Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Eneru irumu 2017

Gebegilá idewesei le líchugubei Bungiu lun desidírü wamá woun

Gebegilá idewesei le líchugubei Bungiu lun desidírü wamá woun

“Ñein lumuti lani Wabureme [s]ífiri anihein esefuruni” (2 KORINTUNA 3:17).

UREMU 31, 32

1, 2. a) Ka hariñagubei fiú gürigia luagu ubafu le líchugubei Bungiu woun lun desidírü wamá? b) Ka tarufudahabei Bíbülia luagu ubafu lun desidírü wamá? c) Kaba burí álügüdahani wóunaba lidan arütíkulu le?

ANUHEIN aban würi mosu meha desidírü tan luagu somu katei, ábati tariñagun lun aban tumada: “Madügabá lun nasaminarun, ariñagarügübei nun kaba lan nadüga. Ménrenguntimati”. Himei tumuti meha lun lariñawagún tun kaba lan tadüga lubaragiñe tayusuruni lubuidun idewesei le líchugubei Bungiu tun, ubafu lun desidírü tan (ariha huméi rekuáduru “ Ka mini lubéi?”). Agia wagía? Hínsiñeti san woun desidírü wamani kaba lan wadüga, o himei wamuti lun amu lan desidírü wawagu? Ka wasaminarubei luagu ubafu lun desidírü wamá?

2 Ámuñegueinarügüti hasaminan gürigia luagu ubafu le líchugubei Bungiu woun lun desidírü wamá. Añahein ariñagutiña mibihin wamani ubafu ligía ladüga saminatiña desidírü laali lan Bungiu sun le lunbei wadügüni. Añahein amu ariñagutiña mosu lan hamuga míchugun lan Bungiu lébeha le gayarabei  wadügüni lun gayara lan desidírü wamá wadügüni le wabusenrun (ariha huméi rekuáduru “Ka mini lubéi?”). Gama lumoun, arufudahatu Bíbülia adüga lániwa Heowá lau ubafu lun desidírü wamá lau lichú aau (aliiha huméi Hosué 24:15). Óunaba tumuti giñe Bíbülia álügüdahani burí le: Gébehati san chansi le líchugubei Bungiu woun lun desidírü wamá? Ida luba san wayusuruni chansi le lun desidírü wamá? Ida liña warufuduni lau le desidírü wabéi luagu hínsiñe lan Heowá woun? Ida liña warufuduni inebe lan le desidírü habéi amu woun? Wóunabubei álügüdahani burí le lidan arütíkulu le.

KA WAFURENDEIRUBEI LUAGU HEOWÁ LUMA LUAGU HESUSU?

3. Kei le líbüre lubéi Heowá lun ladügüni le labusenrun, ida liña layusuruni lubafu?

3 Mébehati lubafu Heowá, gayarati ladügüni sun le labusenrun, gama lumoun gayarati wafurendeirun saragu lídangiñe ligaburi layusuruni lubafu. Kei hénpulu, yusu lumuti Heowá lubafu lun lanúadiruniña ísüraelina ‘lánigume’ (2 Lúrudu 7:6-8). Anúadira lumutiña ladüga meha busén lan lagunfulirun aban füramasei le ladügübei lun Abüraámü le lumada (Agumesehani 22:15-18). Ani kei le líbüre lubéi Heowá lun ladügüni le labusenrun, súnwandan layusuruni lubafu lau ínsiñeni luma irichaü. Ítara liña larufuduni dan le lererehan houn ísüraelina ha maganbadibaña lun. Dan le meha hasakürihan tídangiñe sun hanigi luagu le hadügübei, arufudati meha Heowá ínsiñeni houn luma gudemehabu. Ariñagati: “Nagaraniha houn lídangiñe hariban; hínsiñebaña nun lau sun madüna hamani” (Oseasi 14:4). Kei aubei warihei, yusu lumuti Heowá lubafu lun líderagun amu. Ma lubuidun hénpulu woun!

4, 5. a) Ka ibihibalin idewesei lánina gayara lan desidírü lani kaba lan ladüga furumiñe, ani ida liña layusuruni idewesei ligía? b) Ka álügüdahani gayarabei wadügüni sun wagía wóuniwagua?

