Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Bián-hati irumu 2017

Lebegi asalbaruni: aban idewesei buiti lúmagiñe Wáguchi

Lebegi asalbaruni: aban idewesei buiti lúmagiñe Wáguchi

“Sun buiti le ichugúbei woun [...] siélugiñe liabin, lúmagiñe Bungiu” (SANTIAGU 1:17).

UREMU 148, 5

1. Ka burí katei buiti wibihibei seremei lebegi asalbaruni?

ADÜGATI lani Hesukrístu sákürifisiu lun weresibirun saragu abiniruni. Kei hénpulu, adügati lun sun lan lirahüñü Adán ha hínsiñehabubaña lun irichaü lun hádangiñe hamá liduheñu Bungiu ámuñegü (Ariha huméi rekuáduru “ Ka mini lubéi?”). Adügati giñe lun gachansin wamá lun wawinwandun lidan ugundani lun súnwandan. Gama lumoun, gíbetimati katei ladügün lebegi asalbaruni. Wayanuhaña luagu katei súdiniti houn sun ha siélubaña hama ha ubouagu (Ebüréu 1:8, 9).

2. a) Ka burí katei súdiniti sielu luma ubouagu uágubei layanuha Hesusu lidan furíei wáguchi Bungiu? (Ariha huméi dibuhu le lídanbei lagumeseha arütíkulu). b) Kaba wariha lidan arütíkulu le?

2 Kéiburi bián irumu lubaragiñe lounwen Hesusu, arufudahati houn lani disipulugu lun hafurieidun lau dimurei burí le: “Wáguchi Bungiu le siélubei, inebewalá biri. Ñǘbuinla barúeihan; adügüwalá bugundan ya ubouagu kei ladügǘniwa sielu” (Matéu 6:9, 10). Lidan arütíkulu le warihibei ka lan lánibei lebegi asalbaruni lidan ǘrüwa katei le: 1) lidan inebewa lan liri Heowá, 2) lidan Larúeihan Bungiu luma 3) lidan ladügǘn lugundan Bungiu.

 “INEBEWALÁ BIRI”

3. a) Ka larufudubei liri Bungiu? b) Ida liña lawiyeduni Satanási lubuidun liri Heowá?

3 Le furumiñeti katei le lamuriahabei Hesusu lidan furíei wáguchi Bungiu, lun inebewa lan liri Bungiu ladüga sandu lan. Arufuda lumuti iri le ka lan luwuyeri gürigia Heowá. Ligía Bungiu le gabafutimabei ani le richaguatimabei lidan sun ubóu. Wati Hesusu lun Heowá: “Núguchi Sánduti” (Huan 17:11). Kei le sandu lubéi Heowá, sun le ladügübei sánduti, íbini lilurudun. Gama lumoun, lidan fuluri-agei Edén adügati Satanási lun machourun lan anhein garicha lubéi Bungiu lun líchugun lúrudu houn gürigia. Ariñagati iyeeni luagu Heowá ani wíyeda lumuti lubuidun liri (Agumesehani 3:1-5).

4. Ida liña meha larumadahani Hesusu liri Bungiu?

4 Mítaranti Hesusu kei Satanási, hínsiñeti meha liri Heowá lun Hesusu. Ligía meha ladügünbalin sun liyaraati lun larumadahani (Huan 17:25, 26). Ida liña meha larumadahani Hesusu liri Bungiu? Lau le ladügübei luma le larufudahabei. Ítara liña meha líderaguniña Hesusu híbiri gürigia arihei richá lan lilurudun Heowá ani sun lan le lamuriahabei Bungiu wámagiñe lunti lan wabuidun guánarügü (aliiha huméi Sálumu 40:8-10). Kíputi meha Hesusu úaraguni lau sun adüga lan Satanási lun lasufurirun aban óunweni le gáriti. Arufudati Hesusu gayara lan gaganbadi lan aban wügüri mafigounti lun Heowá sin lachararun.

5. Ida liña gayara lan warumadahani liri Heowá?

5 Agia wagía, ida liña warufuduni hínsiñe lan liri Heowá woun? Lau le wadügübei. Agurabati Heowá lun sandu wamá (aliiha huméi 1 Féduru 1:15, 16). Ligía lúnrügüñein lubéi wáhuduragua ani gaganbaditiwa lun tídangiñe sun wanigi. Íbini dan le wéibaahoun, áfaaguatiwa lun wawinwandun kei larufudahani Heowá woun. Dan le gaganbadi wamá lun lilurudun, rútiwa uéiriguni lun liri (Matéu 5:14-16). Arufudatiwa giñe buidu lan lilurudun Heowá ani aban lan yeeti Satanási. Inarüni chará wamá ladüga gafigoun wamá. Gama lumoun, dan le wachararun, aba wasakürihan ani aba wáfaagun lun wígirun furumiñeguarügü katei le awiyedubalin liri Heowá (Sálumu 79:9).

