Skip tu di aatikl

Skip tu lis a tapik

Yoo Di Laan fi Tink Laik Jehoava?

Yoo Di Laan fi Tink Laik Jehoava?

“Unu mos mek Gaad chaynj di way unu tink soh dat evriting weh unu du wahn chaynj.”—ROAM. 12:2.

SANG: 56, 123

1, 2. Az wi jraa kloasa tu Jehoava, weh wi need fi du? Yooz di egzampl eena di paragraaf.

IMAJIN dat sohnbadi gi wahn lee pikni wahn gif. Den di pikni payrents tel ahn: “Seh tank yu.” Ih du it, bot onli bikaaz dehn tel ahn fi du it. Bot az da pikni groa op, ih geh fi andastan an apreeshiayt wai ih payrents tink ih soh impoatant fi seh tanks wen sohnbadi shoa ahn kainis. Den ih wahn staat tu tank adaz pan ih oan bikaaz ih laan fi bee graytful.

2 Sayhn way soh, wen wee mi fos laan di chroot, wi mi laan dat ih veri impoatant fi obay Jehoava koman dehn. Bot az wi groa spirichwali, wi geh fi laan moa bowt how Jehoava tink. Wi laan weh ih laik, weh ih noh laik, ahn how hihn si tingz. Wen wi chrai fi si tingz di sayhn way laik Jehoava, wi shoa dat wi di laan fi tink laik hihn. Ahn wi alow fi hihn tinkin fi gaid weh wi du ahn di disizhan dehn weh wi mek.

3. Wai ih ku bee haad fi si tingz di way Jehoava si dehn?

3 Eevn doa wi feel hapi wen wi laan fi tink laik Jehoava, ih noh aalwayz eezi bikaaz wi noh perfek. Fi egzampl, wi andastan how Jehoava vyoo mateeryal tingz, sekshwal imoraliti, di preechin werk, di prapa yoos a blod, an ada tingz. Bot sohntaim wi noh andastan wai hihn vyoo dehn da way. Weh wi ku du? How wi ku kantinyu fi laan fi tink laik Jehoava?  Ahn how dat wahn help wi fi du weh rait, now an eena di fyoocha?

HOW WI LAAN FI TINK LAIK GAAD

4. Weh ih meenz fi ‘mek Gaad chaynj di way wi tinkʼ?

4 Reed Roamanz 12:2. Rait ya di apasl Paal mi seh weh wi need fi du soh dat wi ku laan fi tink laik Jehoava. Di laas aatikl mi help wi fi andastan dat wi haftu rijek di tinkin an atichood a dis werl soh dat wi noh “stan laik dehn peepl eena dis werl ataal.” Bot Paal mi tel wi tu dat wi haftu ‘mek Gaad chaynj di way wi tink.ʼ Dis meenz dat wen wi stodi di Baibl wi haftu chrai andastan Jehoava tinkin, meditayt pan it, ahn yooz it fi gaid wi oan tinkin.

5. Wat da di karek way fi stodi?

5 Wen wi stodi, wi du moa dan jos hori reed di mateeryal ahn maak di ansa dehn. Wi haftu tink bowt weh di mateeryal teech wi bowt Jehoava, ih wayz, an ih tinkin. Wi chrai fi andastan wai Gaad koman wan ting ahn kandem di neks. Den wi haftu tink bowt how wi ku aplai weh wi laan eena wi tinkin an akshanz. Wi noh mait kansida aala dehn ting evri taim wi stodi. Bot ih gud fi tek taim, maybi bowt haaf a wi stodi taim, fi meditayt pahn weh wi reed soh dat wi ku apreeshiayt weh wi laan.—Ps. 119:97; 1 Tim. 4:15.

6. Weh wahn hapm wen wi meditayt pahn Jehoava tinkin?

6 Wen wi mek it wahn habit fi meditayt pahn Gaad Werd, sohnting amayzin wahn hapm. Wi wahn geh fi “noa weh Gaad waahn,” ahn wi wahn proov tu wiself dat Gaad tinkin perfek. Wi wahn staat tu si tingz di way hihn si dehn, ahn wi wahn aksep fi hihn tinkin fi wiself. Wi wahn alow ‘Gaad fi chaynj di way wi tink,ʼ ahn wi wahn staat luk pahn tingz eena wahn nyoo way. Di moa wi du dis, di moa wi wahn staat tu tink laik Jehoava.

