Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Gádürü-hati irumu 2016

Ítara liña san bapurichihan kei serenu?

Ítara liña san bapurichihan kei serenu?

SÚDINITI apurichihani, gama lumoun añahein gürigia marihin hamuti súdini lan. Íbini añahein lan gürigia hínsiñeti houn hayanuhan tuagu Bíbülia, masaminaruntiña megei hamá haturiahanu Bíbülia wama.

Samina wamá luagun le ladügübei aban wügüri gíriti Gavin. Abasiihati meha tidan Luban Wadamuridagun, ani mabusenrunti meha laturiahanu Bíbülia. Ka uagu? Ariñagati mibe lan meha lisubudin tuagu Bíbülia ani mabusenrunti lan lun híchugun amu fe. Mabusenrunti meha giñe gadaradun lan luougua luma ni aban relihión ani mabusenrunti meha leyeedún. Ka hisaminanbei luagu lásügürün Gavin? Gayarati meha san líderawagun? Huuti le tarufudahabei Bíbülia houn gürigia. Ligía lariñagunbei Heowá houn ísüraelina ítara luba lan lererun “kei serenu” ani “kei láhibihan huya luagun híduru” (2 Lúrudu 31:19, 30; 32:2). Ariha wamá gádürü katei luáguti serenu le gayarabei wadügüni dan le wapurichihan houn “sun gürigia” (1 Timotéu 2:3, 4).

 KA UAGU ÍTARA LIÑA LUBÉI WAPURICHIHAN KEI SERENU?

Masandirúnti lábürühan serenu. Serenu ligía duna le warihibei binaafin ligibuagu katei le erederubei bóugudi. Ka uagu tariñaga Bíbülia ítara liña lan lererun Heowá “kei serenu”? Ladüga huáliti ligaburi layanuhan Heowá houn lubúeingu ani adüga lumuti lau ínsiñeni. Ida luba wáyeihani? Lau inebe lan hafiñen gürigia ha únbaña wapurichiha woun luma lau wíderaguniña lun hasaminarun luma lun hagía lan houngua desidírü. Ánhawa arufuda houn gürigia berese wamá hau, aransetimabaña lun hánharun lun le wariñagubei houn. Ítara luba buídutima lan lidin woun lidan apurichihani.

Diliti serenu. Ítara luba wapurichihan kei serenu anhein adüga lun buidu lan hasandiragun gürigia houngua. Ida luba wibihini katei le? Samina wamá ida luba lan wíderaguniña gürigia lun hasubudirunu Bíbülia. Arihaya waméi lani Gavin hénpulu. Furumiñe, ariñagati aban íbiri gíriti Chris lun gayara lan laturiahanu Bíbülia luma, gama lumoun mafosurun lumuti lun lánharun. Adügarügüti lun buidu lan lasandiragun Gavin lungua sagü hayanuhan tuagu Bíbülia. Afuranguagüdati Chris lun ayanuhóuati lan tidan sun Bíbülia luagu aban katei súdiniti ani danme lan lasubudiruni katei ligía buídutimabei lan gunfuranda lani adamuridaguni. Ariñagati giñe Chris lun Gavin adüga lan profesía burí le tídanbei Bíbülia lun lafiñerun luagu uganu le tídanbei. Ayanuhatiña saragu wéiyaasu luagu profesía burí le tídanbei Bíbülia. Aba labuidurun lasandiragun Gavin lungua ani aba lánharun laturiahanu Bíbülia.

Ruti serenu ibagari. Lidan lidaani lumabeigan hárougati Ísüraeli, ani gayarati lásügürün saragu hati lubá láhuyun huya. Lun hamuga úati serenu, aba hamuga lamabeidun nadü ani aba hamuga lounwen. Ariñagatu Bíbülia luagu lidan lanme dan le busenbaña lan gürigia haganbuni ‘lererun Bungiu’ (Amosu 8:11). Ítara luba kamá wéiriti hamagürabu lun hasubudirun luagu Bungiu. Ligía tariñagunbei Bíbülia dan le lan hapurichihani kristiánugu anuadirúaaña uganu buiti luáguti Larúeihan Bungiu ítara haña lan “kei serenu le lóunahan Bungiu” (Mikeasi 5:7). Ani añahein giñe amu kristiánugu ha subudiwabaña kei “amu mudún” íderaguaña (Huan 10:16). Uganu le wapurichihabei aban lídangiñe katei le líchugubei Heowá lun líchugun ibagari houn ha busenbaña hafurendeirun luagu. Gebegiti san uganu le woun?

Aban abinirúni lúmagiñe Heowá serenu (2 Lúrudu 33:13). Gayarati ítara lan wapurichihan kei aban abinirúni o kei aban idewesei houn ha ánharubaña lun inarüni. Aban meha abinirúni taturiahóun Bíbülia lun Gavin ladüga íderagua tumuti adeira óunabagülei lun sun lálügüdahan. Fiú dan lárigiñe aba labadiseirun ani guentó gúndaati lau lapurichihani uganu buiti luáguti Larúeihan Bungiu úara tuma Joyce to lani weiriou.

Buíngüda hamuti gefentiña luagu Heowá Ubóu lau uganu buiti luáguti Larúeihan Bungiu.

GEBEGILÁ APURICHIHANI WOUN

Anhein konparárü wamá apurichihani luma serenu, warihibei weiri lan lebegi áfaaguni le wadügübei. Ka uagu? Ladüga mídehanti ábanrügü lagu serenu saragu, ánheinti dan le lábürühan bandi serenu lidan aban, aba ladüdüraguagüdüni múa. Ítarameme, gayarati genege lan woun madügün wamá saragu wábuguarügü. Gama lumoun, sun gefentiña luagu Heowá ha ubouagubaña úara ibihatiña lun lachülürün uganu buiti lidoun “sun ubóu” (Matéu 24:14). Kei aubei warihei, aban abinirúni lúmagiñe Heowá apurichihani. Ani gayarati ítara lan kei serenu le adiliragüdübalin múa ani ru ligía ibagari.