Skip tu di aatikl

Skip tu di ada menyoo

Skip tu lis a tapik

Jehoava Witnisiz

Bileez Kriol

Ansaz tu 10 Kweschanz Weh Yong Peepl Aks

 KWESCHAN 3

How Ah Ku Taak tu Mi Ma ahn Mi Pa?

How Ah Ku Taak tu Mi Ma ahn Mi Pa?

WAI DI ANSA SOH IMPOATANT?

Di moa yu get lang wid yu ma ahn yu pa, di beta yu laif wahn bee.

WEH YOO WUDA DU?

Imajin dis: Jef da wahn 17 yaa oal bwai. Da Wenzdeh eevnin, an ih jos don finish ih hows werk. Now, ih feel laik da taim fi rilaks! Ih put aan di TV ahn chroa ihself dong eena ih fayvrit chyaa.

Sayhn taihn, ih pa kom een beks.

“Jefri! Wai yu di ways taim di wach TV wen yu sopoas tu di help yu lee breda wid ih hoamwerk? Yoo neva du weh wi tel yu fi du!”

Jef grombl jos lowd inof fi mek ih pa hyaa: “Hihn di kohn wid dis agen?”

Ih pa ton tu ahn an seh: “Weh yoo jos seh, bwai?”

Jef seh: “Notn, Dad,” ahn den ih mek op ih fays.

Now, ih pa reeli beks. “Bwai, wach how yu di taak tu mi!”

If yoo da-mi Jef, weh yoo wuda du fi noh kwaaril wid yu pa er yu ma?

STAP AHN TINK!

Wen yu taak tu yu payrents, da laik yu di jraiv wahn kaar. If yu meet peesa di road weh blak aaf, yu jos need fi fain wahn neks way fi goh rong.

 FI EGZAMPL:

Wahn gyal naym Leeya seh: “Ah fain dat ih haad fi taak tu mai pa. Sohntaimz Ah di taak ahn taak tu mi pa, ahn den, sodn-wan hihn wahn seh, ‘Da weh yu mi-di seh? Da mee yu di taak tu?’”

LEEYA GA AT LEES CHREE OPSHAN.

  1. Hala aata ih pa.

    Leeya hala aata ahn, “Dis impoatant! Yu noh eevn di lisn!”

  2. Stap taak tu ih pa.

    Leeya jos giv op di chrai taak tu ih pa bowt ih prablem.

  3. Wayt fi wahn moa beta taim ahn den bring op di tapik agen.

    Leeya taak tu ih pa fays tu fays laytaraan, er ih rait ahn wahn leta bowt ih prablem.

Wich wan a dehnya opshan yoo wuda tel Leeya fi du?

TINK BOWT DIS: Leeya pa bizi—ahn soh hihn noh kanshos dat shee foschraytid. Soh if Leeya pik Opshan A, ih pa noh mait andastan wai shee di hala op aata ahn. Dis opshan praabli noh wahn mek Leeya pa lisn tu weh ih di seh, ahn shee noh wahn di shoa rispek fi ahn needa. (Ifeezhanz 6:2) Soh den, dis opshan ya noh wahn help nobadi.

Jos laik how yu noh wahn mek wahn road weh blak aaf stap yu, sayhn way, yu ku fain wahn way fi taak tu yu payrents

Eevn doa Opshan B mait bee di eeziyes wan fi du, da noh di bes wan. Wai? Bikaaz if Leeya waahn fiks fi shee prablem, ih wahn need fi taak tu ih pa—an if hihn fi help ahn, hihn need fi noa weh di goh aan eena fi shee laif. If yu noh taak, nobadi win.

Bot wid Opshan C, Leeya noh wahn mek eniting stap ahn fahn chrai taak tu ih pa. Insteda dat, shee wahn chrai bring op di tapik wahn nada taim. An if shee pik di opshan fi rait wahn leta tu ih pa, shee mait feel beta eevn kwika.

If ih rait wahn leta, dis ku help ahn fi put tugeda egzakli weh ih waahn seh. Wen ih pa reed di leta, hihn wahn fain owt egzakli weh shee mi-di chrai tel ahn, ahn dat wahn help hihn fi andastan fi shee prablem moa beta. Soh Opshan C wahn help owt Leeya an ih pa. Weda da fays tu fays er wid wahn leta, dis fala weh di Baibl tel wi fi du. “Aalwayz chrai ahn du dehn ting weh wahn bring pees.”—Roamanz 14:19.

Weh ada opshan Leeya kuda mi chrai?

Si if yoo ku tink bowt wan. Den tink a weh wuda bee di rizolt.

 NOH SEN DI RANG MESIJ

Memba, weh yoo seh ahn weh yu payrents tink yu seh da noh aalwayz di saym ting.

FI EGZAMPL:

Yu payrents dehn aks yu wai yu luk laik yu eena wahn bad mood. Yoo seh, “Ah noh waahn taak bowt it.”

Bot weh yu payrents hyaa da: “Ah noh chros yu inof fi tel yu. Ah wahn taak tu mai fren dehn bowt it, bot noh yoo.”

Imajin yu di goh chroo wahn seeryos prablem ahn yu payrents aafa fi help. Bot yu seh: “Noh wori. Ah ku handl it miself.”

  • Weh yu payrents mait tek dis fi meen?

  • Weh wuda bee wahn beta ansa fahn yoo?