Skip tu di aatikl

Skip tu lis a tapik

Oalda Kristyanz—Yu Laayalti Preshos tu Jehoava

Oalda Kristyanz—Yu Laayalti Preshos tu Jehoava

AAL rong di werl, eldaz lov di asainment weh dehn ga fi serv monks Gaad peepl. Dehn da wahn reel blesin, noh chroo? Noh tu lang agoa doh, di way dehn serv eena di kangrigayshan mi chaynj. Da chaynj mi kaal fi mek di oalda eldaz han oava som a dehn heviya rispansabiliti tu di yonga eldaz. How soh?

Akaadn tu di nyoo araynjment, di serkit oavaseeya dehn ahn di teechaz eena di feel wudn tek aan dehn hevi asainment wans dehn reech di ayj a 70. Eni elda weh 80 yaaz oal an oava wuda han oava eevn moa rispansabiliti tu di yonga eldaz. Fi egzampl, dehn wudn serv az di koardinayta fi wahn Branch Komiti er fi di badi a eldaz eena di loakal kangrigayshan. How dehn dyaa bradaz rispan tu dis chaynj? Dehn stay laayal tu Jehoava ahn tu fi hihn aaganaizayshan!

Wahn brada weh naym Ken, mi serv az di koardinayta a wahn Branch Komiti fi nayli 49 yaaz. Hihn mi seh: “Ai mi agree wid di disizhan wid aala mi haat. Az a mata a fak, pahn di sayhn day Ai mi fain owt, Ah mi jos pray tu Jehoava an Ah mi tel ahn dat wi need wahn  yonga brada fi serv az koardinayta.” Wahn lata faytful oalda bradaz rong di werl feel di sayhn way laik Ken. Af koars, dehn lov serv dehn bradaz, soh dehn mi feel kaina sad wen dehn mi fos fain owt.

Esperandio, hoo yoostu bee di koardinayta a di badi a eldaz eena ih kangrigayshan, mi seh: “Di chaynj mi mek Ah feel wahn lee bit sad.” Bot den ih mi haftu admit: “Mi helt neva tu gud, an Ah mi need moa taim fi tek kayr a miself.” Wi faytful brada, Esperandio, kantinyu fi serv Jehoava ahn fi bee wahn blesin tu ih kangrigayshan.

How bowt bradaz hoo yoostu serv fi wahn lang taim az serkit oavaseeya? Allan, hoo mi serv az wahn serkit oavaseeya fi 38 yaaz, seh: “Wen Ai mi fain owt, Ai mi shak.” Bot hihn mi stil si di benifits ih wuda bring if di yonga bradaz wuda geh di chraynin fi du di werk, an hihn kantinyu eena ih faytful servis tu Jehoava.

Russell mi serv az wahn serkit oavaseeya ahn wahn teecha eena di feel fi 40 yaaz. Hihn seh dat hihn an ih waif neva mi hapi wid di chaynj wen dehn mi fos hyaa bowt it. Hihn mi seh: “Wee reeli mi apreeshiayt wi privilij wahn lat ahn wi mi feel laik wi mi ga di schrent fi kantinyu.” Russell an ih waif di yooz dehn chraynin an ekspeeryens eena di kangrigayshan weh dehn di serv, ahn di bradaz reeli injai di werk lang wid dehn.

Eevn if yoo yuself noh feel laik dis, di akonk da 2 Samuel ku help yu fi andastan di bradaz weh feel da way.

WAHN MAN WEH HOMBL AHN SENSABL

Tink bak tu wen King Dayvid son Absalom mi ribel. Dayvid mi ron weh fahn Jeroosalem tu Mahanayim, weh mi deh ees a di Jaadn Riva. Rait deh Dayvid ahn di peepl weh mi deh wid ahn neva ga aal weh dehn mi need. Yu memba weh mi hapm?

Chree man weh mi liv rong di ayrya mi bring bed, food, ahn evriting els weh dehn mi need. Wan a dehn man mi naym Barzilai. (2 Sam. 17:27-29) Wans dehn mi stap Absalom ribelyan, Dayvid kuda mi gaahn bak da Jeroosalem. Barzilai mi gaahn wid dehn az faar az di Jaadn Riva. Dayvid mi invait ahn fi goh da Jeroosalem wid ahn. Ih mi aafa ahn food, eevn doa Barzilai da-mi “wahn veri rich man” an ih praabli neva need di food weh Dayvid mi aafa ahn. (2 Sam. 19:31-33) Bot Barzilai mi ga lata ekspeeryens. Soh Dayvid praabli mi waahn mek ih goh da Jeroosalem soh ih kuda mi benifit fan ih wizdom. An ih wuda mi bee wahn nais privilij fi liv ahn werk wid di king!

Bot Barzilai mi hombl an ih mi andastan ih oan sichuwayshan. Ih mi rimain Dayvid dat ih mi 80 yaaz oal. Den ih mi seh: “Ai ku tel  di difrens bitween gud ahn bad?” Weh hihn mi meen? Barzilai mi don liv wahn lang taim soh ih mos mi pik op sohn wizdom lang di way. An ih stil kuda mi aafa gud advais, jos laik how di “oalda man dehn” wuda mi du fi King Rehobowam laytaraan. (1 Ki. 12:6, 7; Ps. 92:12-14; Prov. 16:31) Soh Barzilai mosi mi-di taak bowt how ih kudn du az moch az ih yoostu bikaaz a ih ayj. Ih mi tel ahn tu, dat sayka ih ayj, ih don mi-di goh def an ih mowt neva ga no tays. (Eccl. 12:4, 5) Soh insted Barzilai mi inkorij Dayvid fi kehr wahn yonga man naym Kimham, hoo da-mi praabli Barzilai son.—2 Sam. 19:35-40.

