Skip tu di aatikl

Skip tu di ada menyoo

Skip tu lis a tapik

Jehoava Witnisiz

Bileez Kriol

Yu Famili Ku Bee Hapi

 SEKSHAN 2

Bee Faytful tu Wan Anada

Bee Faytful tu Wan Anada

“Noh mek nobadi separayt weh Gaad don jain tugeda.”—Maak 10:9

Jehoava ekspek wi fi “lov laayalti.” (Micah 6:8) Dis impoatant espeshali eena yu marij bikaaz if yu noh laayal er faytful, den chros noh wahn dehdeh, an if yu noh ga chros, den lov noh wahn groa.

Peepl weh marid hafu fait haad fi stay faytful tu wan anada. Fi protek yu marij, yu need fi mek op yu main fi du too tingz.

 1 PUT YU MARIJ FOS

WEH DI BAIBL SEH: “Unu mos ga big rispek fi marij.” (Heebrooz 13:4) Yu marij da wan a di moas impoatant ting eena yu laif. Ih dizerv fi bee fos plays.

Jehoava waahn yu foakos pahn yu marij paadna an “injai laif” tugeda. (Ecclesiastes 9:9) Hihn seh playn-wan dat hihn noh waahn unu ignoar wan anada, bot dat unu fi du tingz weh wahn mek eech ada hapi. (1 Korintyanz 10:24) Shoa yu hozban er waif dat yu reeli apreeshiayt ahn.

WEH YU KU DU:

  • Aalwayz spen taim wid wan anada ahn gi aala yu atenshan tu yu marij paadna

  • Tink bowt “wee” insteda “mee”

 2 PROTEK YU HAAT

WEH DI BAIBL SEH: “If yu eevn luk pahn wahn uman ahn los afta ahn, yu don gilti aredi kaa yu don du it eena yu haat.” (Machyu 5:28) If yu kip aan di tink bowt bad tingz weh ga fi du wid seks, da jos laik yu noh di bee faytful tu yu hozban er waif.

Jehoava seh dat yu need fi “protek yu haat.” (Proverbs 4:23; Jeremiah 17:9) Fi du dis yu reeli hafu kyaaful weh yu di luk pan. (Machyu 6:22, 23) Yu fi fala di egzampl a Joab. Hihn mi mek wahn pramis tu ihself dat hihn wahn neva luk pahn wahn uman weh da noh ih waif ahn los afta ahn. (Job 31:1) Mek op yu main fi neva wach poarnografi. Ahn pramis yuself noh fi ga eni kaina roamantik feelinz fi sohnbadi weh da noh yu marij paadna.

WEH YU KU DU:

  • Mek shoar dat evribadi ku si dat yoo faytful tu yu marij paadna

  • Tink bowt how yu hozban er waif feel, ahn put wahn stap rait away tu eni rilayshanship weh yu marij paadna noh laik