Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Diisi-hati irumu 2016

Afiñe wamá luagu lani Heowá füramasei

Afiñe wamá luagu lani Heowá füramasei

“Afiñeni, achoururuni le gumuti luagu [...] anirein lan burí katei lau sun marihin wamani” (EBÜRÉU 11:1).

UREMU 54, 43

1. Ida liña lunti lan wasandiragun woungua ladüga afiñe wamá?

MAMA sun gürigia lun afiñe hamá (2 Tesalónikana 3:2). Gama lumoun ruti Heowá afiñeni houn sun ha áhuduragubaña lun (Rómana 12:3; Galasiana 5:22). Mosu wíchugun seremei lun Heowá luagu afiñeni le líchugubei woun.

2, 3. a) Ka abinirúni weresibirubei luagu wafiñen? b) Kaba burí álügüdahani wóunaba?

2 Ru lumuti Heowá Liráü lun sun lan ha afiñerutiña luagu lun hibihin ferudun luagu hafigoun. Anhein afiñe wabéi luagu Hesusu, gayarati lumadagu wamá Heowá ani ábame wawinwandun lun súnwandan (Huan 6:44, 65; Rómana 6:23). Hínsiñetiwa lun Heowá saragu. Lau sun gafigoun wamá ani madüna wamani ibagari, ariha lumuti luagu gayara lan wadügün katei buiti (Sálumu 103:10). Ligía larufudahanbalin uganu luáguti Hesusu luma lani sákürifisiu woun. Dan le meha wafiñerunbei luagu Hesusu ani aba wafalaruni, aba wibihini emenigini lánina ibagari magumuchaditi (aliiha huméi 1 Huan 4:9, 10).

3 Gama lumoun, ka amu katei gayarabei wafurendeirun luagu afiñeni? Anhein busén wabéi wafiñerun, buídurügüti funa san lau wasubudiruni le adüga láalibei Bungiu luma le lunbei  ladügüni wawagu ámuñegü? Mosu wadügün ámuya katei. Ariha waméi.

ARUFUDA WAMÉI AFIÑENI LE TÍDANBEI WANIGI

4. Anhein afiñe wabéi, kaba wabusenra wadügün?

4 Anhein afiñe wabéi luagu Heowá luma luagu Hesusu, úabei buídurügü lan woun wasubudiruni le adüga hamaalibei luma le lunbei hadügüni wawagu. Busenbadiwa tídangiñe sun wanigi wawinwandun kei aubei harufudaha woun ani wíderagubaña amu lun giñe hasubudiruniña. Ariñagati apostolu Pábulu: “Ánhabu ariñaga lau biyuma luagu Hesusu lan Baburemebei, afiñe buguya tidan banigi luagu saragüda lani Bungiu lídangiñe óunweni, basalbaruba. Ladüga lau bafiñerun tau sun banigi, leresibirabu Bungiu keisi gürigia richaguati; lau bagufeserun lau biyuma, basalbara” (Rómana 10:9, 10; 2 Korintuna 4:13).

5. a) Ka uagu súdini lubéi afiñeni? b) Afuranguagüda huméi lau aban hénpulu ka lan lunbei wadügüni lun wakipuruni wafiñen héreñu.

5 Anhein busén wabéi wawinwandun lun súnwandan lidan iseri ubóu, mosu wafiñerun ani kipu wameime wafiñen héreñu. Ítara liña afiñeni kei aban nadü. Lun laweiridun buidu, lunti wáturaguni gabügürügua. Anhein madügün wamá, lóunweba. Ítarameme, mosu wakipuruni wafiñen ani adüga wagíame lun laganwoundun (Titu 2:2; 2 Tesalónikana 1:3; Lúkasi 22:32; Ebüréu 3:12).

KA SAN AFIÑENIBEI SEGÚN BÍBÜLIA

6. Ka afiñenibei, según lariñaguni Ebüréu 11:1?

6 Ariñawagúati bián katei luagu afiñeni lidan Ebüréu 11:1 (aliiha huméi). Furumiñe, ariñagati “achoururuni [lan] le gumuti luagu wabihibei lan le wagurabubei” afiñenibei. Anihein sun lani Bungiu füramasei lubá ámuñegü lidan burí katei le wagurabubei. Kei hénpulu, chouru wamuti luagu lagumuchuba lan Bungiu lau wuribani ani ñeinbei lan aban iseri ubóu. Libiaman, ariñagatu Bíbülia ‘achoururuni lan le gumuti luagu anirein lan burí katei lau sun marihin wamani afiñenibei’. Anihein saragu katei le inarüniti íbini marihin wamani, kéiburi Heowá, Hesukrístu, ánheligu luma Larúeihan Bungiu le siélubei (Ebüréu 11:3). Ida liña warufuduni inarüni lan wafiñen luagu lani Heowá füramasei luma luagu katei burí le marihínwabei? Arufuda wamuti lau ligaburi wawinwandun luma lau le wariñagubei luma le wadügübei.

