Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Diisi-hati irumu 2016

 ABAHÜDAGUNI LUÁGUTI IBAGARI

Áfaaguadina lun nasigirun lubuidun hénpulu

Áfaaguadina lun nasigirun lubuidun hénpulu

“Subuditi san bun átiri lan irumu nau?”, liña nálügüdahan. Ábati lóunabunina Izak Marais: “Subudi numuti átiri lan irumu bau”. Wati nun Pattersongiñe (Nueva York) darí Colorado, le ñein lubéi meha neredera. Nafuranguagüdaali hun ka lan uagu wayanuha.

DIISI lidan duusu-hati irumu 1936 nágurahoua, lidan uburugu Wichita (Kansas, Meriga). Au meha íbugañaünbei houn ǘrüwa namulenu. Lubúeingu meha Heowá nagübürigu. William tuma Jean híribei. Seriwiti meha núguchi kei wéiyaali lidan damuriguaü. Furendei tumuti núguchu inarüni túmagiñe nagütü, Emma Wagner. Arufudaha tumuti nagütü inarüni houn saragu gürigia. Kéiburi tun Gertrude Steele, aban íbiri to ñǘdünboun eseriwida kei misionera Puerto Rico. * Ligía gibe lubéi meha hénpulu buiti le gayarabei nasigiruni.

GÜRIGIA HA MEHA ÍCHUGUBAÑA ABAN LUBUIDUN HÉNPULU NUN

Núguchi apurichiha tau garüdia.

Haritagua nágili dan le nídinbei luma núguchi apurichiha aban weyu samudi. Seingü meha irumu nau. Wapurichihaña meha houn gürigia ǘmadarugu tau Garüdia Awisahatu luma tau garüdia Consolación, guentó, ¡Despertad! Lidan dan ligía, lageindaguña meha wageira lidan Libiaman Wuribu Wéiriti. Gama lumoun mádaragunti núguchi lungua lidoun awuribuhani. Dan le wapurichihaña lan, ligía layarafadun aban surusia woun. Bacharuañein meha. Aba lariñagun lun núguchi hanufude lan ani láluaharügüña lan lébuna midin lan awuribuha. Aba layarafadagüdüni ligibu luagu núguchi, ani aba lariñagun lun: “Bulesei bana, móuniti bugía le”. Aba nanufudedun saragu, ánheinti núguchi, sigiti apurichiha tau garüdia houn gürigia ha ñéinbaña. Adügati katei ligía lun laganwoundun inebesei le nasandirubei luagu. Lárigiñe aba lásügürün aban súdara ñéingiñe, ani aba lagúaragun gürigia ligía lun: “Adüga humá somu katei lau móuniti le!”. Ábati líchugun súdara ligía fe bacharuañein lan wügüri ligía. Ligía lariñagunbei lun: “Heiba húbiñoun!”. Lárigiñe aba houdin biángubei. Seremei niña lun Heowá luagu ganigi le líchugubei lun núguchi. Tabureme meha bián bísinisi lánina ásahani núguchi, ani ñein meha lidin surusia ligía asarúa.

Wéibuga hama nagübürigu lidoun aban adamurini Wichita lidan burí irumu 40.

 Dan le meha widü lubéi irumu nau, aba halugurunu nagübürigu waban luma hani bísinisi, ani aba hadügün aban tiraüraü muna to gabalabalatu. Ábati wáguyun lidoun aban fulasu ñein lubéi mégeiwa hamá apurichihatiña, yarafa lun uburugu Grand Junction (Colorado). Lidan fulasu ligía, seriwitiña nagübürigu kei prekursoru ani nadagimeintiña ábunagua luma agüriaha animaalugu. Seremei lun áfaaguni le hadügübei luma lun abinirúni le líchugubei Heowá houn, aba lagumeserun furumiñeti damuriguaü lidan fulasu ligía. Badisei lumutina núguchi weyu 20 lidan sisi-hati, irumu 1948 lidan aban duna éibaaguati, úara hama amu gürigia ha meha ánharubaña lun inarüni. Ñeinñein meha Billie Nichols tuma lani weiriou hadan gürigia hagía. Lau lásügürün dan, seriwitiña keisi óunigirutiña sirkuitu, ítara kei hasaani tuma lani weiriou.