6. Ka uagu gayara lubéi larihiniwa Heowá kei gürigia richaguatiña íbini gafigoun wamá?

6 Dandu anhein hádangiñetiwa lubéi kristiánugu anuadirúaaña o hádangiñe “amu mudún”, feruduna lumuti Heowá wafigoun anhein afiñe wabéi luagu lebegi asalbaruni. Ha ederegerubalin habagari lun resibi lumutiña. Ariha lumutiña Heowá kristiánugu anuadirúaaña keisi gürigia richaguatiña ani resibi lumutiña kei lirahüñü. Ariha lumutiña giñe “amu mudún” kei gürigia richaguatiña ani resibi lumutiña kei lumadagu (Huan 10:16; Rómana 5:1, 2; Santiagu 2:21-25). Seremei lebegi asalbaruni, íbini guentó gayarati gamadagua wamá luma Wáguchi ani adüga wameime liri sándume.

“ÑǗBUINLA BARÚEIHAN”

7. Ka burí abinirúni lanügübei Larúeihan Bungiu seremei lebegi asalbaruni?

7 Lidan furíei wáguchi Bungiu, ariñagati Hesusu: “Ñǘbuinla barúeihan”. Ka san lánibei lebegi asalbaruni luma Larúeihan Bungiu? Subudi wamuti luagu Hesusuba lan hama 144,000 gürigia ha anuadirúbaña ubouagugiñe agumadiha lidan Larúeihan Bungiu. Adügati lebegi asalbaruni lun gayara lan háguyugun gürigia ha lun hawinwandun sielu (Arufudúni 5:9, 10; 14:1). Urúeigubaña ani fádirigu, ani hagumadihaba ubouagu luma Hesusu luagu 1,000 irumu. Lídanme dan ligía, layusurubei Heowá larúeihan lun ladügüni Ubóu paraísume luma lun líderaguniña gürigia lun mafigounhaña  lanme. Chülühame dan lun iduheñu hamá dandu lubúeingu Heowá ha siélubaña kei ha ubouagubaña (Arufudúni 5:13; 20:6). Lagumuchuba Hesusu lau Satanási luma lau sun turóbuli le adüga láalibei (Agumesehani 3:15).

8. a) Ida liña líderaguniña Hesusu lani disipulugu lun gunfuranda hamani súdini lan Larúeihan Bungiu? b) Ida liña warufuduni luéigiñeñadiwa lan lóubadina Larúeihan Bungiu?

8 Íderagua lumutiña meha Hesusu lani disipulugu lun gunfuranda hamani súdini lan Larúeihan Bungiu. Ida liña ladügüni? Lárigiñebei labadiseirun, aba lagumeserun apurichihei “uganu le luáguti larúeihan Bungiu” lidan sun fulasu (Lúkasi 4:43). Ariñagati giñe houn lani disipulugu lunti lan houdin apurichiha luagu “chülǘ lumoun lidise-agei fulasu ubouagu” (Adügaü 1:6-8). Uguñe weyu, ruti giñe apurichihani chansi houn gürigia lun hafurendeirun luagu lebegi asalbaruni luma lun hawinwandun lábugiñe Larúeihan Bungiu. Arufuda wamuti úaragua wamá lun Larúeihan Bungiu dan le wíderaguniña kristiánugu anuadirúaaña apurichihei uganu buiti lidan sun ubóu (Matéu 24:14; 25:40).

“ADÜGÜWALÁ BUGUNDAN”

9. Ka uagu gayara lubéi wachoururuni lagunfuliruba lan lisuuni Bungiu houn gürigia?

9 Ariñagati giñe Hesusu lidan furíei wáguchi Bungiu: “Adügüwalá bugundan”. Ka meha labusenrubei lariñagun? Dan le lariñagun Heowá lasusereduba lan aban katei, susereti (Isaíasi 55:11). Madügünti lebedaagun Satanási lun lasansirun lugundan Heowá. Ka meha san lisuunibei Bungiu lun Ubóu? Busenti meha lun labuinchun Ubóu hau lisaanigu Adán tuma Ewa ha mafigountiña (Agumesehani 1:28). Lun hamuga meha hilatiña Adán tuma Ewa lubaragiñe gasaanigu hamá, magunfulirunti hamuga meha lisuuni Bungiu lun habuinchagüdüni Ubóu hau hasaanigu. Ligía lígirunbei Heowá lun gasaanigu hamá. Ruti lebegi asalbaruni chansi houn sun gürigia ha arufudubaña afiñeni lun hawinwandun lun súnwandan sin figóu. Hínsiñetiwa lun Heowá ani busenti lun wibihini lubuidun ibagari le meha labusenrubei woun lúmagiñe furumiñeti dan.

