Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Sedü-hati irumu 2017

“Hayahua hama ha ayahubaña”

“Hayahua hama ha ayahubaña”

“Ligía rúmeme humá lubéi gurasu luma erei húniwagua” (1 TESA. 5:11).

UREMU: 53, 28

1, 2. Ka uagu megei wabéi wayanuhan luagu ida luba lan wíchugun gurasu houn ha eferidirubaña haduheñu lidan óunweni? (Ariha humóun iyawaü to lídanboun lagumeseha arütíkulu).

ARIÑAGATU aban íbiri gíritu Susi: “Lárigiñebei lounwen wasaani, sügütiwa kéiburi aban irumu lau lanarime igarigu”. Abahüdaguati giñe aban íbiri “úa lan dimurei lun lafuranguagüdüni lanarime igarigu” le lasandirubei dan le tóunwenbei lani weiriou sódini. Híruti sügǘ hamá saragu gürigia lídangiñe sügǘ libe burí le. Háfuga añahein saragu íbirigu magurabuntiña yebe lóunweba lan somu haduhe lubaragiñe Arümahedón. Anhein feridihadün lubéi o anhein féridihali lubéi somu gürigia le hasubudirun aban liduhe o aban lumada lidan óunweni, háfuga hálügüdagun hungua: “Ka san ídemuei gayarabei lichugún lidan kesi burí le?”.

2 Gayarati aganbadiwa lan hariñagun gürigia areidaguagüda lani dan sun katei. Gama lumoun, ítara liña san súnwandan? Ariñagatu aban kristiána to hilaali tani weiriei: “Afiñetina buídutimati lan wariñagun le lan badügübei lau bidaani areidaguagüdübadibu”. Ítara liña tigarigu anigi kei furumiñeguarügü gáriti: ánhawa etenira lun lau ínsiñeni, areidagueina luba murusun murusun. Ligíati, ka gayarabei wadügüni lun lawalidagun hagarigu ha eferidirubaña somu haduhe o hamada lidan óunweni?

 HEOWÁ, BUNGIU LE ÍCHUGUBEI “GURASU WOUN SÚNWANDAN”

3, 4. Ka uagu chouru wabalin gunfuranda lani Heowá igarigu le wasandirubei dan le lounwen somu waduhe?

3 Chóuruti lúmagiñe lan Heowá, Wáguchi le gudemehabubei, liabin gurasu le wemegeirubei (aliiha huméi 2 Korintuna 1:3, 4). Heowá íchugubalin hénpulu le buídutimabei luáguti gúnfurandawa lan le hasandirubei amu. Ariñagati Heowá houn lubúeingu lau ichouruni: “Au, au guánarügü rútina gurasu [h]un” (Isa. 51:12; Sal. 119:50, 52, 76).

4 Súfuri laali giñe Wáguchi le gudemehabubei hounwen gürigia ha hínsiñetiña lun saragu kéiburi Abüraámü, Isaakü, Hakobu, Moisesi luma urúei Dawidi (1 Lur. 12:6-8; Mat. 22:31, 32; Adü. 13:22). Ariñagatu Bíbülia busenhali lan Bungiu lachülürün luéyuri lásaaragüdüniña gürigia lídangiñe óunweni (Hob. 14:14, 15). Lídanme dan ligía, gúndaabaña ani buídubei giñe hátuadi. Haritagua waméi ariha lani giñe Bungiu luriban óunweni le lasufurirubei Liráü. Ariñagatu Bíbülia wéiriti lan meha línsiñe Hesusu lun Bungiu (Mat. 3:17). Siñati ni lun wasaminaruni lanarime igarigu le lasandirubei Heowá (Huan 5:20; 10:17).

5, 6. Ida liña líchugun Heowá gurasu woun?

5 Gayarati wachoururuni líderagubadiwa lan Heowá. Ligía moun lumuti lubéi wasaminaruni bián wéiyaasu lubá wadaarunu wanigi lun wabahüdaguni sun le wasandirubei lun. Ruti gurasu woun wasubudiruni gunfuranda lani Heowá wagarigu ani ru lani gurasu le wemegeirubei woun. Ida liña san ladügüni?

6 Adüga lumuti lau “gurasu lúmagiñe [s]ífiri [s]andu” (Adü. 9:31). Füramaseti Hesusu líchugubei lan Wáguchi le siélubei sífiri sandu “houn ha amuriahabalin” lau sun lugundan (Luk. 11:13). Ariñagatu Susi, to uáguboun wayanuha lidan furumiñeti párafu: “Huduguatiwa saragu wéiyaasu ayumuragua lun Heowá lun líchugun dǘgüdaguaü woun. Ani sagü wadügüni sandí wamuti lóunigirunu lidarangilan Bungiu wanigi luma wasaminan” (aliiha huméi Filipuna 4:6, 7).

