Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Bián-hati irumu 2017

Ka alidihabaliña lumutuniña Bungiu uguñe weyu?

Ka alidihabaliña lumutuniña Bungiu uguñe weyu?

“Haritagua humá hawagun ha adundehabalün” (EBÜRÉU 13:7).

UREMU 34, 43

1, 2. Lárigiñebei lidin Hesusu sielun, ka funa san álügüdahani hadügübei apostolugu hóuniwagua?

LUÁGUÑANU meha wübü Oliwu disipulugu luma Hesusu le hamaisturun ani hamada. Sódini, aba harihin lamudeirun Hesusu sielun ani aba eferidireina lan lidan aban dúeri (Adügaü 1:9, 10). Luagu bián irumu, arufudahaali meha Hesusu saragu katei houn, ruti meha gurasu houn ani adundeha laña. Kaba meha san hadüga anhein úaali lubéi Hesusu hama?

2 Lubaragiñe meha lidin Hesusu sielun, ariñagati houn lánigu disipulu gefenbaña lan luagu “dandu Herusalén kei sun lóubawagu Hudéa, Samaria, chülǘ lumoun lidise-agei fulasu ubouagu” (Adügaü 1:8). Ida luba meha san hagunfulirun lau wadagimanu ligía? Füramase haali meha Hesusu houn líderagubaña lan lani Bungiu sífiri sandu (Adügaü 1:5). Kaba meha san adundehaña ani kaba adügei aransehani lun lapurichihóun lidan sun ubóu? Subudi hamuti meha apostolugu yúsuhali lan meha Heowá wügüriña lun ladundehaniña ísüraelina lidan binadu dan. Háfuga ligía hálügüdagunbei houngua anhein lanúadiruba lubéi Heowá aban iseri alidihati.

3. a) Lárigiñebei lidin Hesusu sielun, ka katei súdiniti desidírü habéi apostolugu ha úaraguabaña? b) Kaba burí álügüdahani wóunaba lidan arütíkulu le?

 3 Murusun dan lárigiñe lidin Hesusu sielun, aba hakutihanu disipulugu Lererun Bungiu, aba hamuriahan ídemuei luma ani aba hanúadiruni Matíasi leweñeguame Húdasi Isükarióte. Ítara liña hóustarun 12 apostolugu (Adügaü 1:15-26). Ka meha uagu súdini lubéi katei le houn luma lun Heowá? Aba híchugun disipulugu fe mosu lan duusubaña lan apostolugu * (ariha huméi abürüdǘni). Anúadira laaña meha Hesusu apostolugu ani arufudahaali meha houn lun hagunfulirun aban dasi súdiniti hadan lumutuniña Bungiu. Katei meha san dasi ligía? Ida liña meha líderaguniña Heowá luma Hesusu agunfulira lau dasi ligía? Añahein san gürigia agunfulirutiña lau aban dasi libe lira uguñe weyu? Ida liña gayara lan waritagun hawagun ha alidihabaliña lumutuniña Bungiu, luáguntima “musu úaraguati”? (Matéu 24:45; Ebüréu 13:7). Ariha waméi.

HESUSU ADUNDEHABALIN MUSU ÚARAGUATI

4. Ka meha hawadigimaribei apostolugu hama amu wéiyaaña lidan afiñeni Herusalén?

4 Lúmagiñe Pentekosutesi lidan irumu 33, aba hagumeserun apostolugu alidihei damuriguaü kristiánu. Ariñagatu Bíbülia aba lan “lararamun Féduru hama ha híbiri unsu apostolugu” ani aba larufudahan inarüni houn saragu gürigia le gayarabei lesefuruni habagari (Adügaü 2:14, 15). Saragu hádangiñe gürigia hagía aba kristiánugu hamá. Ani lárigiñe, “aba hederegeragun [kristiánugu hagía] houngua lun hafurendeiruni le harufudahabei apostolugu” (Adügaü 2:42). Apostolugu meha óunigirubalin liseinsun damuriguaü (Adügaü 4:34, 35). Arufudahatiña meha giñe houn lumutuniña Bungiu ani furíei hagía hawagu. Ariñagatiña: “Wagía, wederegerubei wadaani lun afurieidúni lun Bungiu luma lun warufudahani lererun” (Adügaü 6:4). Óunahatiña meha giñe apostolugu kristiánugu ha derebuguti hafiñen lun houdin apurichiha lidan fulasu le mapurichihounwagili (Adügaü 8:14, 15). Lau lásügürün dan, aba hayabin amu kristiánugu anuadirúaaña íderaguaña apostolugu óunigirei damuriguaü. Hagía meha lílanabaña sétanu le arihibei lau hawadigimari kristiánugu ha lídanbaña sun damuriguaü lidan dan ligía (Adügaü 15:2).

