Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Núm. 2 2016

Líderagubadün gaganbadi humá lun eweridihani lun hasalbaruni hibagari

Líderagubadün gaganbadi humá lun eweridihani lun hasalbaruni hibagari

WEYU 26 lidan duusu-hati, irumu 2004, aba lánhingichuni aban hárabaganali le 9,1 lere ubouhu le gíribei Simeulue, luagun nórute libiti Sumatra (Indonesia). Ariha hamuti gürigia ha kósurugubaña aba lan ladisedun barana lárurugugiñe. Lau lóufudagun, aba héibaagun sun gürigia luagun burí wübü, agúaraheina lidan hererun: “Smong! Smong!”, mini lan dimurei le, “hárabaganali baranaha”. Másügürüngili ni dimí oura lárigiñe, ligía labouchagun óunwenbu burí lugudi barana kósurugu, günringueinaloun tiibe-agei muna luma burí aüdü.

Ubouhu Simeulue furumiñetibei fulasu le ídanbei ladüga lanarime hárabaganali baranaha ligía damichi. Sédürügüñanu hádangiñe 78,000 gürigia ha aganóubaña lidan ubouhu ligía ounwe. Ka uagu mibe habéi óunwegutiña? * Anihein aban ariñawagúni kamaniti haganagua lílana ubouhu ligía, le ariñagubei: “Anhein ánhingichagua múa ariha buguya ladisedun barana, éibaaguaba luagun burí wübü, lugundun málühali agiribuda lau lere”. Furendeihaña meha lílana Simeulue hámagiñe hagüchagu ida luba lan hasubudiruni anite lan aban hárabaganali baranaha lau harihin asansiruni lidan. Íderagua lumutiña gaganbadi hamá lun burí katei le arufudubalin houn lídanñanu lan peliguru lun hasalbaruni hibagari.

Wéridi táadiwa Bíbülia málühali lan aban óunwenbu günringuaü asusereda lidan sun ubóu, “saragu asufuriruni le úagili libe lúmagiñe lagumeserun ubóu, úabei giñe lárigiñe” (Matéu 24:21). Mama wayanuhaña luagu hagünrinchagubei lan gürigia Ubóu le ídanbei wawinwanda lau luriban hóuseruni ni luagu lagünrinchawaguba lan ladüga somu hárabaganali, herigini o katei líbeina lira; lugundun lisuuni Bungiu lun ladurarun Ubóu lun súnwandan (Apurichihati 1:4). Lubaragiñe lira, lagünrinchagubaña Bungiu sun “ha agünrinchagubalin ubóu”. Ñeinba lagumucha sun wuribani luma asufuriruni (Arufudúni 11:18; Ariñawagúni 2:22). Mame lueirin abinirúni!

Ani móunwegunbaña gürigia maduruntiña lidan günringuaü le yarafaalibei, ítara kei lasuseredun lidan burí hárabaganali baranaha o múarugu luma dan le láfurihan watu lídangiñe bolkán. “Ínsiñeni Bungiu”, tiña Bíbülia, ani füramaseti “galangantehabei [lan] gürigia buítiña múa, haganóuba giñe lidan súnwandan” (1 Huan 4:8; Sálumu 37:29). Ka gayaraabei hadügüni lun mounwen humá danme le lasuseredun óunwenbu asufuriruni le luma lun hibihini lubuidun burí katei le füramasei láalibei Heowá? Gaganbadi humá lun burí eweridihani.

TENI HUMÁ LUN SUN ASANSIRUNI LE ANÜGÜBEI FULASU UBOUAGU

Siñati wariñaguni kábatima lan weyu lagumucha wuribani luma asufuriruni le ubouagubei, lugundun ariñagati Hesusu: “Ánheinti luagu weyu luma oura le lunbei nagiribudun ubouagun, ibidiñeti ni ka un, ni houn ánheligu ha siélubaña, ni nun, au le Liráü Bungiu; Búngiurügüñein Úguchili asubudirei”. Íbini ítara, ariñagati Hesusu woun lun agagudúañu wamá (Matéu 24:36; 25:13). Kaba un wetenira? Ariñaga tumuti Bíbülia kaba burí lan katei wariha ubouagu lubaragiñeraü lagünrinchaguniña Bungiu wuribatiña. Ítara kei meha lídehan asansiruni  le harihibei lílana Simeulue baranaha lun hasubudiruni anite lan aban hárabaganali baranaha, ídehati giñe asansiruni sódiniti le warihibei ubouagu lun wasubudiruni madiseeli lan lagumuchagüle ubóu le. Lidan rekuáduru le lídanbei páhina le arihúati fiu asansiruni súdiniti le uágubei tayanuha Bíbülia.