HESUSU, FÁDIRI ÍÑUTIMATI LE GUNFURANDABALIWA

7, 8. Ka uagu gayara lubéi wachoururuni luagu líchuguba lan Hesusu gurasu woun?

7 Lau le ladügübei luma le lariñagubei Hesusu dan le ya lubéi ubouagu, arufuda lumuti luagu gunfuranda lani Heowá hagarigu gürigia, arufuda lumuti giñe línsiñehabu luma lugudemehabu (Huan 5:19). Óunaha lumuti Heowá Hesusu ubouagun “awalidaguagüdaña ha nidiheribaña” luma “ámalihaña sun ha hírubaña” (Isa. 61:1, 2; Luk. 4:17-21). Gayarati meha harihini gürigia gudemehabu lan Hesusu, gunfuranda lani hasufurirun ani busén lan líderaguniña (Ebü. 2:17).

8 Dan le meha nibureingili Hesusu, chóuruti gagibugua lan luma lounwen somu liduhe o lumada. Kéiburi dan le 20 lubéi irumu lau, genegeti aba lan lounwen Hosé, lúguchi le agüriahabalin. * Samina wamá luagun lénrengun lun aban gürigia hínsiñehabuti kei Hesusu lagagibudagun luma igarigu le lasandirubei luma le tasandirubei lúguchu hama lamulenu.

9. Ida liña meha larufuduni Hesusu gunfuranda lani hagarigu gürigia dan le lóunwenbei Lásaru?

9 Dan le lagunfulirunbalin lani ministeriu, arufudati Hesusu gunfuranda lani hagarigu gürigia ani gudemehabuti meha houn. Kéiburi dan le lóunwenbei Lásaru le lumada, subudi lumuti meha láguyuguagüdübei lan. Íbini ítara, dan le larihinbalin lanarime  igarigu le tasandirubei María tuma Marta, aba tañuludagun lanigi darí lun aba lan layahun (Huan 11:33-36).

10. Ka uagu gayara lubéi wachoururuni gárimemegili lan lun Hesusu larihiniwa asufurira?

10 Ida liña líderaguniwa uguñe weyu wasaminarun luagun le ladügübei Hesusu lidan binadu dan? Ariñagatu Bíbülia: “Masansiragunti ligaburi Hesukrístu; ligiaméme gúñaarü, uguñe, luma súnwandan” (Ebü. 13:8). Ligía “íchugubalin ibagari le tímatimaati”, subudi lumuti ka lan igarigubei ani ligía gayara lubéi “líderaguniwa lidan [...] wóuchawagun” (Adü. 3:15; Ebü. 2:10, 18). Ligía gayara lubéi wachoururuni gárimemegili lan lun larihiniwa asufurira. Gunfuranda lumuti wagarigu ani ruti gurasu woun dan le wemegeiruni (aliiha huméi Ebüréu 4:15, 16).

“GURASU LUMA DǗGÜDAGUAÜ” TÍDANGIÑE LERERUN BUNGIU

11. Kátima lídangiñe bérusu burí le íchugubei gurasu hun?

11 Amu luéi abahüdaguni luáguti lounwen Lásaru, le gáribei lun Hesusu saragu, anihein saragu bérusu burí tidan Bíbülia le gayarabei líchugun gurasu woun. Ani maweiriduntu wanigi luagu le, ladüga “sun le ariñawagúbei tidan Lererun Bungiu lúmagiñe binarü, lun larufudahóun woun labürühóua; bürüwati meha dimurei burí ligía lun wanügün gurasu luma dǘgüdaguaü lídangiñe, gayara láamuga wemenigidúntima luagu Bungiu” (Rom. 15:4). Féridihadün san somu hiduhe lidan óunweni? Anhein ítara liña lubéi, gayarati líchugun bérusu burí le asigirubei saragu dǘgüdaguaü hun:

  • “Yarafati Aburemei lun lesefuruniña ha gáribei hasandirunu hanigi, ha féridi hamaalibei hemenigin” (Sal. 34:18, 19).

  • “Labadinagua idiheri le agibedagubei nisaminanrugu, rútibu dǘgüdaguaü nun luma ugundani” (Sal. 94:19).