Gíbetiña meha wamadagu ha eseriwidubaña lun Heowá tau sun hanigi. Kei hénpulu, gamadaguatiwa meha hama tiduheñu íbiri Steele: Don tuma Earlene, Dave tuma Julia, luma giñe Si tuma Martha. Hínsiñeti meha woun wayanuha luagu le tarufudahabei Bíbülia. Íderagua lumutina hani hénpulu. Ani furendeitina hámagiñe gasuuniti lan wabagari ani luagu gayara lan wagundaarun dan le wíchuguni Larúeihan Bungiu lidan furumiñeti lúgaaru lidan wabagari.

ÁBAYA NÁGUYUN

Dan le meha 19 lubéi irumu nau, aba lamuriahan aban numada le gíriti Bud Hasty numa lun lan nidin eseriwida kei prekursoru úara luma lidoun amu fulasu ñéinmeme Meriga, ani ligía nadügübei. Ábati lamuriahan óunigiruti sirkuitu wama lun lan wáguyun lidoun aban fulasu gíriti Ruston (Luisiana). Lidan uburugu ligía, añahein meha saragu Gefentiña ha mapurichihanhaña, madamuridagun hagía. Ábati lamuriahan óunigiruti sirkuitu wama lun lan wadügüni sun adamuridaguni sagü dimaasu íbini machülürün hamá amu gürigia wanwoun. Ligía wáluahanbei aban fulasu lun wadamuridagun ani aba waranseruni buidu. Furumiñe, wagíarügüñadiwa biángua ñein, ani dan le wíchuguni wani fánreinti, aban ararira, aban amudeira. Ani dan le líchuguni aban wádangiñe ariñahani, le aban íchigei óunabagülei. Ani dan le meha mosu lan warufudun somu sügǘ lidan plataforma, wagía biángubei adügübalin, íbini ua hamá ni aban gürigia lidan damuriguaü. Aban weyu, aba tachülürün aban íbiri wéiyaaru adamuridagua. Ani dan lárigiñe, aba hagumeserun fiú aturiahatiña Bíbülia hama amu Gefentiña ha meha madamuridagunhaña achülüha. Murusun dan lárigiñe, aba lagumeserun furumiñeti damuriguaü lidan fulasu ligía.

Aban weyu, aba wayanuhan luma aban minisi tani aban ligilisi banhéliu. Aba ladügün fiú álügüdahani woun, ani aba layusurun fiú bérusu tídangiñeti Bíbülia le ibidiñeti nun. Adügati katei ligía lun nagañidun núniwagua ani adüga ligía lun nasaminarun buidu luagun nafiñen. Aturiahatina aban dimaasu darí láriebudun lun nadariruni óunabagülei lun álügüdahani burí le ladügübei wügüri ligía woun. Héregüda lumuti katei ligía numadagua luma Heowá darí lun busén nan nadunragun luma ámuya minisi.

Murusun dan lárigiñe, amuriahati óunigiruti sirkuitu numa lun lan náguyun lidoun uburugu le gíribei El Dorado (Arkansas). Anihein meha aban liraüraü damuriguaü lidan fulasu ligía ani mégeitiña meha ídemuei. Dan le ñein nubéi mosu meha nidin súnwandan Coloradoun lun nidin arufudagua nungua tidan áfisi to hani súdara. Aban weyu, aba houdin fiú prekursorugu úara numa, gama lumoun aba wasufurirun aban danaguaü Texas. Aba tagadeirun nugune. Aba wáwarun lun aban íbiri, le anügübaliwa lúbiñoun ani lárigiñe lidoun adamuridaguni. Lidan adamuridaguni rúwati aban ñunsu luagu danaguaü le wasufurirubei, ani aba hóundarun íbirigu seinsu lun híchuguni woun. Íbiri le anügübaliwa lúbiñoun, alugura lumutu nikarün luagu 25 dólarü.

