Skip tu di aatikl

Skip tu lis a tapik

“Unu Noa Dehnya Ting, Soh Du Dehn, ahn Gaad Wahn Bles Unu”

“Unu Noa Dehnya Ting, Soh Du Dehn, ahn Gaad Wahn Bles Unu”

“Da jos laik food tu mee wen Ai di du weh Gaad waahn Ai du. Da hihn da di Wan weh sen mee, an Ai hafu finish weh hihn sen mi fi du.”—JAN 4:34.

SANG: 80, 35

1. How di selfish atichood a di werl ku mek it haad fi bee hombl?

WAI ih soh haad fi aplai weh wi laan fahn Gaad Werd? Wan reezn da bikaaz wi haftu bee hombl fi du weh rait. Eena dehnya “laas dayz,” ih noh eezi fi bee hombl bikaaz moas a di peepl rong wi ‘jos lov dehnself, lov moni, boas ahn tink dehn beta dan ada peepl,ʼ ahn ‘dehn kyaahn kanchroal dehnself.ʼ (2 Tim. 3:1-3) Az servants a Gaad, wee noa dehnya kaina bihayvya rang, bot sohntaim ih mait luk laik di peepl weh goh aan laik dat di praspa ahn dehn di injai dehn laif. (Ps. 37:1; 73:3) Wi mait wanda: ‘Ih reeli mek sens fi tink bowt ada peepl heda miself? If Ai hombl miself, ada peepl wahn stil rispek mi?ʼ (Look 9:48) If wee mek di selfish atichood a di werl chaynj wi, den wi ku looz owt pahn wi gud rilayshanship wid wi bradaz an ih wahn bee haad fi peepl rekonaiz wi az Kristyanz. Bot wen wi stodi di gud egzampl a hombl servants a Gaad ahn fala dehn, wi wahn geh gud rizolts.

2. Weh wi ku laan wen wi meditayt pahn di egzampl a faytful servants a Gaad eena di paas?

2 Wen wi reed bowt faytful servants a Gaad eena di paas, wi shuda aks wiself: ‘Weh mi help dehn fi bee fi hihn fren?  How dehn mi pleez ahn? Wehpaat dehn mi fain di schrent fi du weh rait?ʼ Wen wi reed bowt fi dehn egzampl eena di Baibl ahn meditayt pahn weh wi reed, wi fayt wahn geh schranga.

SPIRICHWAL FOOD DA MOA DAN JOS INFAMAYSHAN

3, 4. (a) How wi geh wi spirichwal food? (b) Wai wi ku seh dat spirichwal food da moa dan jos di nalij weh wi tek een?

3 Wi geh lata gud kongsl ahn chraynin chroo di Baibl, wi Kristyan poblikayshanz, wi websait dehn, JW Braadkyaastin, ahn wi meetin an asembli dehn. Bot akaadn tu weh Jeezas mi seh da Jan 4:34, spirichwal food da moa dan jos di nalij weh wi tek een. Wat els ih inklood? Jeezas mi seh: “Da jos laik food tu mee wen Ai di du weh Gaad waahn Ai du. Da hihn da di Wan weh sen mee, an Ai hafu finish weh hihn sen mi fi du.

4 Da mi laik food tu Jeezas fi du di wil a Gaad. Jos laik how gud food mek wi helti ahn schrang wen wi eet it, wen wi du di wil a Gaad wi fayt wahn geh schranga. Fi egzampl, yu eva gaahn da wahn meetin fi feel servis eevn doa yu mi taiyad er noh di feel gud? Bot wen yu mi finish servis yu mi feel moch beta, noh chroo?

5. How wi benifit wen wi ak waiz?

5 Wi waiz if wi hombl ahn du weh Jehoava aks wi fi du. (Ps. 107:43) Lata gud tingz wahn hapm wen wi ga wizdom. “Ih moa beta dan eniting els yu ku waahn. . . . Da wahn chree a laif fi dehn wan weh hoal aan tu it, ahn dehn wan weh hoal aan tait tu it wahn bee hapi.” (Prov. 3:13-18) Jeezas mi seh: “Unu noa dehnya ting, soh du dehn, ahn Gaad wahn bles unu.” (Jan 13:17) Di disaipl dehn wuda mi bee hapi onli if dehn mi kantinyu fi du weh Jeezas mi tel dehn fi du. Dehn mi haftu fala fi hihn egzampl ahn liv dehn laif bai weh hihn mi teech dehn.

