Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Gádürü-hati irumu 2016

 ABAHÜDAGUNI LUÁGUTI IBAGARI

Monha burí meha ani guentó wíbirigu haaña

Monha burí meha ani guentó wíbirigu haaña

SARAGU irumu lubaragiñe le, aba tagúaragun Araceli, to namulelua nun, tariñaga: “Mayanuhadigiabá nun. Mabusenruntina naganbun ni kata luagu bani relihión. Sagü naganbunibu, aba nasandirun. Iyereegutibu nun!”. Íbini gúnfulihadina lan 91 irumu, haritagua nágili weyu ligía kamá wurinouga. Gáriti dimurei burí ligía nun. Gama lumoun, kei lariñagun Apurichihati 7:8, “buítimati lagumuchun aban katei sügǘ lau lagumeserun” (Felisa).

Felisa: Esüpáña meha naweirida. Ani katoliku meha sun niduheñu. Seriwitiña meha tareisi hádangiñe waduheñu keisi fádirigu o kei nadagimeintiña tun ligilisi. Tani meha núguchu primu aban hádangiñe ani ruti meha külase tidan aban leskuela katoliku. Dan le lóunwenbei, aba líriduni Huan Pábulu II, le papa, kei aban sandu. Gudemetiña meha niduheñu. Nadagimeinti meha núguchi tidan aban kónpeni ñein lubéi ladügǘwa gürabu ánhounti núguchu áraabu meha tuadigimaribei. Nuguya meha íbugañaüboun hádangiñe 8 isaanigu.

Dan le 12 lubéi irumu nau, aba lagumeserun aban wuribu Esüpáña. Lárigiñe lagumuchun, aba ladaürǘn núguchi ladüga amu lan lisaminan luagun polítika. Hénrenguti meha tun núguchu téigagüdüniwa sun wagía. Ligía aba lubéi tóunahaniña ǘrüwa namulenu tidoun aban haban monha uburugu Bilbao. Máfagunboun meha Araceli, Lauri tuma Ramoni ilamaü ñein.

Araceli: Katorusu meha irumu nau dan le wounahóunbei tidoun haban monha, 12 meha irumu tau Lauri ani 10 tau Ramoni. Aba híchuguniwa monha arumadaha ñein. Bián irumu lárigiñe aba hóunahaniwa tidoun amu haban monha to wéiritimatu Zaragoza, ñein lubéi hóunigirua wéiyaaña. Mosu meha warumadahanu gusina ani súnwandanha buchá lan wawagu dan le wagumuchun. Álugatiwa meha saragu hawagu waduheñu.

Felisa: Dan le hóudinbei níbirigu Zaragoza, aba desidírü tan núguchu luma niyaurite lun hóunahanina hamoun. Fádiri meha niyaurite. Dandu ligía kei núguchu busentiña meha hadisedagüdünina luéi aban nibureinti le busenbei ladarihanina. Gúndaatina  meha lun nidin ásügüra dan tidan aban haban monha, ladüga hínsiñeti meha Bungiu nun. Sagü meha weyu nidin lemesi darí lun busén nan meha nidin eseriwida lidan amu ageiraü, kei aban niduhe le Áfürikabei.

Luéigiñe wabaünan, haban monha to Zaragozaboun (Esüpáña). Luagu wóunwenren Bíbülia Nácar-Colunga.

Wuribati meha nasandiragun nungua tidan haban monha tuguya ladüga siñati meha nadügüni le yebe uágubei nasaminara. Mínchahan hamutina ha híbiri monha lun nidin eseriwida lun Bungiu lidan amu ageiraü, kei nabusenrun. Ligía aba lubéi nagiribudun múnadoun aban irumu lárigiñe lun netenirun lun niyaurite, le fádiri. Ídehatina meha lau wadagimanu múnada, ani sagü meha rábounweyu warisarun úara. Hínsiñeti meha nun naransehan fuluri tun ligilisi luma nasansiraguagüdüniña sandu ha ñéinbaña.

Araceli: Lun monha nan, mosu meha nadügün fiú füramasei espechaliti. Le furumiñeti adüga numuti Zaragoza. Gama lumoun, aba hafanreinraguniwa monha wawariuagua. Aba tidin Lauri tidoun aban haban monha Valencia, Ramoni aba terederun Zaragoza, ani nuguya aba nidin Madrid. Ñein nadügei libiaman füramasei lun monha nan. Gíbetiña meha aturiahatiña erederutiña tidan haban monha ñein Madrid, ani añahein meha giñe gürigia wéinamuhaña, gíbeti meha wadagimanu ñein. Tidan meha háspitali nawadigimarida ñein.

Lubaragiñe monha nan, saminatina meha násügürüba lan saragu dan aliihoun luma aturiahoun Bíbülia. Gama lumoun, híruti mítaranti lan katei hábiñe monha. Maliihan wamutu Bíbülia ñein, ani mayanuhantiwa giñe luagu Bungiu ni luagu Hesusu. Furendeitina ayanuha murusun latín, aturiaha numuti habagari sandu katoliku ani huduguatina meha tun María. Gama lumoun, wéiritimati meha wawadigimaridun.