5, 6. a) Ida liña meha líchugun sífiri ubafu lun sétanu le arihibei lau hawadigimari kristiánugu? (Ariha huméi dibuhu le lídanbei lagumeseha arütíkulu). b) Ida liña meha híderaguni ánheligu sétanu le arihibei lau hawadigimari kristiánugu? c) Ida liña meha tadundehani Lererun Bungiu sétanu le arihibei lau hawadigimari kristiánugu?

5 Lidan furumiñeti sígulu, chouru hamuti meha kristiánugu luagu Heowá lan adundehabalin sétanu le meha arihibei lau hawadigimari lau lídehan Hesusu. Ka meha uagu chouru habalin katei le? Furumiñe, ladüga ruti lan meha sífiri sandu ubafu houn lílana sétanu le arihibei lau hawadigimari kristiánugu lidan dan ligía (Huan 16:13). Inarüni resibi hamá sun kristiánugu anuadirúaaña sífiri sandu, gama lumoun hóuntima apostolugu luma houn wéiyaaña lidan afiñeni ha Herusalénbaña líchiga ubafu. Ítara luba meha gayara lan hadundehani damuriguaü buidu. Kéiburi lidan irumu 49 ruti sífiri sandu ídemuei lun sétanu le arihibei lau hawadigimari kristiánugu lun desidírü hamá luagu lichugún seini tuagu hóustarun wügüriña. Kei le gaganbadi habéi meha lílana damuriguaü lun ladundehan sétanu ligía, aba “hederebugudún [...]  lidan hafiñen, aba haganwoundun afiñetiña sagü weyu (Adügaü 16:4, 5). Arufudatu gárada to leresibiruboun burí damuriguaü luagu anihein lan lani Bungiu sífiri hama lílana sétanu le arihibei lau hawadigimari kristiánugu ani anihein lan igaburi hawagu kéiburi ínsiñeni luma afiñeni (Adügaü 15:11, 25-29; Galasiana 5:22, 23).

6 Le libiaman resun le adügübei lun hachoururuni kristiánugu Heowá lan alidihabalin musu úaraguati, ladüga íderagua hamani ánheligu. Kei hénpulu, ariñagati aban ánheli lun aban wügüri gíriti Korunéliu lun lan láluahani apostolu Féduru. Mama meha huríu Korunéliu ani mibihingili meha giñe seini tuagu lóustarun. Lárigiñe lapurichihan Féduru lun Korunéliu luma houn liduheñu, aba heresibirun sífiri sandu, íbini meha mibihin hamá wügüriña hagía seini tuagu hóustarun. Ítara liña liabin Korunéliu lun ligía lan furumiñeti wügüri kristiánu le mámabei huríu ani le mibihinbei seini tuagu lóustarun. Dan le haganbunbalin apostolugu hama amu íbirigu katei le, ánhatiña lun ladüga ligía lan lugundanbei Bungiu ani resibi hamutiña gürigia lau ugundani lidan damuriguaü lau sun mama hamá huríu ani míchugunti seini tuagu hóustarun (Adügaü 11:13-18). Arufudati katei le ídeha hamá meha giñe ánheligu lidan apurichihani le lalidihabei sétanu le arihibei lau hawadigimari kristiánugu (Adügaü 5:19, 20). Le lǘrüwan resun le adügübei lun hachoururuni kristiánugu luagu Heowá lan alidihabalin sétanu le arihibei lau hawadigimari kristiánugu, ladüga Lererun lan Bungiu adundehabaliña. Súnwandan meha háluahan íbirigu ha adundehani tídangiñe Lererun Bungiu lubá desidírü hamá katei súdiniti luagu somu arufudahani kristiánu luma lun hadundehani burí damuriguaü (Adügaü 1:20-22; 15:15-20).