  • “Wabureme guánarügü Hesukrístu luma Wáguchi Bungiu, le arufuda láalibei línsiñehabu woun lau lareini, ru ligía ámalihouni le magumuchaditi woun luma aban emenigini buiti, rula dǘgüdaguaü tun hanigi, derebugugüda laünme” (2 Tesa. 2:16, 17). *

RUTI DAMURIGUAÜ SARAGU GURASU

12. Ka katei súdiniti gayarabei wadügüni lun wíchugun gurasu houn amu?

12 Gayarati giñe hadarirun ha féridihañabaña aban haduhe lidan óunweni gurasu lidan damuriguaü (aliiha huméi 1 Tesalónikana 5:11). Ida luba wíchugun erei luma gurasu houn ha hírubaña? (Ari. 17:22). Haritagua waméi anihein lan “lidaani ámanichuni luma lidaani adimurehani” (Apur. 3:7). Ariha waméi le hariñagubei bián kristiánugu. Ariñagatu aban gürigia hilaali tani weiriei gíritu Dalene: “Mégeitiña ha egeburihabaña hariñaguni le hasandirubei luma le hasaminarubei. Ligíati, waganbuniña madüraagun wameime hayanun ligía katei buídutimati le gayarabei wadügüni hawagu”. Áfaraguati aban tíbiri Junia lungua, ani ariñagatu: “Íbini siñá lan gunfuranda wamani le hasandirubei gürigia ha eferidirubaña somu haduhe, le súdinitimabei busén wamá gunfuranda wamaniña”.

13. Ka lunbei waritaguni?

13 Luagu amu oubaü, lunti waritaguni amu lan ligaburi lasandiruni luma larufuduni kada gürigia ligarigu. Anihein dan lérügüñein lan asandirubalin igarigu asubudirei ka lan lasandirubei, ani gayarati hénrengu lan lun lafuranguagüdüni. Luagu katei le tayanuha Bíbülia dan le tariñagun: “Subudi tumuti anigi sun tigarigu, ani siñati tafanreinhani tugundan hama terencha” (Ari. 14:10). Ani íbini anhein lariñaga gürigia le lasandirubei,  háfuga úabei lan gunfuranda hamani ha híbiri ka lan labusenrubei lariñagun.

14. Ka amu katei gayarabei wadügüni lun wíchugun gurasu houn ha asufurirubaña?

14 Ladüga sun katei le, háfuga hénrengu lan woun wasubudiruni kaba lan wariñaga houn ha wéiribaña igarigu. Íbini ítara, ariñagatu Bíbülia: “Ha chúbaña aau, areidaguagüdatiña lau hadimurehan” (Ari. 12:18). Daritiña saragu kristiánugu ida luba lan híchugun gurasu houn amu tidan garüdia Cuando muere un ser querido. * Lau sun lira, lidan saragu dan, buídutimati wafalaruni adundehani le: “Hayahua hama ha ayahubaña” (Rom. 12:15). Ariñagatu aban íbiri hilaali tani weiriei gíritu Gaby: “Lau águiraü narufudei le nasandirubei. Ligía ru lubéi gurasu nun hayahuahan numadagu numa. Lidan lidaani igarigu ligía, masandiraguntina nungua nábugua”.

15. Anhein hénrengu lubéi woun wariñagun somu katei houn gürigia, ka gayarabei wadügüni lun wíchugun gurasu? (Ariha huméi giñe rekuaduru “ Le gayarabei wariñaguni lun wíchugun gurasu houn amu”).

15 Anhein hénrengu lubéi woun wariñaguni katei houn gürigia, háfuga ménrenguntimabei lan woun wóunahan aban tiraüraü gárada houn, aban gárada luéigiñe Internet o wabürühan fiú dimurei luéigiñe gágamuru. Gayarati wabürüdün aban bérusu le ruti gurasu, wabahüdahan somu katei buiti luagu óunweti o wayanuhan luagu somu katei le waritagubei lau ínsiñeni. Ariñagatu Junia: “Madaritina dimurei lun nariñaguni ida liña lan tíderagunina gárada burí to neresibiruboun lau somu uganu le ruti gurasu o dan le tamisurahanina somu íbiri lun wásügürün dan úara. Adügati katei burí le lun naritaguni añahein lan gürigia ha hínsiñehabutiña nun ani góunigi hamutina”.

16. Ka amu igaburi buídubei lun wíchugun gurasu?

 16 Huuti giñe wafurieidun hawagu ha asufurirubaña luma wafurieidun hama. Inarüni hénrengu lan wafurieidun lidan kesi burí le. Háfuga wayahun ani aba ladüraagun wamalali. Gama lumoun, gayarati lagalumaruni furíei hagarigu. Ariñagatu Dalene, to uáguboun layanuhóua lidan párafu 12: “Anihein dan, dan le hayabin íbirigu íchiga gurasu nun, aba nálügüdüniña anhein gayara lubéi hadügün aban furíei. Dan le hagumeseruni furíei, hénrenguti houn hayanuhan. Gama lumoun, aba abuidureina lan hamalali ani adügati lira lun nibihin gurasu lau hafuríeidun. Adügati lere hafiñen, hínsiñehabu luma berese hamá nau lun léredun nafiñen”.

SIGÍ WAMÁ ÍCHIGA GURASU HOUN WÍBIRIGU

17-19. Ka uagu lunti lubéi wasigirun íchiga gurasu houn wíbirigu?

