Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Sedü-hati irumu 2017

Ka uagu lunti lubéi wariñagun “alawaha huméi heowá”?

Ka uagu lunti lubéi wariñagun “alawaha huméi heowá”?

“Alawaha huméi Aburemei! Buiti lawarúniwa uremu lun Wabungiute! Lunti leremuhóun uremu bímeti lun!” (SAL. 147:1).

UREMU: 9, 152

1-3. a) Ídabuga san labürüdǘwa Sálumu 147? b) Ka gayaraabei wafurendeiruni dan le waturiahani Sálumu 147?

LIBE-AGEI dan, ayanuhatiwa buidu hawagu gürigia ha adügübaña somu katei buidu o ha arufudubaña aban igaburi kristiánu. Furanguti lunti lan wíchuguni sun uéiriguni lun Heowá. Yuuti lun libihini uéiriguni ligía luagu lanarime ubafu le warihibei lidan katei burí le ladügübei luma luagu óunwenbu ínsiñeni le larufudubei woun lau lóunahani Liráü lun lounwen hawagu gürigia.

2 Busenti meha abürühati Sálumu 147 lalawahani Heowá tídangiñe sun lanigi. Ani ínchaha lumutiña giñe amu gürigia lun halawahani luma (aliiha huméi Sálumu 147:1, 7, 12).

3 Ibidiñeti woun ka lan abürüdübalin sálumu le, gama lumoun, genegeti winwan lan meha dan le lasagarunbaliña Heowá ísüraelina Babilóniagiñe ani ábaya lanügüniña hárigoun Herusaléun (Sal. 147:2). Chóuruti alawaha lani abürühati le Heowá luagu ladügün lunya halawahani lumutuniña hageira. Gama lumoun, anihein meha amu burí resun lun líchugun uéiriguni lun  Heowá. Katei burí san resun ligía? Ani ka resun wámabei lun walawahani Heowá uguñe weyu? (Sal. 147:1).

LAGARANIHAÑA HEOWÁ “HOUN HA SÁNDIBAÑA ANIGI”

4. Ida liña meha funa san hasandiragun ísüraelina houngua dan le lesefurunbaliña Siru, ani ka uagu?

4 Samina wamá san ida liña lan meha hasandiragun ísüraelina ha Babilóniabaña houngua. Adügatiña meha babilóniana lun héherahan amu gürigia hau ísüraelina ani ábanha hariñagun houn lun heremuhan “leremuna Sión houn”. Gama lumoun, mabusenruntiña meha heremuhan ladüga günrinwagua lan Herusalén, resun le méinitimabei lun gunda hamá (Sal. 137:1-3, 6). Gáritu meha hanigi ani mégeitiña meha dǘgüdaguaü. Gama lumoun, ítara kei meha lariñaguni Heowá, aba lagañeiruni Siru, le lurúeite Pérüsia Babilónia ani aba lesefuruniña. Aba lariñagun luagu Heowá: “Ariñagaali nun lun nábunagun aban ténpulu lun Herusalén”. Ábaya lariñagun: “Furumiñeguarügü lubeiti hídangiñe, ha hádangiñetiña lumutuniña Aburemei, íderagualei Bungiu, leiba Herusalén” (2 Kro. 36:23). Chóuruti ruti lan sun katei le gurasu houn ísüraelina hagía dan le Babilóniañanu lubéi.

5. Según Sálumu 147:3, ida liña layusuruni Heowá lubafu?

5 Mámarügüñein meha lun néchani ísüraelina líchiga Heowá gurasu, ruti gurasu lun kada aban hádangiñe. Ítara liña giñe lasuseredun uguñe weyu. Ariñagati abürühati Sálumu 147 lagaranihaña lan Heowá “houn ha sándibaña anigi, güragualei biti le hawagubei” (Sal. 147:3). Dan le sandi wamá o dan le anihein lan lanarime íruni wawagu, gayaraati wachoururuni busén lan Heowá líchugun gurasu woun luma lun lareidaguagüdüni igarigu le tídanbei wanigi (Sal. 34:18; Isa. 57:15). Ruti erei woun luma lichú aau lun wagagibudagun luma furumiñeguarügü turóbuli (Sant. 1:5).

