Skip tu di aatikl

Skip tu di ada menyoo

Skip tu lis a tapik

Jehoava Witnisiz

Bileez Kriol

Ansaz tu 10 Kweschanz Weh Yong Peepl Aks

 KWESCHAN 7

How Ah Ku Deel Wid di Presha fi Ga Seks?

How Ah Ku Deel Wid di Presha fi Ga Seks?

WAI DI ANSA SOH IMPOATANT?

Di disizhan dehn weh yu mek bowt seks now, wahn afek yu laytaraan eena laif.

WEH YOO WUDA DU?

Imajin dis: Heda ahn Maik di goh owt fi too monts now, bot shee feel laik ih noa ahn fareva. Dehn aalwayz di teks wan anada, dehn taak fi owaz pahn di foan, ahn di too a dehn noa weh di neks wan wahn seh bifoa ih eevn seh it! Bot now Maik waahn du moa dahn jos taak.

Joorin di paas kopl a monts, di onli ting Maik ahn Heda du da hoal han ahn kis sohntaim. Heda noh waahn du moa dahn dat. Bot ih noh waahn Maik lef ahn needa. Nobadi els mek shee feel soh priti ahn speshal. ‘Eniwayz,’ shee tel ihself, ‘Mee ahn Maik lov wan anada . . . ’

If yoo oal inof fi dayt ahn yu mi deh eena Heda sichuwayshan, weh yoo wuda du?

STAP AHN TINK!

Seks da wahn gif fahn Gaad onli fi peepl weh marid. If yu ga seks bifoa marij, yu di abyooz da gif. Da laik yu tek wahn priti pees a kloaz weh sombadi gi yu, ahn yooz it fi kleen wid

If yu brok wahn fizikal laa, laik di laa a graviti, yu wahn geh hert. Da di sayhn ting wahn hapm if yu brok wahn moaral laa, laik di wan weh seh: “Kip weh fahn aal sin weh ga fi du wid seks.”—1 Tesaloanyanz 4:3.

Weh wahn hapm if yu noh obay da koman? Di Baibl seh dat wen peepl weh noh marid ga seks, “dehn di sin gens dehn oan badi.” (1 Korintyanz 6:18) Yu tink weh di Baibl seh da chroo?

 Sohn peepl weh stodi dis tapik fain owt dat wen yong peepl ga seks bifoa dehn marid, ih afek dehn aftawodz. Eena weh way?

  • WORIZ. Moas yoots weh ga seks bifoa dehn marid seh dat dehn sari dehn mi du it.

  • DOWTS. Afta dehn ga seks, di too a dehn lef di wanda, ‘Hoo els hee (er shee) don ga seks wid?’

  • DISAPOINTMENT. Deep dong eensaid, lata gyal prifaa sombadi weh wahn tek kyaa a dehn, insteda sombadi weh wahn yooz dehn. Ahn lata bwai fain owt dat afta dehn don ga seks wid wahn gyal, dehn noh feel di sayhn way bowt shee agen.

  • Di lesn da dis: Yu di chroa weh sohnting preshos ahn dongrayd yuself if yu giv een ahn ga seks bifoa marij. (Roamanz 1:24) Yu badi tu preshos fi gi weh jos laik dat!

If yu “kip weh fahn aal sin weh ga fi du wid seks,” yu di shoa dat yu da wahn schrang persn. (1 Tesaloanyanz 4:3) If wan a dehnya day yu doo geh marid, den yu wahn ku ga seks. Ahn yu wahn ku reeli injai it, widowt di woriz, dowts, ahn disapointments weh peepl weh ga seks bifoa marij naamali gat.—Proverbs 7:22, 23; 1 Korintyanz 7:3.

 WEH YOO TINK?

  • If sombadi reeli lov yu fi chroo, yoo tink dehn wuda du eniting fi hert yu er mes op yu fyoocha?

  • If sombadi reeli kay bowt yu, yu tink dehn wuda du eniting fi mes op yu rilayshanship wid Gaad?—Heebrooz 13:4.