Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Diisi-hati irumu 2016

Mabulieida waméi wóuseruniña terencha lau ínsiñehabuni

Mabulieida waméi wóuseruniña terencha lau ínsiñehabuni

“Mabulieida huméi lun hebelaagüdüniña achülürütiña húbiñoun lau ugundani” (EBÜRÉU 13:2).

UREMU 50, 20

1, 2. a) Ka burí lénrengunga úmabei hagagibudagua saragu terencha uguñe weyu? (Ariha humóun iyawaü to lídanboun lagumeseha arütíkulu). b) Ka tariñagubei Bíbülia woun? c) Kaba burí álügüdahani wóunaba?

LÓUGIÑE 30 irumu guentó lúmagiñe láfuridun aban wügüri gíriti Osei Ghánagiñe, le lageira, lun lidin Yuropoun [1] (ariha huméi abürüdǘni lidan lagumuha arütíkulu). Mámagili meha gefenti luagu Heowá lidan dan ligía. Ariñagati gíbeti lan meha lituróbulin. Ariñagati: “Fureseti níchugun fe meberesen hamá hiibe-agei gürigia nau. Súfuritina giñe ladüga lidiliga. Dan le náfuridunbei ñéingiñe lubéi tígirana awión, aba nasandirun lidiliga luagu furumiñeti wéiyaasu lidan nibagari, aba nayahun”. Kei hénrengu lubéi meha lun lafurendeiruni iñeñein le ayanuhóubei lidan ageiraü ligía, sügüti lóugiñe aban irumu lubá ladarirun aban wadagimanu le buiti. Ani kei le dise lubéi tuéi luban, álugati meha saragu hawagu liduheñu ani sandiguati meha lungua kamá lábuguarügüñein.

 2 Lun hamuga wagía lan Oseibei, ida liña hamuga línsiñe woun lun wouserúniwa? Chóuruti weteingiruñanu lan hamuga íbirigu ha tídanbaña Luban Wadamuridagun luagu heresibiruniwa lau ínsiñeni meberesenga ka lan warasanbei o halíagiñe lan wayabin. Ariñagatu Bíbülia houn kristiánugu inarünitiña mosu lan hóuseruniña terencha buidu (Ebüréu 13:2). Ligía wóunabubei lubéi álügüdahani burí le lidan arütíkulu le: Ida liña san larihiniña Heowá terencha? Mosu san wasansiruni ligaburi warihiniña gürigia ha lílana amu ageiraü? Ida liña san gayara lan wíderaguniña terencha lun hasandiragun houngua buidu lidan damuriguaü?

IDA LIÑA SAN LARIHINIÑA HEOWÁ TERENCHA?

3, 4. Según Áfuriduni 23:9, ida liña meha labusenrun Heowá lun hóuseruniña ísüraelina terencha, ani ka uagu?

3 Dan le lesefurunbaliña Heowá ísüraelina lídangiñe amudirawaguni, ruti lúrudu houn lun larufudahan houn ida luba lan hóuseruniña terencha ha áfuridubaña hama Ehiptugiñe (Áfuriduni 12:38, 49; 22:21). Subudi lumuti meha Heowá anihein lan dan hénrengu lan ibagari houn terencha, ligía lóunigirunbaliña lau ínsiñeni. Kei hénpulu, ígira lumutiña meha lun houdin lidan burí ichari lun habudahani le hígirubei alubahatiña (Fádirigu 19:9, 10).

4 Mama ariñagarügüti Heowá houn ísüraelina lun inebe hamá terencha houn. Busenti meha lun haritaguni ida liña lan lasandiragun aban terencha lungua (aliiha huméi Áfuriduni 23:9). Ani lubaragiñe meha músugu hamá ísüraelina Ehiptu, mínsiñetiña meha houn ehiptuna ladüga amu hamá (Agumesehani 43:32; 46:34; Áfuriduni 1:11-14). Hénrenguti meha habagari ísüraelina dan le terencha habéi. Ligía busén lubéi meha Heowá lun haritaguni katei ligía ani lun hóuseruniña lílana amu ageiraü buidu (Fádirigu 19:33, 34).

