Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Eneru irumu 2017

Ka uéigiñe súdini lubéi ǘnabugu wamá

Ka uéigiñe súdini lubéi ǘnabugu wamá

“Hámañein ǘnabugutiña lichú aau” (ARIÑAWAGÚNI 11:2).

UREMU 38, 11

1, 2. Ka uéigiñe aba lubéi mabusenrun laali lan Heowá Saulu? (Ariha huméi dibuhu le lídanbei lagumesehan arütíkulu).

ABAN meha wügüri mapantanti Saulu dan le lanúadirunbalin Heowá lun urúei lan (1 Samueli 9:1, 2, 21; 10:20-24). Gama lumoun lárigiñe liridún urúeime, aba lanaagun lungua. Lidan aban ókaasion, aba hóundaragun saragu milu súdaragu filistéana lun hawuribuhan hama ísüraelina. Lunti meha yebe lagurabahani Saulu lachülürün profeta Samueli lun ligía lan adagaragüda lun Heowá. Gama lumoun kei le larihin luagu hanufude hamá ísüraelina ani aba lan hígiruni saragu hádangiñe aba labuchadun luagu agurabahei Samueli. Ábati ladagaragüdün lun Heowá, aba katei le úati yu lan lun. Ani magundanti Heowá lau katei le ladügübei (1 Samueli 13:5-9).

2 Dan le lachülürün Samueli ñeinhin lubéi Saulu aba lébechuni ladüga lumaganbadin lun Heowá. Lubaragiñe hamuga lánharun lun lichara aba líchuguni duru hawagu amu luagu le ladügübei (1 Samueli 13:10-14). Lúmagiñe dan ligía aba meha lagumeserun óusera lau pantaü. Ligía aba lubéi mabusenrun laali lan Heowá kei urúei ani aba lariñagun lun lagidaraali lan arúeihani luéi  (1 Samueli 15:22, 23). Buiti meha lagumeserun libagari Saulu, gama lumoun wuribati lagumuchun (1 Samueli 31:1-6).

3. a) Ka hasaminarubei saragu gürigia luagu ǘnabuguni? b) Kaba burí álügüdahani wóunaba?

3 Uguñe weyu, añahein saragu gürigia saminatiña luagu siñá lan ǘnabugu hamá anhein busén habéi buidu lan lidin houn lidan habagari. Apantahatiña luagu hámati lun buidu lan harihín hawéi ha híbiri gürigia. Kei hénpulu ariñagati aban polítiku subudiwati ani furí ligía tidan bigibigitu: “Mama aban wügüri ǘnabuguti au ani agurabatina lun ítarameme luba lan”. Ligíati, ka uagu súdini lubéi lun ǘnabugu hamá kristiánugu? Ka pántaübei? Lafuranguagüdüwaba álügüdahani burí le lidan arütíkulu le. Ani lidan le aban warihibei ida luba lan ǘnabugu wamá íbini lidan lénrengunga.

KA UAGU SÚDINI LUBÉI MAPANTAHAN WAMÁ

4. Ka igaburi arufudubei panta lan aban gürigia?

4 Ariñagatu Bíbülia íñuguni lan o pantaü lagarabaagunbei ǘnabuguni (aliiha huméi Ariñawagúni 11:2). Ariñagati Dawidi lun Heowá: “Mígiraba lun ladügüni pantaü le labusenrun nau” (Sálumu 19:13). Ka igaburi arufudubei panta lan aban gürigia? Aban gürigia pántati adügati aban katei íbini ua lan yu lan lun ladügüni, ani háfuga adüga lumuti ladüga íñugu lan o ladüga magurabaguadi lan. Kei le gafigoun wabéi, sun wagía adügaadiwa aban katei ítarati. Gama lumoun anhein barǘ wamaali lubéi igaburi le kei aban échuni, wagañidagüdübei Heowá kei lagañidagüdüni urúei Saulu. Ariñagati Sálumu 119:21 adeinha lan Heowá houn mabuchahatiña. Ka uagu?

5. Ka uagu aban lubéi óunwenbu charati wóuserun lau íñuguni o lau pantaü?

5 Aban óunwenbu charati hóuserun gürigia lau lanarime íñuguni. Ka uagu? Furumiñe, ladüga dan le wóuserun ítara marufuduntiwa inebesei luagu Heowá, le Wabungiute ani Warúeite. Libiaman, ladüga dan le wadügün aban katei sin lichugún üma woun lun wadügüni gayarati ladügün lun gaturobulin wamá hama amu gürigia (Ariñawagúni 13:10). Ani le lǘrüwan, ladüga gayara lan warihín kei ibidiougua tau danme le híchugun gürigia fe luagu lau lan pantaü wadügei aban katei (Lúkasi 14:8, 9). Ligía lariñagunbei Heowá woun lun lan mapantahan wamá.

