Skip tu di aatikl

Skip tu di ada menyoo

Skip tu lis a tapik

Jehoava Witnisiz

Bileez Kriol

Yu Famili Ku Bee Hapi

 SEKSHAN 5

How fi Kip Pees Wid Yu In-Laa Dehn

How fi Kip Pees Wid Yu In-Laa Dehn

‘Unu fi kain ahn hombl. Aalwayz bayr op wid wan anada, an if enibadi du unu eniting, fagiv dehn.’—Koloashanz 3:12, 13

Wen yu geh marid yu ga wahn nyoo famili. Eevn doa yu wahn aalwayz lov ahn rispek yu payrents, yu marij paadna da di moas impoatant persn fi yu now, bisaidz Gaad. Dis noh wahn eezi fi som a yu in-laa dehn fi aksep. Bot if yu aplai di prinsipl dehn fahn di Baibl, ih wahn help yu fi noa weh fi du soh dat yu ku kip di pees wid yu in-laa dehn wail yu werk haad fi ga wahn schrang rilayshanship wid yu hozban er waif.

 1 KIP WAHN GUD ATICHOOD TUWAADZ YU IN-LAA DEHN

WEH DI BAIBL SEH: “Yu fi ga rispek fi yu pa ahn yu ma.” (Ifeezhanz 6:2) Ih noh mata weh ayj yu gat, yu aalwayz need fi rispek yu payrents ahn shoa dat yu aana dehn. Memba dat yu marij paadna need fi gi atenshan tu ih payrents tu. ‘Wen yu lov sohnbadi yu noh wahn jelos dehn,’ soh insteda feel wahn way bowt di rilayshanship weh yu hozban er waif ga wid ih payrents, bee hapi fi dehn. —1 Korintyanz 13:4; Galayshanz 5:26.

WEH YU KU DU:

  • Chrai noh seh tingz laik “yu famili aalwayz mek Ai feel bad” er “yu ma neva hapi wid weh Ai du”

  • Chrai fi si tingz di sayhn way how yu marij paadna si tingz

 2 TAAK TU YU IN-LAA DEHN WID RISPEK

WEH DI BAIBL SEH: “Dat da wai wahn man fi lef ih ma ahn ih pa ahn jain op wid ih waif, ahn di too a dehn wahn bee laik wan persn.” (Machyu 19:5) Wen unu geh marid, unu payrents mait feel dat dehn stil rispansabl fi unu ahn dehn mait waahn kohn rong wahn lat.

Bot unu need fi put wahn limit pahn unu rilayshanship wid unu payrents. Disaid humoch da limit wahn bee ahn tel dehn eena wahn lovin way. Bee aanis wid dehn ahn shoa rispek. (Proverbs 15:1) If yu kain ahn hombl, ih wahn help yu fi ga wahn kloas rilayshanship wid yu in-laa dehn, an ih wahn help yu fi kantinyu ‘shoa lov ahn payshens wid wan anada.’—Ifeezhanz 4:2.

WEH YU KU DU:

  • If ih di bada yu humoch taim yu in-laa dehn kohn rong, taak tu yu marij paadna bowt it wen da wahn gud taim

  • Unu need fi gree wid wan anada pahn how unu wahn setl dehnya mataz