Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Gádürü-hati irumu 2016

Mádaragua wamá woungua lidoun turóbuli burí le lídanbei ubóu fánreinguali le

Mádaragua wamá woungua lidoun turóbuli burí le lídanbei ubóu fánreinguali le

“Ru [huméi] lani Bungiu lun Bungiu” (MATÉU 22:21).

UREMU 33, 137

1. Ka gayarabei wadügüni lun gaganbadi wamá dandu lun Bungiu kei houn gumadimatiña?

ARUFUDAHATU Bíbülia mosu lan gaganbadi wamá houn gumadimatiña. Gama lumoun arufudahatu giñe mosu lan gaganbadi wamá lun Bungiu súnwandan (Adügaü 5:29; Titu 3:1). Ida luba san wadügüni biángubei katei le? Anihein aban lúrudu tidan Bíbülia le gayarati líderaguniwa. Ariñagati Hesusu: “Ru humeiti lani urúei lun urúei, ru humeime lani Bungiu lun Bungiu” (Matéu 22:21). Ida luba san wafayeiruni “lani urúei lun urúei”? Lau gaganbadi wamá lun halurudun gumadimatiña, lau wóuseruniña gumadimatiña lau inebesei luma lau wafayeiruni liseinsuna gumadi (Rómana 13:7). Gama lumoun, kaba asusereda ánhawa hóunaha gumadimatiña adüga somu katei le mínsiñeti lun Bungiu? Madügün wabéi. Gama lumoun, súnwandan wóuserubaña lan gumadimatiña lau inebesei.

2. Ida liña warufuduni mádaragun wamá woungua lidoun polítika?

2 Lun wafayeiruni “lani Bungiu lun Bungiu” moun lumuti wádaragun woungua lidoun luáguti polítika. Mini lan le  mídinbadiwa lan luéigiñe lóubadina ni aban (Isaíasi 2:4). Ida luba warufuduni katei le? Mebedaaguntiwa houn gumadimatiña, ladüga subudi wamuti Heowá lan ígirubei lun ñein hamá. Mádaraguntiwa giñe woungua lidoun katei burí le adügübei lun hasaminarun gürigia wageira lan buídutimabei (Rómana 13:1, 2). Máluguntiwa wasansirun aban urúei luagu amu ani mínchahantiwa giñe somu polítiku lun ladügüni. Mabuduhantiwa giñe lidan lidaani abuduhani ani meteniruntiwa lun polítika.

3. Ka uagu moun lumuti lubéi wádaragun woungua lidoun polítika?

3 Ka uagu mabusenrun lubéi Bungiu lun wádaragun woungua lidoun katei lánina ubóu le? Furumiñe, ladüga wafalaruñein lan lani Hesusu hénpulu. Ariñagati meha Hesusu ‘mama lan lánina ubóu le ligía’. Ligía mádaragun lubéi meha lungua lidoun polítika ni lidoun wuribu (Huan 6:15; 17:16). Libiaman, ladüga luéigiñeñadiwa lan lóubadina Larúeihan Bungiu. Ánhawa ñüdün lúmagiñe somu urúei ubouaguna, ida luba wariñagun houn gürigia larúeihanrügübei lan Bungiu aransehei turóbuli le ubouagubei? Lǘrüwan, mosu úaragua wamá lun Larúeihan Bungiu ladüga ítararügübei lidan wamá aban hama wíbirigu lidan sun ubóu. Fánreingua lumutiña relihión mama inarüniti gürigia ladüga hádaragun houngua lidoun polítika (1 Féduru 2:17).

4. a) Ida liña wasubudiruni hénrengutimabei lan woun mádaragun wamá woungua lidoun luáguti ubóu eibu lásügürün dan? b) Ka uagu lunti lubéi waranserun guentó lun úaragua wamá lun Bungiu?

4 Háfuga wawinwanduña lan lidan aban fulasu le ídanbei magurabun hamá gürigia lun luéigiñe wamá lóubadina somu polítiku. Gama lumoun, eibu ayarafadeina wamá lun lagumuchagüle ubóu le lani Satanási, hénrengutimabei woun wakipurun úaraguni. Kei lariñaguni 2 Timotéu 3:3, 4, uguñe weyu adügatiña gürigia katei mabuidunti meberesenga kaba lan asusereda lárigiñe ani siñati ladügǘn daradu hama. Ani eibu dan wéiritimabei fánreinguaü hadan. Ani gayarati giñe lasansirun léibugun katei lidan furumiñeguarügü ageiraü sódini. Susereeli katei le lidan fiú ageiraü, ani gagibuguaaña íbirigu luma turóbuli wéinamuti. Ligía lunti lubéi waranserun guentó lun úaragua wamá lun Heowá íbini lidan dan hénrenguti. Ariha wamá gádürü katei le gayarabei wadügüni lun waranserun.

