Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Bián-hati irumu 2017

Chóuruti lagunfuliruba lan lisuuni Heowá

Chóuruti lagunfuliruba lan lisuuni Heowá

“Ariñaga naali ani ítara luba nadügüni, adüga naali naransehan ani nagunfulirubei” (ISAÍASI 46:11).

UREMU 147, 149

1, 2. a) Ka lasubudirágüdübei Heowá woun? b) Ka füramasei wadarirubei lidan Isaíasi 46:10, 11 luma 55:11?

GUMESETU Bíbülia lau aban ariñahani sensiyuti ani gíbeti lila. Ariñagatu: “Dan le lagumeserunbei sun katei, aba ladügüni Bungiu sielu luma ubóu” (Agumesehani 1:1). Fiúrügüñein lídangiñe katei le ladügübei Bungiu ubouagu wasubudira. Míbeti wasubudin luagu katei kéiburi huánriñu, leiti luma luagu erei le adügübei lun dan le lan bígiragüdün aban katei íñugiñe aba lan lábürühan múarugun, merederunti huánriñurugu (Apurichihati 3:11). Gama lumoun, subudigüda laali Heowá woun ka lan lisuunibei lun Ubóu luma houn gürigia. Adüga lumutiña gürigia lun lenege hamá ani busenti yebe lun hagundaarun lau habagari ubouagu (Agumesehani 1:26). Lisaanigubaña meha gürigia, ani ligíaba meha Háguchi.

2 Lidan Agumesehani kapítulu 3 aliihatiwa anihein lan meha aban turóbuli le adügübei lun magunfulirun lan lisuuni Bungiu (Agumesehani 3:1-7). Gama lumoun, gayarati laransehan Heowá furumiñeguarügü turóbuli. Úati gayarati lararamuni Heowá  luéi le labusenrubei ladügün (Isaíasi 46:10, 11; 55:11). Gayarati wachoururuni lagunfuliruba lan le labusenrubei Bungiu lúmagiñe furumiñe, ani lagunfuliruba lidan dan.

3. a) Ka burí arufudahani súdiniti íderagubadiwa lun gunfuranda wamani uganu le tídanbei Bíbülia? b) Kaba uagu wakutihei arufudahani burí le guentó? c) Kaba burí álügüdahani wóunaba?

3 Chóuruti subudi wamani ka lan lisuunibei Bungiu lun Ubóu luma houn gürigia. Subudi wamuti giñe ida liña lan lídehan Hesusu lun lagunfulirun lisuuni Bungiu. Súdiniti arufudahani tídangiñeti Bíbülia le. Chóuruti ligía lan fiú lídangiñe furumiñeti katei le wafurendeirubei dan le wagumeserunbei aturiahoun Lererun Bungiu. Ma busentiwa wíderagun amu asubudirei? Anihán aban chansi buiti lun wadügüni lugundun wamisurahañanu gürigia lidoun Aritaguagülei lánina lounwen Kristu (Lúkasi 22:19, 20). Ánhaña ñüdün gürigia hagía adamuridagua wama lidan ókaasion espechaliti le, laganwounduba hasubudin luagu lubuidun lisuuni Bungiu. Anihán lidaani wasaminarun luagun fiú álügüdahani le lunbei línchahaniña gürigia lun houdin. Wakutihabei ǘrüwa álügüdahani le lidan arütíkulu le: Ka meha san lisuunibei Bungiu lun Ubóu luma houn gürigia? Ka meha uagu magunfulirun lubéi lisuuni Bungiu? Ani ka uagu mégeiwa lubéi lani Hesusu sákürifisiu lun lagunfulirun lisuuni Bungiu?

