Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Sedü-hati irumu 2017

Álügüdahani burí le hadügübei aliihatiña

Álügüdahani burí le hadügübei aliihatiña

Buiti san lun gama lan aban kristiánu aban bisilédu, aban aragabusu o amu tuwuyeri áruma lun lóunigiragun lungua hawéi amu gürigia?

Gayaraati háluahan kristiánugu ida luba lan hóunigiragun houngua o hesefuruni habagari. Gama lumoun, lunti gabaroun hamani adundehani burí le tídanbei Bíbülia. Adügati adundehani burí ligía lun warihini mabuidun lan tayusurún bisilédu, aragabusu tuma amu tuwuyeri áruma lun wóunigiragun woungua hawéi amu gürigia. Ariha wamá saragu katei le gayaraabei líderaguniwa lun desidírü wamá buidu.

Sagüráuti habagari gürigia lun Heowá. Subudi lumuti meha Dawidi, le abürühati sálumu, luagu lúmañein lan Heowá “lubuñe ibagari” (Sal. 36:9). Ligíati, anhein desidírü aban kristiánu láluahan ida luba lan lóunigiragun lungua luma lóunigiruni lumegen, ladügübei sun liyaraati lun mounwen lan ni aban gürigia lun mábürühan lan duru luagun (2 Lur. 22:8; Sal. 51:14).

Inarüni gayara lan lafarún aban gürigia hilagubei lau furumiñeguarügü katei. Gama lumoun, inarüni giñe ménrenguntima lan lafarún aban gürigia tau aban áruma, dandu anhein samina laali lubéi gürigia ligía ladügüni o anhein masaminarun lubalin. * Ani anhein giñe hanufudeguali lubéi híweruti ani aba larihin anuhein lan áruma luma le aban gürigia, gayaraabei laweiridagun katei ani gayaraabei lounwen aban hádangiñe.

Aban guñoun lubaragiñe lounwen Hesusu, ariñagati houn lani disipulugu lun hibihin aban eféin, gama lumoun, mama meha lun hóunigiragun houngua (Luk. 22:36, 38). Lariñagunbei houn ítara, lun larufudahan aban katei súdiniti houn: lun lan mawuribuhan hamá, ni dan le añahein lan bandi gürigia  tau áruma áluaha hageindagun hama (Luk. 22:52). Dan le lagayuahanbei Féduru tau lefeinte luagu lidamun fádiri le íñutimabei, aba lariñagun Hesusu lun: “Areidabóun befeinte”. Lárigiñe, aba larufudahan aban inarüni súdiniti, aban eweridihani le adundehabalin habagari kristianugu chülǘ lumoun dan le: “Sun ha áfarahatiña tau eféin, tauba giñe eféin hafarúa” (Mat. 26:51, 52).

Kei lariñaguni Mikeasi 4:3, adaaguatiña lubúeingu Bungiu “awouhagülei tau hefeinte” ani adüga hagía “líbaaha sagadi lau arufun”. Subudiwatiña kristiánugu inarünitiña kei gürigia darangilatiña. Falá hamuti adundehani le labürühabei apostolu Pábulu lau ladundehan Bungiu: “Mafayeira humá wuribani luagu wuribani lun ni aban” ani “adüga huméi sun le huáraati lun habagaridun lidan darangilaü hama súngubei” (Rom. 12:17, 18). Súfuriti saragu lénrengunga, dariguati lungua lidan denchaü háhaburugu “híwerutiña” (2 Ko. 11:26). Gama lumoun, madüraagun lumuti adundehani le tídanbei Bíbülia lun lesefuragun lungua. Lubaragiñe lira, afiñeti luagu Bungiu luma luagu lichú aau le tídanbei Bíbülia, le buídutimabei sügǘ tau “áruma to lánina wuribu” (Apur. 9:18).

