Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Nefu-hati irumu 2016

Nibureinti, héregüdabei bafiñen

Nibureinti, héregüdabei bafiñen

“Afiñeni, achoururuni le gumuti luagu wabihibei lan le wagurabubei [...] lau sun marihin wamani” (EBÜRÉU 11:1).

UREMU 41, 11

1, 2. a) Ka gayarabei hálügüdagun nibureintiña ha eseriwidubaña lun Bungiu houngua? b) Ka tariñagubei Lererun Bungiu?

ANUHEIN aban nibureintu Gran Bretaña to ariñaguboun tun aban íbiri nibureintu leskuelarugu: “Chuti yebe bau lun bafiñerun luagu Bungiu”. Abürühati aban íbiri yámani: “Mafiñentiña numaisturungu luagu abahüdaguni luagu Bungiu lan adügübalin sun katei le aniheinbei, ani según hagía súngubei lan aturiahatiña afiñe wamá luagu saliguarügü lan sun katei lungua”. Ani ariñagatu aban íbiri nibureintu Faransu: “Wéiritu hanigi numaisturungu lau añaheingua lan aturiahatiña ha afiñerubaña tuagu Bíbülia”.

2 Uguñe weyu, gíbetiña gürigia mafiñentiña Bungiu lan adügübaliwa. Anhein aban bubéi nibureinti le eseriwidubei lun Heowá o bafurendeiruña luagu, háfuga anihein lan dan aba bálügüdagun bungua ida luba lan bafuranguagüdüni Bungiu lan adügübaliwa. Íderagua tumutiwa Bíbülia lun wasaminarun lau duari luagun le waliihabei luma luagun le waganbubei, ani íderagua tumutiwa lun wadariruni óunabagülei le richabei. Ariñagatu Bíbülia: “Lóunigirubadibu lichú bau luma gunfurandaü le bídanbei súnwandan”. Ida? Líderagubadiwa lun badisedun luéi arufudahani  le mama inarüniti luma lun bederebudagüdüni bafiñen luagu Heowá (aliihabéi Ariñawagúni 2:10-12).

3. Kaba wariha lidan arütíkulu le?

3 Lun here lan wafiñen luagu Heowá, mosu wasubudiruni buidu (1 Timotéu 2:4). Ligíati, danme le baliihanu Bíbülia tuma wani agumeiraguagüdüni, súdiniti lun bararamagun asaminara. Houchabá gunfuranda bani le baliihabei (Matéu 13:23). Lidan arütíkulu le warihibei luagu anhein lan baturiahan ítara, badariruba saragu resun lun bafiñerun Heowá lan Bungiu le adügübaliwa ani le abürüdagüdübarun Bíbülia (Ebüréu 11:1).

IDA LUBA BEDEREBUDAGÜDÜNI BAFIÑEN?

4. a) Ka uagu wariñaga genegegua lan afiñeni luagu saliguarügü lan sun katei lungua lumoun afiñeni luagu adügǘwarügü lan sun katei? b) Ka lunbei wadügüni súngubei wagía?

4 Gayarati lariñagun somu gürigia: “Afiñetina saliguarügü lan sun katei lungua ladüga ligía hariñagubei aturiahatiña siensia. Ida luba bafiñerun luagu Bungiu ani úagili ni aban arihiti?”. Ítara liña hasaminarun saragu gürigia. Inarüni luagu marihin wamagili lan Bungiu ni ladügǘn somu katei (Huan 1:18). Gama lumoun ha afiñerubaña saliguarügü lan sun katei lungua, afiñetiña giñe luagu le marihin hamagilibei. Ka uagu wariñagei katei le? Ladüga úagili ni aban sásaamu ni aban gürigia arihiti saliguarügü lan somu katei le gabagaribei ani ábaya lan lasaliragun ámuya katei le gabagaribei lídangiñe. Kei hénpulu, úagili ni aban arihiti tasaliragun hewe ámume animaalu (Hobu 38:1, 4). Súngubei wagía lunti wakutihani sun katei buidu lun wadariruni inarüni. Gíbetiña gürigia akutiha hamaali le lídanbei ubóu ani rúhaña fe anihein lan Bungiu. Kei tariñagun Bíbülia, ariha hamaali furangu Bungiu lan adügübalin sun katei ligía ani luagu weiri lan lubafu ani buidu ligía ligaburi (Rómana 1:20).