7. Ka uagu gayara lubéi wariñagun Hesusu lan meha alidihabaliña kristiánugu lidan furumiñeti sígulu?

7 Íbini meha sétanu lan le arihibei lau hawadigimari kristiánugu adundehabalin damuriguaü, gunfuranda hamuti Hesukrístu lan Ichügüdinaübei. Ida liña wasubudiruni? Ariñagati apostolu Pábulu Kristu lan meha íridubei fiú wügüriña “lun apostolugu hamá”. Ariñagati giñe Kristu lan lichügüdinabei o le alidihabalin damuriguaü (Éfesuna 4:11, 15). Busenti meha giñe Bungiu lun hasubudirúniwa lani Hesusu disipulugu keisi kristiánugu, mama luagu liri ni aban hádangiñe apostolugu (Adügaü 11:26). Subudi lumuti meha Pábulu súdini lan lafalarúniwa le harufudahabei apostolugu hama amu kristiánugu ha meha alidihabalin damuriguaü, ladüga tídangiñeti lan meha Lererun Bungiu sun le harufudahabei. Íbini ítara, ariñagati meha Pábulu luagu “Kristu lan lichügüdinabei kada wügüri”. Ani dimurei le layanuhaña meha giñe hawagu lílana sétanu le arihibei lau damuriguaü. Ani lárigiñe ábaya lariñagun Pábulu “Bungiu lan lichügüdinabei Kristu” (1 Korintuna 11:2, 3). Furanguti meha Heowá lan íridubalin Hesukrístu, le Liráü, lun ligía lan alidihei damuriguaü.

MAMA HANI WÜGÜRIÑA WADAGIMANU LE

8, 9. Ka wadagimanu súdiniti ladügübei íbiri Russell?

8 Lúmagiñe irumu 1870, aba lagumeserun Charles Taze Russell hama fiú hádangiñe lumadagu áfaagua lun háhuduragun lun Bungiu kei aubei tarufudahei Bíbülia. Busentiña meha giñe híderagun amu gürigia adügei ligiaméme, íbini gürigia ha ayanuhabaña amu iñeñein. Ligía hadügünbarun óundaruni Zion’s Watch Tower Tract Society lidan irumu 1884. Íbiri meha Russell tábutibei óundaruni tuguya * (ariha huméi abürüdǘni). Seremei meha aliiha lanu Bíbülia  lau duari, manufudeti meha lariñagun houn gürigia mama lan tídangiñeti Bíbülia fiú lídangiñe arufudahani le burí tídanbei ligilisi kéiburi luáguti Trinidad luma luagu móunwedadi tan uani. Gunfurandati meha giñe íbiri Russell marihínwabei lan Kristu danme le lagiribudun ani lagumuchuba lan meha dan le ‘ichugúbei houn ha mámabaña huríu’ lidan irumu 1914 (Lúkasi 21:24). Yusu lumuti meha íbiri Russell lere, lidaani luma liseinsun lun larufudahani inarüni burí le houn gürigia. Chóuruti íderagua lani Heowá luma Hesusu lun ladundehani burí damuriguaü lidan aban dan súdiniti.

9 Mabusenrunti meha íbiri Russell lun hóuseruni gürigia lidan aban igaburi espechaliti. Lidan irumu 1896, abürühati ni lan ligía ni amu íbirigu ha anügübalin ubaraü, mabusenruntiña lan lun heresibirun uéiriguni hámagiñe amu. Mabusenrunti meha giñe libihin somu títulu espechaliti ni lun ñein lan somu sétanu anügüti liri. Dan lárigiñe, aba lariñagun íbiri Russell: “Mama hani wügüriña wadagimanu le”.

10. a) Ídabuga san líridei Hesusu “musu úaraguati”? b) Afuranguagüda huméi ida liña lan lafurangudun luagu mama lan ligiaméme musu úaraguati tuma Sociedad Watch Tower.