KA MEHA LISUUNIBEI BUNGIU

4. Ida liña líchugun katei burí le ladügübei Bungiu uéiriguni lun?

4 Heowá adügübalin sun katei. Ani wéiriti lubuidun sun katei le ladügübei (Agumesehani 1:31; Heremíasi 10:12). Ka wafurendeirubei lídangiñe lubuidun burí katei le ladügübei Heowá luma lubuidun aransehani le lídanbei? Furendeitiwa lunti lan wabuidun sun le ladügübei, lúmagiñe katei le ñǘbüritimabei dagá lumoun le wéinamubei. Ma wéiritu wanigi lau ligaburi tuadigimaridun célula burí to lídanboun wágubu, o dan le warihin aban irahü figigili o dan le warihin aban lubuidun lálüdün Weyu? Sun gürigia gayarati wagundaarun lau katei buíduburiti ladüga ru lumuti Heowá iyaraani ligía woun (aliiha huméi Sálumu 19:1 luma 104:24).

5. Ka ladügübei Heowá lun buidu lan léibugun sun katei?

5 Lau saragu duari, ruti Heowá lébeha sun le ladügübei. Adüga lumuti lúrudu burí le alidihabalin sun le ladügübei, ruti giñe lúrudu lánina laruman ibagari lun buidu lan léibugun sun katei ubouagu (Sálumu 19:7-9) (ariha huméi rekuáduru “ Ka mini lubéi?”). Sun katei le ubouagubei ruti Heowá aban fulasu lun luma aban wadagimanu. Kéiburi lúrudu le adügübei lun sun lan katei eredera lidan lilugaarun ligía ahandilihabalin barana ani adügati lun madisedun tan atmosfera luéi Ubóu. Lun hamuga úati lúrudu ligía, úati hamuga ibagari ubouagu. Sun le ubouagubei buiti luadigimaridun seremei líchugun Heowá lébeha. Arufudati sun katei le adüga lani Bungiu Ubóu hama gürigia lau aban isuuni. Dan le wapurichihan houn gürigia gayarati wíderaguniña asubudirei Bungiu le adügübalin lubuidunraü ubóu le (Arufudúni 4:11).

6, 7. Írida humá fiú lídangiñe idewesei le meha líchugubei Heowá lun Adán tuma Ewa?

6 Busenti meha Heowá lun hawinwandun gürigia lun súnwandan ubouagu (Agumesehani 1:28; Sálumu 37:29). Kei le areida lubéi, ruti saragu idewesei le wéiriti lebegi houn Adán tuma Ewa (aliiha huméi Santiagu 1:17). Kei hénpulu, ruti chansi houn lun desidírü hamá luma ubafu lun hasaminarun, lun hasandirun ínsiñeni luma lun gamadagu hamá (ariha huméi  rekuáduru “ Ka mini lubéi?”). Ayanuhati Heowá luma Adán ani ariñaga lumuti lun ida luba lan ladügüni le buídubei. Arufudahati giñe lun ida luba lan lóunigiragun lungua luma ida luba lan lóunigiruni ubóu hama animaalugu (Agumesehani 2:15-17, 19, 20). Ruti Heowá ubafu lun Adán tuma Ewa lun haguurun, harihin, houchun, lun haganbun luma lun hirimichuni katei burí le ladügübei houn. Ítara luba meha gayara lan hagundaarun lau habagari lidan lubuidun hábiñe. Ruti giñe Heowá saragu wadagimanu súdiniti houn lun hadügüni. Magumubei meha hafurendeirun ni hasubudirun katei iseriti.

7 Ka meha amu katei lídanbei lisuuni Bungiu? Ruti meha Heowá ubafu lun Adán tuma Ewa lun gasaanigu hamá ha mafigountiña. Ani gasaanigubaña meha giñe hasaanigu. Ítara luba meha labuinchun ubóu hau gürigia. Busenti meha Bungiu lun hínsiñedun hasaanigu gürigia houn ítara kei meha hínsiñe Adán tuma Ewa lun. Edeweha lumuti meha Ubóu houn lau sun katei buíduburiti le lídanbei. Ligíaba meha hábiñe lun súnwandan (Sálumu 115:16).

KA MEHA UAGU MAGUNFULIRUN LUBÉI LISUUNI BUNGIU?