ARIHA WAMAÑA GUMADIMATIÑA KEI LARIHINIÑA HEOWÁ

5. Ka lasaminarubei Heowá hawagu gumadimatiña ha ubouagubaña?

5 Lun úaragua wamá lun larúeihan Bungiu, mosu warihini sun arúeihani le ubouagubei kei larihiniña Heowá. Magundanti Bungiu hau urúeigu ha ladüga dan le ladügünbaliña gürigia, míchuti ubafu houn lun hagumadiruniña ha híbiri (Heremíasi 10:23TNM). Lun Heowá, sun gürigia gaduheñuguatiña. Ánhañati urúeigu fánreingua hamutiña gürigia lau hariñagun hageira lan buídutimabei. Ani íbini áfaagua hamá fiú urúeigu lun hadügün katei buiti, siñati haransehani sun waturobulin. Ani sun urúeigu ubouaguna, láganiñu giñe Larúeihan Bungiu, le agumeserubei arúeiha lidan irumu 1914. Málühali Larúeihan Bungiu agumucha lau sun arúeihani le ubouagubei (aliiha huméi Sálumu 2:2, 7-9).

6. Ida luba wóuseruniña gumadimatiña?

6 Ígirati Bungiu lun ñein hamá gumadimatiña ubouagu ladüga ídehatiña lun ñein lan darangilaü luma lun mibe lan chagaguaü. Ídehati katei le lun gayara lan wapurichihan luagu  Larúeihan Bungiu (Rómana 13:3, 4). Ani amuriahati giñe Heowá wama lun wafurieidun hawagu gumadimatiña, lun gayara lan wáhuduragun lun lidan darangilaü (1 Timotéu 2:1, 2). Ánhawa lóusera somu gürigia lau marichaü, gayarati wamuriahan ídemuei hama gumadimatiña, kei meha ladügüni apostolu Pábulu (Adügaü 25:11). Ani íbini ariñaga tan Bíbülia Satanási lan gamaniharibei hau gumadimatiña ubouagu, mariñaguntu ligía lan gamaniharibei lau kada urúei o gumadimati (Lúkasi 4:5, 6). Ligíati, mariñaga wamá Satanási lan gamaniharibei lau somu gürigia le nadagimeinti luma urúei. Ariñagatu Bíbülia moun lumuti lan wayanuhan wuriba hawagu gumadimatiña ni lun wóuseruniña lau minebenehabuni (Titu 3:1, 2).

7. Ka luwuyeri saminaü lunbei wagidaruni wawariua?

7 Kei le busén wamá gaganbadi wamá lun Bungiu, mádaraguntiwa woungua lidoun luáguti ubóu le ani mídintiwa luéigiñe lóubadina somu óundaruni lánina polítika. Gayaraati hénrengu lan katei le dántima le gayara lan lahuudun le hasaminarubei hadügün woun. Kei hénpulu, samina wamá aba lan hebedaagun sun gürigia ha lídanbaña fulasu le ñein lubéi wawinwanda houn gumadimatiña ladüga súfurigüda laaña lan saragu. Ani háfuga adügaali lan giñe gumadimatiña hagía dañu houn gefentiña luagu Heowá. Kaba san wadüga? Furanguti móundarunbadiwa lan hamoun ebedaagutiña hagía. Gama lumoun, gúndaabadiwa san hama ani wayumahaba tidan wanigi lun buidu lan lidin houn? (Éfesuna 2:2). Anhein busén wabéi lun úaragua wamá lun Bungiu, mosu góunigi wamani le wariñagubei luma le wadügübei. Gama lumoun, súdinibei giñe lun masaminarun wamá tidan wanigi luagu garicha lan aban lídangiñe óundaruni ligía o luagu buidu lan luéi le aban.

