Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Diisi-hati irumu 2016

Góunigi huméi humadagua luma Heowá dan le heseriwidun lidan amu iñeñein

Góunigi huméi humadagua luma Heowá dan le heseriwidun lidan amu iñeñein

“Areida naali bererun tidan nanigi” (SÁLUMU 119:11).

UREMU 142, 47

1-3. a) Ka katei lunbei súdinitima lan houn sun lubúeingu Bungiu? b) Ka burí lénrengunga úmabei hagagibudagua íbirigu ha afurendeirubaña aban iñeñein? c) Kaba burí álügüdahani wóunaba lidan arütíkulu le? (Ariha humóun iyawaü to lídanboun lagumeseha arütíkulu).

UGUÑE weyu, hídehaña saragu gefentiña luagu Heowá lidan lagunfulirun profesía le lídanbei Arufudúni 14:6. Ariñagati profesía le lapurichihóuba lan uganu luáguti Larúeihan Bungiu “houn sun néchanigu, rasa, luwuyerigu dimurei luma sun fulasu”. Saragu hádangiñe Gefentiña ha hafurendeiruña amu iñeñein. Saragu hádangiñe seriwitiña kei misioneru o ñǘdünhaña lidoun amu ageiraü le ñein lubéi mégeiwa hamá apurichihatiña. Añahein amu gumeseeña eseriwida lidan amu iñeñein lídanmeme fulasu le ñein lubéi hawinwanda.

2 Súdinitimati houn sun lubúeingu Bungiu hóunigiruni hamadagua luma Heowá (Matéu 5:3) (ariha huméi rekuáduru “ Ka mini lubéi?”). Anihein dan gibe lan weberesegun darí lun hénrengu lan woun wasagarun dan lun waturiahanu Bíbülia buidu. Ani íbirigu ha eseriwidubaña lidan amu iñeñein gagibuguatiña giñe luma amu burí turóbuli.

 3 Lau sun hafurendeiruña lan aban iseri iñeñein, mosu haturiahani íbirigu ha katei burí huliliti le tídanbei Lererun Bungiu (1 Korintuna 2:10). Ka gayarabei hadügüni kristiánugu ha lun haturiahanu Bíbülia buidu buidu dan le ua lan gunfuranda hamani le ariñawagúbei lidan damuriguaü buidu? Ka uagu mosu lubéi hachoururuni agübürigu kristiánugu ha eseriwidubaña lidan amu iñeñein lun lachülürün inarüni le tídanbei Bíbülia tidoun hanigi hasaanigu? Ariha waméi.

ABAN KATEI LE GAYARABEI LÍCHUGUNI WAMADAGUA LUMA HEOWÁ LIDAN PELIGURU

4. Ka katei gayarabei líchuguni wamadagua luma Heowá lidan peliguru? Ru humá aban hénpulu.

4 Anhein ua lubéi gunfuranda wamani arufudahani le tídanbei Bíbülia lidan amu iñeñein, gayarati wíchuguñein lan wamadagua luma Heowá lidan peliguru. Samina wamá luagun aban katei le asuseredubei lidan binadu dan. Dan le meha lagiribudunbei Neemíasi Herusaléun, aba larihini mariñagadi hamá saragu irahüñü huríu lun hererun (aliiha huméi Neemíasi 13:23, 24). Ligía siñá lubéi meha gunfuranda hamanu irahüñü hagía Lererun Bungiu. Kei resultóu, aba ledebilidun hamadagua luma Heowá (Neemíasi 8:2, 8).

5, 6. Ka harihibei fiú agübürigu ha eseriwidubaña lidan aban damuriguaü le ayanuhabei amu iñeñein, ani ka uagu lasusereda katei le?

5 Añahein agübürigu kristiánu ha eseriwidubaña lidan aban damuriguaü le ñein lubéi layanuhóua amu iñeñein, ariha hamaali edebilideina liña lan hamadagua hasaanigu luma Heowá. Ka uagu lasusereda le? Ladüga ua lan gunfuranda hamani hasaanigu le ariñawagúbei lidan adamuridaguni buidu. Ligía machülürün lubéi ariñahani le ichugúbei tidoun hanigi ani mínchahan lumutiña lun gaganbadi hamá lun. Ariha waméi le lariñagubei Féduru, aban úguchili kristiánu le águyubei hama liduheñu Sudaméricagiñe Australioun: “Dan le wayanuhan luagu Bungiu mosu larihín tídangiñe lan wanigi láfurida le wariñagubei” [1] (ariha huméi abürüdǘni le lídanbei lagumuha arütíkulu) (Lúkasi 24:32).