Wéiritimati lebegi ibagari houn kristiánugu sügǘ lau umegeguni. Subudi wamuti mama lan “luéigiñe liibe lúmati gürigia labagarida” (Luk. 12:15). Anhein ayarafada aban híweruti wawagun tau áruma lun líweruhaniwa, lunti wayanuhan lun lau darangilaü. Anhein madisedun wawéi, lunti duari wamá ani ábame wafalaruni leweridihan Hesusu le: “Le anügütu babite buéi, ruboun giñe bisimisin lun”. Mini lan le lunti lan wíchuguni sun le labusenrubei lun (Mat. 5:39, 40; Luk. 6:29). * Inarüni buídutimati lan lun wóuserun lau duari. Hénrengutimabei hárügüdüniwa híwerituña anhein marufudahan wamá wámati ani anhein hasubudira wabesinanigu luagu hínsiñe lan darangilaü woun ladüga gefentiwa lan luagu Heowá (Ari. 18:10; 1 Huan 2:16).

Inebeti hasaminan amu houn kristiánugu (Rom. 14:21). Anhein asubudirúa anuhein lan aban áruma luma aban hádangiñe lílana damuriguaü lun lóunigiragun lungua hawéi amu gürigia, gayaraati taweiridun hanigi fiú íbirigu o hasandiragun houngua wuriba. Línchahabadiwa ínsiñeni lun wáluahani le buídubei houn amu lubaragiñe wabuidun guánarügü, íbini mosu lan wígiruni wadügün aban katei le garichatiwa lun wadügüni (1 Ko. 10:32, 33; 13:4, 5).

Áfaaguatiña kristiánugu lun buidu lan hóuserun (2 Ko. 4:2; 1 Fe. 5:2, 3). Samina wamá anuhein lan aban áruma luma aban kristiánu lun lóunigiragun lungua hawéi amu gürigia. Anhein asigira tau lárigiñe libihin adundehani tídangiñeti Bíbülia, marihínwabei kei aban gürigia le íchuguti hénpulu buiti. Ani siñabei libihin buligasion ni somu chansi espechaliti lidan damuriguaü. Ligiaméme asuseredubei lun aban kristiánu le akipuruti aban áruma ladüga mosu lan layusurunu lidan luadigimari. Lidan kesi burí le, buítimati láluahan amu wadagimanu. *

Kada kristiánu lunti desidírü lan ida luba lan lóunigiruni libagari luma habagari liduheñu, ida luba lan lóunigiruni lúmati luma ka lan wadagimanu lunbei lánharun lun. Gama lumoun, danme le desidírü lan lunti gabaroun lani adundehani le tídanbei Bíbülia, ladüga arihíwati lichú lau luma línsiñehabu Bungiu lidan adundehani ligía. Inebehabutiña kristiánugu ha derebugubaña afiñen lun adundehani burí ligía ani desidírütiña makipurun hamá áruma lun hóunigiragun houngua hawéi amu gürigia. Subudi hamuti hagundaaruba lan lau darangilaü le inarüniti lun súnwandan ánhaña afiñera luagu Bungiu ani inebehabu hagía lun adundehani le tídanbei Bíbülia (Sal. 97:10; Ari. 1:33; 2:6, 7).

Lidan óunwenbu asufuriruni, hafiñeruba kristiánugu luagu Heowá ani málugunbaña hesefuragun houngua.

^ par. 3 Háfuga desidírü lan aban kristiánu gama lan aban aragabusu o amu tuwuyeri áruma lun lagaliruhan animaalu lun léiginiña, o lun lesefuragun lungua hawéi animaalugu áraabuna. Dan le mama lan layusuruñoun áruma tuguya, buítimati lareidunu lidan somu fulasu gageleinti, lasagaruni balu tídangiñe o laragachagunu. Anhein máhawa lubéi tun áruma lidan fulasu le ñein lubéi wawinwanda, o anhein siñati lubéi gama hamanu sun gürigia o mosu lan hamuriahan üma lun gama hamanu, gaganbaditiña kristiánugu lun lúrudu burí le (Rom. 13:1).

^ par. 2 Hadariruba ariñahani luagu ida luba lan hesefurun luéi aban gürigia le áluguti láguragunün lidan arütíkulu le gíribei “Cómo evitar una violación”, tidan ¡Despertad! to lánina 8 lidan ǘrüwa-hati irumu 1993.

^ par. 4 Lun hibihin lanwoun ariñahani luagu anhein lunti lubéi hánharun lun aban wadagimanu le ídanbei mosu lan gama humá aban áruma, ariha humoun garüdia La Atalaya to lánina 1 lidan unsu-hati 2005, páhina 31, tuma to lánina 1 lidan unsu-hati, 1983, páhina 25 luma 26.