“ARANSEÑU HUMÁ [...] MADÜGÜNGA WURIBANI”

8. Dan le lóuchawagun úaraguni le warufudubei lun Bungiu, ida luba ‘aranseñu wamá’ ani ‘madügünga wuribani’?

8 Le libiaman igaburi le ídanbei gayara lan waranserun lun mádaragun wamá woungua lidoun polítika lunti ‘aranseñu wamá kei hewe’ gama lumoun ‘madügünga wuribani kei unhun’ (aliiha huméi Matéu 10:16, 17). Ida luba san ‘aranseñu wamá’? Mosu wasaminarun luagun turóbuli burí le gayarabei wagagibudagun luma. Ani ida luba san ‘madügün wamá wuribani’? Lau mádaragun wamá woungua lidoun turóbuli le lídanbei ubóu lidan dan hénrenguti. Ariha wamá fiú lídangiñe turóbuli burí ligía luma kaba lan íderaguawa lun mádaragun wamá woungua lidoun.

9. Ida luba aranseñu wamá dan le wayanuhan hama amu?

9 Dan le wayanuhan hama amu gürigia. Mosu duari wamá dan le hagumeserun gürigia ayanuha luagu polítika. Kei hénpulu, anhein wayanuhaña lubéi luma aban gürigia luagu Larúeihan Bungiu, moun lumuti wariñagun lun hínsiñe lan somu sétanu lánina polítika woun. Ánheinti busén somu gürigia layanuhan luagu le habusenrubei gürigia hadügün lun haranseruni turóbuli le ubouagubei? Yusu wamóun Bíbülia lun warufuduni lun laransehabei lan Larúeihan Bungiu sun turóbuli ligía lun súnwandan. Ánheinti busén habéi hasigenehan luagu katei kéiburi haragahóun irahüñü o luagu lamarieidun wügüri luma wügüri o würi tuma würi? Lunti warufuduni lun ka lan tariñagubei Bíbülia ani afuranguagüda wameime lun ígira wamá  lun tadundehaniwa Bíbülia. Ánheinti ariñaga lunti lan lagidarún o lasansirún somu lúrudu? Mayanuha wamá luagu katei ligía ani máfaagua wamá wadügün lun lasansirun lisaminan gürigia ligía.

10. Ka gayarabei wadügüni lun úaragua wamá lun Bungiu dan le warihin o waganbun somu katei lidan ñunsu?

10 Dan le waliihan o waganbahan ñunsu. Anihein dan, anuhein lan somu periodiku o somu ñunsu le ñǘdünbei luéigiñe lóubadina somu óundaruni lánina polítika. Wéiritimati lasuseredun le lidan ageiraü le ñein lubéi urúei lan gamanihari lau sun le áfuriduti lidan ñunsu. Anhein anihein lubéi somu ñunsu tidan bigibigitu o somu íchuguti ñunsu le luéigiñebei lóubadina somu óundaruni lánina polítika, mosu góunigi wamá luéi wagumeserun asaminara kei ligía. Lunti wálügüdagun woungua: “Hínsiñeti san nun naganbun somu íchuguti ñunsu ladüga hínsiñe lan le lariñagubei luagu polítika nun?”. Anhein mabusenrun wabéi wádaragun woungua lidoun polítika, maríagua wamá ani maganbahan wagíame ñunsu le ñǘdünbei luéigiñe lóubadina somu óundaruni lánina polítika. Houcha wamá wadarirun periodiku o ñunsu le mabalachunbei luagun lóubadina ni aban óundaruni. Ani dan le waliihan o waganbahan ñunsu, haritagua waméi le tarufudahabei Bíbülia (2 Timotéu 1:13).

11. Ka gayarabei lasuseredun ánhawa asandira saragu ínsiñeni luagu umegeguni le wámabei?

11 Anhein súdini lubéi umegeguni woun. Anhein weiri lubéi wasaminarun luagun seinsu luma umegeguni, hénrengutimabei woun lun úaragua wamá lun Bungiu. Ariha wamá aban hénpulu. Lidan aban ageiraü gíriti Malaui, lárigiñe irumu 1970 mosu meha hígiruni saragu gefentiña luagu Heowá sun hámati ladüga maha hamá hebelurun lidoun polítika. Gama lumoun, ariñagatu aban íbiri gíritu Rudu gíbetiña lan ha siñaguatiña houngua lun hígiruni sun hámati. Íbini anuraha hamá hama amu Gefentiña, lagumuhóun oura aba hóundarun hamoun polítiku lun gayara lan hagiribudun hábiñoun. Hibe-agei lubúeingu Bungiu mádaraguntiña houngua lidoun polítika íbini mosu lan meha hawinwandun lau murusun seinsu ani féridi haméi sun hámati (Ebüréu 10:34).

