Keimon lidoun ariñahani

Keimon lidoun tila

 TÍTULU LE LUÁGUBEI TIDÁÜ

Ka meha uagu lasufurira Hesusu hilá ligía?

Ka meha uagu lasufurira Hesusu hilá ligía?

“Ítara kei lídangiñe lan meha aban wügüri [Adán] lebelura figóu ubouagun, belú ligía óunweni lídangiñe figóu, ítara liña giñe hóunweguba lubéi sun gürigia lugundun afigouhaaña súngubei” (Rómana 5:12).

Hínsiñeti hamuga san hun hawinwandun lun súnwandan? Hóunabuñein hamuga saragu gürigia álügüdahani le lau aban anha, gama lumoun mafiñentiña gayara lan lasuseredun ani ariñagatiña óunweni lan lagumuchagülebei ibagari.

Ánheinti álügüdüwa gürigia:“Busentün san hounwen guentó?”. Úabei gürigia le buídugili lichügü ariñaguti anha lan. Lugundun, íbini gibe lan waturóbulin, mabusenruntiwa wóunwegun. Ariñagatu Bíbülia ru lumuti lan Bungiu “ayumahani tidoun hanigi gürigia” lun busén hamá hawinwandun lun súnwandan (Apurichihati 3:11).

Le linarün katei, murusunrügüñein lidura wabagari. Kati asuseredubei? Adügaali san Bungiu somu katei lun laransehani le gádanbaliwa? Ruti óunabagülei le tíchugubei Bíbülia dǘgüdaguaü woun ani úarati luma lébuna lasufurirun luma lounwen Hesusu.

KA ASUSEREDUBEI?

Lidan ǘrüwa furumiñeti kapítulu le tídanbei líburu Agumesehani abahüdawagúati adüga lániña Bungiu furumiñetiña gürigia Adán tuma Ewa lun hawinwandun lun súnwandan, ariñagaléi houn ka lan lunbei hadügüni lun habihini. Abahüdaguati giñe aba lan maganbadi hamá lun Bungiu, ábati heferidiruni chansi ligía. Afuranguagüdawati sun katei le lidan aban igaburi le ménrenguti gunfurandawa lan darí lun hasaminarun saragu aban lan úraga. Gama lumoun, ítara kei Uganu Buiti le Habürüdübei Disipulugu luagu Hesusu, anihein giñe sun ariñahani le mégeiwabei tidan líburu Agumesehani lun wachoururuni inarüni lan le tariñagubei. *

Ka lanügübei lumaganbadin Adán? Ru tumuti Bíbülia óunabagülei: “Ítara kei lídangiñe lan meha aban wügüri [Adán] lebelura figóu ubouagun, belú ligía óunweni lídangiñe figóu, ítara liña giñe hóunweguba lubéi sun gürigia lugundun afigouhaaña súngubei” (Rómana 5:12). Afigouhati Adán ladüga maganbadi lan lun Bungiu. Ábati leferidiruni chansi lun lawinwandun lun súnwandan ani lau lásügürün dan, aba laweiyadun hilá ligía. Kei lirahüñü lubéi wagía, gafigountiwa giñe. Ligía wasandirunbei, waweiyadunbei, hilagua wagía. Úarati ariñahani le luma le subudi wáalibei uguñe weyu luagu le galagante wabéi hámagiñe wagübürigu. Guentó, ariha waméi ka lan ladügübei Bungiu lun laransehani le gádanbaliwa.

 KA LADÜGÜBEI BUNGIU?

Adügati Bungiu Heowá aransehani lunya libihíniwa le leferidirubei Adán ruya láamuga chansi houn ladügawagun lun hawinwandun lun súnwandan. Ida liña ladügüni?

Ariñagatu Bíbülia: “Óunweni lafayeihabei figóu” (Rómana 6:23). Mini lan le, ladüga lan figóu wóunwegunbei. Ligíati, hilati Adán ladüga lafigouhan. Ítarameme, kei gafigoun wabéi, hilaguatiwa giñe. Keiti mama lubéi wagía gadurunbei luagu wágurahoun lau figóu, aba lóunahani Bungiu Hesukrístu, le Liráü, lun “lafayeirun” luagu wafigoun ladüga lugudemehabu woun. Ida liña lafayeiruni?

Adügati lounwen Hesusu lun gayara lan wibihin ibagari magumuchaditi luma ugundani.

Adügati maganbadi lan Adán —aban wügüri mafigounti— lun galagante hamani sun gürigia figóu luma óunweni; ligía mégeiwa lubéi meha ábanya wügüri —le giñe mafigounti— le gaganbaditi lun Bungiu darí lounwen lun lesefuruniwa lídangiñe figóu. Afuranguagüda tumuti Bíbülia katei le ítara: “Ladüga lubeiti lumaganbadin ábanrügü wügüri, ñǘbuintiña sun gürigia lun hafigouhaba lan; ítarameme giñe, ladüga laganbadi ábanrügü wügüri, gayaraati hayabin sun gürigia lun richaguabaña lan ligibugiñe Bungiu” (Rómana 5:19). Hesusu “ábanrügü wügüri” ligía, le ígirubalin libagari sielu lun lawinwandun kei aban wügüri mafigounti, * hilá ligía wawagu. Adügati katei le lun larihiniwa Bungiu kei gürigia richaguatiña luma lunya gayara lan wawinwandun lun súnwandan.

