Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Gádürü-hati irumu 2016

Ígira wamá lun labuiduragüdüni awanduni wagaburi

Ígira wamá lun labuiduragüdüni awanduni wagaburi

“Lunti lanügünün gurasu ligía darí lébeha üma, gayara láamuga labuidurun higaburi ani úaragua huguyame, úouga mégeiti huagu” (SANTIAGU 1:4).

UREMU 23, 139

1, 2. a) Ka wafurendeirubei lídangiñe awanduni le larufudubei Hedeón hama 300 lisudaranigu? (Ariha huméi dibuhu le lídanbei lagumeseha arütíkulu). b) Según Lúkasi 21:19, ka uagu súdini lubéi awanduni?

LAGEINDAGUÑA meha Hedeón hama lisudaranigu aban wuribu le hénrenguti ani buchá meha hawagu. Sügǘ hamaali meha sun áriebu éibaahaña háganiñu kéiburi 32 kilómeturu (20 maili). Ka asuseredubei lárigiñe? Ariñagatu Bíbülia: “Chülüti Hedeón hau ǘrüwa-san wügüriña ha lúmabaña larun duna Hordán aba hánhiñuraguni, lau sun buchá lan buga hawagu lárigi houdin éibaahaña háganiñu”. Gama lumoun, magañeirun hamagili meha wuribu, ladüga añaheingua meha 15,000 súdaragu áganiñu. Óusera hamaaña meha áganiñu ha ísüraelina wuriba luagu saragu dan. Ligía siñati lubéi meha lararamagun Hedeón hama luwügüriña. Ligía hasigirunbei éibaahaña háganiñu darí lun hagañeiruniña (Alidihatiña 7:22; 8:4, 10, 28).

2 Wagía, wageindaguña giñe aban wuribu hénrenguti le adügübei lun labuchadun wawagu. Satanási, ubóu le lábugiñebei lubafu luma wafigoun guánarügü wáganiñubaña. Saragu wádangiñe barühadiwa saragu irumu áfaagua kóntüra katei burí le. Ani lau  lídehan Heowá gáñeinhadiwa saragu wéiyaasu. Gama lumoun, magañeirun wamagili wuribu sunsuinagubei. Anihein dan gayarabei labuchadun wawagu áfaagua o agurabahei lagumuchagüle ubóu wuribati le. Ariñagati Hesusu wasufuriruba lan saragu turóbuli luma éibaahouni lidan lagumuhóun dan le. Gama lumoun ariñagati giñe ánhawa lan awanda, gayarabei lan wagañeiruni wuribu (aliiha huméi Lúkasi 21:19). Ka mini lubéi awanduni? Kaba íderaguawa lun wawandun? Ka gayarabei wafurendeiruni hámagiñe ha awandubaña? Ani ida luba wígirun lun lanügüniwa “gurasu ligía darí lébeha üma”? (Santiagu 1:4).

KA MINI LUBÉI AWANDUNI?

3. Ka mini lubéi awanduni?

3 Dan le layusurún dimurei awanduni tidan Bíbülia mama lariñaguña luagu siñati lan wadügün ni kata luéidigia wawanduni gádantiwa. Yúsuati dimurei le lun layanuhan luagu wagaburi dan le lidan wamá turóbuli. Mini lan warufudun ganigi, úaraguni luma gurasu. Ariñagatu aban líburu aban lan gürigia le awandati héreti lan lafiñen ani mábürühan lan larüna dan le lidan lan turóbuli. Mini lan wakipurun úaraguni íbini lidan dan le hénrengutimabei. Dan le wawandun, aba lasansirun waturobulin lun agañeirunime. Ani lubaragiñe wetenirun saragu lun wagarigu, aba wetenirun lun le wabusenrubei wadügün.

4. Ka uagu wariñaga íderagua lániwa ínsiñeni lun wawandun?

4 Íderagua lumutiwa ínsiñeni lun wawandun (aliiha huméi 1 Korintuna 13:4, 7). Ka uagu wariñagei le? Ladüga íderagua lumutiwa ínsiñeni le wasandirubei luagu Heowá lun wawandun furumiñeguarügü katei le lígirubei lun lasuseredun (Lúkasi 22:41, 42). Íderagua lumutiwa ínsiñeni le wasandirubei hawagu wíbirigu lun wawanduni hachara (1 Féduru 4:8). Ani íderagua lumutiwa giñe ínsiñeni le wasandirubei tuagu wani weiriou o luagu wani weiriei lun wawanduni turóbuli le burí úmabei hagagibudagua maríeitiña. Ani adügati ínsiñeni ligía lúntima here lan wamarieidun (1 Korintuna 7:28).