Ka ariñahani gayarabei líderagunibu lun bafuranguagüdüni bafiñen houn amu? (Ariha huméi párafu 5).

5. Ka burí katei gayarabei líderaguniwa lun laganwoundun wasubudin luagu sun le ladügübei Bungiu?

5 Dan le warihini sun le lídanbei ubóu ani aba wararamagun asaminara lau duari luagun le warihibei, aba taweiridun wanigi luagu ligaburi ladügǘniwa sun katei. Íderagua lumutiwa wafiñen lun wasubudiruni anihein lan Bungiu,  íbini siñá lan warihini. Aba wíchugun fe hanarime lan lichú lau ani buidu ligía ligaburi (Ebüréu 11:3, 27). Gayarati waganwoundagüdüni wasubudin luagu katei le ladügübei Bungiu lau waliihan luagu katei le akutiha hamaalibei aturiahatiña siensia. Gíbeti lídangiñe ariñahani ligía darí wamuti lidan bidéu Las maravillas de la creación, tidan garüdia Obra de un Creador tuma El origen de la vida, ani tidan líburu ¿Existe un Creador que se interese por nosotros? Tidan garüdia ¡Despertad! anihein dan furiti álügüdahani burí le adügǘbei houn aturiahatiña siensia luma houn amu gürigia lun hafuranguagüdüni ka lan uagu afiñe habéi luagu Bungiu. Lidan seksióun le gíribei “¿Casualidad o diseño?” afuranguagüdawati hawagu animaalugu luma luagu katei le ubouagubei, ani afuranguagüdawati lidan seksióun ligía ida liña lan houchun sásaamu háyeihani le ladügübei Bungiu.

6. Ida luba tíderagunibu wani agumeiraguagüdüni?

6 Anihein aban íbiri Meriga 19 irumu lau ayanuhati tuagu bián garüdia to uáguboun wayanuhan lidan párafu 5. Ariñagati: “Íderagua táadina saragu. Ani aturiaha naaru saragu wéiyaasu”. Ariñagatu aban íbiri Faransu: “Súnwandan taweiridun nanigi dan le naliihani arütíkulu ‘¿Casualidad o Diseño?’. Arufuda lumuti áfaagua hamá sásaamu lun háyeihani sun le lídanbei ubóu, gama lumoun mibihin habéi”. Ani ariñagatiña tagübürigu aban nibureintu 15 irumu tau Sudáfürika: “Libe-agei dan, le taliihabei wasaani furumiñe tidan garüdia ¡Despertad! seksióun le gíribei ‘Entrevista’”. Tíderagubadibu giñe agumeiraguagüdüni burí to. Ida? Tíchuguba saragu resun bun lun bafiñerun anihein lan Bungiu, ani tíderagubadibu lun mafiñerun ban luagu arufudahani le mama inarüniti. Ani tíderagubadibu giñe lun laganwoundun bafiñen, ítara kei lahulilidun lílagüle tídibu wewe ani awandaléi lanarime láfurun garabali (Heremíasi 17:5-8).

BAFIÑEN TUAGU BÍBÜLIA

7. Ka uagu busén lubéi Bungiu lun bayusuruni bisaminan?

7 Maribanti lun badügün álügüdahani kéiburi le: “Ka uagu mosu lubéi nafiñerun luagu le tariñagubei Bíbülia?”. Mabusenrunti Heowá lun bafiñerun luagu aban katei ladügarügü afiñe hamá amu luagu katei ligía. Busenti lun bayusuruni bisaminan lun basubudirunu Bíbülia luma lun badarirun ariñahani le arufudubalin anihein lan Bungiu. Ka uagu? Lugundun éibume laganwoundun bisubudin tuagu Bíbülia, héretimabei bafiñen tuagu (aliihabéi Rómana 12:1, 2 luma 1 Timotéu 2:4). Aban igaburi lun basubudirunu Bíbülia, lau waturiahan tema burí tuáguti Bíbülia le uágubei busén ban bafurendeirun saragu.

8, 9. a) Ka katei hínsiñebei houn gürigia lun haturiahani? b) Ka buiti hasagarubei gürigia dan le hasaminarun luagun le haliihabei?

