Skip tu di aatikl

Skip tu lis a tapik

Serv di Hapi Gaad ahn Bee Hapi!

Serv di Hapi Gaad ahn Bee Hapi!

“Di peepl hoo ga Jehoava az dehn Gaad wahn bee hapi!”—PS. 144:15.

SANG: 44, 125

1. Wai Jehoava Witnisiz da hapi peepl? (Koment pahn di picha da di biginin a dis aatikl.)

JEHOAVA WITNISIZ da wahn hapi set a peepl. Enitaim wi deh tugeda, weda ih bee da wi meetin dehn, wi asembli dehn, er jos wahn lee get-tugeda, wi aalwayz di laaf ahn taak wid wan anada. Wai wi aalwayz soh hapi? Di mayn reezn da bikaaz wi noa ahn serv Jehoava, ahn hihn da di “blesid [er, “hapi,” NW] Gaad.” (1 Tim. 1:11; Ps. 16:11) Chroo hapinis kohn fahn Jehoava bikaaz hihn da di hapi Gaad. Hihn waahn mek wee bee hapi tu, an ih gi wi lata reezn fi rijais.—Deut. 12:7; Eccl. 3:12, 13.

2, 3. (a) Wat da hapinis? (b) Wai ih ku bee haad fi bee hapi?

2 How bowt yoo? Yoo hapi? Yu ku bee hapiya? Fi bee hapi meenz fi feel gud, fi bee kantentid, eevn fi bee ful op wid lata jai. Di Baibl tel wi dat di onli way wi ku reeli ahn chrooli bee hapi da fi ga wahn gud rilayshanship wid Jehoava. Bot tudeh, di werl weh wi liv eena mek it haad fi bee hapi. Wai?

3 Lata sichuwayshan eena laif schres wi owt. Wi sofa if sohnbadi weh wi lov ded er geh disfeloship fahn di  kangrigayshan, if wi marij brok op er en op eena divoas, er if wi looz wi jab. Ih haad fi bee hapi wen wi ga famili prablemz, wen peepl da werk er da skool mak wi, er wen wi fays persikyooshan bikaaz wi serv Jehoava. Fizikal ahn mental helt prablemz ku bring wi dong tu. Bot memba dat Jeezas Krais, di hapi King, lov fi help ahn komfert peepl soh dat dehn ku bee hapi. (1 Tim. 6:15, NW; Mach. 11:28-30) Eena di Sermon pahn di Mongt, Jeezas mi lis aaf wahn lata kwalitiz weh wuda help wi fi bee hapi eevn wen wi di fays di chroblz ahn chraiyalz weh Saytan werl bring pahn wi.

WAHN SCHRANG RILAYSHANSHIP WID JEHOAVA BRING HAPINIS

4, 5. Weh wi ku du fi aalwayz bee hapi?

4 Di fos ting weh Jeezas mi menshan veri impoatant: “Di wan dehn weh noa dat dehn need Gaad wahn bee hapi, sins di Kingdom a di hevnz bilangz tu dehn.” (Mach. 5:3, NW) If wee noa wi need Jehoava, wi wahn luk tu hihn fi help ahn dairekshan. How wi ku du dat? Wi haftu stodi di Baibl, obay ih komanment dehn, ahn mek fi hihn wership bee di moas impoatant ting eena wi laif. Wen wi du dat, hihn wahn bles wi ahn wi wahn bee hapi. Den, wi fayt eena Gaad pramis dehn wahn geh schranga, ahn di “hapi hoap” weh wi fain eena di Baibl wahn help wi fi indyoar wen wi fays prablemz.—Tai. 2:13, NW.

5 If wi waahn bee hapi noh mata wat, wi haftu kantinyu fi schrentn wi rilayshanship wid Jehoava. Di apasl Paal mi rait: “Unu mos aalwayz bee hapi bikaa unu da wan wid di Laad [Jehoava]. An Ah wahn tel unu agen: Unu mos bee hapi eena di Laad!” (Fil. 4:4) Wi haftu ga di wizdom weh kohn fahn Gaad fi mek wi ku bee Jehoava fren. Di Baibl seh: “Di man weh fain wizdom ahn di man weh ga andastandin wahn bee hapi. Da wahn chree a laif fi dehn wan weh hoal aan tu it, ahn dehn wan weh hoal aan tait tu it wahn bee hapi.”—Prov. 3:13, 18.