WI TINKIN AFEK WI AKSHANZ

7, 8. (a) How Jehoava vyoo mateeryal tingz? (Koment pahn di picha dehn da di biginin a dis aatikl.) (b) If wee vyoo mateeryal tingz di sayhn way laik Jehoava, weh wi wahn put fos eena wi laif?

7 Weh wi tink bowt noh onli afek di way wi feel, bot ih afek wi akshanz tu. (Maak 7:21-23; Jay. 2:17) Mek wi kansida sohn egzampl weh wahn mek dis point klyaa. Fos, mek wi luk pahn hoo Gaad mi pik fi rayz ih Son. Jehoava mi pik Joazef ahn Mayri fi rayz Jeezas, eevn doa dehn neva ga lata moni. (Lev. 12:8; Look 2:24) Wen Jeezas mi baan, Mayri mi “put ahn fi lidong eena wahn boad baks weh di animal dehn eet owta kaa no spays neva deh eena di hotel fi dehn stay.” (Look 2:7) If Jehoava mi waahn, ih kuda mi mek shoar dat Jeezas mi baan eena wahn moa komfatabl plays. Bot ih mi moa impoatant tu Jehoava fi mek Jeezas groa op eena wahn famili weh put spirichwal tingz fos.

8 Dis akonk bowt how Jeezas mi baan help wi fi andastan how Jehoava vyoo mateeryal tingz. Wen ih kohn tu mateeryal tingz, som payrents waahn mek dehn pikni geh di bes a di bes, eevn if dat mek dehn rilayshanship wid Jehoava geh week. Bot ih playn fi si dat Jehoava kansida spirichwal tingz fi bee faar moa impoatant. How bowt yoo? Yoo agree wid Jehoava tinkin? Weh yu akshanz shoa?—Reed Heebrooz 13:5.

9, 10. How wi ku shoa dat wi tink di sayhn way laik Jehoava bowt how wi akshanz ku stombl adaz?

9 Wahn nada egzampl da how Jehoava  vyoo peepl hoo stombl adaz. Jeezas mi seh: “If enibadi du eniting fi mek eni a dehnya lee pikni ya weh bileev eena mi du eniting rang, den ih wuda beta fi dehn if dehn tai wahn big hevi rakstoan rong dehn nek ahn chroa dehn da batam a di see.” (Maak 9:42) Dehnya werdz shoa how seeryos Jeezas tek it wen wi stombl ada peepl! Ahn wi noa dat Jeezas tink di sayhn way laik Jehoava. Soh wi noa dat Jehoava wahn tek it veri seeryos wen sohnbadi noh kay if dehn akshanz stombl wan a Jeezas falowaz.—Jan 14:9.

10 Wee vyoo it di sayhn way laik Jehoava ahn Jeezas? Weh wi akshanz shoa? Fi egzampl, sopoaz wi laik wahn sertn stail er fashan weh mait ofen sohnbadi eena di kangrigayshan er mek adaz tink bowt imoaral tingz. Wi lov ahn kansaan fi wi bradaz ahn sistaz wahn bee schranga dan wi oan persnal dizaiya?—1 Tim. 2:9, 10.

11, 12. How wi wahn protek wiself if wi laan fi hayt weh Jehoava hayt ahn koltivayt self-kanchroal?

11 Mek wi kansida wahn nada egzampl. Jehoava hayt eniting weh bad. (Isa. 61:8) Af koars, Jehoava noa dat wi noh perfek ahn dat sohntaim ih noh eezi fi mek wi du weh rait. Bot hihn waahn mek wi tink laik hihn ahn hayt weh bad. (Reed Psalm 97:10.) * If wi meditayt pahn wai Jehoava hayt badnis, wi wahn laan fi tink ahn feel di sayhn way laik hihn, ahn wi wahn ga di schrent fi du weh rait.