Arufudati Heowá ínsiñeni houn terencha

5. Kaba íderaguawa lun wáyeihani ligaburi Heowá ani lun wóuseruniña terencha buidu?

5 Masansirungili Heowá. Ligíati, danme le hayabin terencha lidoun wani damuriguaü, lunti waritaguni hínsiñe hamá gürigia hagía lun Heowá (2 Lúrudu 10:17-19; Malakíasi 3:5, 6). Lunti wasaminarun luagun burí turóbuli le úmabei hagagibudagua. Kei hénpulu, háfuga ua lan gunfuranda hamani iñeñein, ani aba hóuseruniña amu gürigia wuriba. Wasaminarun luagun sun katei le línchahabadiwa lun wáfaagun lun wíderaguniña luma lun wóuseruniña buidu (1 Féduru 3:8).

LUNTI SAN WASANSIRUNI LIGABURI WARIHINIÑA TERENCHA?

6, 7. Ka arufudubalin furendei hamá kristiánugu huríu óuseraña terencha buidu?

6 Furendeitiña meha saragu kristiánugu huríu óuseraña terencha buidu lugundun lidan aban dan wuribati meha hóuseruniña huríu terencha. Lidan lufedun Pentekosutesi irumu 33, arufudatiña meha kristiánugu ha Herusalénbaña  ínsiñeni houn terencha ha meha adügagubaña houngua kristiánugume (Adügaü 2:5, 44-47). Arufuda lumuti katei ligía luagu gunfuranda hamani le mini lubéi heresibirún gürigia buidu.

7 Gama lumoun lidan dan ligía, wuribati meha hasandiragun saragu íbirigu güriegu houngua ladüga houserúña lan würiña ha hilaañabaña hani weiriei lau marichaü (Adügaü 6:1). Lun laransehóun turóbuli ligía, aba hóunahan apostolugu sedü wügüriña ha lídanñein güriegu hiri. Ka uagu? Háfuga lun buidu lan hasandiragun würiña ha ayanuhabaña güriegu houngua (Adügaü 6:2-6).

8, 9. a) Ka burí álügüdahani gayarabei líderaguniwa asubudirei anhein sandí wabéi mínsiñehabuni hawagu lílana amu rasa o ageiraü? b) Ka igaburi lunbei wagidaruni wawariua? (1 Féduru 1:22).

8 Íbini míchugun wamá fe, adügati échuni le lídanbei wageira lun amu lan wóuserun (Rómana 12:2). Ani háfuga gayara lan hayanuhan wabesinanigu hama wapanaagu lidan wadagimanu o leskuelarugu wuriba hawagu lílana amu ageiraü, échuni o rasa. Wagumeseruña san asaminara kei hagía? Ida liña wóuserun dan le ladügün somu gürigia bula wau luagu wageira o luagu wechun?

9 Luagu aban dan, arufudati meha apostolu Féduru mínsiñehabuni hawagu gürigia ha mámabaña huríu. Gama lumoun, lau lásügürün dan aba lígiruni luriban igaburi ligía (Adügaü 10:28, 34, 35; Galasiana 2:11-14). Agia wagía? Ka lunbei wadügüni ánhawa ariha wéirigu lan wasandiragun woungua sügǘ hau lílana amu rasa o ánhawa asandira iyeerehabuni hawagu? Mosu wáfaagun lun wagidaruni wawariua (aliiha huméi 1 Féduru 1:22). Ka gayarabei líderaguniwa? Waritaguni súngubei lan wagía charatiwa ani luagu madüna wamani asalbaruni, meberesenga halíana wamá (Rómana 3:9, 10, 21-24). Ligía ua lubéi resun lun íñugu lan wasandiragun woungua hawéi amu (1 Korintuna 4:7). Mosu wasandiragun woungua kei apostolu Pábulu. Ariñagati houn kristiánugu mámaaña lan terencha. Ariñagati houn “Tílanaadün luban Bungiu” (Éfesuna 2:19). Súngubei wagía lunti wáfaagun lun masaminarun wamá wuriba hawagun amu. Ítara luba warufudun aban lubuidun igaburi (Kolosana 3:10, 11).

IDA LIÑA GAYARA LAN WÓUSERUN BUIDU HAMA TERENCHA?

10, 11. Ida liña meha larufuduni Boosu ariha lániña terencha kei larihiniña Heowá?