6. Wat els wi haftu du fi stay hapi?

6 Wi haftu kantinyu reed di Baibl an yooz weh wi laan fi mek wi ku stay hapi. Jeezas mi tel wi dat ih impoatant fi du dis wen ih mi seh: “If unu noa dehnya ting an unu du dehn, unu wahn bee hapi.” (Jan 13:17, NW; reed Jaymz 1:25.) Wen wi du dis, wi wahn satisfai wi spirichwal need ahn stay hapi. Bot how wi ku bee hapi eevn wen soh moch tingz deh weh ku tek weh wi hapinis? Mek wi si weh Jeezas mi seh neks eena di Sermon pahn di Mongt.

KWALITIZ WEH MEK WI HAPI

7. How peepl weh di moan ahn baal ku stil bee hapi?

7 “Di wan dehn weh di moan ahn baal wahn bee hapi, kaa dehn wahn geh komfert.” (Mach. 5:4, NW) Jeezas neva mi-di taak bowt evribadi hoo moan ahn baal. Lata wikid peepl sad tudeh bikaaz a weh wi di liv eena “terabl taimz.” (2 Tim. 3:1) Bot fi dehn sadnis noh bring dehn kloasa tu Jehoava bikaaz dehn onli foakos pahn dehnself. Dehn noh ga no kaina rilayshanship wid Jehoava, soh dehn kyaahn bee hapi. Jeezas mi-di taak bowt peepl hoo noa dat dehn need Gaad. Dehn moan ahn baal bikaaz dehn si soh moch peepl di rijek Gaad, er noh di liv di way Gaad  waahn. Dehn sad tu bikaaz dehn noa dat dehn da sina, ahn dehn si aala di wikidnis weh di goh aan eena di werl. Jehoava tek noat a hoo feel dis sadnis eena dehn haat, an ih bles dehn wid spirichwal komfert, hapinis, ahn laif.—Reed Ezekiel 5:11; * 9:4. *

8. How wi wahn bee hapi if wi hombl?

8 “Di wan dehn weh hombl wahn bee hapi, kaa di ert wahn bee fi dehn.” (Mach. 5:5, NW) Lata peepl tudeh tu prowd, ahn sayka dat dehn noh ga no manaz ahn dehn chreet ada peepl bad. Dat kaaz wahn hoal lata prablem. Bot wen dehn laan di chroot, dehn chaynj kaa dehn put aan di “nyoo self.” Dat mek dehn ‘haat goh owt tu wan anada, dehn kain ahn hombl wid wan anada, dehn chreet wan anada gud, ahn ga payshens wid wan anada.ʼ (Kol. 3:9-12) Bikaaz a dat, dehn ku injai pees ahn hapinis, ahn wahn kloas frenship wid wan anada. Pahn tap a dat, di Baibl pramis dat dehn kaina peepl wahn “inherit di ert.”—Ps. 37:8-10, 29.

9. (a) Weh Jeezas mi meen wen ih mi seh dat di ‘ert wahn bee fi dehn wan weh homblʼ? (b) Wai dehn wan weh “hongri fi du weh rait” ku bee hapi?

9 Weh Jeezas mi meen wen ih mi seh dat di ‘ert wahn bee fi dehn wan weh homblʼ? Di anointid wahn inherit di ert wen dehn serv az king ahn prees oava it. (Rev. 20:6) Di milyanz a peepl weh noh gwehn da hevn wahn ku liv wahn perfek laif pahn di ert eena chroo pees ahn hapinis. Dehn wahn bee hapi sayka weh dehn “hongri fi du weh rait.” (Mach. 5:6) Dehn dizaiya fi du weh rait wahn geh satisfai eena di nyoo werl wen Jehoava geh rid a aal wikidnis. (2 Peet. 3:13) Den, raichos peepl wahn neva haftu moan ahn baal agen bikaaz a di bad tingz weh wikid peepl du.—Ps. 37:17.

10. Weh ih meen fi ga mersi?

10 “Di wan dehn weh ga mersi pahn ada peepl wahn bee hapi, kaa dehn wahn geh mersi.” (Mach. 5:7, NW) Fi ga mersi pahn ada peepl meenz fi ga wahn waam, jentl haat tuwaadz dehn, er fi tek piti pahn dehn wen dehn di sofa. Bot mersi da moa dan jos wahn feelin. Di Baibl teech wi dat mersi mek wi du sohnting fi help adaz.

