Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Sisi-hati irumu 2017

Ruti Heowá dǘgüdaguaü woun lidan sun wasufurirun

Ruti Heowá dǘgüdaguaü woun lidan sun wasufurirun

“Ruti giñe [Bungiu] dǘgüdaguaü woun lidan sun wasufurirun” (2 KO. 1:3, 4).

UREMU 38, 6

1, 2. Ida liña líchugun Heowá dǘgüdaguaü woun, ani ka ichouruni tíchugubei Lererun woun?

ARIÑAGATI aban íbiri nibureingili lun Stephen, aban wéiyaali lidan afiñeni le derebuguhali, luagu nidiheri lan luagu aban katei. Wagúaruba lun nibureinti ligía Eduardo. Lǘhali nibureinti ligía asaminara luagu ariñaga lan 1 Korintuna 7:28 luagu “ñeinbei [lan] saragu lénrengunga houn ha maríeibaña”. Kei le maríeihali lubéi Stephen, ába lálügüdüni nibureinti ligía katei lan “lénrengunga” ligía ani ida luba lan lararamun lun anhein amarieida. Lubaragiñe lóunabuni Stephen álügüdahani ligía, aba lariñagun lun lun lasaminarun luagun ábaya katei le labürüdübei apostolu Pábulu, luagu aranseñu liña lan Heowá lun líchugun “dǘgüdaguaü woun lidan sun wasufurirun” (2 Ko. 1:3, 4).

2 Chóuruti aban lan Úguchili le hínsiñehabuti Heowá, le íchugubei gurasu woun dan le gaturobulin wamá. Háfuga haritagua humani ida liña lan ladundehanün ani íderagualaün lóugiñe aban wéiyaasu, háfuga tau Lererun. Gayarati wachoururuni luagu busén lani le buídutimabei woun, ítara kei labusenruni houn lubúeingu  lidan binadu dan (aliiha huméi Heremíasi 29:11, 12).

3. Kaba burí álügüdahani wóunaba?

3 Kei lidan furumiñeguarügü katei lidan wabagari, anhein subudi wabalin ka lan uagu wasufurira óuchawaguni luma turóbuli lidan wamarieidun o hadan waduheñu, ménrenguntimabei wawanduni. Ligíati, ka gayarabei ladügün lun ñein lan “lénrengunga” le uágubei layanuha Pábulu? Ka burí hénpulu lánina tidaani Bíbülia luma le lánina wadaani gayarabei líchuguni dǘgüdaguaü le wemegeirubei woun? Líderagubadiwa wasubudiruni óunabagülei lun wasigirun wabaruaguóun.

“SARAGU LÉNRENGUNGA” LIDAN MARÍEI

4, 5. Írida humá fiú katei le adügübei lun ñein lan “saragu lénrengunga” lidan maríei.

4 Dan le lamarieidagüdünbaliña Bungiu furumiñetiña gürigia, ariñagati: “Ligía lígirubei lubéi wügüri lúguchi tuma lúguchu, lun laganóun tuma lúmari, ábame hayabin lun ítara haba lan kei ábanrügü gürigia” (Agu. 2:24). Gama lumoun, kei le gafigoun wabéi, gayarabei ñein lan turóbuli dan le wamarieidun ani aba wagumeserun aban iseri ibagari (Rom. 3:23). Libe-agei dan, aba lárügüdüni wügüri maríeiti habara agübürigu, ladüga adügaali Bungiu aransehani lun ligía lan tichügüdina lani weiriou (1 Ko. 11:3). Háfuga hénrengu lan houn fiú wügüriña maríeitiña hagunfuliruni iseri buligasion le. Ani añahein fiú würiña falá hamuti hadundehan hagübürigu lubaragiñe hafalaruni ladundehan hani weiriei. Gayarati giñe ladügün ligaburi hanaagun houngua hama haduheñu lun ñein lan turóbuli hadan.

5 Aba laganwoundun idiheri dan le tariñagun würi lun tani weiriei luagu gasaanibaña lan. Íbini weiri lan hagundan, nidiheritiña ladüga gayara lan liabin somu sandi lidan dageina tan würi o lárigiñe. Gíbetimahalime katei hemegeirun. Gama lumoun, ñeinbei amu burí katei asansiruti lidan habagari. Tíchugubei úguchuru libe-agei tidaani lun tetenirun lun irahü. Aniheinbei amu burí buligasion lun letenirun úguchili lun, ladüga mosu líchuguni sun le hemegeirubei liduheñu houn. Ligíati, madaanihañame maríeitiña lun hásügürün saragu dan hámagua kei meha furumiñe.