12, 13. a) Ida liña larihiniña Heowá gürigia? b) Ida luba wasubudiruni anhein wagumeseruña lubéi asandira íñuguni ladüga lídangiñetiwa lan somu fulasu?

12 Anhein weiri lubéi wapantan lau wageira luma warasan. Lidan ubóu le kamaniti warihin gürigia abulofuha luagu hageira, luagu uburugu le ñein lubéi hawinwanda, harasan o luagu hechun. Gama lumoun, masaminarunti Heowá buídutima lan aban gürigia o aban rasa luéi le líbiri. Súngubei wagía aban wabu ligibugiñe Bungiu. Inarüni ámuñegueinarügü lan ladügüniwa. Ani sun wagía gúndaatiwa dan warihin ámuñegueinarügü hawuyeri gürigia. Mabusenrunti Heowá lun wígiruni wanichigu. Gama lumoun, mabusenrunti giñe lun wasaminarun buídutima wamá hawéi amu (Rómana 10:12).

13 Moun lumuti wéirigu lan wasandiragun woungua luagu wageira darí lun wasaminarun buídutima lan luéi sun ageiraü. Ánhawa asandiragua woungua ítara, hénrengubei woun lun úaragua wamá lun Bungiu. Ligía meha asuseredubei lidan hadaani furumiñetiña kristiánugu. Aba meha hóuseruniña fiú kristiánugu ebüréu kristiánugu würiña ha hilaali hani weiriei lau marichaü (Adügaü 6:1). Ida luba san wasubudiruni anhein wagumeseruña lubéi asandira íñuguni? Samina wamá:  “Ka san nadügübei dan le líchugun somu íbiri le lídangiñeti amu ageiraü somu adundehani nun? Meresibirun numuti san ladüga samina nan buídutima lan wadügüni katei nageira?”. Anhein ítara liña lubéi, haritagua waméi ariñaga tan Bíbülia lunti lan ǘnabugu wamá ani samina wagíame buídutima hamá ha híbiri wawéi (Filipuna 2:3).

AMURIAHA WAMÁ ÍDEMUEI LUMA HEOWÁ

14. a) Ida liña gayara lan líderaguniwa furíei? b) Ru humá aban hénpulu tídangiñeti Bíbülia le arufudubalin weiri lan lubafu furíei.

14 Lunti giñe wamuriahan ídemuei luma Heowá lun gayara lan mádaragun wamá woungua lidoun luáguti ubóu. Gayarati líderaguniwa furíei saragu. Gayarati wamuriahan sífiri sandu luma Heowá, lun líchugun gurasu woun luma árügüdaguni unguaü. Líderagubadiwa igaburi burí le ánhaña adüga gumadimatiña somu katei le mabuidunti. Gayarati giñe wamuriahan luma Heowá lun líchugun lichú aau woun lun wíchugun fe danme le lóuchawaguña lan úaraguni le warufudubei lun ani lun wadügüni le buídubei (Santiagu 1:5). Gayarati wounahóun furisunrugun o wasufurirun amu katei ladüga úaragua wamá lun Bungiu. Anhein asusereda ítara, amuriaha wamá luma Heowá lun líchugun ganigi woun lun wafuranguagüdüni ka lan uagu mádaragun wabéi woungua lidoun polítika. Chouru waméi líderagubadiwa lan Heowá lun wawandun. Gayarati warihin aban hénpulu le arufudubalin lubafu furíei lidan Adügaü 4:27-31 (aliiha huméi).

15. Ida liña tíderaguniwa Bíbülia lun mádaragun wamá woungua lidoun polítika? (Ariha huméi giñe rekuáduru “ Íderagua tumutiña Lererun Bungiu lun úaragua hamá”).

15 Yusu lumutu Heowá Bíbülia lun líchugun erei woun. Anihein bérusu le gayarati líderaguniwa lun mádaragun wamá woungua lidoun ni kata wuribati lidan ubóu le. Gayarati wasaminarun luagun bérusu burí ligía ani houcha wagíame wafurendeiruni lun wayusuruni luéidügü lachülürün dan lun ua tan aban Bíbülia wama. Gayarati giñe téredagüdüni Bíbülia wafiñen luagu sun katei le füramase lubéi Bungiu woun lubá ámuñegü. Megei wamuti emenigini le lun wawanduni éibaahouni (Rómana 8:25). Anúadaha wamá bérusu burí le ayanuhati luagu iseri ubóu ani houcha wamá wasaminarun luagun katei burí le wabusenrubei warihin ñein.