11. Weh wi ku laan bowt mersi fahn di iloschrayshan bowt di gud Samaritan?

11 Reed Look 10:30-37. Jeezas iloschrayshan bowt di gud Samaritan shoa wi klyaa-wan weh ih meen fi ga mersi. Bikaaz di Samaritan man mi ga mersi ahn kompashan, ih mi du evriting weh ih kuda mi du fi help di man weh mi-di sofa. Afta ih mi tel di stoari, Jeezas mi seh: “Yoo goh ahn du di sayhn ting.” Soh, wi ku aks wiself: ‘Ai di du di sayhn ting? Ai di shoa kompashan laik di Samaritan man? Wen Ah si peepl di sofa, Ai feel kompashan fi dehn? Ai ku du moa fi help dehn? Fi egzampl, Ai ku help di oalda bradaz ahn sistaz eena di kangrigayshan, di wido dehn, ahn di pikni dehn hoo noh ga spirichwal payrents? Ai ku mek di apachooniti fi ‘inkorij ahn taak tu dehn wan weh weekʼ?ʼ—1 Tes. 5:14; Jay. 1:27.

Tek di fos step fi shoa mersi, ahn si how dat wahn mek evribadi hapi (Paragraaf 12)

12. Wai wi hapi wen wi shoa mersi tu adaz?

 12 How mersi bring hapinis? Wen wi shoa mersi tu ada peepl wi di gi dehn sohnting fahn wi haat, ahn dat wahn mek wi hapi. Moa dan dat, wi noa wi di pleez Jehoava. (Aks 20:35; reed Heebrooz 13:16.) King Dayvid mi-di taak bowt wahn persn weh shoa mersi wen ih mi seh: “Jehoava wahn protek ahn, an ih wahn kip ahn alaiv. Evribadi pahn ert wahn seh hihn hapi.” (Ps. 41:1, 2) If wee shoa mersi ahn kompashan fi ada peepl, Jehoava wahn shoa mersi ahn kompashan tu wee, ahn wi wahn bee hapi fareva.—Jay. 2:13.

WI HAPI WEN WI GA WAHN “KLEEN HAAT”

13, 14. Wai wi hapi wen wi ga wahn “kleen haat”?

13 Jeezas mi seh: “Di wan dehn weh ga wahn kleen haat wahn bee hapi, kaa dehn wahn si Gaad.” (Mach. 5:8, NW) Fi mek wi haat bee kleen wi haftu kip wi tinkin ahn dizaiya dehn kleen. Dis veri impoatant if wi waahn mek Jehoava aksep wi wership.—Reed 2 Korintyanz 4:2; 1 Tim. 1:5.

14 Di wan dehn weh ga wahn kleen haat ku ga wahn gud rilayshanship wid Jehoava. Di Baibl seh: “Di wan dehn weh wash dehn roab wahn bee hapi.” (Rev. 22:14, NW) Weh ih meenz fi “wash dehn roab”? Wen anointid Kristyanz “wash dehn roab” dehn kleen eena Jehoava sait, ahn hihn wahn gi dehn imoartal laif ahn dehn wahn bee hapi fareva da hevn. Di grayt krowd weh ga di hoap fi liv fareva pahn di ert ku bee kleen fronta Gaad ahn bee fi hihn fren tu. Di Baibl seh “dehn don wash dehn roab eena di Lam blod ahn mek dehn wait.”—Rev. 7:9, 13, 14.

15, 16. How di wan dehn weh ga wahn kleen haat ku “si Gaad”?

15 How dehn wan weh ga wahn kleen haat ku “si Gaad” wen di Baibl seh dat “no man ku si [Gaad] ahn liv”? (Ex. 33:20) Di Greek werd weh chranslayt az “si” ku meen fi imajin, andastan, er noa. Soh fi “si Gaad” meenz dat wi andastan weh kaina Persn hihn ahn lov fi hihn kwalitiz. (Ifee. 1:18) Jeezas mi shoa di sayhn kwalitiz laik Jehoava, soh hihn kuda mi seh: “Enibadi weh don si mee don si mai Faada tu.”—Jan 14:7-9.

16 Wahn nada way wi ku “si Gaad” da wen wi si how hihn help wi eena wi laif. (Job 42:5) Wi ku aalso “si” aala di wandaful tingz weh Jehoava pramis fi du fi aal hoo kip dehn haat kleen ahn stay laayal tu hihn. Af koars, di anointid wan dehn wahn akchwali si Gaad wen dehn rezorek ahn goh da hevn.—1 Jan 3:2.