Ibihatiwa lun lanügüniwa aban gürigia Wichitaoun. Ñein meha laganawa íbiri McCartney, aban prekursoru ani hamada niduheñu. Gasaaniti bián irahüñü mádounu, Frank luma Francis híribei. Darí guentó buídugili numadagua hama. Aba halugurunu aban binadu hagune nun luágurügü 25 dólarü,  ligiaméme seinsu le nibihubei dan le nalugurunu nugune to agünrinchaguboun. Ligía furumiñeti wéiyaasu narihini líchuguni Heowá le nemegeirubei nun luagu níchuguni Larúeihan lidan furumiñeti lúgaaru. Lidan bisida ligía, aba harufudunu íbirigu McCartney aban íbiri magadiñetu gíritu Bethel Crane nun. Ruth meha tíribei túguchu Bethel, aban íbiri to awinwanduboun lidan uburugu Wellington (Kansas) ani hínsiñeti meha apurichihani tun saragu. Ani seriwitu meha Ruth kei prekursora íbini lárigiñe tagunfulirun 90 irumu. Maríeitina tuma Bethel lidan irumu 1958, lubaragiñe lásügürün aban irumu. Lárigiñe maríei, seriwitiwa úara kei prekursoru uburugu El Dorado.

ABA WIBIHIN LUBUIDUN AMISURAHANI

Busentiwa meha wasigiruni lubuidun hénpulu le híchugubei Gefentiña ha wasubudirubaña lúmagiñe wañüraü. Ligía desidírü wabéi wánharun lun furumiñeguarügü amisurahani le tadügübei lóundarun Heowá woun. Furumiñe, aba wounahóun keisi prekursorugu espechalitiña lidoun fulasu le gíribei Walnut Ridge (Arkansas). Ani lidan irumu 1962 resibitiwa aban lubuidun amisurahani. Aba wamisurahóun lun woudin lidoun külase númeru 37 tidan Leskuela Galaadü. Aba wagundaarun dan le wíchugunbei fe ñeinbei lan Don Steel lidan ligiaméme külase. Lárigiñe weresibihan, aba wounahóun eseriwida Nairobi, uburugu le súdinitimabei Kenia. Aba wírudun dan le mosu lan woudin Nueva Yórkgiñe, gama lumoun aba wagundaarun dan le wachülürünbei Nairobi ani aba warihini hagurabahañadiwa lan íbirigu.

Apurichiha Nairobi tuma Mary luma Chris Kanaiya.

Aba línsiñedun Kenia woun luma apurichihani lidan ageiraü ligía. Anihein meha Chris tuma Mary Kanaiya hadan furumiñetiña gürigia ha únbaña wíchiga aturiahani tídangiñeti Bíbülia ani aba hánharun lun inarüni. Añaheingua eseriwida lidan dan dayarüti Kenia. * Aban irumu lárigiñe, aba wounahóun Kampala, uburugu le súdinitimabei Uganda. Wagía meha furumiñetiña misionerugu lidan ageiraü ligía. Buiti meha dan ligía, ladüga gíbetiña gürigia busentiña meha hafurendeiruni inarüni le tídanbei Bíbülia. Saragu hádangiñe aba hánharun lun inarüni. Gama lumoun, lárigiñe  ǘrüwa irumu dimí wau eseriwida Áfürika, aba wagiribudun Merigoun ladüga dageinañoun lan nani weiriou. Wéiritimati íruni le wasandirubei weyu le wóudinbei Áfürikagiñe sügǘ lau dan le wáfuridunbei Nueva Yórkgiñe. Wéiriti meha ínsiñeni le wasandirubei hawagu gürigia Áfürika ani agurabatiwa meha wagiribudun aban weyu.