17 Kei le amu habéi gürigia hawariuagua, mama ligiaméme lidura hagarigu. Ligíati, mámarügüla lidan furumiñeti burí weyu wáluaha wídehan, dan le añahein lan saragu iduheñu hama umadagu yarafa. Lunti giñe wídehan lidan hati burí le asigirubei, dan le giribuhaña ha híbiri lidoun haberesegun. Ariñagati Ariñawagúni 17:17: “Aban umadaü, súnwandan buidu lan, ítara liña kei aban íbiri lidan lidaani idiheri”. Lunti wáfaagun lun wíchugun gurasu lidan sun dan le hemegeiruni gürigia (aliiha huméi 1 Tesalónikana 3:7).

18 Haritagua waméi gayarati lan lagiribudun íruni furumiñeguarügü oura. Háfuga dan le lagunfulirun gürigia irumu lúmagiñe lounwen o lúmagiñe lamarieidun, o háfuga dan le haganbun somu uremu, harihin somu iyawaü, hadügün somu katei o íbini somu íhemeni, o aban amuri o somu dan lidan irumu. Gürigia ha eferidirubalin hani weiriei o hani weiriou lidan óunweni, háfuga hénrengu lan houn hadügün fiú katei luagu furumiñeti wéiyaasu sin hani paaná, kéiburi houdin lidan aban adamurini o lidan aritaguagülei lánina lounwen Kristu. Abahüdaguati aban íbiri le óunwebei lani weiriou: “Agurabatina yebe wéiribei lan ligari nun nagunfulirun ábanya irumu lúmagiñe namarieidun sin nani weiriou, ani gáriti nun. Gama lumoun, adügatiña saragu íbirigu aban liraüraü adamuridaguni hau numadagu ha úmabei buídutima lan nanaagun nungua lun másügürün nani weyu ligía nábugua”.

19 Gabaroun waméi mámarügüñein lan lidan weyu burí espechaliti hemegeira gürigia gurasu. Ariñagatu Junia: “Libe-agei dan, huuti ídemuei le ichugúbei bun dan le ua lan ni kata espechaliti lunti lasuseredun. Dan le bibihin ídemuei lidan magurabun bani ruti saragu dǘgüdaguaü”. Inarüni siñati lan wagidaruni sun íruni le hasandirubei ha egeburihabaña. Gama lumoun, anihein saragu katei le gayarabei wadügüni lun wíchugun gurasu houn (1 Huan 3:18). Haritaguatu Gaby: “Rútina óunwenbu seremei lun Heowá ladüga íderagua hamutina wéiyaaña lidan afiñeni lau ínsiñeni ani mígirun hamutina nábugua lidan dan hénrenguti. Adügatiña lun nasandiruni anihein lan Heowá óunigirana súnwandan”.

20. Ka uagu ru lubéi lani Heowá füramasei gurasu woun?

20 Ruti gurasu woun wasubudiruni lagumuchuba lan Heowá, Bungiu le íchugubei gurasu, lau sun igarigu lun súnwandan danme le “haganbuni sun hilaguaaña” lumalali Kristu ani ábame hasaarun lídangiñe óunweni (Huan 5:28, 29). Füramase haali Bungiu lagumuchuba lan lau “óunweni lun súnwandan” ani “laragahabei [lan] águiraü luéigiñe hagu sun gürigia” (Isa. 25:8). Danme le lachülürün weyu ligía, lubaragiñeme wayahun “hama ha ayahubaña”, sun ha lúnbaña hawinwandun ligibuagu Ubóu hagundaaruba “hama ha gúndaabaña” (Rom. 12:15).

^ par. 8 Arufudatu Bíbülia wínwangili lan meha Hosé dan le 12 lubéi irumu lau Hesusu. Gama lumoun, míridunwati Hosé dan le ladügünbalin Hesusu furumiñeti lani milaguru —lasaliraguagüdün duna diweinme— ni lidan amu burí ókaasion. Dan le luáguñein lubéi wagabu Hesusu, ariñagati lun apostolu Huan lun lóunigirunu María, to lúguchu. Chóuruti madügün lubéi lan hamuga lira lun hamuga meha wínwangili lan lúguchi (Huan 19:26, 27).

^ par. 11 Anihán burí ámuya bérusu le íchugubei gurasu houn saragu íbirigu: Sálumu 20:1, 2; 31:7; 38:8, 9, 15; 55:22; 121:1, 2; Isaíasi 57:15; 66:13; Filipuna 4:13, luma 1 Féduru 5:7.

^ par. 14 Ariha huméi giñe arütíkulu “Jesús supo consolar a sus amigos”, tidan garüdia La Atalaya to lánina 1 lidan unsu-hati, 2010.