10 Ayanuhatu Bíbülia luagu aban wügüri úaraguati gíriti Boosu. Arufuda lumuti meha ariha lániña terencha kei larihiniña Heowá. Ida liña ladügüni? Aban weyu, aba lidin arihei lichari lidan lidaani alubahani. Ábati larihin aba würi moábüna gíritu Rudu ñein. Tawadigimariduña meha saragu abudaha ilaü. Íbini ariñaga lan meha Lúrudu gayara lan tidin abudaha ilaü, amuriahatu üma lun tadügüni. Dan le líchugun Boosu fe luagu katei le, aba taweiridun lanigi darí lun lígirunu lun tabudahan lídangiñe ilaü le hadürühabei nadagimeintiña (aliiha huméi Rudu 2:5-7, 15, 16).

11 Ábati ladügün Boosu aban katei le arufudubalin nidiheri lan tuagun Rudu luma luagun lénrengunga le tasufurirubei ladüga terencha tan. Aba  lariñagun tun lun terederun hama lubúeingu ha nibureingiña lun móuserun hamanu wügüriña ha nadagimeinbaña áraabu wuriba. Adügati giñe aransehani lun tibihin saragu éigini luma duna, ítara kei ha híbiri nadagimeintiña. Óusera lumutu Boosu fugiabu terencha tuguya lau inebesei ani ruti giñe gurasu tun (Rudu 2:8-10, 13, 14).

12. Ka gayarabei lasuseredun ánhawa arufuda ínsiñeni houn terencha?

12 Óusera lumutu Boosu Rudu buidu ladüga tóuserunu Noemí, to tágürü, lau ínsiñeni. Gama lumoun, óusera lumutu giñe buidu ladüga gumeseeru lan meha eseriwida lun Heowá ani áluaha taali meha lídehan Bungiu. Dan le meha larufudun Boosu ínsiñeni tun Rudu, le linarün katei, lafalaruñein lani Heowá hénpulu (Rudu 2:12, 20; Ariñawagúni 19:17). Uguñe weyu, susereti aban katei ítarati. Ánhawa arufuda ínsiñeni houn “sun gürigia”, gayarati wíderaguniña lun hafurendeiruni inarüni luma lun harihini hínsiñe hamá lun Heowá saragu (1 Timotéu 2:3, 4).

Busuguatiwa san lau ínsiñeni houn terencha ha achülürübaña tidan Luban Adamuridaguni? (Ariha huméi párafu 13, 14).

13, 14. a) Ka uagu mosu lubéi wabusuragun houn terencha ha achülürübaña tidoun Luban Wadamuridagun? b) Kaba íderaguawa lun buidu lan wasandiragun woungua danme le wayanuhan luma aban terencha?

13 Gayarati wóuseruniña terencha buidu lau weresibiruniña buidu tidan Luban Wadamuridagun. Anihein dan, dan le málügili hachülürün gürigia lidoun aban ageiraü, haburitiña ani mayarafaduntiña houn amu. Gayarati giñe mebegi lan hasandiragun houngua háfuga ladüga gudeme hamá, ladüga harasan o luagu fulasu le ñéingiñe lubéi hayabin. Ligía mosu lubéi wanügüni ubaraü lun warufuduni houn berese wamá hau ani hínsiñe hamá woun. Anhein anihein lubéi programa JW Language  wama, gayarati wayusuruni lun wafurendeirun abusuragua houn lidan hañeñe (aliiha huméi Filipuna 2:3, 4).

14 Háfuga anihein dan mabuidun lan wasandiragun woungua ayanuha hama gürigia ha lídangiñetiña amu néchani. Kaba íderaguawa agidarei katei le wawariua? Gayarati wabahüdahan somu katei houn wawougua. Háfuga ábame wíchugun fe gíbeti lan katei le uágubei gayara lan wayanuhan hama. Haritagua waméi sun lan rasa anihein lan échuni buiti hama luma wuribati.

ÍDERAGUA WAMAÑA AMU LUN BUIDU LAN HASANDIRAGUN HOUNGUA

15. Kaba íderaguawa lun gunfuranda wamaniña ha méchungiñabaña luagu aban iseri ageiraü?

15 Ida luba wíderagun amu lun buidu lan hasandiragun houngua dan le hachülürün lidoun damuriguaü? Lunti wálügüdagun woungua: “Lun hamuga lídanñadina lan amu ageiraü, ida liña hamuga línsiñe nun lun nouserúniwa?” (Matéu 7:12). Gaguraasun wamá habá terencha. Inarüni úabei lan gunfuranda wamani ligaburi hasaminarun o ligaburi hóuserun furumiñe. Gama lumoun, magurabaha wamá lun hasaminarun o lun hóuserun kei lílana wageira. Buítimati lun gunfuranda wamaniña ani lun wánharun lun hagaburi (aliiha huméi Rómana 15:7).