LASANSIRUN GÁDANTIWA

Aba wáguyun Colorado, ñein lubéi meha hawinwanda nagübürigu. Murusun dan lárigiñe aba nasirua tan furumiñetu wasaani, Kimberly. Ani 17 hati lárigiñe ligía nasirua tan to aban wasaani, Stephany. Áfaaguatiwa saragu lun wetenirun houn wasaanigu buidu. Ligía wáfaagunbei lun warufudahani inarüni houn. Busentiwa meha wasigiruni ligiaméme hénpulu le híchugubei amu woun. Subudi wamuti gayarati lan híderaguniña agübürigu hasaanigu lau lubuidun hani hénpulu. Gama lumoun subudi wamuti giñe madügün lan katei le lun wachoururuni heseriwiduba lan wasaanigu lun Heowá, ítara kei lasuseredun houn bián hádangiñe namulenu. Híruti aba lan hígiruni Heowá. Agurabatina lachülürün aban weyu lunya desidírü hamá hasigiruni lubuidun hénpulu le ichugúbei woun.

Gúndaatiwa lau wagüriahaniña wasaanigu, ani súnwandan meha wouchun wadügün katei úara hama. Lidan meha aban uburugu gíriti Aspen (Colorado) wawinwanda. Kei anihein lubéi saragu niewe lidan fulasu ligía, aba wafurendeirun súngubei áhurera lidan niewe. Ligía anihein lubéi meha dan, ñǘdüntiwa sun wagía lun wásügürün aban dan úara, ani ruti meha katei ligía chansi woun lun wayanuhan hama wasaanigu. Ani hínsiñeti meha giñe woun woudin akianpuha ani lun wayanuhan saragu. Dan le aweinamudeina hamá, adügatiña álügüdahani woun, kéiburi: “Kaba wadüga danme le wéinamugadiwa?” ani “Kaba san uma wamarieida?”. Adüga wamuti sun wayaraati lun warufudahan houn lun línsiñedun Heowá houn. Ani ínchaha wamutiña giñe súnwandan lun heseriwidun lidan dan dayarüti luma lun hamarieidun hama íbirigu ha íchugubalin Larúeihan Bungiu lidan furumiñeti lúgaaru lidan habagari. Hóuchatiwa giñe wíderaguniña lun gunfuranda hamani buítimati lan lun mamarieidun hamá dan le nibureingiña saragu. Héchutiwa meha ariñaga houn lun lan hagurabahan.

Dandu Bethel kei au sigí wamuti hénpulu le híchugubei wagübürigu woun. Ligía súnwandan lubéi meha wáfaagun lun wanügüniña wasaanigu lidoun adamuridaguni luma apurichiha. Hínsiñeti meha woun wamisurahaniña íbirigu ha eseriwidubaña lidan dan dayarüti wábiñoun. Ani súnwandan meha wayanuhan hama luagu ugundani le meha wasandirubei keisi misioneru. Súnwandan meha busén wamá woudin Áfürika hau wasaanigu, ani gúndaatiña meha lau saminaü ligía.

Súnwandan meha wadügüni aturiahani keisi iduheñu. Asayahatiwa hama wasaanigu lun warihini ida luba lan hóunabun lun álügüdahani le gayarabei ladügǘn houn leskuelarugu. Hínsiñeti meha houn hadügüni, ani buiti hasandiragun houngua lárigiñe. Gama lumoun, dan le aweinamudeina hamá, anihein meha dan mabusenruntiña haturiahanu Bíbülia keisi iduheñu. Aban weyu aba labuchadun nuagu ani aba nariñagun houn  maturiahanbadiwa lan ani lun lan houdin harumurugun. Aba taweiridun hanigi. Aba hagumeserun ayahuaha ani ariñaga hagía busén hamá haturiahan. Aba wíchugun fe wíderaguñanu lan lun gebegi lan larufudahan Heowá houn. Lau lásügürün dan, aba harihini aturiahani keisi iduheñu kei aban katei gebegiti. Lidan burí ókaasion ligía hínsiñeti meha houn hariñaguni woun ka lan hasaminarubei luma ka lan hasandirubei. Anihein meha dan aba hariñagun woun múaran hamá lau somu arufudahati tídangiñeti Bíbülia. Íbini hénrengu lan katei ligía woun, le buídubei, luagu subudi wamuti lan meha kátima lan hasaminarubei. Lárigiñe wasaminarun hama, aba hánharun lun le lariñagubei Heowá.