KA MINI LUBÉI MAPANTAHAN LAN ABAN GÜRIGIA?

6, 7. Ida liña genegegua lan mapantani luma ǘnabuguni?

6 Yarafaguati mapantan lan aban gürigia luma ǘnabuguni. Aban kristiánu ǘnabuguti mapantahanti, saminati iñu hamá amu gürigia luéi (Filipuna 2:3). Gürigia le ǘnabugubei mapantahanti, subudi lumuti le gayara lubéi adüga luma le lásiñarubei ani ánhati lun lichara. Ani aranseñu liña giñe lun laganbuni le hasaminarubei amu luma lun lafurendeirun hámagiñe. Hínsiñetiña gürigia ǘnabugutiña lun Heowá.

7 Ariñagatu Bíbülia subudi lani aban gürigia le mapantanti anihein lan fiú katei siñati ladügüni sin libihin üma lun ladügüni ani anihein lan katei lásiñarun adüga. Íderagua lumuti katei le lun inebe hama amu gürigia lun luma lun lóuseruniña lau gudemehabu.

8. Anhein busén wabéi lun ǘnabugu wamá súnwandan, ka saminaü luma usa lunbei wagidaruni wawariua?

8 Ánhawa móunigi gayarabei wagumeserun apantaha sin wíchugun fe. Ida luba hamuga lasuseredun le? Háfuga wagumeserun asaminara wéirigutima wamá hawéi ha híbiri ladügarügü gani wamá somu buligasion lidan damuriguaü  o ladüga gani hamani wamadagu (Rómana 12:16). O háfuga wagumeserun abulofuha lúnrügü wariawagún (1 Timotéu 2:9, 10). Gayarati wagumeserun ariñaga houn amu ka lan lunbei hadügüni luma ka lan lunbei madügün hamani (1 Korintuna 4:6).

9. Ka uagu hagumesera fiú gürigia óusera lau lanarime íñuguni? Ayanuha humá luagu aban hénpulu tídangiñeti Bíbülia.

9 Ánhawa márügüdagun woungua luéi lagübüri saminaü, gayarabei wagumeserun apantaha. Óuseratiña saragu gürigia lau lanarime íñuguni ladüga márügüdagun hamá houngua luéi gimugaü, igañi, o ayumahani lun heresibirun uériguni. Anihán katei le asuseredubei houn fiú gürigia ha uágubaña tayanuha Bíbülia, kéiburi Abüsalón, Osiasi luma Nabukodonosoru. Afuranguagüda lumuti meha Heowá houn lunti lan ǘnabugu hamá (2 Samueli 15:1-6; 18:9-17; 2 Krónikasi 26:16-21; Danieli 5:18-21).

10. Ka uagu moun lumuti lubéi wadimurehan luagu lébuna hadügün gürigia somu katei? Ayanuha humá luagu aban hénpulu tídangiñeti Bíbülia.

10 Háfuga anihein lan amu resun lun hóuserun gürigia lau pantaü. Samina wamá luagu likesin Abimélekü luma likesin Féduru (Agumesehani 20:2-7; Matéu 26:31-35). Óuseratiña san lau íñuguni? Anihein meha funa san katei le ibidiñeti houn? Odi adügarügü hamuti katei sin hasaminarun? Kei le siñá lubéi wasubudiruni le tídanbei hanigi gürigia moun lumuti wíchugun hadurun amu (aliiha huméi Santiagu 4:12).

WABARA HADAN LUMUTUNIÑA BUNGIU

11. Ka un lánhara kristiánu le mapantahabei?

11 Kristiánu le mapantanbei gúndaati lau lubara hadan lumutuniña Bungiu. Kei le mínsiñe lubéi chagaguaü lun Heowá, ruti aban ubaraü woun súngubei lidan damuriguaü. Mégeiwatiwa súngubei. Rúhali Heowá ubafu woun luma iyarani, ani ígirati lun desidírü wamá ida luba lan wayusuruni. Ánhawa ǘnabugu wayusurubei kei labusenruni (Rómana 12:4-8). Agurabati Heowá lun wayusuruni iyaraani le wawagubei lun wíchugun uériguni lun luma lun wíderagun amu (aliiha huméi 1 Féduru 4:10).

