Skip tu di aatikl

Skip tu di ada menyoo

Skip tu lis a tapik

Jehoava Witnisiz

Bileez Kriol

Gud Nyooz Fahn Gaad!

 LESN 2

Hoo Da di Onli Chroo Gaad?

Hoo Da di Onli Chroo Gaad?

1. Wai wi shuda wership Gaad?

Di chroo Gaad da di Kriyayta a evriting. Hihn noh ga wahn biginin ner wahn en. (1 Timoti 1:17) Di gud nyooz weh deh eena di Baibl kohn fahn hihn. (1 Timoti 1:11) Bikaaz Gaad gi wi laif, da onli hihn wi shuda wership.​—Reed Revilayshan 4:11.

2. Da weh kaina persn Gaad?

Nobadi ku si Gaad bikaaz hihn da wahn Spirit. Dis meen dat di kaina laif weh hihn ga, faar haiya dan fi wee wan weh da flesh ahn blod. (Jan 4:24; 6:46) Stilyet, wi kud laan bowt Gaad fahn di tingz weh ih mek. Fi egzampl, wi si ih lov ahn wizdom eena di difrent kaina froots ahn flowaz weh ih mek. Wi laan bowt fi hihn powa fahn di saiz a di yoonivers.​—Reed Roamanz 1:20.

Wi ku laan moa bowt Gaad wen wi reed di Baibl. Fi egzampl, wi laan weh ih laik fahn weh ih noh laik, how hihn chreet peepl, ahn how ih ak eena difrent sichuwayshan.​—Reed Psalm 103:7-10.

3. Yu tink Gaad ga wahn naym?

Jeezas mi seh: “Fi wee Faada weh deh da hevn, mek wi kip yu naym hoali.” (Machyu 6:9) Eevn doa Gaad hav wahn lata taitl, laik “Laad” ahn “Gaad,” hihn hav wahn persnal naym. Eena eech langwij, dehn seh it wahn difrent way. Eena Kriol yu wuda seh “Jehoava.” Som seh “Yaaweh.”​—Reed Psalm 83:18.

Eena lata Baibl, dehn tek owt Gaad naym ahn put een Laad er Gaad. Bot wen dehn mi fos rait di Baibl, ih mi hav een fi hihn naym bowt 7,000 taim. Wen Jeezas mi teech  peepl bowt Gaad, ih mek shoar fi teech dehn bowt Gaad naym tu.​—Reed Heebrooz 2:12.

4. Yu tink Jehoava kay bowt wi?

Laik dis pa weh lov ih pikni, Gaad di tek akshan fi wi oan gud eena di langa rond

Peepl di sofa aal oava di werl. Dis noh meen dat Jehoava da wahn Gaad weh noh kay bowt wi. Sohn peepl seh dat hihn mek wi sofa fi tes wi, bot dat da noh chroo.​—Reed Jaymz 1:13.

Gaad gi aala wi free wil fi shoa seh dat wee impoatant tu hihn. Wi kud chooz fi wi oanself fi serv ahn er nat. Wi reeli glad hihn noh foas wi, noh chroo? (Joshua 24:15) Bot lata peepl chooz fi du loan badnis, dats wai peepl aal oava di werl di sofa. Ih hert Jehoava haat wen ih si injostis di hapm.​—Reed Genesis 6:5, 6.

Jehoava da wahn Gaad weh kay bowt wi. Hihn waahn wi injai wi laif. Soon ih wahn get rid a sofarin ahn dehn wan weh kaaz it. Fi rait now, ih ga gud reezn fi alow sofarin, bot da onli fi wahn lee wail. Eena lesn 8, wi wahn laan wai.​—Reed 2 Peeta 3:7, 13.

5. How wi ku geh kloasa tu Gaad?

Jehoava invait wi fi kohn kloas tu ahn. Wi du dis wen wi pray tu ahn. Hihn inchrestid eena eech wan a wi. (Psalm 65:2; 145:18) Hihn redi fi fergiv. Ih noatis how haad wi chrai fi pleez ahn, eevn if wi mek mistayk sohntaim. Eevn doa wi noh perfek, wi ku stil bee wahn kloas fren wid Gaad.​—Reed Psalm 103:12-14; Jaymz 4:8.

Jehoava da di wan weh giv wi laif, soh wi shuda lov ahn moa dan enibadi els. (Maak 12:30) Wen yu laan moa bowt Gaad ahn du weh ih aks yu fi du, dis shoa dat yu lov ahn. If yu du dis yu wahn geh kloasa tu hihn.​—Reed 1 Timoti 2:4; 1 Jan 5:3.

Laan Moa Bowt Dis

GUD NYOOZ FAHN GAAD!

Yu Tink Gaad Ga Wahn Naym?

Gaad ga lata taitl laik Almaiti, Kriyayta, ahn Laad. Bot Gaad persnal naym deh eena di Baibl oava 7,000 taim.