7. Ida liña líderaguniwa lani Noé hénpulu lun gunfuranda wamani le mini lubéi afiñeni? (Ariha huméi dibuhu le lídanbei lagumeseha arütíkulu).

7 Íderagua lumutiwa lani Noé hénpulu lun gunfuranda wamani le mini lubéi afiñeni. Ariñagati apostolu Pábulu resibi lan Noé adundehani lúmagiñe Bungiu luagu anitebei lan “aban óunwenbu guran, lau sun marihinñahagili lan [aban] guran”. Kei busén lubéi meha Noé lagundaaragüdüni Bungiu, “aba ládaragun aban óunwenbu ugunei lun lasalbarun hau sun tílana luban” (Ebüréu 11:7). Afiñeti meha Noé luagu le lariñagubei Heowá lun, ligía ladügünbei aban óunwenbu árüka. Másiñati álügüdagua hamá lubesinanigu Noé houngua ka lan uagu ladügoun árüka. Ani gayarati wachoururuni merederun lan Noé maniñu, lugundun ariñagatu Bíbülia apurichiha lan “houn gafigountiña lun hasakürihan” (2 Féduru 2:5). Afuranguagüda lumuti houn gürigia luagu lóunahaba lan Bungiu aban guran lun lagumuchun lau wuribani. Másiñati aba lan lasubudiragüdüni houn le meha lariñagubei Heowá lun: “Nagumuchaguagüdaaña sun gürigia, gíbeti anarimeni ubouagu hádangiñeti, nagumuchaguagüdaaña lubeiti labu sun ubóu”. Ariñagati meha giñe Heowá  lun Noé: “Nóunaha aban guran le lunbei labuluchuni ubóu, lun lagumuchun lau sun le gabagaribei ligibuagu ubóu. Lóunweba sun le ubouagubei”. Lárigiñe, chóuruti afuranguagüda lani Noé houn gürigia ka lan lunbei hadügüni lun hesefuruni habagari. Ariñagaali meha Heowá lun ‘mosu lan lebelurun tidoun árüka’ (Agumesehani 6:13, 17, 18).

8. Ka lariñagubei Santiagu luagu afiñeni?

8 Abürühati giñe disipulu Santiagu luagu afiñeni. Háfuga aba lan ladügüni murusun dan lárigiñe labürüdünu Pábulu ligaradan houn kristiánugu ebüréu. Ariñagati Santiagu: “Arufudabéiti bafiñen nun bóugudin luéi buiti le badügübei, narufudeime nafiñen bun lau buiti le nadügübei” (Santiagu 2:18). Ariñagati lun lan wafiñerun le gumuti, úati buídurügü lan lau wafiñerun luagu Bungiu. Subudi hamuti máfianu luagu anihein lan Bungiu, gama lumoun mafiñentiña luagu. Lubaragiñe lira, aba hebedaagun lun lau sun here (Santiagu 2:19, 20). Le linarün aban katei, gürigia le afiñebei luagu Bungiu busenti lagundaaragüdüni lau katei buiti le ladügübei. Ligía meha ladügübei Abüraámü. Abürühati Santiagu: “Resibi lumuti Bungiu Abüraámü, le wagücha, keisi richaguati ligibugiñe luagu le ladügübei dan le lánharunbei lun yebe láfaruni Isaakü le liráü hilagubei keisi adagaragüdüni. Ariha baali luagu arufuda lani Abüraámü lafiñen lau katei le ladügübei, ani ñǘbuinti lafiñen lun dayarübei lan lau katei le ladügübei”. Lárigiñe, arufuda lumuti Santiagu lunti lan warufuduni wafiñen lau katei le wadügübei dan le lariñagun: “Ítara kei hilañu liña lan úgubu anhein ua tubéi uani lidan, hilañu liña giñe hafiñen anhein marufudun humá lau katei buiti le hadügübei” (Santiagu 2:21-23, 26).

9, 10. Ka lunbei wadügüni anhein busén wabéi warufuduni wafiñen luagu Liráü Bungiu?