8. Ka meha uagu líchigei Heowá lúrudu le lídanbei Agumesehani 2:16, 17 lun Adán tuma Ewa?

8 Masuseredunti meha katei kei labusenruni Heowá lidan dan ligía. Ka asuseredubei? Ariha waméi. Aba líchugun Heowá aban lúrudu ménrengunti lun Adán tuma Ewa lidan dan ligía lun hasubudiruni gébeha lan líbürei le hibihibei. Aba lariñagun houn: “Gayaraati beigin tídangiñe tin sun wewe to yaaboun, gama lumoun meigabóun tin wewe to lánina lasubudirúniwa le buídubei lumoun le wuribabei. Meigabóun tin wewe tuguya, ladüga anhoun beiga ninarün bau bóunweba” (Agumesehani 2:16, 17). Ménrengunti meha gunfurandawa lan lúrudu ligía. Ani ménrengunti meha giñe gaganbadiwa lan lun, lugundun anihein meha saragu amu éigini lidan fuluri agei le semeeti ani le gayarati héigini.

9, 10. a) Ka duru líchugubei Satanási luagun Heowá? b) Ka desidírü habéi Adán tuma Ewa? (Ariha huméi dibuhu le lídanbei lagumeseha arütíkulu).

9 Yúsuti meha Satanási aban hewe lun leyeedunu Ewa ani lun ladügün lun maganbadi tan lun Heowá le Túguchi (aliiha huméi Agumesehani 3:1-5; Arufudúni 12:9). Adügati lun genege lan luagu maricha lan Bungiu ladüga mígirun lan lun heigin lisaanigu tídangiñe “tin furumiñeguarügü tídibu wewe” lidan fuluri-agei. Ítara liña meha kamá lariñaguña: “Kagia uagu siñá lubéi hadügüni sun le habusenrun?”. Lárigiñe aba lariñaguni iyeeni le tun Ewa: “Móunwegunbadün”. Lárigiñe, aba louchun ladügün lun tasaminarun mama lan mosu gaganbadi tan lun Bungiu. Aba lariñagun tun: “Subudi lumuti Bungiu luagu danme lan heigin tídangiñe tin tídibu wewe tuguya, léfegechuba lan hagu”. Lau dimurei le, aba lariñagun Satanási mabusenrun lan Heowá lun leigin Adán tuma Ewa tídangiñe furuda tuguya ladüga aban lanme hibihin aban lichú aau espechaliti. Lagumuhóun, aba lariñagun Satanási tun ábame lan “hasubudiruni le buídubei luma le wuribabei, ábameti ítara humá kei Bungiu”.

10 Mosu meha desidírü hamá Adán tuma Ewa anhein gaganbadibaña lubéi lun Bungiu o anhein hadügüba lubéi gasu tau hewe. Híruti aba lan maganbadi hamá lun Bungiu. Aba hígiruni Heowá ani aba mabusenrunhaña lan lun ligía lan Háguchi. Ítara liña houdin luéigiñe lóubadina Satanási. Lúmagiñe dan ligía, aba herederun hábugua ani aba móunigirun laaña lan Heowá (Agumesehani 3:6-13).

11. Ka meha uagu siñá lubéi lígiruni Heowá lifigoun Adán tuma Ewa ítaraguarügü?

 11 Dan le maganbadi habéi Adán tuma Ewa lun lilurudun Bungiu, aba gafigoun hamá. Aba láganihaña lan Bungiu, ladüga iyereeguti wuribani lun. Ariñagatu Bíbülia wéiriti lan laruman Bungiu ani ‘siñati lan lánharun lun wuribani’ (Abakúku 1:13). Lun hamuga meha aba lan meberesen lan Heowá lau lifigoun Adán tuma Ewa, ru lumuti hamuga habagari sun gürigia lidan peliguru. Dandu ánheligu kei gürigia hálügüdaguña hamuga houngua anhein gayara lubéi hafiñerun luagu le lariñagubei. Gama lumoun, gúnfuli lumuti Heowá sun lani füramasei, inebehabuti lun súnwandan (Sálumu 119:142). Íbini líbüre hamá meha Adán tuma Ewa lun desidírü hamá, mosu meha hasufuriruni sun le lunti liabin houn ladüga hebedaagun lun Heowá. Lau lásügürün dan, aba hóunwegun ani aba hagiribudun lidoun múa le ídangiñebei hadügǘwa (Agumesehani 3:19).