6. Wai wi haftu kantinyu fi aplai weh wi laan?

6 Nowadayz, wi stil haftu kip aan di aplai weh wi laan fahn Jehoava eena wi evriday laif. Fi egzampl, tink bowt wahn mekyanik weh ga aala di toolz, nalij, ahn spyaa paats weh ih need fi du ih werk. Dehnya noh wahn du ahn no gud if ih noh yooz dehn. Hihn mait ga lata ekspeeryens, bot ih haftu kantinyu di yooz weh ih noa if ih waahn kip op ih skilz ahn kantinyu fi du gud werk. Jos laik dat, wen wi mi fos laan di chroot wi mi hapi bikaaz wi mi-di aplai weh wi mi reed eena di Baibl. Bot wi haftu bee hombl ahn kantinyu fi aplai weh wi laan fahn Jehoava evriday, ahn den wi wahn bee hapi.

7. Weh wi ku laan fahn di egzampl dehn eena di Baibl?

7 Mek wi luk pahn sohn difrent sichuwayshan weh ku mek it haad fi stay hombl. Wi wahn laan how faytful servants a Gaad eena di paas mi stay hombl eena simila sichuwayshanz. Bot wi haftu du moa dan jos reed di infamayshan. Wi haftu meditayt pan it an aplai it eena wi laif rait away.

“WEE DA MAN JOS LAIK UNU!”

8, 9. How Aks 14:8-15 shoa dat di apasl Paal mi hombl? (Koment pahn di picha da di biginin a dis aatikl.)

8 Gaad waahn ‘sayv aal peepl ahn ih waahn dehn noa di chroot.ʼ (1 Tim. 2:4) How yoo luk pahn aala di difrent kaina peepl weh noh laan di chroot yet? Eevn doa di apasl Paal yoostu goh luk fi di Jooz ahn peepl weh mi don noa bowt Jehoava aredi, ih yoostu goh preech tu  dehn wan weh mi wership ada gaadz tu. Bot sohntaim di way dehn mi rispan wuda mek it haad fi stay hombl.

9 Fi egzampl, pahn Paal fos mishineri chrip, di peepl da Laikonya mi tink dat hihn ahn Baanabas da-mi di faals gaadz Zoos ahn Hermiz. Yu tink Paal ahn Baanabas mi temtid fi aksep aala da prayz? Yu tink dehn mi seeʼt laik wahn nais lee brayk fahn aala di persikyooshan dehn mi gaahn chroo eena di laas too siti dehn mi vizit? Er maybi dehn mi tink dat dis wuda mi mek it eeziya fi preech di gud nyooz tu dehn peepl? Non ataal! Rait away dehn mi tayr dehn kloaz fi shoa seh dat dehn neva laik weh mi-di goh aan ahn dehn ron eena di midl a di krowd ahn hala seh: “Man, da wai unu di du dis? Wee da man jos laik unu!”—Aks 14:8-15.

10. Wai Paal ahn Baanabas neva feel laik dehn mi beta dan di peepl da Laikonya?

10 Paal ahn Baanabas neva mi meen dat dehn mi wership di sayhn way laik di peepl da Laikonya. Dehn mi meen dat dehn neva perfek. Da Gaad mi sen owt Paal ahn Baanabas fi bee mishineri. (Aks 13:2) Dehn mi geh anointid wid hoali spirit ahn dehn mi ga wahn wandaful hoap fi di fyoocha. Wid aala dat, dehn kuda mi feel laik dehn beta dan di peepl da Laikonya. Bot dehn mi noa dat di peepl da Laikonya kuda mi geh dehn sayhn blesin tu if dehn mi lisn an aksep di gud nyooz.

11. How wi ku bee hombl laik Paal wen wi di preech?

11 Fos, wi neva wuda waahn feel laik wi dizerv eni kaina prayz fi di tingz weh Jehoava help wi fi du. Sekant, wi haftu aks wiself: ‘How Ai luk pahn di peepl weh Ah preech tu? Ai shoa eni kaina prejudis tuwaadz dehn?ʼ Jehoava Witnisiz aal oava di werl chrai fi fain enibadi hoo wilin fi lisn tu di gud nyooz. Som a dehn eevn chrai fi laan di langwij er kolcha a peepl weh adaz luk dong pan. Bot di Witnisiz noh feel laik dehn beta dan di peepl weh dehn preech tu. Insteda dat, dehn chrai fi andastan eech persn soh dehn ku reech dehn haat wid di gud nyooz a di Kingdom.