9 Lóugiñe 30 irumu lárigiñe labürühan Santiagu luagu afiñeni, abürüha lumutu Huan lani Ewanhéliu tuma ǘrüwa gárada. Ítara kei amu abürühatiña Bíbülia, gunfuranda lumuti Huan le mini lubéi afiñeni. Súnwandan meha layusurun aban dimurei güriegu le gayarati lásügürawagüdüniwa lidan garifuna kei “afiñera”.

Arufuda wamuti wafiñen luagu Liráü Bungiu dan le gaganbadi wamá lun lugumadin

10 Kei hénpulu, ariñagati Huan: “Le afiñebei luagu Liráü Bungiu, gabagariti le magumuchaditi; ánheinti le máhabei lafiñerun luagu Liráü Bungiu, mabagaribei libe ibagari ligía [...]; lábürüharügüba ligañi Bungiu luagun” (Huan 3:36). Lun warufuduni wafiñen luagu Liráü Bungiu, lunti gaganbadi wamá lun lugumadin (ariha huméi rekuáduru “ Ka mini lubéi?”). Dan le waliihani sun le labürüdübei Huan, ariha wamuti súnwandan lan meha larufudahan Hesusu mosu lan wafiñerun luagu luma luagu Lúguchi lun wawinwandun lun súnwandan (Huan 3:16; 6:29, 40; 11:25, 26; 14:1, 12).

11. Ida liña warufuduni weteingiradi luagu larufudahani Heowá inarüni woun?

11 Yusu lumuti meha Heowá lani sífiri sandu lun líderaguniwa lun gunfuranda wamani inarüni luagu luma luagu Liráü, ani lun líderaguniwa afiñera hawagu (aliiha huméi Lúkasi 10:21). Ida liña warufuduni weteingiradi luagu  le adüga láalibei Heowá wawagu? Lau wíchugun seremei lun luagu chansi le líchugubei woun lun lumadagu wamá lau lídehan “Hesusu, le [...] abuiduragüdübalin wafiñen sunsuinagubei” (Ebüréu 12:2). Ani mosu giñe wasigirun aganwoundagüdei wafiñen. Ida? Lau wafurieidun luma lau waturiahanu Bíbülia súnwandan (Éfesuna 6:18; 1 Féduru 2:2).

Sagü gayara lan wadügüni, arufuda waméi wafiñen lau wayanuhan houn amu luagu Larúeihan Bungiu. (Ariha huméi párafu 12).

12. Kaba wadüga anhein afiñe wabéi?

12 Anhein here lubéi wafiñen luagu lani Heowá füramasei, warufudubei lau le wadügübei súnwandan. Kei hénpulu, wasigiruba ayanuha houn gürigia luagu Larúeihan Bungiu ani wíderagubaña lun hafalaruni Hesusu. Ani wasigiruba giñe adügei “le buídubei houn súngubei [...], hóuntima waduheñu lidan afiñeni” (Galasiana 6:10). Ani wasigiruba áfaagua lun wagidaruni binadu wagaburi “le láninabei ubóu le”, ladüga mabusenruntiwa wadügün ni kata le gayarabei lagadeiruni wamadagua luma Heowá (Kolosana 3:5, 8-10).

ÍDERAGUA LUMUTIWA WAFIÑEN LUN WAKIPURUNI WAMADAGUA LUMA HEOWÁ

13. a) Ka uagu súdini lubéi wafiñerun luagu Bungiu? b) Ka tariñagubei Bíbülia luagu afiñeni, ani ka uagu?

13 Ariñagatu Bíbülia siñabei lan wagundaaragüdüni Bungiu ánhawa mafiñen, “lugundun lun wayarafadun lun, gasu wafiñerun luagu anihein lan ani líchuguba lan hafayeiruáha ha áluahabalin” (Ebüréu 11:6). Ariñagatu Bíbülia ‘gébuna lan’ wafiñen luagu Bungiu. Ka uagu? Ladüga afiñeni ligía aban lídangiñe furumiñeti igaburi le lunbei larufuduni kristiánu inarüniti (Ebüréu 6:1). Gama lumoun mégeitiwa giñe saragu amu igaburi le lunbei líderaguniwa lun wakipuruni wamadagua luma Bungiu (aliiha huméi 2 Féduru 1:5-7; Húdasi 20, 21).

14, 15. Ka uagu súdinitima lubéi warufudun ínsiñeni sügǘ lau afiñeni?

14 Gíbetimati hayanuhan abürühatiña Bíbülia luagu afiñeni sügǘ lau luagu amu igaburi. Mini lan san le afiñeni lan igaburi súdinitimati le lunbei larufuduni aban kristiánu? Ariha waméi.