4 Desidírüti Heowá ladügüniña ánheligu hama gürigia lau ubafu lun gayara lan desidírü hamá. Hesusu ladügübei Bungiu furumiñe ani lenege guánarügü ladügei. Ligía furumiñetibei ibihei idewesei lun gayara lan desidírü lan (Kolosana 1:15). Ida liña san layusuruni Hesusu idewesei ligía? Lubaragiñe liabin ubouagun, desidírüti úaragua lan lun Bungiu ani lun míderagun lani Satanási lidan lebedaagun. Ani dan le liábinbei ubouagun, desidírüti mánharun lan lun katei le yebe labusenrubei Mafia líchuguni lun (Matéu 4:10). Ani aban guñoun lubaragiñe lounwen furíeiti lun Lúguchi ani ariñagati lun lau ichouruni busén lan ladügüni lugundan. Aba lariñagun lun: “Núguchi, ánhabu busén, sefu bana luéi uniñein gífiti le; gama lumoun madügüwalá le nabusenrubei, leelá babusenrubei adügǘwa” (Lúkasi 22:42). Gayarati san háyeihani gürigia Hesusu lun hayusuruni habafu lun desidírü hamá lun híchugun uéiriguni lun Heowá luma lun hadügüni lugundan?

5 Anha, gayarati wáyeihani Hesusu ladüga lenege guánarügü giñe Bungiu ladügawa (Agumesehani 1:26). Gama lumoun, siñati wadügüni sun le wabusenrun kei Heowá. Ariñagatu Bíbülia rúhali lan Heowá lébeha le gayarabei wadügüni ani agurabati lun inebe lan woun. Kéiburi hamuga würiña maríeitiña mosu inebe lan lilurudun hani weiriei houn, ani irahüñü mosu gaganbadi hamá houn hagübürigu (Éfesuna 5:22; 6:1). Ligía lunti lubéi wálügüdagun woungua: “Inebehabutina san lun lébeha chansi le líchugubei Bungiu nun lun desidírü nan?”. Según ligaburi wóunabun lun álügüdahani le ítara luba wibihini  ibagari magumuchaditi le füramase lubéi Bungiu woun.

LIGABURI LAYUSURÚN IDEWESEI LUN DESIDÍRÜ WAMÁ

6. Ru humá aban hénpulu le arufudubalin ka lan uagu súdini lubéi gébeha lan chansi le wibihibei lun desidírü wamá?

6 Kei le gébeha lubéi ubafu le wibihibei lun desidírü wamá, gayarati san wariñagun inarüni lan líbüre wamá? Anha. Ka uagu? Ladüga íderagua lumutiwa katei le. Ariha wamá aban hénpulu. Samina wamá aba lan desidírü wamá wadügün aban wéiyaasu díseti tidan karü, gama lumoun úati lúrudu lun abugahani. Sun gürigia abugahatiña luéigiñe oubaü le habusenrun ani gayarati héibaaguagüdünu karü kei auti habusenra. Darangilubei hamuga san waweiyasuhan? Chóuruti úabei lan hamuga darangilu wamá. Arufuda lumuti hénpulu le megei wamá lun gébehabei lan katei lun líbüre wamá le tímatimaati. Ariha wamá fiú hénpulu tídangiñeti Bíbülia le arufudubalin lunti lan wabuidun guánarügü líchiga Heowá lébeha sun katei.

7. a) Írida humá aban katei le ídanbei amu lan Adán hawéi animaalugu. b) Ida liña meha layusuruni Adán lubafu lun desidírü lan buidu?

7 Adán meha furumiñeti gürigia le ladügübei Heowá. Ígira lumuti Heowá Adán lun desidírü lan, ítara kei meha ladüga houn ánheligu. Gama lumoun míchugun lumuti chansi ligía houn animaalugu. Ida liña layusuruni Adán chansi ligía buidu? Ánhati lun wadagimanu le líchugubei Bungiu lun lun líchugun hiri animaalugu. Ariñagatu Bíbülia aba lan lanügüniña Bungiu animaalugu lun Adán lun larihiniña luma lun líchugun hiri. Masansirunti Heowá ni aban lídangiñe iri le lanúadirubei Adán. Inebeti le desidírü lubéi Adán lun Heowá (Agumesehani 2:19).