Ida luba líderaguniwa lani Hesusu hénpulu ánhawa ibiha aban iseri buligasion? (Ariha waméi párafu 12 darí 14).

12, 13. Ka lunbei waritaguni ánhawa agagibudagua luma somu asansiruni lidan weseriwidun lun Heowá?

12 Lau lásügürün dan gayarati lasansirun le wadügübei lidan weseriwidun lun Heowá. Samina wamá san luagu sun asansiruni le winwan láalibei Hesusu. Furumiñe, lábugua meha lawinwanda luma Lúguchi (Ariñawagúni 8:22). Lárigiñe aba lawadigimaridun luma Lúguchi adügaña ánheligu, ubóu hama gürigia (Kolosana 1:16). Lárigiñe, aba lounahóun Hesusu ubouagun. Mosu meha nasirua lan ya kei aban irahü ani aba aweirideina lan darí lun aban lan wügüri (Filipuna 2:7). Lárigiñe lounwen, aba lagiribudun sielun, ani lidan irumu 1914 aba ligía lan urúei lidan Larúeihan Bungiu (Ebüréu 2:9). Ani lárigiñeme larúeihan luagu milu irumu, lagiribudagüdübei Arúeihani lun Lúguchi. Lúmagiñe dan ligía ábame “Búngiurügüba lan sun katei hadan súngubei”, lidan amu dimurei, ligíaba agumadiha lidan sun ubóu (1 Korintuna 15:28).

13 Sun wagía gayarati giñe ñein lan asansiruni lidan wabagari. Gayarati lasansirun wani buligasion según le desidírü wabéi lidan wabagari. Kei hénpulu, gayarati mamarieidungidiwa lan meha ani aba desidírü wamá wamarieidun. O háfuga gasaanigu haadiwa lan. Lau lásügürün dan háfuga aba lan desidírü wamá wadügün fiú asansiruni lidan wabagari lun weseriwidun lun Heowá lidan dan dayarüti. Gama lumoun, anihein dan lasansirun wani buligasion ladüga lasansirun gádantiwa.  Guentó háfuga gayara lan wadügün saragu o háfuga murusunrügaali lan katei gayarati wadügün lidan weseriwidun lun Heowá. Gama lumoun, meberesenga anhein nibureingidiwa lubéi o wéiyougaadiwa lan, anhein buidu lubéi wátuadi o wuriba lan, subudi lumuti Heowá ida luba lan buídutima lan weseriwidun lun. Magurabunti lun wadügün lóugiñe le wayaraabei adüga. Lubaragiñe lira, gúndaati lau le wadügübei lun weseriwidun lun (Ebüréu 6:10).

14. Ida liña gayara lan líderaguniwa ǘnabuguni lun gunda wamá lau sun gádantiwa?

14 Sun wadagimanu le líchugubei Lúguchi Hesusu lun gúnfuli lumuti lau ugundani, ani ligía giñe lunbei wadügüni (Ariñawagúni 8:30, 31TNM). Anhein ǘnabugu wabéi, gúndaabadiwa lau sun wadagimanu luma buligasion le ichugúti woun lidan damuriguaü. Metenibadiwa lun buligasion le ichugúbei houn amu. Gúndaarügübadiwa lau lúgaaru le wibihibei tidan lóundarun Bungiu ladüga subudi wamuti ligía lan íchugubalin ubaraü ligía woun. Línchahabadiwa giñe ǘnabuguni lun inebe hamá wíbirigu woun ani lun wíderaguniña lau sun wagundan. Wagundaaruba luagu ru lan giñe Heowá aban ubaraü houn hadan lumutuniña (Rómana 12:10).

LARIHÍN ǗNABUGUNI KEISI LUBUDUBU

15. Ka wafurendeirubei lídangiñe lani Hedeón hénpulu?

15 Ruti Hedeón aban buiti hénpulu lánina ǘnabuguni. Luagu aban weyu, ariñagati Heowá lun lun lesefuruniña ísüraelina háhaburugugiñe madianna, ha háganiñu. Ida liña lóunabun Hedeón? Aba lariñagun liduheñu lan ñǘraütimabaña hádangiñe lani türibu ani ligía lan ñǘraütimabei tídangiñe luban lúguchi (Alidihatiña 6:15). Íbini ítara, afiñeti  meha Hedeón luagu Bungiu ani ánhati ladügüni wadagimanu ligía. Áfaaguti lun gunfuranda lani buidu ka lan labusenrubei Heowá lun ladügüni ani amuriahati luma lun ladundehani (Alidihatiña 6:36-40). Inarüni aban lan meha wügüri héreti ani ganigiti Hedeón, gama lumoun chuti meha giñe lau ani óuserati lau duari (Alidihatiña 6:11, 27). Dan le habusenrunbei gürigia lun ligía lan harúeite, máhati. Lárigiñebei lagunfulirun lau wadagimanu le líchugubei Heowá lun, aba lagiribudun lúbiñoun (Alidihatiña 8:22, 23, 29).