12. Ka meha asuseredubei houn lisaanigu Adán?

12 Dan le héiginbarun Adán tuma Ewa furuda tuguya, siñá meha lígirun Heowá lun hasigirun hadan liduheñu. Ligía meha labugunbaliña lídangiñe fuluri-agei ani mígirunti lun hagiribudun ñeinhin (Agumesehani 3:23, 24). Ígirati Heowá lun hasufuriruni lani le desidírü habéi resultóu (aliiha huméi 2 Lúrudu 32:4, 5). Le resultóubei, aba siñá lan háyeihani ligaburi Heowá buidu buidu. Féridi lumuti Adán lubuidun libagari luma habagari ladügawagun. Figóu luma óunweni, ligía lígirubei houn (Rómana 5:12). Gidá lumuti Adán chansi hawéi lisaanigu lun hawinwandun lun súnwandan. Ni hagía ni hasaanigu siñá meha gasaanigu hamá ha mafigountiña. Lúmagiñebei ladügün Satanási lun hebedaagun Adán tuma Ewa lun Bungiu, aniheingua oucha lun hadügüni sun gürigia ligiaméme (Huan 8:44).

ADÜGATI LANI HESUSU SAKÜRIFISIU LUN GAMADAGUA WAMÁ LUMA BUNGIU

13. Ka katei busenmeme lágilibei Bungiu houn gürigia?

13 Íbini aba lan hígiruni Adán tuma Ewa Heowá, hínsiñegiña meha gürigia lun. Busengili meha lun gamadagua hamá gürigia luma ani mabusenrunti meha lun lounwen ni aban (2 Féduru 3:9). Ligía ladügünbalin sun le mégeiwabei lau lóufudagun lun gayaraya lan gamadagua hamá gürigia luma. Ida liña meha san ladügüni sin ladüraaguni lilurudun guánarügü? Ariha waméi.

Lárigiñebei lígiruni Adán tuma Ewa Heowá, aba ladügüni le mégeiwabei lunya gayara lan gamadagua hamá gürigia luma

14. a) Según Huan 3:16, ka ladügübei Bungiu lun lesefuruniwa luéi figóu luma óunweni? b) Ka álügüdahani gayarabei wakutihani hama gürigia?

14 (Aliiha huméi Huan 3:16). Besafu hádangiñe gürigia ha lúnbaña wamisurahaniña lidoun Aritaguagülei háfuga subudi habéi bérusu le buidu. Gama lumoun, subudi hamuti san gürigia ka lan uagu gayara lubéi líchugun lani Kristu sákürifisiu ibagari magumuchaditi woun? Gayarati wíderaguniña gürigia asubudirei lóunabagüle álügüdahani le. Ídaba gayara lan wadügüni? Danme le wamisurahaniña lidoun  Aritaguagülei, lidan lóurate Aritaguagülei o danme le woudin bisidaña lárigiñe. Anhein gunfuranda hamá le mini lubéi lani Kristu sákürifisiu buidu, gunfuranda habéi buidu weiri lan wínsiñe lun Heowá luma lueirin lichú lau. Ka burí katei gayarabei wariñaguni houn luagu lebegi asalbaruni?

15. Ka uagu wariñaga mítaran lan meha Hesusu kei Adán?

15 Ru lumuti Heowá libagari aban wügüri mafigounti lun lesefuruniwa. Mosu meha úaragua lan wügüri mafigounti ligía lun Heowá ani mosu giñe aranseñu lan lun líchuguni libagari hawagu gürigia (Rómana 5:17-19). Anúadira lumuti Heowá Hesusu lun katei le, le furumiñeti gürigia le ladügübei. Sügügüda lumuti Bungiu libagari Liráü siélugiñe lun ubouagun (Huan 1:14). Aban meha wügüri mafigounti Hesusu, ítara kei meha Adán. Gama lumoun, mítaranti meha Hesusu kei Adán, ladüga gaganbaditi Hesusu lun lilurudun Bungiu kei lagurabuni lúmagiñe aban wügüri mafigounti. Íbini gagibugua lan meha Hesusu luma óuchawaguni le hénrenguti, súnwandan meha gaganbadi lan lun lilurudun Bungiu.