6. Ka larufudahabei Sálumu 147:4 woun? (Ariha huméi dibuhu le lídanbei lagumeseha arütíkulu).

6 Arihati abürühati sálumu sielun ani aba lariñagun Heowá lan “ariñagubei átiribaña lan meha waruguma ru ligía tiri kada aban” (Sal. 147:4). Ka meha uagu lagumesera abürühati sálumu ayanuha hawagu waruguma? Samina waméi le: gayaraati meha larihiniña waruguma, gama lumoun, ibidiñeti meha lun átiriñanu lan. Uguñe weyu, gíbetimatiña waruguma gayara lan harihin aturiahatiña siensia. Le linarün katei, ariñagatiña añahein lan saragu milu míñunu waruguma ani anihein lan saragu sétanu waruguma huáriñugu. Gama lumoun, siñati hasubudiruni lau ichouruni átiriñanu lan. Búngiurügüñein gayara labahüdüniña ani ruti tiri kada aban. Mini lan le espechalitu lan kada aban tídangiñe lun Heowá (1 Ko. 15:41). Ka larufudahabei le woun? Ítara lan kei subudi lani Bungiu halíañoun lan kada waruguma súnwandan, subudi lumuti giñe halíañadiwa lan, ida liña lan wasandiragun woungua luma ka lan lemegeirubei kada aban wádangiñe.

7, 8. a) Ka gunfuranda lubéi Heowá wawagu? b) Ka hénpulu arufudubalin gunfuranda lániwa Heowá?

7 Gunfuranda lumuti Heowá turobuli le úmabei wagagibudagua kada aban wádangiñe ani gabafuti lun líderaguniwa (aliiha huméi Sálumu 147:5). Anihein dan genege lan woun weiri lan lénrengun waturobulin darí lun siñá lan wasigirun wabaruaguoun. Gama lumoun, subudi lumuti Bungiu le wásiñarubei adüga ani “subudi lumuti buidu luagu múa lan wabuñabei” (Sal. 103:14). Kei le gafigoun wabéi, héiguatiwa lidoun ligiaméme charati saragu wéiyaasu. Chóuruti súngubei lan wagía asakürihatiwa  luagu somu katei le wariñagubei, luagu somu ayumahani wuribati le wasandirubei somu dan o dan le wasandirun gimugaü. Íbini masuseredun lan ni kata lídangiñe le lun Heowá, gunfuranda lumutiwa buidu (Isa. 40:28).

8 Háfuga ariha wamaali lan ida liña lan layusuruni Heowá lubafu lun líderaguniwa ararama lun turóbuli (Isa. 41:10, 13). Ariha waméi le asuseredubei tun aban prekursora gíritu Kyoko. Dan le tóunahounbei eseriwida lidan amu fulasu, aba teferidiruni tuguraasun. Ida liña san tíchugun fe gunfuranda lani Heowá gádantu? Daritu Kyoko saragu íbirigu ha gunfuranda hamutu lidan iseri damuriguaü le ñein tubéi. Sandítu kamá lariñaguña Heowá tun: “Hínsiñetibu nun, ani mámarügü ladüga prekursora lan buguya, hínsiñetibu nun ladüga nisaani buguya ani derege baali bibagari nun. Agurabatina lun gunda ban luagu nani ban Gefentu”. Ida liña larufuduni Suntigabafu hun mébehati lan lualin lichügü?

RU LUMUTI HEOWÁ LE WEMEGEIRUBEI WOUN

9, 10. Ka un letenira Heowá furumiñe? Ru humá aban hénpulu.

9 Háfuga anihein lan dan wadiheridun luagu katei le wemegeirubei kéiburi éigini. Gama lumoun, adüga lumuti Heowá Ubóu lun líchuguni éigini le lemegeirubei sun le gabagaribei lun, hóugüda lumutiña íbini “harahüñü sanadi dan le hayahun”, kei lariñaguni Sálumu 147:8, 9 (aliiha huméi). Anhein hóugüda lubaliña Heowá dunuru ha, gayaraati wachoururuni líchugubei lan giñe le wemegeirubei woun (Sal. 37:25).