10 Lidan irumu 1919 líridei Hesusu “musu úaraguati”, ǘrüwa irumu lárigiñe lounwen íbiri Russell. Ka san un líridei? Lun líchugun “éigini” houn lánigu lidan dan (Matéu 24:45). Lidan irumu burí ligía, resibitiña meha gürigia ha afalarubalin Hesusu ariñahani hámagiñe fiú íbirigu anuadirúaaña ha lídanbaña aban liráüraü sétanu le meha tídanbei sukursáli to ñéingiñe lubéi lalidihóua wadagimanu Brooklyn (Nueva York). Gumeseti dimurei “cuerpo gobernante” ( o Sétanu le arihibei lau hawadigimari gefentiña luagu Heowá lidan sun ubóu) ayusurúa tidan wani agumeiraguagüdüni lidan burí irumu 40. Lidan dan ligía, gunfurandawati meha dan le lan layanuhóun luagu sétanu le layanuhóuña lan hawagu sun ha anügübalin ichügüdinaü tidan Watch Tower Bible and Tract Society. Gama lumoun, lidan irumu 1971 aba lafurangudun mama lan ligiaméme Sétanu le arihibei lau hawadigimari gefentiña luagu Heowá lidan sun ubóu tumoun Sociedad Watch Tower, to eteniruboun lúnrügü katei lánina lúrudu. Lúmagiñe dan ligía, gayarahali meha mama hamá hádangiñe ha alidihabarun Sociedad Watch Tower lílana sétanu ligía. Lidan lagumuhóun burí irumu, íbirigu ha hádangiñetiña amu mudún hagía alidihabarun Sociedad Watch Tower tuma amu burí óundaruni to hayusuruboun lumutuniña Bungiu. Ídehati le lun gayara lan letenirun musu úaraguati lun líchugun adundehani luma ariñahani le tídangiñeti Bíbülia houn lumutuniña Bungiu (Huan 10:16; Adügaü 6:4). Afuranguagüdatu Garüdia Atalaya to lánina 15 lidan sedü-hati irumu 2013 ha lan fiú íbirigu anuadirúaaña ha lídanbaña Sétanu le arihibei lau hawadigimari gefentiña luagu Heowá lidan sun ubóu hagía lan “musu úaraguatibei”.

Sétanu le arihibei lau hawadigimari kristiánugu lidan irumu 50.

11. Ida liña desidírü lan musu úaraguati?

11 Dan le hadamuridagun íbirigu ha lídanbaña Sétanu le arihibei lau hawadigimari gefentiña luagu Heowá ligía desidírü hamá katei súdiniti úara. Ídehati hadamuridagun súnwandan lun ñein lan úarani hadan luma lun hayanuhan buidu hámagua (Ariñawagúni 20:18). Úati ni aban hádangiñe íbirigu ha lídanbaña sétanu ligía súdinitimati hawéi ha híbiri. Ligíati, sagü irumu amu íbiri lídangiñe guánarügü sétanu ligía alidihabalin adamuridaguni le hadügübei aban wéiyaasu luagu dimaasu (1 Féduru 5:1). Ítara liña giñe luadigimaridun sísigubei sétanu le lábugiñebei laríaahan musu úaraguati. Úati ni aban hádangiñe íbirigu ha lídanbaña sétanu le asaminaruti ligía lan ichügüdinaübei houn ha híbiri. Kada aban hádangiñe hádangiñeti  ‘tílana muna’ (ariha huméi rekuáduru “ Ka mini lubéi?”). Ligíati, kada aban hádangiñe resibiti ariñahani lúmagiñe “musu úaraguati” ani falá lumuti ladundehan.

Laransehaña musu úaraguati ariñahani tídangiñeti Lererun Bungiu houn lumutuniña Bungiu lúmagiñe liridúniwa lidan irumu 1919. (Ariha huméi párafu 10 luma 11).

KATEI SAN “MUSU ÚARAGUATI ANI GUNFURANDA LIGÍA”?

12. Kaba burí álügüdahani wóunaba guentó?

12 Mibihinti musu úaraguati arufudúni o uénedü lúmagiñe Bungiu ani gayarati giñe hachararun íbirigu ha. Gayarati hachararun dan le hafuranguagüdün somu arufudahani tídangiñeti Bíbülia o dan le híchugun somu adundehani. Kéiburi tidan Índice de las publicaciones Watch Tower anihein aban fánreinti le gíribei “Aclaración de creencias”. Anuhein aban lísüta ñein lau burí asansiruni le adügǘbei lidan lafuranguagüdüniwa somu arufudahani tídangiñeti Bíbülia lúmagiñe irumu 1870. Mariñagunti Hesusu líchuguba lan musu úaraguati ariñahani le úati mégeiti lidan woun. Katei san “musu úaraguati ani gunfuranda ligía” le uágubei layanuha Hesusu? (Matéu 24:45). Ka arufudubalin luagu ligiaméme lan musu úaraguati  luma Sétanu le arihibei lau hawadigimari gefentiña luagu Heowá lidan sun ubóu? Ariha waméi ida liña lan leresibiruni musu úaraguati ligiaméme ídemuei le leresibirubei sétanu le arihibei lau hawadigimari kristiánugu lidan furumiñeti sígulu.