Aba nagumeserun asandira saragu idiheri. Saminatina meha lunti lan hamuga nidin nadagimein lun nagañeirun seinsu lun níderaguniña niduheñu sügǘ lau nerederun nadagimein hábiñe monha lun harisidun amu. Ligía aba lubéi nayanuhan tuma ábuti ani aba nariñagun tun busén nan nidin. Aba talakürüni bena nau tidan aban rumu según tuguya lun lasansirun nisaminan.

Aba hígirunina lun náfuridun, gama lumoun dan le harihinbei busengidina lan nidin, ábaya halakürüni rumu ligía nau. Adüga hamuti ǘrüwa wéiyaasu. Ábati hariñagun nun hígirubadina lan lun nidin ánhanagubeirügü abürüda: “Néibuga ladüga himei nani neseriwidun lun Satanási sügǘ lau neseriwidun lun Bungiu”. Ma lanarime katei. Busentina meha nidin, gama lumoun, mabürüdünbadina meha aban katei ítarati. Ligía nariñagunbei houn busén nan nagufeserun lun aban fádiri. Aba nabahüdaguni sun katei lun, ani aba libihin üma nun lúmagiñe hábuti fádirigu lun nounahóun tidoun haban monha to Zaragozaboun. Rédeitina ñein fiú hati darí lun hígirunina lun náfuridun.  Fiú dan lárigiñe, aba giñe háfuridun Lauri tuma Ramoni tídangiñe haban monha.

ABA TAFANREINRAGUAGÜDÜNIWA ABAN LÍBURU

Felisa

Felisa: Lau lásügürün dan, aba namarieidun ani aba nidin awinwanda lidan aban fulasu Esüpáña gíriti Cantabria. Sigitina meha abasiiha lemesi sagü dimaasu. Aban weyu dimaasu, aba lasagarunu fádiri líburu La verdad que lleva a vida eterna. Lau lanarime igañi, aba lariñagun woun anhein lan anuhein lubéi líburu tuguya luma somu wádangiñe, lun lan lederegerunu lun o lun lan lágurunu.

Úatu meha líburu tuguya numa, gama lumoun busentina meha aban. Fiú weyu lárigiñe, aba hachülürün bián hiñaruñu gefentiña luagu Heowá núbiñoun ani aba hígirun aban nun. Aliiha numutu guñoun ligía. Dan le hagiribudunbei gürigia hagía, aba hariñagun nun gayara lan híchugun külase nun tídangiñe Bíbülia, aba nánharun.

Líburu La verdad

Hínsiñegubeiñein luáguti Bungiu nun. Ligía dan lubéi le nafurendeirunbalin inarüni luagu Heowá, aba nagumeserun asandira ínsiñeni luagu. Busentina meha nayanuhan luagu houn sun gürigia. Aba nabadiseirun lidan irumu 1973. Sagü meha gachansin nan aba nayanuhan luagu Bungiu houn niduheñu. Gama lumoun, ariñagatiña meha sun hagía charatina lan, Aracelitima.

Araceli: Kei le meha wuriba lubéi nouserún tidan haban monha, safagu niña meha luma nani relihión. Íbini ítara sigitina meha ñüdün lemesi sagü dimaasu ani arisara nuguya sagü weyu. Busengidina meha gunfuranda nanu Bíbülia, ani amuriahatina meha luma Bungiu lun líderagunina. Luagu aban weyu, aba tayanuhan Felisa nun luagu le tafurendeirubei. Gama lumoun, magundantina meha lau le tariñagubei. Wéiriti meha ubebeni le tuágubei darí lun nasaminarun le lan lanarime línsiñe relihión ligía tun.

Araceli

Dan lárigiñe aba nagiribudun nadagimein Madrid. Aba namarieidun ñein. Ariha naali meha luagu mawinwandun hamá gürigia ha abasiihabaña ligilisirugun kei larufudahan Hesusu. Aba mídinhadina lan ligilisirugu ani magufeserun nuguya. Aba mafiñenhadina lan hawagu sandu ni luagu asufuriruni máfiougati. Aba giñe náguruniña sun sandu ha númabaña. Le linarün katei ibidiñeti meha nun anhein buidu lubéi le nadügübei, gama lumoun adüga numuti ladüga buin niña lan lau  magundani. Aba meha nariñagun lun Bungiu: “Busentina nasubudirunibu, íderaguabana!”. Haritaguatina chülǘ hamá gefentiña luagu Heowá adaünha luagu nubenari saragu wéiyaasu, ani madararun numuti habá. Mafiñenhadina meha luagu ni aban relihión.

Francia meha tawinwanda Lauri, ani Ramoni Esüpáña. Yarafa lun irumu 1980 aba hagumeserun aturiahoun Bíbülia hama gefentiña luagu Heowá. Saminatina yebe heyeedúña lan kei Felisa. Lau lásügürün dan aba gamadagua nan tuma aban nubesinan gíritu Angelines, gefentu meha giñe luagu Heowá. Dandu tuguya kei tani weiriei álügüda hamutina meha saragu wéiyaasu anhein busén nubéi nafurendeirun tuagu Bíbülia. Aba burí nariñagun houn mabusenrun nan naganbun luagu relihión. Gama lumoun ariha hamuti meha súdini tan Bíbülia nun. Luagu aban weyu, aba nariñagun houn naturiahaboun lan Bíbülia hama anhein gayara nayusurunu nibibülian, aban Nácar-Colunga.