10 Le súdinitimabei, ru lumuti lan Heowá le wemegeirubei woun lun héreñu lan wafiñen. Ru lumuti giñe lidarangilan woun, “le wéiritimabei luéi sun subudi” (Fili. 4:6, 7). Samina wamá luagun le asuseredubei lun Mutsuo tuma lani weiriou, ha arihibalin lídehan Heowá dan le ladagarunbei aban tsunami Hapón lidan irumu 2011. Séfutiña ladüga hawarirun tábulugun haban, gama lumoun, féridi hamuti libe-agei hamegen. Sügǘ hamuti guñoun diliti ligía lidan aban rumu lidan libiaman fuló tani haban, to wuribaruboun. Larugan binaafin, aba háluahan somu katei le lunti líchugun gurasu houn lidan habagari keisi kristiánugu. Ábanrügüñoun líburu hadarirun, Anuario de los testigos de Jehová 2006. Aba larihini Mutsuo tani subtitulu le gíribei “Los tsunamis más mortíferos de la historia”. Layanuhaña luagu aban hárabaganali le asuseredubei lidan ubouhu Sumatra lidan irumu 2004 ani adügati lun lasuseredun tsunami le wéiritimabei lidan sun dan. Aba laliihani Mutsuo sügǘ ligía tuma lani weiriou lau águiraü hágurugu. Sanditiña líchuguñein lan Bungiu ínsiñeni luma gurasu le hemegeirubei houn. Ariha hamuti giñe línsiñehabu Heowá dan le hanügünbei hábirigu daüguaü luma éigini houn. Gama lumoun, létima íchugubei gurasu houn, bisida le hadügübei íbirigu ha tóunahabaña lóundarun Heowá lidoun hani damuriguaü. Ariñagati Mutsuo: “Sanditina anihein lan Heowá wóubagiñe óunigirawa. Ruti saragu gurasu woun”. Kei aubei warihei, téniti Heowá furumiñe lun le wemegeirubei lun wakipuruni wamadagua luma ani lárigiñe aba letenirun lun le líbiri wemegeirun.

IDA LUBA WASAGARUN BUITI LÍDANGIÑE LÍDEHAN HEOWÁ

11. Ka lunbei wadügüni lun wasagarun buiti lídangiñe lídehan Heowá?

11 Aranseñu liña Heowá súnwandan lun líchugun awalidaguni houn ha ǘnabugubaña (Sal. 147:6aTNM). Ka lunbei wadügüni lun wasagarun buiti lídangiñe lídehan  Heowá? Wadügün aban lubuidun umadaguaü luma. Lun wadügüni, lunti ǘnabugu wamá (Sof. 2:3). Gürigia ha ǘnabugubaña agurabatiña laransehani Heowá marichaü luma lun lagidaruni turobuli le adügübei lun hasufurirun. Gúndaati hau burí gürigia ha.

12, 13. a) Ka lunbei madügün wamani anhein busén wabéi líderaguniwa Heowá? b) Ka lunbei wadügüni lun wagundaaragüdüni Bungiu?

12 Luagu amu oubaü, ǘnabugüda lumutiña Bungiu ha salufuribaña (Sal. 147:6b). Mama huraraü katei le. Anhein busén wabéi wasagarun buiti lídangiñe línsiñehabu Heowá ani lun masufurirun wamani ligañi, lunti iyereehabu wamá lun le iyereegubei lun (Sal. 97:10). Kei hénpulu: lunti iyereegu lan magíaguni woun. Mini lan le lunti lan wadisedun luéi furumiñeguarügü katei le gayaraabei ladügün lun wéiguadun lidoun, kei burí tariyawagun iyawaü lánina agamariduni (Sal. 119:37; Mat. 5:28). Háfuga hénrengubei lan áfaaguni le, gama lumoun labinirubadiwa Heowá ánhawa adiseda luéi katei burí le.

13 Lun gayara lan wagañeiruni wuribu le, lunti wamuriahan ídemuei luma Heowá. Magundanbei wau ánhawa afiñera wawougua o hawagu amu gürigia (Sal. 147:10). Le lunbei wadügüni wayumuragun lun lun líderaguniwa. Mítaranti Heowá kei gürigia ha íchugubaña adundehani, mabuchadunti luagu aganbei wayumuragun lun. Ariñagati Sálumu 147:11: “Ha inebehabubaña lun, hagía áubaña lagundaara, ha hemenigibaña luagu línsiñehabu”. Ligíati, chóuruti ladügüba lan ínsiñeni le lasandirubei wawagu lun lasigirun íderaguawa lun wárügüdagun woungua luéi luriban ayumahani.

