Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Sisi-hati irumu 2017

Subuditi san hun?

Subuditi san hun?

Anihein meha san resun lun lariñawagún “híwerutiña” houn ha alugurahabaña animaalu ténpulurugu Herusalén?

ABAHÜDAGUATI ewanhéliu lani Matéu: “Aba lebelurun Hesusu litenpulunrúgun Bungiu, aba labugaguniña sun alugurahatiña hama agañeihatiña ha ñéinbaña. Aba lagarabaaguni dábula burí le hadabulan ha asansihabaña seinsu ñein, luma hala ha alugurahabaña unhun. Aba lariñagun houn: ‘Lariñahare Bungiu tidan Lererun: “Lúbaana afurieiduni ligíaba tiri nuban”; anhein huguya, barǘ humaaru kei haban híwerutiña’” (Mat. 21:12, 13).

Arufudati abahüdaguni wéiriti lan meha liserun hebegidina ha alugurahabaña ténpulurugu. Según tariñaguni Misná (Keritot 1:7), anihein meha aban dan, lidan furumiñeti sígulu, aba lan liñurun hebegi bián unhun ha lánina sákürifisiu lun aban denariu le golu. Seinsu ligía, ligía meha lagañeirubei furumiñeguarügü nadagimeinti luagu wein-seingü weyu wadagimanu. Ígirati meha Lúrudu lun hadagaragüdün gudemetiña wagugua o unhun, gama lumoun, wéirihali meha haserun darí lun siñá lan meha hagañeihaniña (Fad. 1:14; 5:7; 12:6-8). Mínsiñeti meha katei le lun aban máisturu lidan halurudun huríu le gíribei Simeón ben Gamaliel, ligía aba lubéi larariragüdüni linumerun sákürifisiu le mósubei híchuguni gürigia. Kei resultóu, aba lararirun hebegi unhun darí lun gayara lan hagañeihan san lau tebegi aban.

Según le warihibei, garichati meha Hesusu saragu lun lagúarun houn ha alugurahabaña ténpulurugu “híwerutiña”, ladüga busentiña meha harisidun hádangiñe gürigia.