ÓUNDARAGUA TÁADIWA BÍBÜLIA

Felisa: Dan le nabadiseirunbei lidan irumu 1973, añahein meha kéiburi 70 Gefentiña Santander, uburugu le súdinitimabei Cantabria. Anihein saragu lirahüñü aüdü lidan fulasu ligía. Lun gayara lan wapurichihan houn sun gürigia hagía mosu meha wadügün wéiyaasu díseti tidan busu. Lau lásügürün dan aba wadügüni tidan karü.

Lidan sun irumu burí le rúhadina külase tídangiñeti Bíbülia houn bandi gürigia. Hibe-agei katoliku meha, ani badiseitiña 11 hádangiñe. Mosu meha gaguraasun nan. Ítara kei nuguya, mégeitiña meha dan lun hasubudiruni charati lan hafiñen. Subudi numuti meha Bíbüliarügüñoun lan luma sífiri sandu gayara tíderagun aban gürigia lun lasansirun ani lun gunfuranda lani inarüni (Ebüréu 4:12). Súdara meha nani weiriei ani badiseiti lidan irumu 1979. Ani gumesetu núguchu aturiahoun Bíbülia fiú dan lubaragiñe tounwen.

Araceli: Dan le nagumeserunbei aturiahoun Bíbülia hama Gefentiña, mafiñentina meha hawagu. Lárigiñe aba nagumeserun afiñera hawagu ladüga narihini winwan hamani le hapurichihabei. Ábatima meha léredun nafiñen luagu Heowá luma tuagu Bíbülia, ani gúndaatimatina meha. Ariha hamuti meha fiú besinagu asansiruni ligía nuagu ani aba hariñagun nun: “Araceli, sigibatia lidan émeri le anúadira báalibei”.

Haritagua nágili ariñaga nan meha lun Heowá: “Seremei luagu mígirunbadina kei féridi waaru luma luagu bíchugun saragu chansi nun lun nadariruni subudi inarüniti le tídanbei Bíbülia”. Amuriahatina giñe ferudun tuma Felisa luagu katei burí le nariñagubei tun. Lúmagiñe dan ligía masigenehantiwa, gúndaarügütiwa dan le wayanuhan tuagu Bíbülia. Badiseitina lidan irumu 1989, dan le 61 irumu nau.

Felisa: Guenlé 91 irumu nau ani hilá nani weiriei. Siñaali nadügün saragu kei meha furumiñe, gama lumoun aliiha nágiru Bíbülia sagü weyu. Ani sagü gayara lan, aba nidin adamuridagua ani furí nuguya apurichiha.

Araceli: Hínsiñeti nun nayanuhan luagu Heowá houn fádirigu luma houn monha, háfuga ladüga monha lan meha nuguya. Ayanuhaadina luagu katei súdiniti hama fiú hádangiñe. Gíbeeña erederutiña tau garüdia tuma líburu. Haritaguagidina luagun aban fádiri le úmabei nayanuha saragu wéiyaasu. Aban weyu, aba lariñagun nun úara lan lisaminan luma sun le nariñagubei lun. Gama lumoun aba lariñagun nun: “Haliñounbadina san guentó lau wéiyaadina lan? Kaba hariñaga tílana niligilisin hama niduheñu?”. Aba nariñagun lun: “Kábati lariñaga Bungiu?”. Ariha numuti aba lan lírudun dan le líchugunbei fe ninarün lan le nariñagubei lun. Gama lumoun, afiñetina hanufude lan meha lasansirun.

Mabulieidun nubéi weyu le lariñagunbei nani weiriei nun busén lan lidin numa tidan Luban Wadamuridagun. Barühali meha lóugiñe 80 irumu dan le lídinbei lidan furumiñeti adamuridaguni, ani aba meferidirunhali lan ni aban. Aturiaha lumutu Bíbülia ani gumese ligía apurichiha. Gíbeti katei buiti naritagun luagu dan le wáfuridunbei apurichiha úara. Bián hati lubaragiñe labadiseirun ligía lounwen.

Felisa: Dan le nagumeserunbei eseriwida lun Heowá, magundantiña meha ǘrüwa namulenu. Gama lumoun, dan lárigiñe aba giñe desidírü hamá Gefentiña hamá. Chóuruti anihán lan aban lídangiñe katei buídutimati le asuseredubei lidan nibagari. Gayarahali meha úara wamá ani ayanuha wagía luagu Wabungiute luma tuagu Bíbülia to Lererun. Chülüdüga meha dan lun gayara lan wáhuduragun lun Heowá úara. *

^ par. 29 Araceli 87 irumu tau, Felisa 91 tuma Ramoni 83. Sigitiña ǘrüwagubei eseriwida lun Heowá lau ubebeni. Hilatu Lauri úaraguñu lun Heowá lidan irumu 1990.