PRAY FI ADAZ BAI NAYM

12. How Ipafras mi shoa dat ih mi reeli ahn chrooli kay bowt adaz?

12 Wahn nada way wi ku shoa dat wi hombl ahn dat wi di du Gaad wil da fi pray fi adaz weh “shayr di sayhn preshos fayt weh wi gat.” (2 Peet. 1:1) Ipafras mi du dat. Di Baibl onli menshan hihn chree taim eena di leta dehn weh Paal mi rait. Wen Paal mi deh anda hows ares da Roam, ih mi rait tu di Kristyan dehn da Koloaseh ahn tel dehn dat Ipafras mi-di ‘pray fi dehn aal di taim wid aala ih haat.ʼ (Kol. 4:12) Ipafras mi noa di bradaz gud, an ih reeli mi kay bowt dehn. Jos bikaaz hihn mi “deh eena prizn” wid Paal noh meenz dat ih mi faget bowt weh ada peepl mi need. (Fai. 23) An ih mi du sohnting bowt it. Ipafras mi pray fi ih bradaz ahn sistaz, eevn bai naym. Wee ku du dat tu. Dehn kaina pryaaz powaful.—2 Kor. 1:11; Jay. 5:16.

13. How yoo ku fala Ipafras egzampl wen yu pray?

13 Tink bowt hoo yu ku pray fa bai naym. Yu mait tink bowt bradaz ahn sistaz eena yu kangrigayshan weh di fays temtayshan er weh haftu mek sohn seeryos disizhan. Er yu mait pray fi dehn wan weh di schrogl wid famili prablemz. Lata bradaz luk op di naym dehn eena di aatikl “Jehovahʼs  Witnesses Imprisoned for Their Faith” pahn jw.org ahn pray fi dehn. (Luk anda NEWSROOM > LEGAL DEVELOPMENTS.) Ahn wi neva waahn faget dehn bradaz ahn sistaz weh looz peepl weh dehn lov eena det, weh servaiv nachral dizaasta er waar, er weh di goh chroo haad taimz. Lata wi bradaz ahn sistaz need wi pryaaz. Wen wi pray fi dehn, wi shoa dat wi di luk owt fi wan anada, noh onli wiself. (Fil. 2:4) Jehoava lisn tu dehn kaina pryaaz!

“EECH WAN A UNU SHUDA HORI FI LISN”

14. How Jehoava shoa dat hihn wilin fi lisn?

14 Wahn neks way wi ku shoa dat wi hombl da fi bee wilin fi lisn tu ada peepl. Jaymz 1:19 seh wi shuda “hori fi lisn.” Jehoava da di bes egzampl a dis. (Gen. 18:32; Josh. 10:14) Fi egzampl, reed di kanvasayshan da Exodus 32:11-14. (Reed.) * Jehoava neva mi need eni advais fahn Moaziz, bot hihn mi stil giv ahn di chaans fi taak bowt how ih mi feel. Yu tink yoo wuda mi tek di taim fi lisn tu sohnbadi hoo mi mek mistayk eena di paas? Yu tink yoo wuda mi aksep ih advais? Wel, Jehoava payshent, ahn hihn mek taim fi lisn tu enibadi weh pray tu ahn wid fayt.

15. How wi ku fala Jehoava egzampl ahn chreet peepl wid aana ahn rispek?

15 Aks yuself: ‘If Jehoava ku stup dong ahn deel wid peepl ahn lisn tu dehn laik how ih mi du wid Aybraham, Raychel, Moaziz, Jashwa, Manoawa, Ilaija, ahn Hezikaiya, Ai kyaahn werk haada fi shoa aana ahn rispek tu mai bradaz tu? Ai ku werk haada fi mek taim fi dehn, hyaa weh dehn ga fi seh, ahn eevn fala dehn gud advais? Ah wanda if enibadi eena di kangrigayshan er mi famili need mi atenshan rait now? Weh Ai wahn du bowt it? Ah wahn help dehn?ʼ—Gen. 30:6; Judg. 13:9; 1 Ki. 17:22; 2 Chron. 30:20.

“MAYBI JEHOAVA WAHN LUK PAHN HOW AH DI PONISH”

Dayvid mi seh: “Lef ahn loan!” Weh yoo wuda mi du? (Paragraaf 16, 17)

16. How King Dayvid mi rispan wen Shimiyai mi provoak ahn?

16 If wi hombl, ih wahn bee eeziya fi shoa self-kanchroal wen peepl provoak wi. (Ifee. 4:2) Wi ku fain wahn gud egzampl a dis eena 2 Samuel 16:5-7, * 13. * (Reed.) Shimiyai, hoo da-mi faamli tu King Saal, mi insolt op an atak Dayvid an ih servant dehn. Dayvid kuda mi stap Shimiyai, bot ih mi payshent an ih neva du ahn notn. How Dayvid mi manij fi kanchroal ihself eena dis sichuwayshan? Wi ku fain di ansa eena Psalm 3.