KABA ÍDERAGUAWA LUN WAWANDUN?

5. Ka uagu gayaratima lubéi líderaguniwa Heowá awanda?

5 Wamuriahan luma Heowá lun líchugun erei woun. Ariñagatu Bíbülia ruti lan Heowá “gurasu luma dǘgüdaguaü” (Rómana 15:5). Heowátima gayarabei líderaguniwa awanda ladüga ligíarügüñein gunfurandei gádantiwa buidu, gunfuranda lumuti giñe ida liña lan wasandiragun woungua luma sun le susereelibei lidan wabagari. Ligíati, subudi lumuti ka lan wemegeirubei lun wawandun. Ariñagatu Bíbülia “gúnfuli lumuti [lan Bungiu] hayumahan ha inebehabubaña lun; dan hamuriahan luma lun líderaguniña, aganba lumutiña, sefuláña” (Sálumu 145:19). Gama lumoun, ida liña san lóunabuniwa Bungiu dan le wamuriahan luma lun líchugun erei woun lun wawandun?

6. Dan le wagagibudagun luma óuchawaguni, ida liña lagunfuliruni Heowá lani füramasei luagu líderagubadiwa lan?

6 Ánhawa amuriaha luma Heowá lun líderaguniwa awanda, füramaseti woun líderagubadiwa lan (aliiha huméi 1 Korintuna 10:13). Ida luba ladügüni? Anihein dan lau lagidaruni turóbuli ligía wawéi. Gama lumoun, libe-agei dan rúrügüti erei woun lun gayara lan wawandun lau gurasu luma lau ugundani (Kolosana 1:11). Subudi lumuti giñe Heowá lébeha wawandun. Mígirunbei lun laweiridagun aban turóbuli darí lun siñá lan wakipurun úaraguni.

7. Afuranguagüda huméi lau aban hénpulu ka lan uagu mosu lubéi waturiahanu Lererun Bungiu buidu lun gayara lan wawandun.

 7 Wederebudagüdüni wafiñen lau ariñahani tídangiñe Lererun Bungiu. Ka uagu súdini lubéi waturiahanu Lererun Bungiu buidu? Ru wamá aban hénpulu. Lun lawariruni aban gürigia wübü le íñutimabei ubouagu, mosu leigin gürigia ligía ǘrüwa wéiyaasu lanwoun éigini le léigibei sagü weyu. Anhein busén lubéi lawandun darí lachülürün iñu, mosu léigini sun éigini le liyaraati. Ítarameme, anhein busén wabéi wawandun darí lumoun lagumuhóun, mosu waturiahanu Lererun Bungiu buidu. Mosu wasagarun dan lun waturiahan wábuguarügü luma lun woudin adamuridagua súnwandan. Ítara luba gayara lan wakipurun aban afiñeni héreti (Huan 6:27).

8, 9. a) Según Hobu 2:4, 5, ka katei óuchawagubei dan le lidan wamá turóbuli? b) Ka gayarabei wasaminaruni lidan dan ligía?

8 Waritaguni mosu lan úaragua wamá lun Bungiu. Dan le wagagibudagun luma turóbuli, súfuritiwa saragu. Gama lumoun, haritagua waméi giñe lóuchawaguña lan úaraguni le warufudubei lun Bungiu. Mabusenrunti Satanási lun Heowá lan agumadiha ubouagu. Anaba lumuti Satanási Heowá lau lariñagun seriwi hamá gürigia lun luágurügü katei le líchugubei houn. Lidan lidaani Hobu, ariñagati Satanási: “Aranseñu liña gürigia lun ladügüni liyaraati lun lesefuruni libagari”. Lárigiñe aba lariñagun anhein lan aguura Heowá luagu Hobu, aba lanme lagarabaagun Hobu lun (Hobu 2:4, 5). Saragu dan lárigiñe, dan le labugúnbei Satanási siélugiñe, aba meha lasigirun íchiga hadurun lubúeingu Bungiu (Arufudúni 12:10). Ani uguñe weyu, aniheingua ariñaga heseriwiduña lan gürigia lun Bungiu luágurügü katei buiti le líchugubei houn. Busenti lun maganbadi wamá lun lilurudun Bungiu ani lun wígiruni weseriwidun lun. Ligíati, danme le wagagibudagun luma turóbuli, haritagua waméi warufudubei lan lau ligaburi wóunabun anhein luéigiñeñadiwa lubéi lóubadina Heowá keisi le garichabei lun larúeihani ubóu le.