SAMINA WAMÁ LUAGUN HÉNPULU LE HÍCHUGUBEI LUBÚEINGU BUNGIU HA ÚARAGUABAÑA

16, 17. Ka wafurendeirubei lídangiñe hénpulu le híchugubei lubúeingu Bungiu ha arufudubaña úaraguni? (Ariha humóun iyawaü to lídanboun lagumeseha arütíkulu).

16 Le ligadürün igaburi lun waranserun lun úaragua wamá lun Bungiu mosu  wasaminarun luagu hénpulu le híchugubei lubúeingu Bungiu ha úaraguabaña. Lidan tidaani Bíbülia arufudatiña saragu hádangiñe ganigi ani desidírütiña buidu lun úaragua hamá lun Bungiu. Kei hénpulu máhati meha Sadürákü, Mesakü luma Awedi-negó háhuduragun lun aban guáriua le ayusurúbei kei sínbolu lani arúeihani Babilónia (aliiha huméi Danieli 3:16-18). Uguñe weyu, íderagua lumutiña abahüdaguni le saragu Gefentiña lun ganigi hamá ani lun hamahadun háhuduragun lun lufanidiran hageira. Samina wamá giñe luagun lani Hesusu hénpulu. Mádaragunti meha lungua lidoun polítika ni lidoun amu katei le afanreinragubaliña gürigia. Subudi lumuti meha líderagubaña lan lani hénpulu lani disipulugu. Ligía líchugunbei gurasu houn ani aba lariñagun houn: “Gañei naali ubóu!” (Huan 16:33).

17 Uguñe weyu, añahein saragu Gefentiña ha úaraguatiña lun Bungiu. Añahein hádangiñe súfurigüdüwatiña saragu, dáüwatiña ani añahein hagía afarúatiña hilagubei ladüga úaragua hamá lun Heowá. Íderagua lumutiwa hani hénpulu lun ganigi wamá. Ariñagati aban íbiri turquiana: “Aban meha nibureinti Franz Reiter le afarúbei hilagubei ladüga maha lan lóundarun hadoun lisudaranigu Hitler. Arufuda tumuti gárada to labürühaboun tun lúguchu aban guñoun lubaragiñe lounwen luagu weiri lan lafiñen luagu Heowá. Busentina meha nafalaruni lani hénpulu lun hamuga lachülürün dan lun násügürün aban óuchawaguni libe lira” [1] (ariha huméi abürüdǘni lidan lagumuha arütíkulu).

18, 19. a) Ida liña gayara lan híderaguniwa íbirigu lidan damuriguaü lun wakipurun úaraguni? b) Ka desidírü hubéi hadügün guentó?

18 Gayarati híderaguniwa wíbirigu lun úaragua wamá lun Bungiu. Anhein lídanñadiwa lubéi lénrengunga, ayanuha wamá hama wéiyaaña lidan afiñeni. Gayarati híchugun adundehani buiti woun tau Bíbülia. Ani anhein giñe hasubudira íbirigu lidan damuriguaü ka lan suserebei woun, gayarabei giñe híchugun gurasu woun. Gayarati wariñagun houn lun hafurieidun wawagu. Ani íbini wagía gayarati giñe wíchugun gurasu houn wíbirigu ani furíei wagíame hawagu (Matéu 7:12). Lidan páhina lánina Internet jw.org anuhein aban lísüta lau hiri íbirigu ha furisunrugubaña. Darí wamutu lidan arütíkulu “Testigos de Jehová presos por sus creencias (por países)”, lidan fánreinti PRENSA > ASUNTOS LEGALES. Anúadaha waméi hiri fiú íbirigu ani amuriaha wamá luma Heowá lun líderaguniña lun ganigi hamá ani úaragua hagíame (Éfesuna 6:18-20).

19 Eibu ayarafadeinatima wamá lun lagumuchagüle ubóu le, gayarabei hadügün gumadimatiña erei wawagu lun woudin luéigiñe lóubadina somu óundaruni lánina polítika. Ligía súdini lubéi lun waranserun guentó lun gayara lan wakipurun úaraguni lidan ubóu le le ídanbei fánreinguañu haña lan gürigia.

^ [1] (párafu 17): Ariha humóun líburu Los testigos de Jehová, proclamadores del Reino de Dios, páhina 662, luma rekuáduru “Murió para la gloria de Dios” tidan líburu El Reino de Dios ya está gobernando, páhina 150.