6-8. Ida liña gayara lan hasandiragun aban feru maríeitiña houngua ladüga busén hamá gasaanigu hamá ani siñati?

6 Añahein maríeitiña gagibuguatiña luma amu turóbuli: masaanigutiña íbini weiri lan habusenrun gasaanigu hamá. Ni maríei ni isaanigu machoururagüdünti aban ibagari sin idiheri, gama lumoun, dan le busén hamá gürigia hasaanigu ani siñati gasaani hamá gayarati lanügün turóbuli. Añahein würiña maríeitiña wéiriti hadiheri ladüga lásiñarun hagaraüdün (Ari. 13:12). Lidan tidaani Bíbülia, aban meha katei mabuidunti le barüti busiganu maráü tan aban würi. Dagati meha lanarime íruni tuagu Rakeli, to lani Hakobu weiriou, dan le tarihinbei garahüñü tan tíbugaña ani tuguya maraütu (Agu. 30:1, 2). Ha misionerugu ha eseriwidubaña lidan burí fulasu le ñein lubéi gibe hamá hasaanigu gürigia, aba burí hálügüdüniña gürigia ka lan uagu masaanigu habéi. Íbini hariñaguni houn ka lan uagu, anihein dan aba hariñagun houn: “Ma lirun! Wafurieiduba huagu”.

7 Ariha waméi tásügürün aban íbiri Inglaterra to siñabei tagaraüdün lau sun busén tan yebe tisaanigu. Dan le tásügürünbalin irumudiri le ídanbei gayara lan hagaraüdün gürigia, aba tírudun saragu, ladüga aba tíchugun fe magunfulirunbei lan le tayumahabei lidan ubóu le. Ligía aba lubéi desidírü tan úara luma tani weiriei lun háluahan aban irahü lun hagüriahani kei haráü. Gama lumoun, aba tariñagun: “Sügütina aban dan  kamá hamuga namuiseruña. Subudi numuti meha mama lan ligiaméme bágurahani biráü kei bagüriahan aban le haráü amu”.

8 Inarüni ariñaga tan Bíbülia “hasalbaruba [lan] würiña lau hágurahan” (1 Tim. 2:15). Gama lumoun, úati mini lan dimurei le hibihiba lan ibagari magumuchaditi lau gasaanigu hamá, mini lan aban lan würi to gasaanigutu ani gábantu lun tetenirun tun gayarati lan méiguadun tan lidoun achurahani ani mádaragun tuguyame tungua lidoun habagari amu (1 Tim. 5:13). Lau sun luwuyeri, gaturobulinboun lidan maríei luma lidan tibagari hama tiduheñu.

Ida luba wawanduni lounwen somu waduhe o wamada? (Ariha huméi párafu 9 luma 12).

9. Ka uagu aban lubéi óuchawaguni hénrenguti lounwen aban hádangiñe maríeitiña?

9 Dan le wasaminarun luagun turóbuli le gayarabei ñein lan hadan maríeitiña, anihein aban le mámabei súnwandan liabin lidoun wasaminan: lounwen aban hádangiñe maríeitiña. Ha asufurirubalin katei le háfuga masaminaruntiña yebe lasusereduba lan houn lidan ubóu le. Afiñetiña kristiánugu tau sun hanigi luagu füramasei lánina águyuguni, aban emenigini le íchugubei saragu gurasu lun le eferidirubarun lani weiriou o to eferidirubalin tani weiriei (Huan 5:28, 29). Ligía ábanya ligaburi líchugun Wáguchi le hínsiñehabubei gurasu luma ídemuei tau Lererun houn ha ásügürübaña lénrengunga. Ariha waméi ida liña lan hasandiruni fiú lubúeingu Bungiu gurasu le líchugubei luma ida liña lan líderaguniña.