Inarüni susereñahaali lan lídangiñe katei burí le lidan binadu dan, íbini mama lan súngubei lidan aban ni lidan sun fulasu. Gama lumoun, ariñagati Hesusu danme lan warihini “sun burí katei le” wasubudirubei lan yarafaali lan lagumuchagüle ubóu (Matéu 24:33). Álügüdagua humá hungua anhein susereñahaali lubéi katei burí le lariñagubei Hesusu 1) lidan sun ubóu, 2) súngubei lidan aban 3) aribadeinatima ligía. Chóuruti wawinwanduña lan lidan lidaani lasuseredun sun le.

ABAN KATEI LE ARUFUDUBALIN LÍNSIÑEHABU BUNGIU

Ariñagati aban binadu lurúeite Meriga: “Ídehati katei burí le awisarubaliña gürigia luagu peliguru [...] lun gayara lan hesefuruni habagari”. Lárigiñe hárabaganali baranaha le asuseredubei lidan irumu 2004, sétiwati burí fidu lánina awisahani lidan sun fulasu ligía, ídeha láamuga lun móunwegun hamá saragu gürigia ánheinya asusereda amu katei kei le. Ítarameme, adügaali Bungiu lun ñein lan katei le awisarutiwa anite lan lagumuchagüle ubóu. Füramasetu Bíbülia: “Lapurichihóuba uganu buiti le luáguti larúeihan Bungiu lidan sun ubóu lun lasubudirúniwa lidan sun fulasu; ligíaalimeti lagumuchun ubóu” (Matéu 24:14).

Lídanrügü irumu le ásügürübei, sügütiña gefentiña luagu Heowá lóugiñe 1,900 míñunu oura apurichihei uganu buiti lidan 240 ageiraü luma burí fulasu lidan lóugiñe 700 iñeñein. Furangutimati larufuduni wadagimanu le yarafaali lan lagumuchagüle ubóu le. Kei sandí habéi gefentiña luagu Heowá ínsiñeni hawagu gürigia, adüga hamuti sun hayaraati lun hawisaruniña luagu chülümémeeli lan luéyuri laguseragüdün Bungiu (Matéu 22:39). Arufuda lumuti Heowá hínsiñe humá lun lau lasubudiragüdüni ariñahani le hun. Mabulieida huméi mabusenrun  lan Bungiu lun leferidirun ni aban, busenrügüti “lun hasakürihan sun gürigia” (2 Féduru 3:9). Agia huguya, hadügüba san gasu lau eweridihani le líchugubei Bungiu hun lau ínsiñehabuni?

ÉIBAAGUA HUMÁ LIDOUN ABAN FULASU CHÓURUTI!

Haritagua huméi sefu hamani lílana fulasu burí le kósurugubei libiti Simeulue habagari ladüga hanurahan lidoun burí fulasu íñuti ítara kei harihini labakürün barana; magurabahantiña lagiribudun. Háluahan hesefurun ligía unbei hetenira lau lóufudagun. Ítarameme, mosu giñe hanurahan lidoun aban “fulasu íñuti” lubaragiñe latarüdün, sefu humaamugei hibagari. Lau lídehan Bungiu, abürühati meha profeta Isaíasi aban lubuidun amisurahani le achülürübei woun darí lidoun “lagumuhóun dan” le. Ariñagati: “Higougu, warí wamá luagun luwübüri Wabureme, [...] arufuda láamugei lémeri woun, gayara láamuga wéibugun lidan lémeri” (Isaíasi 2:2, 3).

Dan le wamudeirun luagun aban wübü gíbetimati katei wayara ariha ani chóurutimati wasandiragun woungua. Ítarameme, tíderaguña Bíbülia saragu míñunu gürigia ha lídangiñetiña sun ubóu asubudirei lémeri Bungiu, luma lun habuiduragüdüni ligaburi hanügüni habagari (2 Timotéu 3:16, 17). Íderagua lumutiwa lira lun “wéibugun lidan lémeri” Bungiu, gunda láamuga wau góunigi láwame.

Hánharuba san lun amisurahani le luma lun lóunigirunün Bungiu lidan dan hénrenguti le? Lau fulesei, akutiha huméi rekuáduru le lídanbei arütíkulu le, le arufudubalin profesía burí le tídanbei Bíbülia libügürü “lagumuhóun dan” (2 Timotéu 3:1). Gúndaabaña gefentiña luagu Heowá ha apurichihabaña lidan fulasu le ñein lubéi hawinwanda lun híderagunün gunfurandei le tarufudahabei Bíbülia luma lun hayusuruni lidan hibagari. Másiñati gúndaabadün lan harihini ligaburi tóunabuni Bíbülia álügüdahani burí le hadügübei húniwagua lidan wani páhina lidan Internetwww.jw.org/es. Belú humá lidoun ENSEÑANZAS BÍBLICAS > PREGUNTAS SOBRE LA BIBLIA.

^ par. 3 Adügati hárabaganali baranaha le asuseredubei lidan irumu 2004 lun hóunwegun hóugiñe 220,000 gürigia, ligía ábanbei lídangiñe hárabaganali baranaha le gíbetimabei damichi ladügün lídangiñe súngubei.