9 Lidan dan ligía, lunti wasaminarun luagun katei le. Luagu aban oubaü anihein Satanási hama lumafianu aríaguawa luma ariñaga woun lun lan masigirun wamá áfaagua. Luagu le aban oubaü anihán Heowá, warúeite Hesukrístu, kristiánugu anuadirúaaña ha águyuguaañabaña sielu hama saragu milu ánheligu. Haríaguñadiwa giñe, gama lumoun, hariñaguña woun lun lan mabuchadun lan wawagu. Gúndaatiña dan le harihini úaragua wamá lun Heowá ani awanhagua lan awanda. Ábati lariñagun Heowá woun: “Chula bau, niráü, ábame bagundaaragüdünina; ítara luba gayara lan nóunabuniña ha anabagutina” (Ariñawagúni 27:11).

10. Ida liña wáyeihani Hesusu dan le wagagibudagun luma óuchawaguni?

10 Wetenirun lun lubuidun resultóu le lanügübei wawandun. Samina humá hadügüña lan aban wéiyaasu ani mosu lan hásügürün lídangiñe aban üma le adügǘbei lábugiñegiñe múa. Búrigati ñein. Gama lumoun, subudi humuti ánhadün lan asigira hubaruaguóun, hachülürüba lan lidoun lagumuha üma ani ábayame háfuridun lidoun larugounga. Ítara liña ibagari kei wéiyaasu ligía. Gayarabei wásügürün lídangiñe dan hénrenguti ani ábame wadiheridun saragu. Háfuga íbini lan Hesusu sandiguati lungua ítara. Dan le ládarawagunbei luagu aban wagabu lun lounwen, súfurigüda hamuti saragu. Chóuruti ligía lan dan le hénrengutimabei lidan libagari. Ka íderagubalin awanda? Ariñagatu  Bíbülia subudi lani lárigiñe lanme lasufurirun “lagundaaruba lan” (Ebüréu 12:2, 3). Lidan amu dimurei, aba lasaminarun Hesusu luagun lubuidun resultóu le lunbei lanügüni lawandun, le súdinitimabei luagu lídehaba lan lun larumadahóun liri Bungiu luma liricha lun larúeihan. Subudi lumuti meha lagumuchuba lan lóuchawagun, anhein lan afayeiruahaü le lunbei libihini sielu laduraruba lan lun súnwandan. Danme le wasufurirun somu turóbuli wéiriti, gayarati wáyeihani Hesusu. Ida? Mosu wasaminarun luagun lubuidun resultóu le lanügübei awanduni luma lun waritaguni lagumuchuba lan turóbuli.

“HA AWANDUBALIN ASUFURIRUNI”

11. Ka uagu buidu lubéi lun wasubudiruni habagari ha “awandubalin asufuriruni”?

11 Gíbeeña lubúeingu Bungiu awandutiña kei wagía. Lidan meha lidaani apostolu Féduru, gíbetiña meha kristiánugu awandutiña éibaahouni lúmagiñe Satanási. Ligía lariñagunbei Féduru houn: “Mígiraguagüda humá hungua lun; deregüdagu humá lidan hafiñen, subudiñu huméi luagu ligiaméme lan giñe hasufurirubei hiduheñu luéigiñe Kristu lidan sun fulasu” (1 Féduru 5:9). Ligía buidu lubéi lun wasubudiruni habagari ha “awandubalin asufuriruni”. Ka uagu? Ladüga gayarati líderaguniwa lun úaragua wamá, gayarati líchugun ichouruni woun luagu gayara lan wawandun ani lun waritaguni ánhawa lan úaragua lun Heowá wibihibei lan wafayeiruaha (Santiagu 5:11). Ariha waméi hénpulu le híchugubei fiú lubúeingu Bungiu ha awandaaña [1] (ariha huméi abürüdǘni lidan lagumuha arütíkulu).