6 Anihein giñe amu turóbuli, ladüga dan le waliihan lidan amu iñeñein háfuga madagati tidan wanigi kei dan le waliihan lidan wañeñe guánarügü. Hénrenguti giñe wayanuhan hama gürigia lidan amu iñeñein. Gayarati ladügün katei le lun labuchadun wawagu ani lun méreediwa lan lun weseriwidun lun Heowá buidu. Ligíati, lau sun mosu lan weseriwidun lau ubebeni lidan amu iñeñein, lunti wóunigiruni wamadagua luma Heowá (Matéu 4:4).

LUBÚEINGU BUNGIU HA ÓUNIGIRUBALIN HAMADAGUA LUMA

7. Ka meha hadügübei babilóniana lun houchun lun lánharun Danieli lun hechun luma lun hani relihión?

7 Dan le lanügǘnbei Danieli hama lumadagu adaürǘwa Babilónia, álugatiña babilóniana hafosuruniña lun hánharun lun échuni le ñeinbei luma lun hebelurun lidoun hani relihión. Ida liña hadügüni? Aba harufudahani hañeñe houn ani aba híchugun iri babilóniana hawagu (Danieli 1:3-7). Iseri iri le híchugubei luagu Danieli sagawati lídangiñe liri Bel, bungiu le súdinitimabei houn babilóniana. Háfuga busenti yebe lurúeite Babilónia lun lafiñerun Danieli gabafutimati lan habungiute babilóniana sügǘ lau Heowá, le Lubungiute Danieli (Danieli 4:8).

Kipu lumuti meha Danieli lumadagua luma Heowá ladüga aturiaha lumutu Lererun to meha lídanboun ebüréu

8. Ka ladügübei Danieli lun héreñu lan lumadagua luma Heowá?

8 Dan le Babilónia lubéi Danieli, aba hálugun  híchuguni éigini semeeti le léigibei urúei lun. Gama lumoun, desidírühali meha gaganbadi lan lun lilurudun Bungiu (Danieli 1:8). Kipu lumuti meha Danieli lumadagua luma Heowá íbini lidan lan aban ageiraü terencha lawinwanda. Ka meha ladügübei lun libihini? Aturiaha lumutu líburu sagüráutu, to meha lídanboun iñeñein ebüréu (Danieli 9:2). Kéiburi 70 irumu lárigiñe lachülürün Babilónioun, subudiwagili meha kei Danieli, liri lidan ebüréu (Danieli 5:13).

9. Ka meha igaburi larufudubei abürühati Sálumu 119 tibügürü Lererun Bungiu?

9 Gayarati giñe wasaminarun luagun lani abürühati Sálumu 119 hénpulu. Mosu meha lawandun hayanuhan fiú tílana luban wuriba luagu. Gama lumoun, áluahati ídemuei tidan Lererun Bungiu, ani ruti katei ligía erei lun lun amu lan hawéi ha híbiri (Sálumu 119:23, 61). Ígirati meha lun lebelurun larufudahan Bungiu tidoun lanigi (aliiha huméi Sálumu 119:11, 46).

GÓUNIGI WAMÉI WAMADAGUA LUMA HEOWÁ

10, 11. a) Ka wabusenrubei wibihin dan le waturiahanu Lererun Bungiu? b) Ida luba wibihini katei le? Afuranguagüda huméi lau aban hénpulu.

10 Íbini anhein gibe lubéi wani buligasion lidan damuriguaü luma lidan wawadigimari, sun wagía lunti wasagarun dan lun waturiahanu Bíbülia dandu wábuguarügü kei lidan áhuduraguni keisi iduheñu (Éfesuna 5:15, 16). Dan le waturiahan, mama mosu waliihan saragu páhina tídangiñe Bíbülia o tídangiñe somu agumeiraguagüdüni, ani mámarügü giñe lun wasagarun aban óunabagülei lubá adamuridaguni. Mosu waturiahan lun lachülürün Lererun Bungiu tidoun wanigi ani lun téredagüdüni wafiñen.

11 Lun wibihini le wabusenrubei dan le waturiahan, moun lumuti wasaminarun luágunrügü le hemegeirubei amu, mosu giñe wasaminarun luagun le wemegeirubei (Filipuna 1:9, 10). Ka uagu wariñagei le? Ladüga dan le waranserun lubá apurichihani, lubá adamuridaguni, lun wíchugun aban yanu o somu fánreinti lidan damuriguaü, mama súnwandan wasaminarun ida luba lan líderaguniwa le waliihabei. Ayanuha wamá luagu aban ábouguti. Íbini mosu lan lóuchuni éigini le lábougubei lubaragiñe leseriwiduni, siñati lerederun láurügü murusun éigini le lóuchubei. Anhein busén lubéi lakipuruni lubuidun látuadi, mosu laranserun éigini le buiti lúniwagua súnwandan. Ítarameme, anhein busén wabéi wakipuruni wamadagua luma Heowá, mosu waturiahanu Bíbülia sun dan lun wibihini ariñahani le wemegeirubei.