IDA LUBA WADARIRUN GURASU DAN LE WASUFURIRUN

10. Ka íchugubei gurasu tun Ana? (Ariha huméi dibuhu le lídanbei lagumeseha arütíkulu).

10 Gagibuguatu meha Ana to lani Elikaná weiriou luma aban óuchawaguni hénrenguti: siñati meha tagaraüdün, ani to aban lani Elikaná weiriou, gasaanigutu meha (aliiha huméi 1 Samueli 1:4-7). Irumu ligibuagun irumu, mósuha tawanduni Ana tañawarihan Peniná tun, ani adügatiha katei le lun tírudun saragu. Ka íchugubei gurasu tun? Ariñagatu Bíbülia lütu lan meha Ana afurieida lun Heowá lun tabahüdaguni tituróbulin lun. Chóuruti aguraba tan meha lóunabubei lan Bungiu tafurieidun. Ani meberesenga kaba lan meha asusereda, “aba mírudundigiaaru lan” Ana (1 Sam. 1:12, 17, 18). Hemenigitu meha luagu líchuguba lan Heowá aban irahü tun o líchuguba lan gurasu tun lidan amu igaburi.

11. Ida liña líchugun furíei gurasu woun?

11 Kei le gafigoungidiwa lubéi ani wawinwanduña lidan ubóu le lábugiñebei lubafu Satanási, wasigiruba asufurira óuchawaguni (1 Huan 5:19). Gama lumoun, subudi wamuti anihein lan Bungiu wama le aranseñubei “lun líchugun gurasu woun”. Gayarati líderaguniwa dan le wásügürün lénrengunga ánhawa afurieida tídangiñe sun wanigi kei meha Ana. Ítara kei tuguya, mama abahüdaguarügü wabéi waturobulin lun, lunti wariñaguni lun ida liña lan wasandiragun woungua ani ayumuragua wagíame lun tídangiñe sun wanigi lun líderaguniwa (Fili. 4:6, 7).

12. Ka meha íderagubarun Ana lun gunda tan?

12 Gayarati wadarirun gurasu dan le wírudun saragu ladüga siñá lan gasaanigu wamá o ladüga lounwen somu waduhe. Haritagua wamá tuagun Ana, würi profeta to awinwanduboun lidan lidaani Hesusu. Aba meha lounwen tani weiriei sedü irumu lárigiñe hamarieidun, ani mariñaguntu Bíbülia gasaanigu hamá. Gádürü-wein-gádürü meha irumu tau ani máfuriduntu meha “ténpulurugugiñe, aba terederun ñein eseriwida lun Bungiu áriebu wéyuagu, ayunara luma afurieida lun” (Luk. 2:37). Ruti meha áhuduraguni lun Heowá gurasu luma ugundani tun Ana.

13. Ru humá aban hénpulu luagu ida liña lan gayara lan híchugun umadagu buítiña gurasu woun dan le madari wamani hadan waduheñu.

 13 Gayarati giñe híchugun umadagu buítiña ha wámabaña lidan damuriguaü gurasu woun (Ari. 18:24). Ariha wamá aban hénpulu. Hírutu meha Paula saragu dan le tígirunbalin túguchu inarüni. Hénrenguti meha katei le tun, seingü meha irumu tau. Gama lumoun dan lárigiñe, aba tibihin dǘgüdaguaü túmagiñe Ann, aban prekursora to arufuduboun ínsiñeni tun ani beresetu tau saragu. Abahüdaguatu Paula: “Íbini mama lan meha niduhe Paula, íderagua lumutina ínsiñeni le tarufudubei nun”. Ábaya tariñagun: “Íderagua lumutina katei ligía lun nasigirun eseriwida lun Heowá”. Giributu túguchu Paula lidoun damuriguaü, ani aba tagundaarun Paula saragu. Ani gúndaatu giñe Ann, ladüga tíderagunu Paula lun mígirun tani teseriwidun lun Heowá.

14. Ida liña líderaguniwa wíchugun gurasu?

14 Súdiniti dan le lan warufudun ínsiñeni luma dan le weberesedun hau amu tídangiñe sun wanigi, aba wesefuragun woungua luéi saminaü mabuidunti. Gíbetiña íbirigu würiña, dandu ha maríeihaña kei ha mamarieidungiña, subudi hamuti dan le lan wíderaguni Bungiu lidan lapurichihóun uganu buiti aba lan wagundaarun saragu. Busentiña híchugun inebesei lun Heowá lau hadügüni lugundan. Añahein fiú hádangiñe ariha hamuti apurichihani keisi árani. Chóuruti ídeha wamá sun wagía  lun ñein lan úarani lidan damuriguaü dan le wasaminarun hawagun wíbirigu luma hawagun gürigia ha únbaña wapurichiha (Fili. 2:4). Ligía meha ladügübei apostolu Pábulu. Góunigi lumutiña íbirigu tesalónikana kei tadügüni “aban úguchuru”, ani ruti gurasu houn keisi aban úguchili lidan damuriguaü (aliiha huméi 1 Tesalónikana 2:7, 11, 12).