8 Añahein gürigia hínsiñeti houn haturiahani profesía burí le tídanbei Bíbülia. Añahein amu hínsiñeti houn konparárü hamani le tariñagubei Bíbülia luma le hariñagubei aturiahatiña luagu katei binadu. Kei hénpulu, saminabá luagun Agumesehani 3:15. Ru lumuti Heowá profesía súdiniti le murusun dan lárigiñe lebedaagun Adán tuma Ewa kóntüra liricha lun larúeihan. Ligía furumiñetibei profesía lídangiñe sun le íderagubaliwa lun gunfuranda wamani ida luba lan lígiruni Larúeihan Bungiu furangu garichati lan Heowá lun larúeihan ani gumú ligíame lau asufuriruni. Ida luba baturiahani profesía le lídanbei Agumesehani 3:15? Gumesebá lau badügün aban lísüta lau burí bérusu le ayanuhabei luagu lagunfulirun profesía le. Lárigiñe, akutihabá luagu ídabuga lan labürüdǘwa bérusu  burí ligía ani bürübei según ligaburi lasuseredun katei. Ábame barihin luagu winwan hamá meha abürühatiña Bíbülia lidan ámuñegueinarügü dan, gama lumoun kada aban hádangiñe ídehati lun lafuranguagüdüniwa profesía le murusun murusun. Líderagubadibu katei le lun barufuduni adundeha lumutiña lan meha Heowá abürühatiña Bíbülia lau lani sífiri sandu (2 Féduru 1:21).

9 Aban íbiri le erederubei Yámani ruti fe anihein lan ariñahani luáguti Larúeihan Bungiu tidan kada líburu to tídanboun Bíbülia íbini habürüdün lan bián wein wügüriña. Ani saragu hádangiñe, lidan ámuñegueinarügü dan hawinwandun, ani masubudiraguntiña meha houngua. Taturiahañein meha aban íbiri aban arütíkulu tídangiñe Garüdia Awisahatu. Aba tíchugun fe úaragua lan ariñahani luáguti Luéyuri Esefuruni luma Agumesehani 3:15 ani luma le agunfulirubei luagu Mesíasi [1] (ariha huméi abürüdǘni le lídanbei lagumuha arütíkulu). Abürühatu: “Íderagua lumutina lun narihini furangu aban lan Bungiu buiti Heowá. Aba taweiridun nanigi lau nafurendeirun amuriaha lan hama ísüraelina lun hefeduhani Luéyuri Esefuruni ani aba lan lagunfulirun profesía ligía luagu Hesusu. Mosu meha nararamagun asaminara luagun le mini lubéi Luéyuri Esefuruni”. Ka uagu tasandiragunbei tungua ítara? Ladüga tasaminarun luagun le taliihabei ani aba gunfuranda tani. Íderagua lumutu katei ligía lun tederebudagüdüni tafiñen luma lun tayarafadun lun Heowá (Matéu 13:23).

10. Ka amu katei gayarabei líderagunibu lun bederebudagüdüni bafiñen tuagu Bíbülia?

10 Ka amu katei lunbei líderagunibu lun bederebudagüdüni bafiñen? Basaminarun luagun ganigi le meha harufudubei ha abürüdübarun Bíbülia luma luagun súnwandan lan hariñaguni inarüni. Lidan meha dan ligía, saragu abürühatiña luágurügüñein katei buiti le asuseredubei lidan hageira o houn harúeitegu habürühan. Ánhaña lánigu Heowá profeta, mámarügüñein luagu katei buiti le asuseredubei houn ísüraelina o houn urúeigu habürühan. Írida hamuti giñe le wuribabei (2 Krónikasi 16:9, 10; 24:18-22). Ayanuhatiña meha giñe luagu hachara luma luagu hachara amu lubúeingu Bungiu (2 Samueli 12:1-14; Márükosu 14:50). Ariñagati aban nibureinti le erederubei Gran Bretaña: “Úati kamani lan aban igaburi ítarati uguñe weyu. Íderagua lumutina katei le lúntima nafiñerun lúmagiñe lan Heowá tiabin Bíbülia”.