 WI KU BEE HAPI EEVN IF WI GA PRABLEMZ

17. Wai peepl weh werk haad fi mek pees ku bee hapi?

17 Di neks ting Jeezas mi seh da: “Di wan dehn weh mek pees wid adaz wahn bee hapi.” (Mach. 5:9, NW) Enibadi weh tek di fos step fi mek pees ahn noh wayt pahn nobadi els ga gud reezn fi bee hapi. Di disaipl Jaymz mi rait: “Evribadi weh help mek pees monks ada peepl di plaant di seed a pees, ahn dehn wahn reep wahn lata gud tingz fahn dat.” (Jay. 3:18) Wen wi ga eni kaina prablem weh ku afek wi rilayshanship wid adaz eena di kangrigayshan er wi famili, wi ku aks Gaad fi help wi mek pees wid dehn. Den, Jehoava wahn gi yu ih hoali spirit, weh wahn help yu fi shoa Kristyan kwalitiz. Jeezas teech wi fi tek di fos step fi shoa pees wen ih mi seh: “Soh wen yu deh fronta Gaad da di alta di aafa yu gif tu ahn, ahn yu memba seh yu brada ga sohnting gens yu, lef yu gif deh ahn goh mek op wid yu brada fos. Den kohn bak ahn aafa yu gif tu Gaad.”—Mach. 5:23, 24.

18, 19. Wai Kristyanz ku bee hapi eevn if dehn di sofa persikyooshan?

18 “Unu wahn bee hapi wen peepl insolt ahn persikyoot ahn tel aal kaina lai pahn unu sayka weh unu bilangz tu mee.” (Mach. 5:11, NW) Weh Jeezas mi meen? Ih mi seh: “Memba seh dat da di sayhn way dehn mi chreet di prafit dehn weh mi deh bifoa fi unu taim. Soh unu fi rijais ahn unu fi hapi, kaa Gaad di sayv wahn big riwaad eena hevn fi unu.” (Mach. 5:12) Wen dehn mi beet di apasl dehn ahn koman dehn fi stap preech, ‘dehn mi lef di Jooish Kongsl ahn dehn mi hapi.ʼ Af koars, dehn neva mi injai di beetin. Bot, dehn mi hapi “bikaa dehn sofa shaym fi sayka Jeezas.”—Aks 5:41.

19 Nowadayz, Jehoava peepl stil di indyoar wid jai wen peepl persikyoot dehn. (Reed Jaymz 1:2-4.) Jos laik di apasl dehn, wi noh injai di sofarin er di persikyooshan. Bot if wi stay faytful tu Jehoava, hihn wahn gi wi di korij weh wi need fi indyoar. Fi egzampl, eena Aagas 1944, Henryk Dornik ahn fi hihn breda mi en op eena wahn kansenchrayshan kyamp. Bot dehn wan weh mi-di persikyoot dehn mi haftu admit: “Yu kyaahn kanvins dehn fi du eniting. Dehn kwait hapi fi sofa fi weh dehn bileev.” Brada Dornik mi seh: “Eevn doa Ah neva waahn sofa er eevn ded fi weh Ah bileev, Ah geh lata jai wen Ah shoa korij ahn hoal mi hed hai wail Ah sofa sayka mi laayalti tu Jehoava. . . . Ah pray haad ahn dat help mi fi geh kloasa tu Jehoava, ahn hihn shoa mi dat Ah ku pen pan ahn eena eni sichuwayshan.”

20. Wai wee hapi fi serv di hapi Gaad?

20 Wen Jehoava hapi wid wi, wee ku bee hapi eevn wen peepl persikyoot wi, wen wi famili mek it haad fi serv Jehoava, er wen wi sofa fahn siknis er oal ayj. (1 Tim. 1:11) Wi ku bee hapi bikaaz a di pramis dehn weh Gaad gi wi tu, kaa “Gaad noh tel no lai.” (Tai. 1:2) Wans Jehoava du aal weh ih pramis fi du, wi nat eevn wahn rimemba aala di prablem dehn weh wi gat now. Wi kyaahn eevn imajin how wandaful laif wahn bee eena di Paradais! Yes, eena dehn dayz ‘lata pees wahn deh, soh wi wahn bee hapi hapi.ʼ—Ps. 37:11.

^ par. 7 Ezekiel 5:11: “Di Sovrin Laad Jehoava seh: ‘Soh az lang az Ai alaiv, bikaaz unu mi bring aala unu disgostin aidal an unu disgostin wayz eena mai templ, Ah noh wahn pay unu no main; Ah noh wahn feel sari, an Ah noh wahn shoa no kompashan.ʼ”

^ par. 7 Ezekiel 9:4: “Jehoava mi tel ahn: ‘Goh chroo di siti, chroo Jeroosalem, ahn put wahn maak pahn di farid a aala di man dehn hoo sad ahn hoo di groan kaaz a aala di disgostin ting dehn weh di hapm eena di siti.ʼ”