8. Ida liña wuriba lan layusuruni Adán ubafu lun desidírü lan, ani ka lánibei katei le resultóu?

8 Ru lumuti meha Heowá buligasion lun Adán lun ladügüni Ubóu paraísume. Ariñagati Bungiu lun: “Garahüñügua humá saragu, buíngüda huméi ubóu hau hirahüñü ani gumadi huméi, gumadi humañame úduraü hama dunuru hama sun animaalugu ha aduruuharügübaña múarugu” (Agumesehani 1:28). Gama lumoun, desidírüti Adán lánhiñuraguni lébeha chansi le líchugubei Heowá lun. Ligía léiginbei tídangiñe furuda to yebe lunboun meigin lanu. Kei le wuriba lubéi desidírü lan Adán, sun gürigia súfurihaña luagu saragu milu irumu (Rómana 5:12). Haritagua waméi luriban resultóu le lanügübei le desidírü lubéi Adán. Líderagubadiwa lun buidu lan wayusuruni ubafu le líchugubei Heowá woun lun desidírü wamá ani inebehabu wagíame lun lébeha ubafu ligía.

9. Ka chansi líchugubei Heowá houn ísüraelina, ani ka füramase habéi?

9 Súngubei wagía galagante wamaali figóu luma óunweni hámagiñe Adán tuma Ewa. Gama lumoun gayaragili desidírü wamá kaba lan wadüga. Ariha wamuti katei le lidan ligaburi lóuseruniña Heowá ísüraelina. Ruti chansi houn ísüraelina lun desidírü hamá anhein busén habéi lun hagía lan lumutuniña ha hínsiñetimabaña lun (Áfuriduni 19:3-6). Ánhatiña meha ísüraelina lun lumutuniña hamá luma lun inebehabu hamá lun lúrudu le líchugubei houn. Füramasetiña: “Wadügübei sun le lariñagubei Bungiu” (Áfuriduni 19:8). Híruti aba lan hadüraaguni hani füramasei dan lárigiñe. Arufudahati hani hénpulu aban katei woun. Mosu lan warihini chansi le líchugubei Bungiu woun lun desidírü wamá kei aban katei wéiriti lebegi, mosu lan werederun yarafa lun Heowá ani gaganbadi wagíame lun lilurudun (1 Korintuna 10:11).

10. Ka burí hénpulu lídangiñe Ebüréu kapítulu 11 arufudubalin gayara lan wayusuruni chansi lun desidírü wamá lun wíchugun uéiriguni lun Heowá? (Ariha huméi dibuhu le lídanbei lagumeseha arütíkulu).

 10 Lidan kapítulu 11 tidan gárada houn Ebüréu iridúati hiri 16 wügüriña hama würiña úaraguatiña ha desidírübaña inebehabu hamá lun le lariñagubei Heowá lun madügün hamani. Ladüga desidírü hamá buidu, resibitiña saragu abiniruni luma aban lubuidun emenigini lubá ámuñegü. Kéiburi Noé wéiriti meha lafiñen ani desidírüti gaganbadi lan lun adundehani le líchugubei Bungiu lun lun ladügün aban árüka lun lesefuruniña liduheñu (Ebüréu 11:7). Abüraámü tuma Sara gaganbaditiña meha giñe lun Bungiu lau sun hagundan ani aba houdin lidoun fulasu le meha uágubei lariñaga líchugubei lan houn. Íbini gachansin hamá meha lun “hagiribudun hárigoun” uburugun Uru, aba hetenirun lun lani Bungiu füramasei lubá ámuñegü. Ariñagatu Bíbülia aba lan háfaagun lun hibihin aban “ageiraü buítimati” (Ebüréu 11:8, 9, 13, 15, 16). Desidírüti meha Moisesi lígiruni lirisin Ehiptu ani “himei lumuti lasufurirun hama lumutuniña Bungiu lubaragiñe laganóun buidu tidan luban urúei, to lánina figóu” (Ebüréu 11:24-26). Áyeiha waméi hafiñen lubúeingu Bungiu ha ani arufuda waméi ariha wamani chansi le líchugubei woun lun desidírü wamá kei aban katei wéiriti lebegi lau wayusuruni lun wadügüni lugundan Bungiu.