11. Ka gayarabei líchugun ichouruni woun lúmagiñe lan Bungiu tiabin Bíbülia?

11 Dan le wígirun lun tadundehaniwa Bíbülia, resibitiwa lubuidun resultóu. Ani adügati katei le lun wachoururuni lúmagiñe lan Bungiu tiabin Bíbülia (aliiha huméi Sálumu 19:7-11). Ariñagatu aban nibureintu haponna: “Adügati haganbadin niduheñu lun le tarufudahabei Bíbülia lun gunda wamá. Wínwantiwa lidan darangilaü, úarani luma ínsiñeni”. Íderagua taaña Bíbülia saragu gürigia lun híchugun fe mama lan inarüni saragu lídangiñe katei le meha hafiñerubei (Sálumu 115:3-8). Íderagua taaña giñe lun hafiñerun luagu Bungiu suntigabafu. Luagu amu oubaü, gürigia ha mafiñenbaña luagu Bungiu aba hanügüni katei le ladügübei Bungiu kei habungiute. Añahein amu ariñagatiña gayarabei lan híchugun gürigia guánarügü aban ibagari buítimati woun. Gama lumoun, dan le warihini le ibiha hamaalibei darí guentó, aba wíchugun fe siñagua hamá houngua lun haransehani turóbuli le ubouagubei. Bíbüliarügüñoun gayara füramase tan aban ibagari buítimati woun (Sálumu 146:3, 4).

 IDA LUBA WASAMINARUN HAMA AMU?

12, 13. Ida luba bayanuhan hama amu gürigia luagu sun le ladügübei Bungiu luma tuagu Bíbülia?

12 Danme le bayanuhan luagu le ladügübei Bungiu o tuagu Bíbülia hama amu, furumiñe houchabá basubudiruni ka lan lafiñenbei gürigia ligía. Añahein saragu, afiñetiña saliguarügü lan sun katei lungua ani afiñe hagía luagu Bungiu. Según hagía yusu lumuti Bungiu ewolusión lun ladügüni sun le gabagaribei. Añahein amu afiñetiña mosu lan inarüni lan arufudahani luagu saliguarügü lan sun katei ladüga ligía arufudahóubei leskuelarugu. Ani añahein amu mafiñenhaña luagu Bungiu ladüga katei wuribati le harihibei lidan hani relihión. Ligíati, danme le bayanuhan luma somu gürigia, álügüdabei furumiñe luagu ka lan lafiñenbei luma ka lan uagu lafiñerei. Anhein baganba, chóuruti laganbubadibu lan (Titu 3:2).

Lau inebesei, álügüdabei gürigia luagu ka lan lafiñenbei ani lárigiñe aganbabéi lóunabagüle

13 Anhein adüga somu gürigia bula bau ladüga bafiñen luagu Bungiu, ida luba bóunabuni? Lau inebesei, amuriahabá luma lun lafuranguagüdüni bun ida liña lan lagumeserun ibagari. Gayarati bariñagun lun anhein lan inarüni lubéi saliguarügü lan sun katei lungua, mosu lan hamuga gabafubei lan furumiñeti katei le gabagaribei lun lagibedagun. Ariñagati aban máisturu lemegeiruña lan hamuga katei ligía somu katei lun ladouragun lau, ubafu lun libihin erei ani lun layusuruni, ariñahani luagu ida luba lan lesetirún luma ida luba lan laweiridun (ADN), luma ubafu lun lareiduni ariñahani ligía. Ariñagati máisturu ligía aba lan taweiridun lanigi lau larihini íbini lan katei le ñǘbüritimabei hanarimeti lácharagun.

14. Danme le bayanuhan luagu le ladügübei Bungiu, ida luba bafuranguagüdüni?

14 Danme le bayanuhan luma somu gürigia luagu le ladügübei Bungiu, gayarati bafuranguagüdüni lau dimurei le lariñagubei apostolu Pábulu. Abürühati: “Sun muna adügarügü lumutu somu gürigia; gama lumoun Bungiu adügübalin sun katei le aniheinbei” (Ebüréu 3:4). Furanguti masaliragun tan aban muna tungua. Mosu ñein lan aban gürigia lun ladügünu. Hénrengutimati ladügǘn aban katei gabagariti sügǘ tau aban muna. Ligíati, chóuruti anihein lan somu gürigia le adügübalin. Gayarati bayusurunu wani agumeiraguagüdüni lun bayanuhan luagu sun le ladügübei Bungiu. Ayanuhatu aban íbiri luma aban nibureinti le mafiñenbei luagu Bungiu, ani aba tíchugunu bián garüdia to uáguboun wayanuha lidan párafu seingü lun. Aban dimaasu lárigiñe, ariñagati nibureinti ligía: “Anati guentó, afiñeedina luagu Bungiu”. Gumeseti nibureinti ligía aturiahoun Bíbülia ani dan lárigiñe aba labadiseirun.

