Skip tu di aatikl

Skip tu di ada menyoo

Skip tu lis a tapik

Jehoava Witnisiz

Bileez Kriol

Ansaz tu 10 Kweschanz Weh Yong Peepl Aks

 KWESCHAN 2

Wai Ai Kyaahn Stap Wori Bowt How Ah Luk?

Wai Ai Kyaahn Stap Wori Bowt How Ah Luk?

WAI DI ANSA SOH IMPOATANT?

Dehn ga tingz eena laif weh moa impoatant dan weh yu si eena di miro.

WEH YOO WUDA DU?

Imajin dis: Wen Joolya luk eena di miro, aal weh shee si da loan fat. “Ai need fi looz sohn wayt,” ih tel ihself—eevn doa fi shee payrents ahn frenz tel ahn dat shee “reeli maaga.”

Laytli, Joolya eevn tink bowt du sohnting krayzi fi looz “jos faiv pong.” Aal weh ih hafu du da staav ihself fi wahn fyoo dayz . . .

If yoo eva feel laik how Joolya feel, weh yoo wuda du?

STAP AHN TINK!

Di way how yoo si yuself ku bee laik yu di wach yuself eena wahn miro weh twis op

Ih noh rang fi mek yu wori wahn lee bit bowt how yu luk. Akchwali, wen di Baibl taak bowt Sayra, Raychel, Abigayl, Joazef, Dayvid, an adaz, ih menshan dat dehn mi luk gud. Di Baibl seh dat wahn laydi naym Abishag mi “veri veri priti.”—1 Kings 1:4.

Bot yu noa, lata yong peepl obses bowt how dehn luk. Dat ku mek dehn en op eena seeryos prablem. Tink bowt dis:

  • Eena wan ripoat, 58 persent a aala di gyal dehn weh dehn mi servay mi seh dat dehn oavawayt, wen akchwali, onli 17 persent mi reeli oavawayt.

  • Eena wahn neks ripoat, 45 persent a aala di uman dehn weh mi andawayt mi tink seh dehn oavawayt!

  • Bikaa dehn di chrai looz wayt, sohn yong peepl en op wid anorexia—wahn siknis weh di persn akchwali di staav ihself. If ih noh geh help ih ku ded.

 If yoo ga eni simtomz a anorexia er eni ada eetin disaada, pleez geh help. Taak tu wahn payrent er wahn neks adolt weh yu chros. Di Baibl seh: “Wahn chroo chroo fren shoa lov aala di taim, ih da wahn brada weh baan fi wen taimz haad.” —Proverbs 17:17.

DI BES TING YU KU DU FI FEEL BETA BOWT HOW YU LUK!

Reeli, da di wayz weh wahn persn ga weh wahn mek peepl laik dehn er noh laik dehn. Da laik King Dayvid son weh mi nayhn Absalom. Di Baibl seh:

“Dehn neva ga nobadi weh peepl mi prayz fi ih gud luks moa dahn hihn. . . . Notn neva rang wid ih luks.”—2 Samuel 14:25.

Bot yu noa wat? Dis yong man mi ful op a praid, greedi fi powa, an ih da-mi wahn chrayta! Soh, di Baibl noh seh notn gud bowt Absalom wayz; ih shoa ahn fi bee wahn man weh neva laayal ahn weh mi ful op a haychrid.

Soh ih mek sens dat di Baibl tel wi:

“Yu fi put aan di nyoo self.”—Koloashanz 3:9, 10.

“Yu noh fi pen pahn tingz . . . fi mek yu luk byootiful. Insteda dat, yu byooti fi kohn fahn eensaida yu.”—1 Peeta 3:3, 4.

Eevn doa notn rang fi mek yu waahn luk gud, weh moa impoatant dan how yu luk da di wayz weh yu gat. Pahn di langa ron, peepl wahn laik yu gud wayz eevn moa dan yu luks er yu badi! Wahn gyal naym Filisya mi seh: “Wen yu priti yu ku geh atenshan kwik, bot dat da noh weh peepl memba di moas bowt yu. Dehn memba da hoo yoo pahn di eensaid.”

HOW YU SI YUSELF?

Yoo aalwayz feel bad bowt how yu luk?

Yoo eva tink bowt geh plastik serjri er goh pahn wahn krayzi daiyet fi chrai luk beta?

Weh yoo wuda waahn chaynj bowt how yu luk if yu kud? (Pik di wan dehn weh yoo wuda chaynj.)

  • HAIT

  • WAYT

  • HYAA

  • BADI SHAYP

  • FAYS SKIN KALA

  • SOHNTING ELS

If yoo mi ansa yes tu di fos too kweschan ahn yu mi pik chree er moa a di opshanz eena di terd kweschan, tink bowt dis: Ih pasabl dat ada peepl noh si yu az bad az yu si yuself.—1 Samuel 16:7.