídangiñetiña sun ubóu ha mígirunbalin hapurichihan. Úaraguni le harufudubei lumutuniña Wabureme ligía adügübei lun wagañeiruni kesi le”. Seremei úaraguni libeméme lira, gañei waali amu burí kesi lidan amu burí fulasu ubouagu. Ítara liña, gayarati ladügün ínsiñeni le wasandirubei luagu wani ministeriu lun wagañeiruni éibaahouni.

12. Ka desidírü wabéi wadügün?

12 Anhein ariha wabalin wani ministeriu keisi aban irisini lúmagiñeti Heowá, magufurumadunbadiwa láurügü “wadügün oura”. Wadügübei sun wayaraati lun wadimurehani “uganu buiti luáguti línsiñehabu Bungiu” (Adü. 20:24; 2 Tim. 4:5). Kaba san warufudaha dan le wapurichihan? Ariha wamá ábanya irisini le líchugubei Bungiu woun.

ABAN IRISINI WÉIRITI INARÜNI LE WASUBUDIRUBEI

13, 14. Ka san luwuyeri irisini uágubei layanuha Hesusu lidan Matéu 13:52? b) Ida liña waganwoundagüdüni?

13 Inarüni le líchugubei Heowá, le “Lubungiute inarüni” woun, ligía lǘrüwan irisini le lunbei wayanuhan luagu (2 Sam. 7:28; Sal. 31:5). Aban Bungiu le areidati Heowá, le arufudahabalin inarüni houn ha inebehabubaña lun. Lúmagiñebei layanuhóun woun luagu inarüni, gachansintiwa lun wafurendeiruni inarüni lau waliihanu Bíbülia tuma burí agumeiraguagüdüni luma lau woudin lidan adamuridaguni luma lidan adamurini wéinamuti. Lau lásügürün dan, gíbeeli irisini wareidun le unbei lagúara Hesusu inarüni binaduhali luma le iserigili (aliiha huméi Matéu 13:52). Líderagubadiwa Heowá aganwoundagüdei warisin lau inarüni iseriti le wéiriti lebegi anhein wáluaha keisi aban irisini le aramudaguati (aliiha huméi Ariñawagúni 2:4-7). Ida liña san wadügüni?

14 Mosu waturiahanu Bíbülia tuma burí wani agumeiraguagüdüni buidu, ani akutiha wamounme hulili. Ítara luba wadarirun inarüni le meha ibidiñeti woun ani iseribei woun (Hos. 1:8, 9; Sal. 1:2, 3). Dan le táfuridunbei garüdia to luagu furumiñeti wéiyaasu lidan sedü-hati lidan irumu 1879 ariñagatu: “Ítara liña inarüni kei aban fuluri lidan ibagari le ítarabei kei fulasu mageirawati, geyegu liña lau híduru würibati le lánina iyeeni ani ítagaraü yebe lañaradagun fuluri. Anhein samina hubéi hadariruni, mosu agagudúañu humá; [...] anhein busén hubéi hibihini, mosu hélemuchagun. Ualá gufuruma humá lau ábanrügü fuluri lánina inarüni. [...] Sigí humá abudaha; sigí humá áluaha”. Lunti wasandirun aban óunwenbu ayumahani lun waganwoundagüdüni warisin le lánina inarüni le tídanbei Bíbülia.

15. a) Ka burí inarüni gayarabei wariñagun binaduhali lan? b) Ka burí lídangiñe súdinitimabei hun?

15 Daritiwa inarüni le wéiriti lebegi dan le wagumeserun aturiahoun Bíbülia. Gayarati wagúarun lun inarüni binaduhali ladüga ligía furumiñeti katei wafurendeirubei ani wéiriti meha lebegi woun. Laganagua inarüni ligía anihein luagu Heowá lan adügübaliwa ani gasuuni lan houn gürigia. Furendeitiwa giñe weiri lan wínsiñe lun darí lun líchuguni liráü keisi sákürifisiu lun lesefuruniwa lídangiñe figóu luma óunweni. Arufudahóuati giñe woun lagumuchuba lan Larúeihan lau asufuriruni ani gayarabei lan wawinwandun lun súnwandan lidan ugundani luma darangilaü (Huan 3:16; Aruf. 4:11; 21:3, 4).

16. Ka lunbei wadügüni dan le lafuranguagüdüniwa somu inarüni tídangiñeti Bíbülia?

16 Anihein dan mosu lan wafuranguagüdüni  ida liña lan gunfuranda wamani somu profesía o somu fánreinti tídangiñeti Bíbülia. Dan le lasuseredun katei le, mosu wasagarun dan lun waturiahani ariñahani ligía buidu ani ráramagua wagíame asaminara (Adü. 17:11; 1 Tim. 4:15). Mama hóucharügütiwa gunfuranda wamani fánreinti burí le súdinitimabei lídangiñe iseri afuranguagüdüni ligía, áfaaguatiwa giñe lun gunfuranda wamani fánreinti le ñǘbüriti luma ida liña lan amu lan luéi furumiñeti afuranguagüdüni. Anhein wadüga ítara, chóuruti laganwounduba lan warisin lau iseri inarüni ligía. Ka uagu buidu lubéi lun wadügüni katei le?