11. a) Anhein wayusura wabafu lun desidírü wamá buidu, kaba lubuidun chansi wibiha? b) Ka ínchahabaliwa lun wayusuruni wachansin lun desidírü wamá buidu?

11 Háfuga genege lan woun ménrenguntimati lan wígirun lun amu lan desidírü wawagu. Gama lumoun, anhein wadüga, weferidiruba aban lubuidun chansi. Ka uagu wayanuha? Afuranguagüda tumuti Bíbülia lidan 2 Lúrudu 30:19, 20 (aliiha huméi). Ariñagati bérusu 19 ruti lan Bungiu chansi houn ísüraelina lun hanúadahan. Ani lidan bérusu 20 ariñagati gayarabei lan meha harufuduni lun Heowá anhein hínsiñe lubéi houn lau le desidírü habéi. Wagía gachansintiwa giñe lun desidírü wamá anhein busén wabéi weseriwidun lun Heowá. Ánhawa desidírü wadügüni, gachansinbadiwa lun wayusuruni wabafu lun desidírü wamá lun wíchugun uéiriguni lun Heowá luma lun warufuduni lun weiri lan línsiñe woun.

MAYUSURA WAMÉI WACHANSIN LUN DESIDÍRÜ WAMÁ WURIBA

12. Ka mabusenrun wabéi wadügün lau chansi le líchugubei Heowá woun lun desidírü wamá?

12 Samina wamá aba lan wíchugun aban idewesei le séruti lun aban wamada. Ida liña hamuga san wasandiragun woungua anhein lágura lidoun ifei o anhein layusura lun ladügün dañu houn amu? Ma gáribei yebe woun? Kei le Heowá lan íchugubalin ubafu woun lun desidírü wamá, chóuruti gari lan lun larihini hayusuruni fiú gürigia lun desidírü hamá wuriba o lun hadügün dañu houn amu. Ariñaga tumuti Bíbülia meteingiradibaña lan gürigia lidan “lagumuhóun dan” (2 Timotéu 3:1, 2). Ánheinti wagía mabusenruntiwa wayusuruni wachansin ítara ni lun wóuserun lau meteingiradi. Ida lubati warufuduni seremei waña lan lun Heowá luagu ubafu le líchugubei woun? Ani ida luba san wayusuruni idewesei le líchugubei Bungiu woun buidu?

13. Ida luba wayusuruni líbürei le líchugubei Bungiu woun buidu?

13 Sun wagía líbüretiwa lun desidírü wamá kaba lan wamadagu, ida luba lan wasansiragun o waranseragun woungua, luma kaba lan wísebahari. Gama lumoun, mosu duari wamá ani moun lumuti wayusuruni chansi le lun wáluahan  lébuna wadügün katei le mínsiñeti lun Bungiu o lun wadügüni le hadügübei gürigia ubouaguna (aliiha huméi 1 Féduru 2:16). Lubaragiñe wayusuruni chansi lun desidírü wamá lun wadügüni le wuribabei, lunti warihini kei aban chansi lun wadügüni sun katei lun wíchugun “uériguni lun Bungiu” (1 Korintuna 10:31; Galasiana 5:13).

14. Ka uagu lunti lubéi wafiñerun luagu Heowá dan le wayusuruni wabafu lun desidírü wamá?

14 Ariñagati Heowá woun: “Au Aburemeibei le Bubungiute; arufudaha numuti le buídubei bun, adundeha numutibu luéigiñe üma le lunbei bafalaruni” (Isaíasi 48:17). Anhein afiñe wabéi luagu Heowá, inebehabubadiwa lun katei le uágubei lariñaga lun madügün wamani ani desidírübadiwa buidu. Wánharuba luagu “mama lan wügüri laburemebei lémeri. Úati yu lan lun wügüri le éibugubei ladundehani lupasun guánarügü” (Heremíasi 10:23TNM). Dandu meha Adán kei ísüraelina ha múaragunbaña máhatiña meha inebehabu hamá lun lúrudu le líchugubei Heowá. lubaragiñe lira, aba desidírü hamá hafiñerun ‘luagu lualin hachügü’. Mafalara waméi luriban hani hénpulu. Afiñe wamá luagu Heowá tau sun wanigi lubaragiñe wafiñerun wawougua (Ariñawagúni 3:5).