13. Ida liña líderaguni sífiri sandu musu úaraguati?

13 Íderagua lumuti sífiri sandu musu úaraguati. Íderagua laali lani Bungiu sífiri sandu musu úaraguati lun gunfuranda lani arufudahani tídangiñeti Bíbülia le meha úabei gunfuranda hamani. Kei hénpulu, samina wamá san tuagun lísüta lánina iseri gunfurandaü le uágubei layanuhóua lidan párafu le lubaragiñebei le. Úabei yebe ni aban gürigia gayarati gunfuranda lani ani afuranguagüdalei “lilulin-agei laritagun Bungiu” lau lubafu guánarügü (aliiha huméi 1 Korintuna 2:10). Úarati musu úaraguati luma le lariñagubei apostolu Pábulu: “Adimurehatiwa luagu lareini Bungiu lau burí dimurei le larufudahabei Sífiri woun, mama lau burí dimurei le wafurendeirun lau lichú wau” (1 Korintuna 2:13). Luagu saragu irumu, gumadi lumutiña relihión mama inarüniti gürigia ani míchuti aban adundehani le furanguti houn. Kati uagu ganwounhali lubéi gunfurandawa tan Bíbülia lúmagiñe irumu 1919? Ladüga líderaguñein lan Heowá lau lani sífiri sandu.

14. Según Arufudúni 14:6, 7, ida liña híderaguni ánheligu musu úaraguati hama sun lumutuniña Bungiu uguñe weyu?

14 Íderagua hamuti ánheligu Musu úaraguati. Wéiriti lani musu úaraguati buligasion lun laransehani luáguti apurichihani le hadügübei hóugiñe widü míñunu apurichihatiña lidan sun ubóu. Ka uagu lanarimebei lawanserun wadagimanu le? Aban lídangiñe resun, ladüga hídehaña lan ánheligu lidan (aliiha huméi Arufudúni 14:6, 7). Lidan saragu kesi, adundeha hamaaña ánheligu apurichihatiña lun houdin ayanuha luma aban gürigia le sun liña lamuriahan ídemuei luma Bungiu * (ariha huméi abürüdǘni). Aniheingua apurichihani luma arufudahani awansera lidan fulasu burí le ñein lubéi máhawa lan lun apurichihani. Sun katei le susereti láurügü hídehan ánheligu.

15. Arufuda huméi lau aban hénpulu ida liña lan amu lan musu úaraguati hawéi lábuti relihión mama inarüniti

15 Adundeha tumuti Lererun Bungiu musu úaraguati (aliiha huméi Huan 17:17). Samina wamá luagun le asuseredubei lidan irumu 1973. Tidan garüdia La Atalaya to lánina 15 lidan diisi-hati lidan irumu ligía fuati álügüdahani: “Gayarati san habadiseirun gürigia ha mígirunbalin bisiu lánina layusurún iyuri?”. Aba lariñagun óunabagülei uá, ani óunabagülei le úarati luma le tarufudahabei Bíbülia. Ayanuhatu garüdia tuguya luagu saragu fánreinti tídangiñeti Bíbülia lun tafuranguagüdüni ka lan uagu mosu lubéi labugún aban gürigia lídangiñe damuriguaü dan le mígirun lani agumulahani (1 Korintuna 5:7; 2 Korintuna 7:1). Ariñagatu meha garüdia tuguya mama lan lúmagiñe aban gürigia liabin lúrudu dǘgüdati ligía, lúmagiñeti “Bungiu, le ayanuhabei tídangiñe Lererun to bürüwaruboun”. Hóundarunrügüñoun gefentiña luagu Heowá ígira lun Lererunba lan Bungiu adundehóun. Ani adüga tumuti íbini hénrengu lan houn fiú Gefentiña hafalaruni adundehani ligía. Málügili tariñagun aban líburu to ayanuhaboun luagu relihión Meriga: “Súnwandan hakutihani tábutigu ligilisi ligaburi harufudahan lun hasansiruni lun úara lan luma afiñeni luma burí saminaü le kamanibei ubouagu”. Mídinti musu úaraguati lau le hasaminarubei hibe-agei gürigia. Lubaragiñe lira, ígirati lun tadundehani Lererun Bungiu. Arufudati le luagu Heowá lan adundehabaliña lumutuniña.