17, 18. Ka ídemuei líchugubei sífiri sandu woun?

17 Arufudahati Hesusu gayarati lan ladügün lani Bungiu sífiri lun waritaguni le furendei wamaalibei (Huan 14:25, 26). Ida liña líderaguni katei le arufudahati? Ariha waméi le asuseredubei lun Peter lidan irumu 1970, disinéfu meha irumu lau ani sun liña meha lebelurun Betelirugun Gran Bretaña. Aban weyu dan le lapurichihaña lan muna tuagu muna, aba láfuridun aban gürigia kéiburi 50 irumu lau ani hádiumati. Aba lálügüdüni Peter gürigia ligía anhein hínsiñe lubéi hamuga lun gunfuranda lanu Bíbülia. Aban meha máisturu huríu wügüri ligía, aban hádangiñe ha afuranguagüdübalin lila lúrudu, ani aba taweiridun lanigi ladüga lariñagun aban nibureinti lun busén lan larufudahan lun tuagu Bíbülia. Lun lóuchaguni huríu ligía nibureinti le, aba lálügüdüni: “Nibureinti, subuditi san bun ka lan iñeñein ídanbei tabürüdǘwa liliburun Danieli?”. Aba lariñagun Peter lun bürüwati lan fiú fánreinti lidan araméu. “Wéiritu lanigi máisturu huríu ligía luagu subudi nani óunabagülei —liña Peter—, gama lumoun, wéiritimatu nanigi sügǘ lau. Ida liña san nasubudiruni? Dan le nídinbei múnadoun ani aba náluahan tidan burí garüdia La Atalaya tuma ¡Despertad! to burí lánina lagumuhóun hati, aba nadarirun aban arütíkulu le afuranguagüdübalin lidan lan araméu tabürüdǘwa liliburun Danieli” *. Gayarati ladügün sífiri sandu lun waritaguni katei burí le aliiha wamaali ani le areida wamaali keisi aban irisini (Luk. 12:11, 12; 21:13-15).

18 Anhein wareida inarüni le larufudahabei Heowá woun kei aban irisini, tínchahabadiwa wanigi lun wibihin lanwoun irisini ligía, dandu le binaduhali kei le iseri. Laganwounduba wínsiñehabu luma weteingiradi luagu lichú aau le lúmagiñeti Bungiu, ani ábame aranseñu wamá lun warufudahan houn amu.

GÓUNIGI WAMÉI WARISIN

19. Ka uagu mosu lubéi wóunigiruni irisini le ñǘbuinbei lúmagiñe Bungiu?

19 Áfaaguati Satanási luma ubóu le lábugiñebei lubafu lun hedebilidagüdüni o lun hagumuchun lau ínsiñeni le wasandirubei luagu irisini burí le uágubei wayanuha lidan arütíkulu le. Ánhawa móunigi, gayarabei wígirun lun ménrengun lan leyeeduniwa ayumahani lun wagañeirun bandi seinsu o lun busén wamá aban ibagari lau saragu umegeguni luma wendei. Haritaguagüda lumutiwa apostolu Huan ásügüreina liña lan ubóu le lau sun layumahan (1 Huan 2:15-17). Ligía lunti lubéi wáfaagun saragu lun wakipuruni ínsiñeni le wasandirubei luagu irisini le líchugubei Bungiu woun.

20. Ka desidírü hubéi hadügün lun hóunigiruni irisini le resibi humaalibei lúmagiñe Bungiu?

20 Masaminara humá bián wéiyaasu lubá hígirun furumiñeguarügü katei le gayarabei ledebilidagüdüni ínsiñeni le hasandirubei luagu Larúeihan Bungiu. Sigí humá apurichiha lau ubebeni ani meferidira huméi ínsiñeni le hasandirubei luagu hani ministeriu. Áluaha huméi inarüni le tídanbei Bíbülia súnwandan. Ítara luba lagibedun irisini huma sielu “le ñein lubéi siñá lan hebelurun híwerutiña, ua hagía hamutiri ñein lun héigini”. Ladüga kei lariñaguni Hesusu, “le ñein lumuti hisirin, ñeinboun giñe hanigi” (Luk. 12:33, 34).

^ par. 17 Lúmagiñe Danieli 2:4b darí 7:28 lidan araméu labürüdǘwa tidan furumiñetu dugumedu.