12. Ka wafurendeirubei lídangiñe hénpulu le híchugubei ánheligu lidan fuluri-agei Edén?

12 Querubines. Súdinitiña ánheligu ha. Dan le meha hafigouhanbei Adán tuma Ewa, aba líchugun Heowá aban wadagimanu houn ánheligu ha ubouagu, amu wadagimanu luéi le meha hadügübei sielu. Íderagua lumutiwa hani hénpulu lun wawandun dan le wibihin somu wadagimanu le hénrenguti tidan lóundarun Heowá. Ariñagatu Bíbülia aba lan líchugun Heowá “átiri kátaña garünatiña luéigiñe oubaü le ñéingiñe lubéi laboucha weyu libiti Edén, tuma aban eféin durungu kei watu, agararahatu luagun sun oubaü lun ua lan ni aban achülürüti luagun tídibu wewe to lánina ibagari” (Agumesehani 3:24) [2] (ariha huméi abürüdǘni lidan lagumuha arütíkulu). Mariñaguntu Bíbülia aba lan hekeherun ánheligu ha o aba lan hariñagun súdini hamá lun hadügün aban wadagimanu libe lira. Mariñaguntu giñe aba lan labuchadun hawagu o aba lan hígiruni habara. Lubaragiñe lira, aba herederun ñein darí lagumuchun hawadigimari. Háfuga redei hamá ñein lóugiñe 1,600 irumu, darí lachülürün Guran.

13. Ka íderagubalin Hobu lun lawandun saragu asufuriruni?

 13 Hobu, aban wügüri úaraguati. Háfuga anihein lan dan weferidiruni waguraasun ladüga lariñagun somu wamada o waduhe somu katei le agaridagüdübarun wanigi. O háfuga weiri lan wasandi o súfuri wamá luagu lounwen somu gürigia le hínsiñeti woun saragu. Gama lumoun, meberesenga ka lan suserebei woun, gayarati líderaguniwa lani Hobu hénpulu (Hobu 1:18, 19; 2:7, 9; 19:1-3). Ibidiñeti meha lun Hobu ka lan uagu sódini lubéi lagumeserun saragu katei wuribati asusereda lun. Gama lumoun meferidirun lumuti luguraasun. Ka íderagubalin awanda? Furumiñe, ínsiñeni le lasandirubei luagu Heowá luma ayumahani le lasandirubei lun lagundaaragüdüni Bungiu (Hobu 1:1). Busenti meha ladügüni lugundan Heowá dandu lidan buidu lan lidin lun kei dan le wuriba lan. Libiaman, ayanuhati Heowá lun luagu sun katei le ladügübei lun laritaguni weiri lan lubafu Heowá. Íderagua lumuti katei le lun lachoururuni lagidarubei lan Heowá sun asufuriruni ligía luéi lidan dan (Hobu 42:1, 2). Ani ítara liña lasuseredun. Gidá lumuti Heowá lasufurirun Hobu ani ruti dóbuli lun lóugiñe le leferidirubei. Aba gunda lan libagari Hobu (Hobu 42:10, 17).

14. Según 2 Korintuna 1:6, ida liña líderaguniña awanduni le larufudubei Pábulu amu íbirigu?

14 Apostolu Pábulu. Gayarati wasufurirun fiú wádangiñe éibaahouni ladüga weseriwidun lun Heowá. O anhein wéiyaaña wabéi lidan afiñeni o óunigirutiña sirkuitu, háfuga weiri lan wadiheri ladüga gibe lan wadagimanu lunti wadügüni. Anhein ítara liña lubéi, gayarati líderaguniwa lani Pábulu hénpulu. Súfuriti lanarime éibaahouni. Ani wéiriti meha giñe lidiheri hawagu íbirigu (2 Korintuna 11:23-29). Gama lumoun, mabuchadunti luagu, ani íderagua lumutiña lani hénpulu ha híbiri lun giñe hawandun (aliiha huméi 2 Korintuna 1:6). Ánhawa awanda, líderagubaña giñe wani hénpulu amu íbirigu lun hawandun.

 WÍGIRUBA SAN LUN LABUIDURAGÜDÜNI AWANDUNI WAGABURI?

15, 16. a) Ka idan líderaguawa awanduni? b) Ru humá hénpulu burí luagu ida liña lan líderaguniwa awanduni?