PLAN FI DI FYOOCHA

Barzilai neva mi tek aan di privilij weh Dayvid mi aafa bikaaz hihn mi andastan ih limits. Di aaganaizayshan mi mek dis chaynj weh wi mi menshan eena di biginin a dis aatikl fi wahn simila reezn. Nowadayz, wi kyaahn jos luk pahn weh wan brada ku du, laik eena Barzilai kays. Wi haftu shoa wizdom eena di way wi kansida aala di faytful eldaz weh di serv rong di werl.

Dehnya hombl oalda bradaz andastan dat Jehoava aaganaizayshan wahn ku kantinyu groa moa eena di fyoocha if di yonga bradaz tek aan som a dehn rispansabiliti. Moas a di taim da dehn oalda bradaz wahn chrayn di yonga bradaz fi handl dehn asainment, jos laik how Barzilai mosi mi chrayn ih son ahn di apasl Paal mi chrayn Timoti. (1 Kor. 4:17; Fil. 2:20-22) Dehn yonga bradaz da wahn “gif” tu di kangrigayshan, an dehn help mek ‘di badi a Krais geh schrang.ʼ—Ifee. 4:8-12; kompyaa Numbers 11:16, 17, 29.

DIFRENT WAYZ FI TEK PAAT

Lata bradaz weh di serv aal oava di werl mi en op di giv som a dehn rispansabiliti tu adaz. Bot now dehn ga ada wayz weh dehn ku kantinyu fi du moa eena Jehoava servis.

Marco mi serv az wahn serkit oavaseeya fi 19 yaaz. Hihn seh: “Eena di kangrigayshan wi ga sohn sistaz hoo hozban dehn noh di serv Jehoava. Now Ah ga moa taim fi reech owt ahn help dehn hozban.”

Geraldo, hoo da-mi wahn serkit oavaseeya fi 28 yaaz, mi seh: “Now wi goal da fi help di inaktiv wan dehn ahn fi kandok moa Baibl stodiz.” Soh faar, hihn an ih waif di kandok 15 Baibl stodiz ahn wahn lata di inaktiv wanz di kohn bak da di meetin dehn.

Allan, weh wi mi menshan erliya, seh: “Now wi ga di apachooniti fi du eevn moa eena di preechin werk. Wi di preech eena poblik witnisin, bizniz teritori, ahn tu wi nayba dehn, ahn wi di injai it wahn lat. Too a wi nayba dehn don kohn da Kingdom Haal.”

If yoo da wahn faytful brada hoo stil aybl fi serv, ahn yu geh wahn nyoo asainment eena di kangrigayshan, yu ga wahn nada way yu ku help owt. Yu ku shayr yu gud ekspeeryens wid di yonga bradaz ahn dat sopoat Jehoava werk tu. Russell, hoo wi mi koat erliya, seh: “Jehoava di chrayn ahn yooz di byootiful, talentid yonga bradaz, ahn di bradaz ahn sistaz rong di werl di benifit fahn di way dehn teech ahn shepad di kangrigayshan.”—Si di baks “ Help di Yonga Man Dehn fi Du Dehn Bes.”

YU LAAYALTI PRESHOS TU JEHOAVA

If fi yoo asainment laytli chaynj, kip wahn pazitiv atichood. Yu mi werk haad eena yu laas asainment, ahn yu mi toch wahn lata peepl haat. Yu ku stil reech owt ahn help peepl. Di peepl weh yu help lov yu, ahn dehn wahn aalwayz lov yu.

Moa impoatant, yu ga wahn plays eena Jehoava haat. Hihn wahn neva ‘faget how haad yu mi werk fi hihn, ahn how yu shoa yu lov tu hihn wen yu mi help owt ih peepl dehn, ahn how yu di kip aan di help dehn.ʼ (Heeb. 6:10) Da skripcha da wahn garantee dat Jehoava  noh jos rimemba weh yu yoostu du. Yu soh preshos tu Jehoava dat hihn wahn neva faget weh yu mi du far ahn eena di paas an weh yu kip aan di du fi pleez hihn!

Sopoaz yoo neva geh wahn chaynj a asainment. Dis ku stil afek yoo. How?

If yoo di werk wid wan a dehn faytful oalda bradaz hoo mi geh wahn chaynj a asainment, yu ku benifit fahn fi hihn ayj an yaaz a ekspeeryens. Soh aks ahn fi advais er fi eni sojeshan weh ku help yu. Wach how ih set di egzampl fi yu, ahn kantinyu fi put ih ekspeeryens tu gud yoos ahn stay laayal tu Jehoava eena ih nyoo asainment.

Soh weda yu da wahn oalda brada di serv eena wahn nyoo asainment, er yu da wahn yonga brada er sista weh ku benifit fahn di oalda bradaz, noh faget dat yu laayalti preshos tu Jehoava. Hihn wahn neva faget yu faytful servis!