15 Konparárü lumuti Pábulu afiñeni luma ínsiñeni. Ariñagati ‘anhein lan weiri lubéi lafiñen darí hamuga lun gayara lan ladiñurun aban wübü lídangiñe lubara lau afiñeni ligía ani mínsiñehabuti, ni kata lan ligía’ (1 Korintuna 13:2). Ani ariñagati meha Hesusu ínsiñeni lan luagu Bungiu “gumadi wéirigutimabei [...] lídangiñe sun lugumadin Bungiu” (Matéu 22:35-40). Íderagua lumutiwa  ínsiñeni lun warufudun saragu amu igaburi le hínsiñeti lun Bungiu. Kei hénpulu, ariñagatu Bíbülia afiñe lumuti lan ínsiñeni sun katei. Ligíati, íderagua lumutiwa ínsiñeni lun wafiñerun luagu sun le lariñagubei Bungiu woun tidan Bíbülia (1 Korintuna 13:4, 7).

16, 17. a) Ida liña tarufuduni Bíbülia súdini lan afiñeni luma ínsiñeni? b) Ka lídangiñe igaburi le súdinitimabei, ani ka uagu?

16 Arufudatu Bíbülia súdini lan ínsiñeni luma afiñeni. Ligía anihein lubéi dan ayanuha hamá abürühatiña Bíbülia luagu bián igaburi le úara. Kéiburi apostolu Pábulu, ínchaha lumutiña amu kristiánugu lun hadouragun haugua “lau afiñeni luma lau ínsiñeni” (1 Tesalónikana 5:8). Ariñagati Féduru luagu Hesusu: “Hínsiñeti Hesukrístu hun lau sun marihin humagili lan; ani lau sun lira, afiñeedün luagu” (1 Féduru 1:8). Ariñagati meha Santiagu houn kristiánugu anuadirúaaña: “Anúadira laaña Bungiu ha gudemebaña lidan ubóu le lun risi hamá lidan hafiñen, lun giñe heresibiruni arúeihani le füramase lubéi houn ha hínsiñehabubaña lun” (Santiagu 2:5). Ani ariñagati Huan busén lan Bungiu “lun wafiñerun luagu Hesukrístu le Liráü, lun giñe hínsiñegua wamá wámagua” (1 Huan 3:23).

17 Gama lumoun ariñagati giñe Pábulu aniheingua lan “afiñeni, emenigini luma ínsiñeni [...] gama lumoun ínsiñeni, wéiritimabei lídangiñe ǘrüwagubei” (1 Korintuna 13:13). Ka uagu lariñaga Pábulu súdinitimati lan ínsiñeni? Ladüga ámuñegü mámaalime mosu wafiñerun luagu füramasei le ladügübei Bungiu luagu aban iseri ubóu. Wawinwanduñeinme lubuidun ibagari le uágubei tayanuha Bíbülia. Gama lumoun, mósume wasigirun arufuda ínsiñeni luagu Bungiu luma hawagu amu gürigia. Lasigiruba ínsiñeni ligía aganwounda eibu dan.

BINÍ LAALI HEOWÁ HAFIÑEN LUMUTUNIÑA

18, 19. Ka buiti lanügübei hafiñen lubúeingu Bungiu uguñe weyu, ani kaba un wíchigei uéiriguni luagu katei le?

18 Uguñe weyu, ígiratiña lubúeingu Bungiu lun ladundehaniña Heowá lau lani sífiri sandu. Ligía afiñe habéi luagu Larúeihan Bungiu ani aba houdin luéigiñe lóubadina. Ani hínsiñeguatiña giñe hóuniwagua (Galasiana 5:22, 23). Kei resultóu, lidan sun ubóu añahein hóugiñe widü míñunu íbirigu ha agundaarubaña lau darangilaü luma úarani lidan damuriguaü. Furanguti weiri lan lubafu afiñeni luma ínsiñeni.

19 Láurügüñein lídehan Heowá gayara lan ñein lan úarani. Gadünati lun walawahani luagu katei le (Isaíasi 55:13). Teinki waña lun Heowá luagu chansi le líchugubei woun lun wasalbarun ladüga ‘wafiñen luagu’ (Éfesuna 2:8). Lasigiruba Heowá íderaguaña saragu amu gürigia lun hafiñerun luagu. Ani lachülürüba aban weyu lun labuinchun Ubóu hau gürigia mafigountiña, richaguatiña ani gúndaatiña ha lúnbaña halawahani Heowá lun súnwandan.