Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Núm. 2 2016

Mégeitiña san kristiánugu sanduariu lun háhuduragun lun Bungiu?

Mégeitiña san kristiánugu sanduariu lun háhuduragun lun Bungiu?

KÉIBURI lúmagiñe bián-milu irumu guentó, aweiyasuhatiña hóugiñe sisi-míñunu gürigia sagü irumu lidoun aban áraabu le ñein tubéi burí hibúari lidan fulasu le gíribei Shima, ageiraü Hapón, lun hachülürün tidoun Óunwenbu Sanduariu to uburuguboun Ise, le ñein lubéi háhuduragua lílana relihión sintoísta tun Amaterasu Omikami, to lubungiute Weyu. Dan le hachülürün, aba harumadaguagüdün houngua lau hachibuni háhabu luma hayuma. Lárigiñe, aba herederun rara ligibugiñe haiden (fulasu le ñein lubéi lahudurawagúa), ñein aba hábuluchagun, apouha haméi háhabu, furíei hagía tun habungiute. * Igirúatiña lílana relihión sintoísta lun gani hamá amu relihión. Añahein giñe hádangiñe ha áhuduragubaña lun Buda, ítara kei kristiánugu hama lílana amu burí relihión ha únbaña mariban lan larihín háyeihani ligaburi háhuduragun sintoísta tidan sanduariu to.

Anuhein sanduariu lidan saragu relihión le wéinamuti ani bisida hamutu saragu míñunu gürigia. * Lidan burí ageiraü le ídanbei kritiánugu hamá hiibe-agei gürigia, anuhein burí ligilisi tuma kapiya to ayusurúboun lun láhudurawagun lun Hesusu, tun María luma houn sandu. Anuhein giñe sanduariu lidan burí fulasu le uágubei lafiñerúa susere lan somu katei le uágubei tabahüdagua Bíbülia o somu “milaguru” le málügili lasuseredun o lidan burí fulasu le ñein lubéi lareidahóua binadu katei sagüráuti. Chülütiña saragu gürigia lidoun burí fulasu le ladüga afiñetiña laganbúatimaba lan hafurieidun anhein hadüga lidan aban fulasu sagüráuti. Añahein éibugatiña saragu lidoun fulasu le ñein tubéi sanduariu burí to lun harufuduni weiri lan hafiñen.

Saragu gürigia bisidoun Óunwenbu Sanduariu to uburuguboun Ise (Hapón) luma lagadábugiñe dübü le ñein tubéi guáriua Lourdes (Faransu)

Laganbúba san wafurieidun ounabúa ligíame anhein wadüga tidan aban sanduariu? Gúndaati funa san Bungiu lau héibugun gürigia saragu lun hachülürün lidoun burí fulasu le? Ani le súdinitimabei, lunti san háhuduragun kristiánugu lun Bungiu tidan sanduariu? Líderagubadiwa wasubudiruni lóunabagüle álügüdahani burí le lun gunfuranda wamani ida luba lan warihini láhudurawagun tidan burí sanduariu luma ida liña lan labusenrun Bungiu lun wáhuduragun lun.

“LAU SÍFIRI LUMA INARÜNI”

Ka mini lubéi le lariñagubei Hesusu libügürü mosu lan wáhuduragun lun Bungiu “lau sífiri luma inarüni”?

Arufuda lumuti le lariñagubei Hesusu tun aban würi samariana ka lan lisaminanbei Bungiu luagu áhuduraguni lidan burí fulasu sagüráuti o tidan sanduariu. Lidan lásügürüña lan Hesusu Samariagiñe aba lararamagun emeraagua lubadu aban fusu yarafa lun uburugu Síkarü. Aba lagumeserun ayanuha tuma aban würi to ñǘdünboun adabura duna. Lidan hayanuhan, aba tíridun würi tuguya aban lídangiñe katei le ídanbei mítaran hamá samariana kei huríu, ariñagatu: “Wagüchagu  ha Samariana, huduguatiña meha lun Bungiu ya luagu wübü lígita; anhein huguya huríu, ariñagatün luagu Herusalén lan fulasu le lunbei ñein lan wáhuduragua lun Bungiu” (Huan 4:5-9, 20).

Tayanuhaña meha würi tuguya luagu wübü Gerisímü le adarirúbei 50 kilometuru (30 maili) luagun nórute libiti Herusalén. Ñein, anuhein meha aban ténpulu hama samariana to meha ídanboun hadüga fedu kéiburi Luéyuri Esefuruni. Gama lumoun, lubaragiñe letenirun Hesusu lun lira, ariñagati tun: “Afiñebá nun luagu anitebei lan dan lun háhuduragun lun Bungiu mídinga huguya luagun wübü lígita, ni hidin Herusalén” (Huan 4:21). Magurabúnwati yebe aban óunabagülei ítarati, lúmagiñetima aban huríu! Ka méhati uagu lachülürüba lubéi dan lun máhudurawagun waali lan lun Bungiu tidan guánarügü litenpulun?

Ariñagati giñe Hesusu tun: “Lachülürüba oura, ani anihán oura ligía, lun láhudurawaguba lan lun Bungiu lau sífiri luma inarüni, ladüga ítara liña labusenrun Úguchili lun láhudurawagun lun” (Huan 4:23). Luagu saragu sígulu, tídanrügüñein meha tuenden ténpulu to Herusalénboun háhuduragua huríu lun Bungiu. Aweiyasuhatiña meha ǘrüwa wéiyaasu lidan irumu lun hadügün sákürifisiu lun Habungiute, Heowá, tidan (Áfuriduni 23:14-17). Gama lumoun, ariñagati Hesusu lasansiraguba lan sun lira ladüga háhuduraguba lan lubúeingu Bungiu ha inarünitiña lun Bungiu “lau sífiri luma inarüni”.