10. Kaba buiti lanüga lebegi asalbaruni houn gürigia ha hilaguaañabaña?

10 Hilaguaaña saragu míñunu gürigia sin hasubudiruni Heowá. Kaba san asusereda houn gürigia ha? Kei le busén lubéi Bungiu lun hawinwandun gürigia, láguyuguagüdübaña ha hilaañabaña. Seremei lebegi asalbaruni, gayarabei háguyugun gürigia. Danme le háguyugun gürigia, gachansinbaña lun hafurendeirun luagu Heowá luma lun hawinwandun lun súnwandan (Adügaü 24:15). Kei le Heowá lubéi íchugubalin ibagari, ligíaba háguchi sun ha lúnbaña háguyugun (Sálumu 36:9). Ligía lariñagunbei Hesusu lidan furíei Heowá lan Wáguchibei “le siélubei” (Matéu 6:9). Ru laali Heowá wadagimanu súdiniti le lun Hesusu lun láguyuguagüdüniña hilaaña. Ligía lariñagunbei Hesusu: “Au águyugunibei, au ibagari” (Huan 6:40, 44; 11:25).

11. Ka labusenrubei Bungiu houn “saragu gürigia”?

11 Ariñagati giñe Hesusu: “Furumiñeguarügü ha adügüti lugundan Bungiu, hagía namulenubaña, nítunu tuma núguchu” (Márükosu 3:35). Busenti Bungiu lun háhuduragun gürigia ha lídangiñetiña sun rasa, sun iñeñein luma néchani lun. Ariñagatu Bíbülia “gíbetiña gürigia hagía darí lun siñá lan habahüdǘn”. Afiñetiña gürigia hagía luagu lebegi asalbaruni ani busentiña gaganbadi hamá lun Bungiu. Alawaha hamuti giñe ani ariñagatiña: “Lúmagiñe Wabungiute, le ñunbei luagu lálana arúeihani, luma lúmagiñe Mudún, liabin wasalbarun” (Arufudúni 7:9, 10).

12. Ka wafurendeirubei luagu lisuuni Heowá houn gürigia lídangiñe furíei le larufudahabei Hesusu?

 12 Furendeihadiwa saragu luagu Heowá luma luagu lisuuni houn gürigia lídangiñe furíei le larufudahabei Hesusu. Furumiñe furendeitiwa lunti lan wadügüni sun wayaraati lun warumadahani liri Heowá ani inebe ligíame woun (Isaíasi 8:13). Adügati lebegi asalbaruni lun gayara lan wesefurun ani adügati giñe lun inebewa lan liri Bungiu. Le linarün katei, “Heowá Esefuragüleibei” mini lubéi liri Hesusu. Libiaman, furendeitiwa layusurubei lan Heowá Larúeihan lun gayara lan hibihini gürigia gaganbaditiña sun buiti le lanügübei lebegi asalbaruni. Ani lǘrüwan, furendeitiwa úati lan ni kata gayarati lararamuni lagunfulirun lugundan Heowá (Sálumu 135:6; Isaíasi 46:9, 10).

GETEINGIRADI WAMÁ LUAGU LEBEGI ASALBARUNI

13. Ka uagu wabadiseirúa?

13 Arufuda wamuti weteingiradi luagu lebegi asalbaruni dan le wederegeragun woungua lun Heowá ani badisei wagía. Ítara liña warufuduni afiñe wamá luagu lebegi asalbaruni ani “lánigu lan Heowá wagía” (Rómana 14:8, TNM). Ani dan le wabadiseirun amuriahatiwa luma Heowá lun líchugun ‘aban anigi harumatu’ woun (1 Féduru 3:21). Ani óunaba lumutiwa Heowá lau líchuguni abinirúni le lanügübei lebegi asalbaruni woun. Ligía chouru wabalin líchugubei lan sun le füramase lubéi woun (Rómana 8:32).

Ida liña warufuduni weteingiradi luagu lebegi asalbaruni? (Ariha huméi párafu 13 luma 14).