17. Wat mi help Dayvid fi shoa self-kanchroal, ahn how wee ku fala fi hihn egzampl?

 17 Dayvid mi rait Psalm 3 wen ih mi-di ron weh fan ih son, Absalom, hoo mi-di chrai kil ahn. Shimiyai mi atak ahn rong da sayhn taim, bot Dayvid mi manij fi kip ih self-kanchroal. How? Dayvid mi seh eena Psalm 3:4: “Ah wahn kaal owt tu Jehoava wid aala mi vais, ahn hihn wahn ansa mi fan ih hoali mongtin.” Wee ku pray wen peepl atak wi tu. Den Jehoava wahn gi wi ih hoali spirit. Yu ku tink bowt eni sichuwayshan weh yoo mait haftu ga moa self-kanchroal? Yu ku bee moa wilin fi fagiv adaz eevn wen dehn provoak yu? Yoo chros dat Jehoava si weh yu di goh chroo ahn dat ih waahn help yu ahn bles yu?

“WIZDOM DA DI MOAS IMPOATANT TING”

18. How wi wahn benifit if wi kantinyu fi obay Jehoava dairekshan?

18 Wen wi du weh wi noa fi bee rait, wi wahn bee waiz ahn Jehoava wahn bles wi. Dat da wai Proverbs 4:7 seh dat “wizdom da di moas impoatant ting”! Eevn doa wizdom bays pahn nalij, chroo wizdom da noh jos how wi andastan di infamayshan wi gat. Ih ga fi du moa wid di disizhan dehn weh wi mek. Eevn di aans dehn shoa wahn kaina wizdom. Wen dehn pripyaa dehn food joorin soma taim, dehn shoa di wizdom weh Gaad mek dehn wid. (Prov. 30:24, 25) Di Baibl kaal Jeezas “Gaad wizdom,” ahn hihn aalwayz du weh Gaad waahn ih du. (1 Kor. 1:24; Jan 8:29) If wi kip wiself hombl, an if wi waiz ahn aalwayz du weh rait, Gaad wahn bles wi. (Reed Machyu 7:21-23.) Soh kip di werk haad fi mek di kangrigayshan wahn plays weh evribadi ku bee hombl ahn du weh Jehoava waahn dehn du. Ih tek taim ahn payshens fi aplai weh Jehoava teech wi. Bot wen wi du dat wi shoa dat wi hombl, ahn dat wahn mek wi bee hapi now ahn fareva.

^ par. 14 Exodus 32:11-14: “Den Moaziz mi pray tu Jehoava ih Gaad ahn seh: ‘Oa Jehoava, wai yu wahn mek yu terabl raat blayz op gens yu peepl weh yu mi bring owt fahn di lan a Eejip wid grayt powa ahn wid wahn maiti han? Di Eejipshan dehn wuda seh, “Hihn mi meen fi du dehn bad fahn wen ih mi leed dehn owt. Ih mi waahn kil dehn eena di mongtin dehn ahn waip dehn aafa di fays a di ert.” Ton bak yu raat ahn tek piti pahn yu peepl noh? Rimemba Aybraham, Aizak, an Izrel yu servant dehn. Yoo mi sway bai yu oanself ahn tel dehn: “Fi chroo Ah wahn bles yu ahn gi yu wahn lata lata disendant. Ah wahn gi aala dis lan weh Ah shoa yoo tu yu disendant dehn, soh dat dehn ku tek it ahn kip it fareva.”ʼ Soh Jehoava mi feel sari fi ih peepl an ih neva du weh ih mi seh ih wahn du.”

^ par. 16 2 Samuel 16:5-7: “Wen King Dayvid mi reech Bahoorim, wan a Saal relitiv weh mi naym Shimiyai, di son a Geera, mi kom owt di hala ahn kos op az ih mi-di kohn kloas tu dehn. Ih mi-di chrai stoan Dayvid an aala ih servant dehn, an aala di peepl ahn di maiti man dehn weh mi deh wid ahn pan ih rait han said ahn pan ih lef han said. Shimiyai mi-di kos op ahn seh: “Get owt, get owt, yu merdara! Yu wotlis pees a man!”

^ par. 16 2 Samuel 16:13: “Soh Dayvid an ih aami mi kip aan di goh dong di road wail Shimiyai mi-di waak langsaid dehn pahn di mongtin, di hala ahn kos op ahn chroa stoan ahn lata dos.”