14. Ka íchugubei saragu gurasu lun abürühati Sálumu?

14 Chóurugüda lumuti Heowá woun líderagubaña lan lubúeingu ha mégeibaña ídemuei. Lasaminaruña meha abürühati Sálumu 147 luagu hagiribudun ísüraelina Herusaléun dan le lariñagunbei luagu Heowá: “Ligía arumadahabalin lidaünda bubenari biniláña sun birahüñü lurageirugu uburugu. Ligía anügübalin darangilaü buburuguterugun” (Sal. 147:13, 14). Ruti meha dǘgüdaguaü lun abürühati Sálumu lasubudiruni lederebudagüdübei lan meha Bungiu lubenari Herusalén lun lóunigiruniña lubúeingu.

Ida liña tíderaguniwa Lererun Bungiu dan le wasufurirun saragu? (Ariha huméi párafu 15 darí 17).

15-17. a) Ida liña san gayara lan wasandiragun woungua, ani ida liña layusurunu Heowá Lererun lun líderaguniwa? b) Ru humá aban hénpulu le arufudubalin íderagua lumutiwa lan Bungiu tau Lererun “furese”?

15 Gayarati wagagibudagun luma sügǘ hénrenguti le adügübei lun wadiheridun saragu. Gama lumoun gayarati líchugun Heowá lichú aau woun. Ariñagati abürühati sálumu luagu Bungiu: “Óunaha lumuti lererun lidoun múa, ani éibaaguati lererun furese”. Ariñagati giñe: “Adüga lumuti niewe kamá hamuga tura mudún, afuruha lumuti serenu kamá hamuga kaliki” ani “óunaha lumuti yelu”. Lárigiñe aba lálügüdahan abürühati sálumu: “Lau lidiliga le lóunahabei” kaba awandei? Lagumuhóun aba lariñagun: “Óunaha lumuti lererun, aba larürüdaguagüdüni” (Sal. 147:15-18). Ka wafurendeirubei lídangiñe katei le? Gayarati lan lahandilihani Heowá niewe luma serenu lugundun subudi lumuti sun katei ani wéiriti lubafu. Ligía gayara lubéi giñe líderaguniwa lun wiñuragun lídangiñe furumiñeguarügü turóbuli.

16 Adundeha lumutiwa Heowá uguñe weyu tau Bíbülia to Lererun. Gayaraati wariñagun éibaaguati lan lererun furese lugundun ligía íchugubalin adundehani le wemegeirubei woun dan le wemegeiruni. Samina wamá luagun buiti le wibihibei ladüga tídehan Bíbülia, agumeiraguagüdüni  to líchuguboun “musu úaraguati”, Broadcasting, páhina lidan Internet jw.org, wéiyaaña lidan afiñeni hama íbirigu (Mat. 24:45). Ma adundeha lumutiwa Heowá “furese”, kei lariñaguni abürühati sálumu?

17 Saminatu yebe aban íbiri gíritu Simone mebegi tan lun Bungiu ani siñabei lan meha lagundaarun tau. Íbini ítara mígirun tumuti tafurieidun lun amuriaha ídemuei luma. Ani áfaaguatu giñe lun tasigirun aturiahoun Bíbülia. Sandí tumuti san tubafu lererun Bungiu? Ariñagatu: “Meberesenga ka lan sügǘ úmabei nagagibudagua, súnwandan nasandiruni lubafu luma ladundehan Heowá”. Íderagua laaru katei le lun takipurun aban igaburi buiti.

18. Ka uagu hasandirunbei rúhali lan Heowá aban lubuidun chansi hun, ani ka resun húmabei lun halawahani?

18 Subudi lumuti meha abürühati sálumu anihein lan meha aban lubuidun chansi hama ísüraelina lugundun anúadira laaña meha Bungiu lun líchugunu “lererun” houn ani “rulei lugumadin luma lilurudun” (aliiha huméi Sálumu 147:19, 20). Gayaraati giñe wasandiragun woungua ítara ladüga wagíarügüñein lanúadira Heowá lun wanügüni liri. Subudi wamuti Bungiu, ani Lererun adundehabaliwa. Ligía gayara lubéi lumadagu wamá. Ani wéiriti weteingiruni luagu. Ítara kei abürühati Sálumu 147, gébunati walawahani Heowá luma lun wamisurahan amu gürigia lun hadügüni ligiaméme.