14. Ka uagu líchiga Heowá gumadi lun hínsiñe hamá gürigia woun?

14 Adüga lumuti Heowá sun katei ladüga lueirin línsiñehabu. Busenti lun háyeihani sun ha áhuduragubaña lun ani lun hínsiñegua hamá hámagua (1 Huan 4:8-11). Dan le hínsiñe hamá gürigia woun, arufudatiwa giñe busén wamá ‘lirahüñü wamá Wáguchi le siélubei’ (Matéu 5:43-48). Tidan Bíbülia, ínsiñeni luagu Bungiu gumadi le súdinitimabei. Ani le libiaman, hínsiñe hamá híbiri gürigia woun (Matéu 22:37-40). Lun warufuduni hínsiñe hamá gürigia woun lunti wayanuhan houn luagu uganu buiti luáguti Larúeihan Bungiu. Ánhawa inebehabu lun lilurudun Bungiu luagu lunti lan hínsiñe hamá híbiri gürigia woun, ani wíbirigutima, warufudubei wínsiñehabu lun Bungiu sunsuinagubei (1 Huan 4:12, 20).

ABINIRÚNI SEREMEI LEBEGI ASALBARUNI

15. a) Ka burí abiniruni wibihibei lúmagiñe Heowá guentó? b) Kaba burí abiniruni wibiha ámuñegü?

15 Chouru lumuti Heowá woun gayara lan ladügün  lun ‘lachibún wafigoun’ anhein afiñe wabéi luagu lebegi asalbaruni. Mini lan le gayara lan feruduna lani wafigoun sunsuinagubei (aliiha huméi Adügaü 3:19-21). Kei buga aubei warihei, adügati lebegi asalbaruni lun gayara lan lanügün Heowá fiú gürigia lun lisaanigume lun hawinwandun sielu. Hagía kristiánugu ha anuadirúaañabaña (Rómana 8:15-17). Luagu amu oubaü, amisuraha lumutiña Heowá kristiánugu ha hádangiñetiña “amu mudún” lun liduheñu hamá ya ubouagu. Danme le mafigounhaña, mósume hásügürün aban lagumuhóun óuchawaguni. Ánhaña akipura úaraguni lun Heowá, ábame giñe lisaanigu hamá (Rómana 8:20, 21; Arufudúni 20:7-9). Hínsiñememebaña sun lisaanigu Heowá lun. Ani seremei lebegi asalbaruni, wasigiruba ibiha abinirúni lun súnwandan (Ebüréu 9:12). Ru laali Heowá lubuidun idewesei le woun, ani úabei gayarati lagidaruni wawéi.

16. Ida liña lesefuruniwa lebegi asalbaruni?

16 Ánhawa asaküriha luagu wafigoun, siñabei ladügün Mafia ni kata lun leredehaniwa luéi liduheñu wamá Heowá ámuñegü. Ru lumuti Hesusu libagari “ábanrügü wéiyaasu” lun súnwandan. Mini lan le memegeirunwabei lan lafayeirúniwa lebegi asalbaruni ábaya wéiyaasu (Ebüréu 9:24-26). Sügügüda lumuti Adán figóu wawagun, gama lumoun líchuguba lani Hesusu sákürifisiu ibagari magumuchaditi woun. Gayarati lesefuruniwa lebegi asalbaruni lídangiñe ubóu le lani Satanási luma lídangiñe anufudei luéi óunweni (Ebüréu 2:14, 15).

17. Ka wasandirubei dan le wasaminarun luagu lueirin wínsiñe lun Heowá?

17 Gayarati wachoururuni lagunfuliruba lan lani Heowá füramasei súnwandan. Ítara kei masansirun lan lúrudu burí le líchugubei luagu katei burí le ladügübei, masansirunbei giñe Heowá. Lagunfulirubei sun le lariñagubei (Malakíasi 3:6). Mámarügüñein ibagari líchiga Heowá woun. Ru lumuti giñe línsiñehabu woun. “Ítara liña wayabin asubudirei luma afiñera luagu hínsiñe wamá lun Bungiu. Ínsiñeni Bungiu” (1 Huan 4:16). Kei le súnwandan lubéi lagunfuliruni Heowá le füramase lubéi, málühali Ubóu lun ábanbei lan paraísu. Sun gürigia háyeihabei Heowá ani hínsiñeguabaña hámagua. Sun lubúeingu Bungiu, dandu ha siélubaña kei ha ubouagubaña halawahabei ani ábame hariñagun: “Rualá alawahani, uéiriguni, lichú aau, eteingiruni, inebesei, ubafu luma erei lun Wabungiute lun sun dan. Ítarala” (Arufudúni 7:12).