ABA WÉCHUDUN LUAGU BURÍ AMU ASANSIRUNI

Fureseti lásügürün lidaani wagüriahaniña wasaanigu. Lau tídehan luma tadundehan lóundarun Heowá, aba wadügüni sun wayaraati lun warufudahan houn lun línsiñedun Heowá houn. Wéiriti meha wagundan dan le hagumeserunbei eseriwida kei prekursoru dan le hagumuchuni haturiahan ani aba hafurendeirun awadigimarida lun hanuriagun houngua. Aba houdin eseriwida úara hama bián íbirigu würiña lidoun uburugu Cleveland (Tennessee), ladüga mégeiwatiña apurichihatiña lidan fulasu ligía. Álugatiwa hawagu, gama lumoun gúndaatiwa lau hayusuruni habagari lun heseriwidun lun Bungiu lidan dan dayarüti. Dandu Bethel kei au ábaya desidírü wamá weseriwidun kei prekursoru. Ruti katei ligía chansi woun lun weseriwidun keisi óunigirutiña sirkuitu ani lun wídehan lidan adamurini wéinamuti.

Lubaragiñe háguyun lidoun uburugu Tennessee, ñǘdüntiña wasaanigu Londres (Inglaterra) lun houdin Betelirugu. Ñein tasubudirei Stephany aban nibureinti gíriti Paul Norton, le eseriwidubei Betelirugu. Lidan dan ligía, 19 irumu tau Stephany. Lidan amu wéiyaasu Inglaterra, aba tasubudirun Kimberly aban nibureinti le eseriwidubei Betelirugu gíriti Brian Llewellyn. Dan le tagunfulirunbei Stephany 23 irumu ligía tamarieidun luma Paul. Ani aban irumu lárigiñe, aba tamarieidun Kimberly luma Brian. Wein-seingü meha irumu tau. Ligíati, biángubei hagía maríeitiña lárigiñe hagunfulirun 23 irumu. Gúndaatiwa lau warihini maríei hamá hama wügüriña ha buítiña.

Luma Paul, Stephany, Kimberly luma Brian tidan sukursáli Malaui lidan irumu 2002.

Ariñagatiña wasaanigu woun íderagua laaña lan hénpulu le wíchugubei houn lun hasigirun ‘áluahei Larúeihan Bungiu furumiñe’, íbini dan le gaturóbulin hamá luagu seinsu (Matéu 6:33). Lidan gádürü-hati, 1998, aba hamisurahóun Paul tuma Stephany lidoun külase númeru 105 tidan Leskuela Galaadü, ani lárigiñe aba hounahóun eseriwida Malaui. Lídanmeme dan ligía aba hamisurahóun Brian tuma Kimberly eseriwida Betelirugu Londres. Ani dan lárigiñe, aba hounahóun eseriwida tidan Beteli Malaui. Wéiriti wagundan lau warihini yusu hamani wasaanigu habagari buidu.

ÁMUYA AMISURAHANI LE BUITI

Lidan eneru irumu 2001 aba lagúarun íbiri Marais nun, íbiri le uágubei nayanuha lidan lagumeseha abahüdaguni le. Íbiri Marais ligía arihibei lau wadagimanu lánina tásügürawagüdüniwa agumeiraguagüdüni lidoun amu iñeñein. Aba lariñagun nun haransehañein lan íbirigu ha nadagimeinbaña luma aban külase lun híderaguniña ásügüragüdütiña ha lídanbaña sun ubóu lun gunfuranda hamani buidu le hásügüragüdübei lídangiñe inglesi. Íbini 64 lan meha irumu nau lidan dan ligía, busentiña meha harufudahan nun lun níchugun külase houn amu. Aba nafurieidun lun Heowá úara tuma nani weiriou luagu katei le, ani aba wamuriahan adundehani hama wagübürigu. Íbini wéiyougaaña lan meha biángubei hagía, ani mégeitiña saragu ídemuei, busentiña lun woudin. Ligía aba lubéi nagúarun houn íbirigu Patterson lun nariñagun houn wánharuba lan lun amisurahani le hadügübei woun.