15, 16. a) Lubaragiñe bafuranguagüdüni lun aban gürigia lúmagiñe lan Bungiu tiabin Bíbülia, ka lunbei badügüni? b) Ka lunbei baritaguni súnwandan?

15 Anhein machourun lubéi aban gürigia lúmagiñe lan Bungiu tiabin Bíbülia, ida luba basaminarun luma? Kei aubei wariñagei, furumiñe gayarati bálügüdüni ka lan lafiñenbei luma ka lan tema hínsiñetimabei lun (Ariñawagúni 18:13). Anhein hínsiñe lubéi siensia lun, gayarati bíchugun hénpulu tídangiñeti Bíbülia lun le arufudubalin machararun tan Bíbülia dan le tayanuhan luagu katei lánina siensia. Anhein hínsiñe lubéi lun laturiahan luagu katei le asuseredubei lidan binadu dan, gayarati  bayanuhan luma luagu somu sügǘ le áfuachubei tidan burí líburu to lánina katei le asuseredubei lidan binadu dan ani le bürǘ wáalibei tidan Bíbülia saragu dan lubaragiñe lasuseredun. Háfuga giñe haganbunibu amu gürigia ánhabu arufudaha somu katei houn tídangiñe Bíbülia le gayarabei líderaguniña lun hagundaarun lau aban ibagari buítimati. Kei hénpulu, gayarati barufudahan fiú adundehani houn lídangiñe Serumu luagu Wübü.

16 Danme le bayanuhan luma aban gürigia, haritaguabei mabusenrun wamá wasigenehan. Busentiwa lun gunda hamá lau hayanuhan wama luma lau hafurendeirun tuagu Bíbülia. Ligíati, adügabá álügüdahani lun lau inebesei, ani aganbabéi lóunabagüle. Afuranguagüdabéi lun lau inebesei ka lan bafiñenbei. Súdiniti katei le dántima le wéiriaali lan gürigia ligía buéi. Ítarati, ménrenguntimabei lun inebe ban lun. Ani taweiriduba lanigi lau larihini ligaburi layanuhan aban nibureinti luagu lafiñen. Luagu amu oubaü, anhein busenrügü lubéi aban gürigia lasigenehan o ladügün bula bau, mama mosu bóunabuni (Ariñawagúni 26:4).

ÉIBUME LAGANWOUNDUN BISUBUDIN TUAGU BÍBÜLIA, HÉRETIMABEI BAFIÑEN

17, 18. a) Kaba íderaguabu lun bederebudagüdüni bafiñen tuagu Bíbülia? b) Kaba wariha lidan le aban arütíkulu?

17 Íbini subudi baali lan arufudahani le méinitimabei tídangiñe Bíbülia, mosu badügün ábanya katei lun bederebudagüdüni bafiñen. Mosu basigirun akutihoun Bíbülia lun bafurendeirun amu ariñahani, kamá hamuga báluahaña somu irisini (Ariñawagúni 2:3-6). Lunti baliihanu Bíbülia lun bederebudagüdüni bafiñen. Gayarati bouchun baliihanu súngubei lidan aban irumu. Ítara liña lederebudagüdüni aban óunigiruti sirkuitu lumadagua luma Heowá dan le nibureingili. Ariñagati: “Aban katei le íderagubalina lun nachoururuni Lererun lan Bungiu Bíbülia, naliihanu dayarügü. Aba gunfuranda nani abahüdaguni tídangiñeti Bíbülia le meha nafurendeirubei dan le irahügidina”. Ka amu katei gayarabei badügüni? Gayarati bayusurunu sun tulu to búmaboun lun gunfuranda bani le baliihabei. Kei hénpulu, gayarati bayusuruni programa Watchtower Library lidan DVD, tani Watchtower LÍBURU-AGEI, Índice de las publicaciones Watch Tower o Adundehani lun haturiahan gefentiña luagu Heowá.

18 Agübürigu, huguyatima gayarabei harufudahan luagu Heowá houn hisaanigu. Ligíati, lidan le aban arütíkulu warihiba fiú igaburi le ídanbei gayara lan híderaguniña agübürigu hasaanigu lun héretima lan hafiñen.

^ [1] (párafu 9): Garüdia Atalaya (guentó, Garüdia Awisahatu) to lánina 1 lidan duusu-hati, 2013.