12, 13. Ka uagu hariñaga saragu íbirigu buítimati lan houn haturiahanu Bíbülia lidan hañeñe?

12 Saragu íbirigu ha eseriwidutiña lidan aban damuriguaü le ídanbei layanuhóua amu iñeñein ariha hamaali buidu lan lun haturiahanu Bíbülia lidan hañeñe (Adügaü 2:8). Íbini ha eseriwidubaña kei misioneru ariha hamuti íderagua lániña katei le lun hakipuragun houngua héreñu lidan heseriwidun ani siñati lan gufuruma hamá láurügü le haganbubei lidan adamuridaguni.

 13 Barühali aban íbiri gíriti Alain widü irumu afurendeira ayanuha persa. Ariñagati: “Dan le naranserun lubá adamuridaguni lidan iñeñein persa, wéiriti netenirun lun iñeñein. Ani kei le weiri lubéi nayusuruni nisaminan, mama súnwandan lachülürün ariñahani le nakutihabei tidoun nanigi. Ligía hechu nubéi aturiahoun Bíbülia tuma burí agumeiraguagüdüni lidan niñeñe”.

AGÜBÜRIGU, CHÜLǗ HUMÁ TIDOUN HANIGI HISAANIGU

14. Ka lunbei hachoururuni agübürigu kristiánugu, ani ka uagu?

14 Mosu hachoururuni agübürigu kristiánu luagu gunfuranda hamani hasaanigu inarüni ani hínsiñe lan houn. Ka uagu? Samina wamá luagun Serge tuma Muriel, to lani weiriou. Seriwitiña meha lidan aban damuriguaü lidan amu iñeñein luagu ǘrüwa irumu. Gasaanitiña aban nibureinti disedü irumu lau. Lau lásügürün dan, aba harihin mínsiñeeli lan lun hasaani lapurichihan ni lun lidin adamuridagua. Ariñagatu Muriel: “Mínsiñeti meha lun lapurichihan lidan amu iñeñein, ani furumiñe hínsiñeti meha lun lapurichihan lidan faransu, iñeñein le layanuhabei”. Afuranguagüdati Serge adügati lan eseriwiduni lidan amu iñeñein lun darasa lan lawanserun hasaani. Ligía aba lubéi desidírü hamá hagiribudun lidoun damuriguaü le meha ñein habéi furumiñe.

Áfaagua humá lun lachülürün inarüni tídangiñeti Bíbülia tidoun hanigi hisaanigu. (Ariha huméi párafu 14, 15).

15. a) Ka burí katei lunbei hakutihani agübürigu anhein hasaminaruña lubéi hasansirun damuriguaü? b) Ka adundehani líchugubei 2 Lúrudu 6:5-7 houn agübürigu?

15 Háfuga hasaminaruña fiú agübürigu hagiribudun lidoun damuriguaü le ñein lubéi  layanuhóua iñeñein le gunfuranda habéi hasaanigu buidu. Ka burí katei lunbei gabaroun hamani lubá desidírü hamani katei le? Furumiñe, mosu harihini anhein gadaani habéi ani here hagía lun harufudahan houn hasaanigu lun línsiñedun Heowá houn luma lun harufudahan amu iñeñein houn. Libiaman, mosu harihini anhein busén habéi hasaanigu hapurichihan, houdin adamuridagua o heseriwidun lidan amu iñeñein. Lárigiñe hakutihani sun katei le, háfuga desidírübaña saragu agübürigu hagiribudun lidoun aban damuriguaü lidan iñeñein le gunfuranda habéi hasaanigu. Ani danme le lederebugudun hamadagua hasaanigu luma Heowá, háfuga gayaraahalime hagiribudun agübürigu lidoun damuriguaü lidan amu iñeñein (aliiha huméi 2 Lúrudu 6:5-7).

16, 17. Ka hadügübei saragu agübürigu lun harufudahan houn hasaanigu luagu Heowá?