KA MEHA UAGU LASUFURIRA HESUSU HILÁ LIGÍA?

Ka meha uagu mégeiwa lubéi lun lounwen Hesusu lun libihíniwa sun le? Siñati meha san líchugun Bungiu aban lúrudu lun gayara lan hawinwandun ladügawagun Adán lun súnwandan? Lau sun meha gabafu lan lun ladügüni, madügün lumuti ladüga ladüraaguñein hamuga lan lúrudu le guánarügü líchugubei libügürü óunweni lan lafayeihabei figóu. Mama wayanuhaña luagu aban lúrudu le gayaraati ligirún magunfulirunga o lasansirún ladügarügü ligía lan busenwabei. Wayanuhaña luagu aban lúrudu le súdiniti lun ladügǘn irichaü (Sálumu 37:28).

Lun hamuga móuserun lan Bungiu lau irichaü lidan dan ligía, siñabei hamuga wachouruni madügünya lubéi lan. Kéiburi anhein lóuseruba lubéi lau irichaü danme lanúadiruni kaba lan hádangiñe ladügawagun Adán awinwanda lun súnwandan ni anhein lagunfulirubei  lubéi sun le füramase lubéi. Kei inebe lubéi lilurudun guánarügü Bungiu lun lun gayara lan wasalbarun, chouru wamaali guentó lóuseruba lan lau irichaü súnwandan.

Adügati lígiruni Bungiu Liráü lun líchuguni libagari keisi sákürifisiu lunya gachansin hamá gürigia lun hawinwandun lun súnwandan lidan aban paraísu ubouagu. Hesukrístu guánarügü ariñagubei: “Ladüga wéiriti hínsiñe gürigia ha ubouagubaña lun Bungiu darí lun lóunahani Liráü le ábanrügüti, lun lounwen luagu hafigoun, lun sun lan ha afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi” (Huan 3:16). Mámarügüñein liricha Bungiu larufuda lounwen Hesusu, arufuda lumuti giñe lueirin wínsiñe lun.

Gama lumoun, mounabúnwagili álügüdahani le: ka meha uagu mosu lubéi lasufurirun Hesusu hilá ligía lidan aban igaburi hanarimeti ítara? Arufuda lumuti laganbadi Hesusu labadinagua saragu asufuriruni iyeeni lan le lariñagubei Mafia libügürü úabei lan gürigia úaraguati lun Bungiu anhein ásügüra lídangiñe lénrengunga (Hobu 2:4, 5). Genegeti meha inarüni lan le lariñagubei Mafia dan le ladügünbei lun maganbadi lan furumiñeti wügüri mafigounti lun Bungiu. Ánheinti Hesusu, le meha giñe mafigounbei, gaganbaditi lun Bungiu íbini lábugiñe saragu lénrengunga (1 Korintuna 15:45). Ítara liña larufuduni lun hamuga lan meha busén lan Adán gaganbadi lan lun Bungiu, gaganbadibei hamuga. Ruti giñe Hesusu aban lubuidun hénpulu woun lun wafalaruni (1 Féduru 2:21). Kei gaganbadi lubéi Hesusu lun Lúguchi ruti lafayeiruaha lau líchugun ibagari móunwedaditi lun sielu.

KA BUITI GAYARAABEI HIBIHINI?

Inarüni hilá lan Hesusu ani adügati lounwen lun gayara lan wawinwandun lun súnwandan. Ligíayati wálügüdünbadün: Hínsiñeti hamuga san hun hawinwandun lun súnwandan? Ariñaga lumuti Hesusu ka lan lunbei wadügüni lun wibihini: “Anihán lébunabei ibagari le magumuchaditi, lun hasubudirunibu buguya le Bungiu ábanrügüti, le inarüniti, luma lun hasubudirunina, au Hesukrístu le bóunahabei” (Huan 17:3).

Wagía, ha adügübarun garüdia to, amisuraha hamutün asubudirei Heowá, Bungiu le inarüniti, luma Hesukrístu, le Liráü. Híderagubadün gefentiña luagu Heowá ha lídanbaña fulasu le ñein lubéi hawinwanda lau sun hagundan. Hadariruba giñe lanwoun ariñahani lidan wani páhina lidan Internet, www.jw.org/cab.

^ par. 8 Akutiha huméi fánreinti le gíribei “Carácter histórico de Génesis” tidan líburu Perspicacia para comprender las Escrituras, bolumen 1, páhina 1017, hadügün gefentiña luagu Heowá. Gayaraati giñe hadarirunu lidan ww.jw.org/es (belú humá lidoun PUBLICACIONES > BIBLIOTECA EN LÍNEA).

^ par. 13 Sügügüda lumuti Bungiu libagari Liráü turageirugun María. Óunigira lumuti lau lani sífiri sandu lun másügürün lan tifigoun lúguchu luagun (Lúkasi 1:31, 35).