15 Adügati Heowá lun labürühani disipulu Santiagu dimurei burí le: “Lunti lanügünün gurasu ligía darí lébeha üma, gayara láamuga labuidurun higaburi ani úaragua huguyame, úouga mégeiti huagu” (Santiagu 1:4). Kei aubei warihei, ariñagati Santiagu líderagubadiwa lan awanduni lun labuidurun wagaburi, lidan amu dimurei, lun kristiánugu wamá ha buítiña. Ida liña san ladügüni awanduni katei le wawagu? Kéiburi dan le gaturobulin wamá, háfuga wíchugun fe mosu lan gaguraasun wamá, o lun geteingiraditima wamá o lúntima warufudun ínsiñeni. Dan le wawandun, aba wafurendeirun arufudei igaburi burí le ani aba kristiánugu wamá ha buítiña. Ítara liña wígirun lun labuiduragüdüni awanduni wagaburi.

Ánhawa awanda dan le gaturobulin wamá, kristiánugubadiwa ha buídutimatiña. (Ariha huméi párafu 15 luma 16).

16 Kei le íderagua lubadiwa awanduni lun kristiánugu wamá ha buítiña, máluaha wamá wáfuridun lídangiñe turóbuli lau warufudun maganbadi lun Bungiu. Ru wamá bián hénpulu. Samina wamá wáfaaguña lan kóntüra aba luriban saminaü. Lubaragiñe wígiraguagüdün woungua lun wábürühan lidoun, amuriaha wamá luma Heowá lun líderaguniwa agidarei luriban saminaü ligía wawariua. O samina wamá anihein lan somu waduhe le mabusenrunti lun gefén wamá luagu Heowá. Lubaragiñe wígiraguagüdün woungua, sigí wamá eseriwida lun Heowá. Líderagubadiwa katei le lúntima wafiñerun luagu Heowá. Mabulieida waméi anhein lan busén wabéi lun lánharun Heowá woun, mosu lan wawandun (Rómana 5:3-5; Santiagu 1:12).

17, 18. a) Yusu humá aban hénpulu lun hafuranguagüdüni lisudinin awanduni darí lumoun lagumuhóun. b) Guentó kei yarafatimahadiwa lubéi lun lagumuchun ubóu, ka lunbei wachoururuni?

17 Mosu wawandun darí lagumuhóun, ani mámarügü luagu murusun dan. Samina wamá tuagun aban waporu to abulucheina tiña. Anhein busén habéi gürigia ha tídanbaña hesefurun, mosu háfulihan darí hachülürün laru beya sin labuchadun hawagu. Ítarameme, anhein busén wabéi wawinwandun lidan Paraísu, mosu wawandun darí lumoun lagumuhóun sin wararamagun. Ítara kei meha lariñaguni apostolu Pábulu ‘moun lumuti lábürühan warüna’ (2 Korintuna 4:1, 16).

18 Kei Pábulu, chouru wamuti líderagubadiwa lan Heowá lun wawandun darí lumoun lagumuhóun. Abürühati Pábulu: “Sügütiwa hau agañeirutiña lídangiñe le hínsiñehabubei woun. Chouru numuti lubeiti luagu ua lan ni kata lun lafanreinraguniwa luéi línsiñehabu Bungiu —ni óunweni, ni ibagari, ni ánheligu, ni máfianu, ni katei le guentobei, ni le lunbei liabin, ni le siélubei, ni le ubouagubei, ni burí amu katei le ladügübei Bungiu— siñati lafanreinraguniwa luéi línsiñehabu le larufudubei woun lidan Wabureme Hesukrístu” (Rómana 8:37-39). Gunfurandawati aniheinbei lan dan labuchadun wawagu. Gama lumoun, mosu wafalaruni lani Hedeón hama luwügüriña hénpulu. Buchá meha hawagu, ani íbini ítara sigitiña habaruaguóun (Alidihatiña 8:4). Hafalarubei san hani hénpulu?

^ [1] (párafu 11): Líderagubadiwa giñe waliihani hénpulu lánina awanduni le harufudubei lubúeingu Bungiu lidan wadaani. Gayarati waliihani ariñahani hawaguti wíbirigu Etiopíana, Malaui luma Rusia tidan Anuario to lánina 1992, 1999 luma 2008.

^ [2] (párafu 12): Mariñagun tumuti Bíbülia átiriñanu lan ánheligu layusurun Bungiu lun wadagimanu le.