16. Ka uagu aban lubéi idewesei le wéiriti lebegi lani Hesusu sákürifisiu?

16 Lau lederegeruni Hesusu libagari sin figóu, sefu lumutiwa lídangiñe figóu luma óunweni. Ítara kei lóuserun Hesusu ítara liña yebe lunti lan meha lóuserun Adán. Aban meha wügüri mafigounti Hesusu le arufudubei úaraguni luma gaganbadi lun Bungiu (1 Timotéu 2:6). Ruti lani sákürifisiu chansi houn sun wügüriña, würiña hama irahüñü lun hawinwandun lun súnwandan (Matéu 20:28). Kei aubei warihei, mégeiwati meha lani Hesusu sákürifisiu lun lagunfulirun lisuuni Bungiu (2 Korintuna 1:19, 20).

 DARÁ LUMUTI HEOWÁ BENA LUN WAGIRIBUDUN

17. Ka wibihibei seremei lani Hesusu sákürifisiu?

17 Séruti lafayeihan Heowá lun lesefuruniwa (1 Féduru 1:19). Wéiriti webegi lun darí lun lígirun lun lounwen Liráü le hínsiñebei lun wawagu (1 Huan 4:9, 10). Lidan somu igaburi, ragǘ lumuti Hesusu lilugaarun Adán ani aba Wáguchi lan (1 Korintuna 15:45). Lau lani Hesusu sákürifisiu, mámarügüñein chansi lun wawinwandun lun súnwandan líchiga woun. Ruti giñe chansi woun lun hadan wamá liduheñu Bungiu ámuñegü. Seremei lani Kristu sákürifisiu mafigounbadiwa, ani gayarabei leresibiruniwa Heowá hadan liduheñu sin ladüraaguni lilurudun. Buídubei danme le mafigounhaña sun gürigia ha úaraguabaña lun Bungiu. Chülüdügame dan lun iduheñu hamá sun lirahüñü Bungiu ha siélubaña hama ha ubouagubaña ani ñein ligíame úarani hadan. Lirahüñübadiwa Bungiu súngubei (Rómana 8:21).

18. Ídaba san Heowá lan “sun katei hadan súngubei”?

18 Íbini meha maganbadi hamá furumiñetiña wagübürigu lun Heowá, hínsiñememetiña gürigia lun. Ligía líchugunbalin libagari Liráü lun lesefuruniwa. Íbini gafigoun wamá, siñati lafosuruniwa Satanási lun múaragun wamá lun Heowá. Lau lebegi asalbaruni, líderagubadiwa Heowá lun richagua wamá. Mame lubuidun danme le hibihin sun gürigia ha ánharutiña lun Hesusu ani afiñe hagíame luagu ibagari magumuchaditi (Huan 6:40). Lagunfulirubei Wáguchi le hínsiñehabubei, Heowá, lisuuni ani líderagubaña gürigia lun mafigoun hamá. Ábameti “Búngiurügüba lan sun katei hadan súngubei” (1 Korintuna 15:28).

19. a) Kaba wadüga anhein geteingiradi wabéi luagu lani Hesusu sákürifisiu? (Ariha huméi rekuáduru “ Sigí wamá áluahaña ha gadünabalin”). b) Kaba wakutiha lidan le aban arütíkulu?

19 Anhein geteingiradi wabéi luagu lani Hesusu sákürifisiu, wayanuhaba houn amu luagu lubuidun idewesei le. Mégeitiña gürigia hasubudiruni ru lani Heowá ibagari magumuchaditi houn lau ínsiñeni lau lídehan lani Kristu sákürifisiu. Gama lumoun, mámarügüñein ibagari magumuchaditi líchiga lebegi asalbaruni woun. Adügati giñe lun lounabún sun sigenei le lagumeserubei Satanási lidan fuluri-agei Edén. Lidan leweñegua arütíkulu wakutihabei ida liña lan laransehani lebegi asalbaruni sun katei le.