 “HARITAGUA HUMÁ HAWAGUN HA ADUNDEHABALÜN”

16. Ida liña waritagun luagun Sétanu le arihibei lau hawadigimari gefentiña luagu Heowá lidan sun ubóu?

16 (Aliiha huméi Ebüréu 13:7). Ariñagatu Bíbülia lunti lan waritagun ‘hawagun ha adundehabaliwa’. Ani adüga wamuti katei le dan le wafurieidun hawagu íbirigu ha lídanbaña Sétanu le arihibei lau hawadigimari gefentiña luagu Heowá lidan sun ubóu (Éfesuna 6:18). Gíbeti buligasion lunti hetenirun lun. Kéiburi lun híchugun ariñahani tídangiñeti Lererun Bungiu woun, halidihani apurichihani lidan sun ubóu ani ténitiña giñe lun budagia le tibihibei óundaruni. Chóuruti megei hamá íbirigu ha lun wafurieidun hawagu súnwandan.

17, 18. a) Ida liña wíderaguni musu úaraguati? b) Ka uagu lunti lubéi wadügüni sun wayaraati lidan apurichihani?

17 Arufuda wamuti giñe haritagua wamá luagun musu úaraguati dan le wafalaruni adundehani le líchugubei woun. Adundeha lumutiwa musu úaraguati tau burí agumeiraguagüdüni, adamuridaguni luma adamurini wéinamuti. Írida lumutiña giñe óunigirutiña sirkuitu, ani ha óunigirubaña sirkuitu aba híriduniña wéiyaaña lidan afiñeni ha burí lídanbaña damuriguaü. Arufuda hamuti óunigirutiña sirkuitu hama wéiyaaña lidan afiñeni haritagua hamá luagu musu úaraguati dan le hafalaruni adundehani le líchugubei houn. Ani sun wagía arufudatiwa inebesei luagu Hesusu, le Wachügüdina, dan le gaganbadi wamá houn íbirigu ha layusurubaña uguñe weyu (Ebüréu 13:17).

18 Haritaguatiwa giñe luagun musu úaraguati dan le wadügüni sun wayaraati lidan apurichihani. Ínchaha lumutiwa Ebüréu 13:7 lun wáyeihani hafiñen íbirigu ha adundehabalin damuriguaü. Arufuda laali musu úaraguati weiri lan lafiñen lau lapurichihan lau ubebeni luma lau hídehan lun lawanserun lapurichihóun uganu buiti. Íderagua wamuti san musu úaraguati lidan wadagimanu súdiniti le? Anhein wadüga, gúndaabadiwa danme le lariñagun Hesusu woun: “Furumiñeguarügü katei le hadügübei lun aban hádangiñe namulenu, ka lan lǘnabunbei, nun giñe hadügei” (Matéu 25:34-40).

19. Ka uagu desidírühadiwa lubéi wafalaruni Hesusu, le Wachügüdina?

19 Dan le lagiribudunbei Hesusu sielun, machaga lumutiña lani disipulugu (Matéu 28:20). Subudi lumuti meha íderagua lani sífiri sandu, ánheligu tuma Lererun Bungiu adundehaña lani disipulugu dan le ya lubéi ubouagu. Ani uguñe weyu, ru lumuti ligiaméme ídemuei lun musu úaraguati. Falá lumuti musu úaraguati “Mudún le ñeinhin lumuti lidin” (Arufudúni 14:4). Ligíati, dan le wafalaruni ladundehan musu úaraguati, kéigubeirügü wafalaruñein lan Hesusu, le Wachügüdina. Ani málühali adundehawa “larun duna le íchugubei ibagari” ani ábame wawinwandun lun súnwandan (Arufudúni 7:14-17). Úati ni aban gürigia gabafuti lun füramase lani katei le woun.

^ par. 3 Kei warihini, busenti meha Heowá lun duusubaña lan apostolugu lun hagíaba lan ‘duusu dübü le lebu lubarieirun’ Iseri Herusalén (Arufudúni 21:14). Ligía mama lubéi meha mosu geweñegua hamá apostolugu úaraguatiña ha óunwegubaña lárigiñe dan ligía.

^ par. 8 Lúmagiñe lidan irumu 1955, aba lasansirun tiri óundaruni tugía lun Watch Tower Bible and Tract Society of Pennsylvania.

^ par. 14 Ariha humóun líburu “Testimonio cabal” del Reino de Dios, páhina 58 luma 59.