16 Darihaña fiú agübürigu ida luba lan harufudahan luagu Heowá houn hasaanigu lidan hañeñe, íbini heseriwiduña lan lidan aban damuriguaü o sétanu le ídanbei layanuhóua amu iñeñein. Samina wamá luagun aban úguchili gíriti Charles. Ǘrüwañanu lisaanigu, kéiburi 9 luma 13 irumu hau. Súngubei hagía heseriwiduña lidan aban sétanu le ídanbei layanuhóua aban iñeñein le gíribei lingala. Ariñagati Charles: “Aba desidírü wamá waturiahanu Bíbülia hama wasaanigu ani luagu wadügübei lan áhuduraguni lun Bungiu keisi iduheñu lidan wañeñe guánarügü”. Ariñagati giñe luagu asayaha hamá ani áhurera hagía lidan iñeñein lingala lun gunda hamá hasaanigu lau le hafurendeirubei.

Áfaagua humá lun hafurendeiruni iñeñein le ayanuhóubei lidan damuriguaü le ídanbei heseriwida ani lun hóunabun lidan damuriguaü. (Ariha huméi párafu 16, 17).

 17 Guentó, samina wamá luagun lani Kevin hénpulu: biámañanu lisaanigu, seingü irumu tau aban, ani widü irumu tau to aban. Áfaaguati Kevin lun larufudahanu Lererun Bungiu houn lisaanigu, ladüga úagili gunfuranda hamani iñeñein le ídanbei layanuhóua lidan damuriguaü buidu. Ariñagati: “Au tuma nani weiriou aturiaha wamutu Bíbülia hama wasaanigu lidan faransu, iñeñein le wayanuhabei buidu. Adügaadiwa aransehani lun woudin lidan aban adamuridaguni lidan faransu sagü hati. Ani sagatiwa giñe dan lun woudin lidan aban adamurini le ǘrüwati weyu lidan wañeñe”.

18. a) Ida liña gayara lan líderaguniña Rómana 15:1, 2 agübürigu lun desidírü hamani ka lan buídutimabei houn hasaanigu? b) Ka adundehani híchugubei saragu agübürigu? (Ariha huméi abürüdǘni le lídanbei lagumuha arütíkulu).

18 Lunti desidírü hamani kada iduheñu ka lan buídutimabei lun hakipuruni hasaanigu hamadagua luma Heowá [2] (ariha huméi abürüdǘni le lídanbei lagumuha arütíkulu) (Galasiana 6:5). Lidan párafu 14 ayanuhatiwa tuagu Muriel luma Serge. Ariñagatu Muriel hínsiñe lan hamuga houn hasigirun eseriwida lidan amu iñeñein. Íbini ítara, aba desidírü hamá háguyun lidoun amu damuriguaü lun híderaguni hasaani ederebudagüdei lumadagua luma Heowá (aliiha huméi Rómana 15:1, 2). Uguñe weyu, ariñagati Serge buiti lan le hadügübei. Ariñagati dan le lan hagiribudunbei lidoun damuriguaü faransu, aba lan labuidurun lumadagua hasaani luma Heowá ani aba labadiseirun. Guentó, leseriwiduña hasaani kei prekursoru ani lasaminaruña leseriwidun lidan amu iñeñein.

ÍGIRA WAMÁ LUN LEBELURUN LERERUN BUNGIU TIDOUN WANIGI

19, 20. Ida liña warufuduni hínsiñe tan Lererun Bungiu woun?

19 Hínsiñetiña sun gürigia lun Heowá. Adügaali lun ñein tan Lererun lidan saragu iñeñein lun hafurendeiruni “sun gürigia” inarüni (1 Timotéu 2:4). Subudi lumuti Heowá aba lan lederebugudun wamadagua luma dan le waliihanu Lererun lidan iñeñein le gunfuranda wabéi buidu.

20 Lunti wáfaagun sungua luagu lun wakipuruni lubuidun wamadagua luma Heowá. Lun wibihini, mosu wéchudun aliihoun Bíbülia lidan iñeñein le gunfuranda wabéi buidu. Ítara luba wíderaguniña waduheñu lun hederebudagüdüni hamadagua luma Heowá ani warufudubei ítara luagu hínsiñe tan Lererun Bungiu woun saragu (Sálumu 119:11).

^ [1] (párafu 5): Sánsiwati iri.

^ [2] (párafu 18): Ariha huméi arütíkulu “La crianza de los hijos en un país extranjero: desafíos y galardones” (Hagüriahóun isaanigu lidan amu ageiraü: turóbuli luma abinirúni), tídangiñe garüdia La Atalaya to lánina 15 lidan diisi-hati, 2002. Hadariruba adundehani buiti ñein le gayarabei líderaguniña hiduheñu.