Gaguraasun wamá habá ha málügiñabaña lidan aban iseri ageiraü

16, 17. a) Ka gayarabei wadügüni lun buídutima lan wasubudiruniña íbirigu ha ñǘbuinbaña lídangiñe amu ageiraü? b) Ka gayarabei wadügüni lun wíderaguniña íbirigu terencha ha lídanbaña wani damuriguaü?

 16 Ka gayarabei wadügüni lun buídutima lan wasubudiruniña terencha ha yarafabaña woun? Lau wasagarun dan lun wafurendeirun luagu hageira luma luagu hechun. Lidan áhuduraguni keisi iduheñu gayarati wáluahan ariñahani luagu hechun terencha ha lídanbaña wani damuriguaü o ha lídanbaña fulasu le ñein lubéi wawinwanda. Gayarati giñe wasubudiruniña buidu lau wamisurahaniña eiga wábiñe. Dará laali Heowá “bena” houn terencha lun “gayaraabei lan hafiñerun” luagu (Adügaü 14:27). Áyeiha waméi lani hénpulu lau wamisurahaniña wíbirigu ha lílana amu ageiraü wábiñoun (Galasiana 6:10; Hobu 31:32).

Arufudatiwa san ínsiñeni houn gürigia ha achülürübaña lídangiñe amu ageiraü? (Ariha huméi párafu 16, 17).

17 Wásügürün dan hama iduheñu terencha líderagubadiwa lun gunfuranda wamani sun áfaaguni le hadügübei lun héchudun luagu burí échuni le lídanbei wageira. Háfuga warihibei luagu megei hamá ídemuei lun hafurendeiruni iñeñein. O gayarati wíderaguniña áluaha óundaruni to gayarati tíderaguniña adarira wadagimanu o aban muna buitu. Gayarati líderaguniña katei burí le wíbirigu saragu (Ariñawagúni 3:27).

18. Ka hénpulu gayarabei háyeihani terencha?

18 Furanguti mosu lan hadügüni terencha sun hayaraati lun héchudun luagu igaburi le lídanbei fulasu le ñeinhin lubéi houdin. Gayarati háyeihani tani Rudu hénpulu. Furumiñe, arufudatu inebesei luagu échuni le lídanbei iseri ageiraü ligía. Ida? Lau tamuriahan üma lun tabudahan ilaü lidan ichari (Rudu 2:7). Masaminaruntu garicha tan lun tadügüni ani masaminaruntu giñe mosu lan híderagunu ha híbiri. Ani libiaman, masaminaruntu bián wéiyaasu lun tarufuduni teteingiradi luagu ínsiñeni le arufudúbei tun (Rudu 2:13). Anhein háyeiha terencha lubuidun tigaburi Rudu, másiñati inebebaña lan houn íbirigu luma houn lílana iseri ageiraü le ñeinhin lubéi houdin.

19. Ka uagu mosu lubéi wíderaguniña terencha lun hasandiragun houngua buidu waganagua?

19 Gúndaatiwa lau larufudun Heowá ínsiñeni houn sun gürigia luma lau líchugun chansi houn lun haganbuni uganu buiti le tídangiñeti Bíbülia. Háfuga siñati lan meha haturiahanu saragu terencha Bíbülia o houdin adamuridagua lidan hageira. Gama lumoun guentó kei gayarahali lan hadamuridagun wama, mosu wíderaguniña lun masandiragun hamá houngua kei terencha waganagua. Háfuga mibe lan waseinsun o siñati lan wíchugun saragu katei houn. Gama lumoun, ánhawa arufuda ínsiñeni houn, wáyeihañein ínsiñeni le lasandirubei Heowá hawagu. Ligíati, sigí waméi lani Heowá hénpulu ani adüga waméi sun wayaraati lun weresibiruniña terencha lau sun wagundan (Éfesuna 5:1, 2).

^ [1] (párafu 1): Sánsiwati iri.