INEBELÁ LE DESIDÍRÜ HABÉI AMU WOUN

15. Ka wafurendeirubei lídangiñe adundehani le lídanbei Galasiana 6:5?

15 Líbüretiña giñe amu lun desidírü hama ani mosu inebe lan le desidírü habéi woun. Ka uagu? Ladüga sun wagía líbüretiwa lun desidírü wamá. Ligía anihein lubéi dan desidírü hamá amu kristiánugu amu katei luéi le desidírü wabéi. Gayarati lasuseredun le íbini lidan  katei luáguti usa luma áhuduraguni lun Bungiu. Haritagua waméi adundehani le lídanbei Galasiana 6:5 (aliiha huméi). Arufudahati adundehani le woun kada lan kristiánu lun lóunabun lun Bungiu luagu le desidírü lubéi. Anhein gunfuranda wabalin katei le, inebebei haricha amu woun lun desidírü hamani kaba lan hadüga.

Gayarati desidírü wamani le wabusenrubei wadügün, gama lumoun lunti inebe lan le desidírü habéi amu woun. (Ariha huméi párafu 15).

16, 17. a) Ka meha uagu aban lubéi turobuli houn kristiánugu ha uburugubaña Korintu líbüre hamá lun desidírü hamá? b) Ida liña líderaguniña Pábulu Kristianugu hagía? c) Ka wafurendeirubei?

16 Ariha wamá aban hénpulu tídangiñeti Bíbülia le arufudubalin ka lan uagu mosu lubéi inebe lan le desidírü habéi wíbirigu woun. Múaranti meha hasaminan kristiánugu korintuna luagu anhein gayara lubéi héigini uwi le adagarawagüdübei houn guáriua ani lárigiñe aba lalugurahóun mágidurugu. Añahein meha hádangiñe hou hamuti uwi ligía darangilu, ladüga subudi hamani ni kata lan guáriua. Gama lumoun, ha meha áhuduragubaña houn guáriua lubaragiñe kristiánugu hamá saminatiña meha ligiaméme lan leigín uwi ligía kei láhudurawagun houn guáriua (1 Korintuna 8:4, 7). Aba meha laweiridagun turóbuli luagu katei le darí lun gayara lan meha lafanreinraguni damuriguaü. Ka meha ladügübei Pábulu lun líderaguniña íbirigu aransehei turóbuli ligía?

17 Furumiñe aba laritaguagüdüni Pábulu houn kristiánugu Korintuna madügünbei lan éigini lun buídutima lan hamadagua luma Bungiu (1 Korintuna 8:8). Lárigiñe, aba lariñagun Pábulu houn íbini lan líbüre hamá lun desidírü hamá, mosu lan góunigi hamá luéi hadügün lun hasandiragun ha débilibaña houngua wuriba (1 Korintuna 8:9). Lárigiñe, aba lariñagun houn ha débilibaña isaminan lun lan mayanuhan hamá wuriba hawagu ha desidírübaña heigin lídangiñe uwi ligía (1 Korintuna 10:25, 29, 30). Kei aubei warihei, aban meha katei súdiniti luáguti áhuduraguni lun Bungiu katei le, ani mosu meha desidírü lan kada kristiánu kaba lan ladüga. Ma lunti giñe inebehabu wamá lun le desidírü habéi wíbirigu íbini lidan katei le ñǘbüriti? (1 Korintuna 10:32, 33).

18. Ida liña warufuduni luagu weiri lan lebegi idewesei le líchugubei Heowá woun lun desidírü wamá?

18 Aba idewesei lúmagiñe Heowá líbürei lun desidírü wamá, ani ruti chansi woun lun líbüre wamá le tímatimaati (2 Korintuna 3:17). Wéiriti lebegi idewesei le woun lugundun adügati lun warufuduni lau le desidírü wabéi luagu hínsiñe lan Heowá woun. Desidírü wamá buidu lun wíchugun uériguni lun Bungiu ani inebelá le desidírü habéi amu woun. Ítarati warufudubei weiri lan lebegi idewesei le líchugubei Heowá woun.