GURASU HADAN IDUHEÑU

15. Kátañatima san gánibalin buligasion lun harufudahani inarüni houn irahüñü?

15 Súdiniti giñe wasaminarun luagun ídemuei luma gurasu le wíchugubei houn iduheñu. Anihein dan hamuriahan íbirigu ha málügiña lidan damuriguaü ídemuei luma amu íbiri le lǘhali lidan inarüni lun líderaguniña arufudahei inarüni houn hasaanigu, o íbini lun híchugun aturiahani houn. Ariñagatu Lererun Bungiu agübürigu lan lúnbaña harufudahan houn hasaanigu (Ari. 23:22; Efe. 6:1-4). Anihein dan megei hamá agübürigu ídemuei, gama lumoun, moun lumuti híchuguni hani buligasion houn amu. Ligía súdini lubéi lun hayanuhan hama hasaanigu sun dan.

16. Ka lunbei waritaguni dan le lamuriahóun wama lun wíderagun aban irahü?

16 Anhein ariñaga aban úguchili woun lun waturiahanu Bíbülia luma lisaani, mosu waritaguni mama lan wanügüñein lilugaarun úguchili. Gayarati giñe lamuriahóun wama lun wíchugun aturiahani tídangiñeti Bíbülia lun lisaani somu gürigia le mínsiñehabuti lun inarüni. Lidan burí kesi le, lunti waritaguni mama lan ladüga wíderagun aban gürigia asubudirei Bungiu lun wasandiragun woungua kamá lúguchu o lúguchi wagía. Buiti giñe lun waturiahan hama irahüñü hábiñe dan le añahein lan hagübürigu ñein o lun ñein lan amu kristiánu le derebuguhali o waturiahan lidan aban fulasu le furanguti. Anhein wadüga ítara, míchubadiwa chansi lun hasaminarun gürigia wuriba. Lau lásügürün dan agurabúati lun hagübürigu haaña lanme irahüñü arufudaha houn, ítara kei lariñaguni Heowá.

17. Ida liña gayara lan híchugun irahüñü gurasu?

17 Nibureintiña ha afurendeirubaña asandira ínsiñeni luagu Bungiu ani gaganbadi hagía lun, barütiña gurasu dan le inebehabu hamá houn hagübürigu, dan le híderaguniña lau hemegeirun ani ídehatiña lun hawanserun sun haduheñu lidan hafiñen. Anihein meha aban wügüri gíriti Lamekü, ladügawagun Setü, le awinwandubei lubaragiñe Guran le lánina lidaani Noé, huduguati meha wügüri ligía lun Heowá. Ariñagati lidan aban profesía luagu Noé le liráü: “Íñaragua lumuti Bungiu múa, mósuti wawadigimaridun here lun wábunaguni; gama lumoun irahü le, lemeraaguagüdübadiwa”. Gúnfuliti lererun dan le lagidarunbalin Bungiu íñarawaguni ubouagugiñe (Agu. 5:29; 8:21). Uguñe weyu, ha irahüñü ha luéigiñebaña lóubadina áhuduraguni inarüniti, gayarati hanügün gurasu houn haduheñu. Gayarati híderaguniña haduheñu awandei óuchawaguni luma lun hásügürün lau ibagari lídangiñe óunwenbu asufuriruni le yarafaalibei, le lunbei wéiritima lan sügǘ meha lau Guran.

18. Kaba íderaguawa awanda íbini gaturobulin wamá?

18 Uguñe weyu, daritiña saragu míñunu gürigia gurasu dan le hafurieidun, dan le hasaminarun luagun hénpulu burí le tídanbei Bíbülia luma dan le hadügün umadaguaü hama amu lubúeingu Bungiu (aliiha huméi Sálumu 145:18, 19). Subudi wamuti Heowárügüñein lan gayara líchugun gurasu le magumuchaditi woun, ani chóuruti líderagubadiwa lan gurasu ligía lun wawandun furumiñeguarügü óuchawaguni o lénrengunga le úmati wagagibudagua, dandu guentó kei ámuñegü.