Lídanñoun meha aban fulasu ténpulu. Ánheinti sífiri luma inarüni mama katei le gayaraati larihín ni laguurún. Ligíati, afuranguagüdati Hesusu mámaba lan luéigiñe aban fulasu o muna dipeni lan áhuduraguni inarüniti; wübü lan yebe Gerisímü, ténpulu to Herusalénboun o furumiñeguarügü amu fulasu sagüráuti.

Ariñagati giñe Hesusu tun würi samariana lachülürüba lan “oura” lun lasansirun ligaburi láhudurawagun lun Bungiu. Chülüti oura ligía dan le lederegerúnbalin Hesusu libagari keisi sákürifisiu, ñein lagumucha háhuduragun huríu lun Bungiu según lilurudun Moisesi (Rómana 10:4). Kati uagu lariñaga Hesusu “anihán oura ligía”? Ladüga, kei meha ligía lan Mesíasibei, gumeseeli meha anúadiraña lani disipulugu ha lúnbaña gaganbadi hamá lun dimurei le: “Sífiri Bungiu; ani ha áhuduragubaña lun, lunti hadügüni lau sun hani sífiri luma hanarün” (Huan 4:24). Kati mini lubéi láhudurawagun lun Bungiu lau sífiri luma inarüni?

Dan le lariñagunbei Hesusu mosu lan láhudurawagun lun Bungiu lau sífiri, mama meha layanuhaña luagu aban luwuyeri áhuduraguni le hanarimeguti. Layanuhaña meha luagu ligaburi ladundehaniwa lani Bungiu sífiri sandu le íderagubaliwa lidan ámuñegueinarügü katei, kéiburi lun gunfuranda wamanu Lererun Bungiu (1 Korintuna 2:9-12). Ánheinti inarüni le uágubei layanuha Hesusu, mini lan lasubudirúniwa  le tarufudahabei Lererun Bungiu buidu buidu. Ligíati, mama fulasu le ñein lubéi wáhuduragua lun Bungiu súdinitimabei. Ánhawagubeirügü áhuduragua lun Bungiu según le tarufudahabei Bíbülia luma lábugiñe ladundehan sífiri sandu ligíarügübei lagundaarun lau.

LE HASAMINARUBEI KRISTIÁNUGU TUAGU SANDUARIU

Ida luba harihini kristiánugu leibugúniwa tidoun burí sanduariu luma áhuduraguni le adügǘbei tidan? Kei ariñaga lan Hesusu háhuduraguba lan lubúeingu Bungiu ha inarünitiña lun Bungiu lau sífiri luma inarüni, ligía ariha lubalin Bungiu láhudurawaguniwa lun tidan aban sanduariu o fulasu sagüráuti kei aban katei le mebegiti. Afuranguagüda tumuti giñe Bíbülia woun ka lan lasaminarubei Bungiu luagu láhudurawagun houn guáriua, ariñagatu: “Anuraha humá luéi láhudurawaguniwa houn guáriua” ani “mafalara humaña búngiugu ha iyeenitiña” (1 Korintuna 10:14; 1 Huan 5:21). Ligía mama lubéi mosu háhuduragun kristiánugu inarünitiña lun Bungiu lidan somu fulasu le arihúati kei sánduti o le ñein lubéi láhudurawagua houn guáriua. Kei lun lan láhudurawagun houn guáriua tayusurúa burí sanduariu ligía máhuduragun habéi kristiánugu inarünitiña lun Bungiu tidan.

Úati mini lan le ariñaga tan Bíbülia moun lumuti lan wafurieidun, waturiahanu Bíbülia luma wararamagun asaminara lidan somu fulasu le hínsiñeti woun. Ídehati wadamuridagun lidan aban fulasu darangilati ani gadünamati lun wafurendeirun luma lun wayanuhan luagu katei lúmagiñeti Bungiu. Maribanti giñe wíchugun aritaguagülei luagun hamúaha waduheñu, háfuga ladüga lan hínsiñe hamá woun luma lun waritagun hawagun. Gama lumoun, ánhawa arihei fulasu ligía kei sagüráuti, yúsuwa ligía lun láhudurawagun houn guáriua, o lun katei líbeina lira, úabei úaragua lan luma le larufudahabei Hesusu.

Ligíati, memegeiruntün hidin tidan aban sanduariu lúntima gayara lan laganbuni Bungiu hafurieidun. Mabinirun lubadün giñe Bungiu lau héibugun saragu lun hachülürün lidoun burí fulasu le. Ariñagatu Bíbülia luagu Heowá lan “Laburemebei sielu luma ubóu. Maganóunti tidan ligilisi to hadüga gürigia”. Gama lumoun, masaminara humá díseñu liña lan Bungiu wawéi. Gayaraati wafurieidun lun ani aganba lumutiwa meberesenga halíañadiwa lan, lugundun madiseti “Bungiu luéi kada aban wádangiñe” (Adügaü 17:24-27).

^ par. 2 Madügǘnti ligiaméme luwuyeri áhuduraguni tidan sun sanduariu sintoísta.

^ par. 3 Ariha huméi rekuáduru “ Ka san sanduariuboun?”.