Gama lumoun, aba tíchugun núguchu fe anihein lan kánserü tuagu. Aba nayanuhan tuma ani aba nariñagun tun himei wamá werederun lun wíderagunu Linda, to namulelua, óunigiroun. Máhatu núguchu ani aba tariñagun nun: “Wuribatimabei nasandiragun nungua ánhabu midin”. Ligiaméme tasaminarubei Linda. Ligía aba lubéi  woudin Betelirugun, Patterson. Dandu Bethel kei au seremei wamutiña saragu luagu lueirin sákürifisiu le hadügübei. Aba giñe weteingiruniña íbirigu ha íderagubaliña. Aban weyu lárigiñe wachülürün Patterson, aba tagúarun Linda woun lun tawisaruniwa hilá tan núguchu. Ítara kei tínchahaniwa núguchu lun wadügün, aba wetenirun lun wawadigimari.

Aba wagundaarun saragu lau wasubudiruni wóudiba lan tidoun sukursáli to Malauiboun íchigei furumiñeti külase. Ani tidan sukursáli tugía heseriwida wasaanigu hama hánigu weiriei. Buiti dan le wásügürübei ñein úara. Lárigiñe aba wíchuguni külase ligía houn íbirigu Zimbabue luma Zambia. Ǘrüwa irumu lárigiñe, aba lamuriahóun wama lunya wagiribudun Malaui. Ñein ídehatiwa lidan labürüdǘn luagu le hásügürübei Gefentiña ha asufurirubaña éibaahouni lidan ageiraü ligía ladüga mádaragun hamá houngua lidoun polítika. *

Wapurichihaña hama wabaña.

Dan le wagiribudunbei Áfürikagiñe lidan irumu 2005, ábaya wírudun saragu. Aba wagiribudun wábiñoun uburugu Basalt (Colorado). Ñein, dandu Bethel kei au sigitiwa eseriwida kei prekursorugu. Lidan irumu 2006, aba háguyun Brian tuma Kimberly tubadun waban lun hagüriahaniña bián hasaanigu, Mackenzie tuma Elizabeth. Aniheingua Paul tuma Stephany eseriwida Malaui, ani leseriwiduña Paul lidan Sétanu le arihibei tau Sukursáli. Gúnfulimemedina 80 irumu, ani gúndaatina lau narihiniña saragu íbirigu nibureintiña etenira lun wadagimanu le meha nadügübei. Luagu hafulesein wasaanigu hama wabaña, áfaaguadiwa lun wasigiruni lubuidun hénpulu le híchugubei amu kristiánugu woun. Ligía weiri lubéi wagundan.

^ par. 5 Anhein busén hubéi lanwoun ariñahani luagu wadagimanu keisi misioneru le hadügübei saragu tiduheñu íbiri Steele, ariha humóun garüdia La Atalaya to lánina 1 lidan bián-hati, 1957, páhina 76 darí 79, luma tidan garüdia La Atalaya to lánina 15 lidan widü-hati, 1971, páhina 506 darí 511.

^ par. 17 Dan le laransehóunña lubéi arütíkulu le, aba tounwen íbiri Kanaiya úaragu lun Heowá.

^ par. 30 Kei hénpulu, ariha huméi abahüdaguni luáguti libagari Trophim Nsomba, tidan garüdia La Atalaya to lánina 15 lidan gádürü-hati, 2015, páhina 14 darí 18.