16, 17. Ka katei gabaroun lubéi aban kristiánu ǘnabuguti le busenti lawanserun lidan leseriwidun lun Heowá?

16 Warufuduña san ua lan ǘnabugu wamá dan le wánharun lun somu buligasion o dan le busén wamá lúntima wídehan lidan damuriguaü? Uá. Ariñagatu Bíbülia buidu lan busén wamá waganwoundagüdüni weseriwidun lun Heowá luma houn wíbirigu, ani lun wawanserun lidan weseriwidun lun Heowá (1 Timotéu 4:13-15). Gama lumoun, mama mosu wiridún lun aban iseri buligasion lun gayara lan wawanserun. Sun wagía gayarati wasigirun abuiduragüdei wagaburi keisi kristiánugu luma iyaraani le ru láalibei Heowá woun. Ítara luba buídutima lan weseriwidun lun Heowá ani gayarabei wíderaguniña ha híbiri.

17 Aban kristiánu le ǘnabuguti, lubaragiñe lánharun lun somu buligasion álügüdahati ka lan lunbei ladügüni, furíeiti lun Heowá luagu katei ligía ani saminati buidu anhein gayarabei lubéi lagunfuliruni. Háfuga buídubei lun lálügüdagun lungua anhein gadaanigili lubeime ani here ligíame lun lagunfulirun lau amu burí katei súdiniti. Anhein siñabei lubéi lagunfuliruni, háfuga gayarabei hadügün amu íbirigu fiú lídangiñe wadagimanu le ladügübei. Lárigiñe lakutihani sun katei buidu, háfuga líchugun kristiánu ǘnabuguti ligía fe siñabei lan lagunfulirun buidu lau buligasion le ichugúbei lun. Anhein ǘnabugu wabéi, aniheinbei dan mosu lan wariñagun uá.

18. a) Anhein ǘnabugu wabéi, kaba wadüga anhein ichugúa aba iseri buligasion woun? b) Ida liña líderaguniwa Rómana 12:3 lun ǘnabugu wamá?

18 Mabusenrunti Heowá lun wanaagun woungua lidan wéibugun lidan lémeri (Mikeasi 6:8). Ligíati, anhein ichugúa aban iseri buligasion woun, áyeiha waméi Hedeón ani amuriaha wamá luma Heowá lun ladundehaniwa ani lun líderaguniwa. Samina wamá buidu luagu le lariñagubei Heowá woun tidan Lererun luma tidan lóundarun. Mabulieida waméi sun lan le wadügübei lun Heowá adüga wamuti ladüga ǘnabugu lan Heowá ani íderagua lumutiwa, mama ladüga chu lan wau (Sálumu 18:35). Anhein ǘnabugu wabéi masaminarunbadiwa súdinitima wamá hawéi amu (aliiha huméi Rómana 12:3).

19. Ka uagu lunti lubéi ǘnabugu wamá?

19 Kei aubei warihei, mosu ǘnabugu wamá ladüga subudi wamuti lúnrügüñein lan Heowá yu lan libihin uériguni ladüga ligía adügübalin sun katei ani ligía Bungiu le Íñutimabei lidan sun ubóu (Arufudúni 4:11). Líderagubadiwa ǘnabuguni lun gunda wamá lau le wayaraabei adüga lidan weseriwidun lun Heowá. Líderagubadiwa giñe lun inebe lan le hasandirubei luma le hasaminarubei wíbirigu woun, ani ítara ñeinbei úarani wadan. Dan le ǘnabugu wamá, mádaraguntiwa woungua lidoun turóbuli wéinamuti ladüga wasaminaruba buidu lubaragiñe wadügün aban katei. Ani hínsiñetiña giñe gürigia ǘnabugutiña lun Heowá. Sun katei le arufudahati woun súdini lan lun ǘnabugu hamá lubúeingu Bungiu. Lidan leweñegua arütíkulu warihibei ida luba lan ǘnabugumeme wamá íbini lidan lénrengunga.