12 If wi laan fi hayt weh bad, wi wahn ku noa if sertn tingz rang eevn if di Baibl noh menshan dehn. Fi egzampl, wahn kaina loos kandok weh di geh moa ahn moa kaman nowadayz da lap daans. Som peepl tink dat if dehn noh akchwali di ga seks, dehn noh di du notn rang. * Bot yu tink dat dehnya kaina bihayvya gree wid Gaad tinkin? Memba, Jehoava hayt eni kaina badnis; tu hihn ih disgostin. Mek wi werk haad fi koltivayt self-kanchroal soh dat wi ku stay faar fahn eniting weh rang ahn laan fi hayt weh Jehoava hayt.—Roam. 12:9.

TINK NOW BOWT WEH YU WAHN DU EENA DI FYOOCHA

13. Wai wi shuda tink now bowt how Jehoava si tingz soh dat wi ku mek waiz disizhanz eena di fyoocha?

13 Wen wi di stodi, ih gud fi tink bowt how Jehoava vyoo tingz, bikaaz ih ku help wi fi mek waiz disizhanz eena di fyoocha. Laik dat, eevn if wi en op eena wahn sichuwayshan weh kaal fi wahn kwik disizhan, wi wahn don noa weh fi du. (Prov. 22:3) Mek wi luk pahn sohn egzampl fahn di Baibl.

14. Weh wi laan fahn how Joazef mi ansa Potifa waif?

14 Joazef mi rijek Potifa waif rait away wen shee mi chrai get hihn fi sleep wid ahn. Ih klyaa dat Joazef mi meditayt pahn weh Jehoava tink bowt marij heda taim. (Reed Genesis 39:8, 9.) * Pahn  tap a dat, hihn mi tel Potifa waif: “How Ah ku du sohnting soh bad an akchwali sin gens Gaad?” Dat tel wi dat hihn mi laan fi si tingz di sayhn way how Gaad si dehn. How bowt wee? Sopoaz sohnbadi da werk staat tu flert wid wi. Er how if sohnbadi sen wi wahn mesij er picha weh ster op wi dizaiya fi seks? * Ih wahn bee moch eeziya fi stan op fi weh rait if wi mi don laan an aksep Jehoava tinkin heda taim, ahn wi wahn ku disaid weh wi wahn du if wi eva fays dehn kaina sichuwayshan.

15. How wee ku stay faytful tu Jehoava laik di chree Heebrooz?

15 Now mek wi luk pahn di egzampl a di chree Heebrooz weh wi kaal Shayjrak, Meeshak, an Abednigoa. Wen King Nebyukadneza mi koman dehn fi wership di imij weh hihn mi mek, dehn mi tel ahn playn ahn schrayt dat dehn neva wahn du it. Bikaaz dehn mi don tink bowt weh dehn wuda mi du if wahn sichuwayshan laik dat kom op, dehn mi stay faytful tu Jehoava. (Ex. 20:4, 5; Dan. 3:4-6, 12, 16-18) Sopoaz yu baas wuda aks yu fi wahn lee kanchribyooshan fi wahn selibrayshan weh ga fi du wid faals rilijan. Weh yoo wuda du? Insteda wayt fi wahn sichuwayshan laik dat kom op, wai yu noh mek di taim now fi laan how Jehoava vyoo it? Den, if sohnting laik dat eva kom op, ih wahn bee eeziya fi seh ahn du weh rait, jos laik di chree Heebrooz.

Yoo mi du yu risaach, ful owt wahn leegal dakyument, ahn taak tu yu dakta? (Paragraaf 16)

16. How wahn klyaa andastandin a Jehoava tinkin ku help wi pripyaa fi wahn medikal imerjensi?

16 If wi meditayt pahn Jehoava tinkin, ih ku help wi fi stay laayal tu hihn if wi ga wahn medikal imerjensi. Af koars, wi don disaid dat wi wahn rifyooz fi tek hoal blod, er eni a di foa mayn paat a blod. (Aks 15:28, 29) Bot sohn medikal proseeja involv blod, an eech Kristyan haftu mek ih oan disizhan bays pahn Baibl prinsipl. Wen da di bes taim fi disaid? Wen wi eena haaspital, maybi eena payn an dehn di presha wi fi mek wahn kwik disizhan? Af koars nat! Now da di taim fi du risaach, ful owt wahn leegal dakyument weh eksplayn klyaa-wan weh  kaina chreetment wi wahn aksep, ahn taak tu wi dakta. *

17-19. Wai ih soh impoatant dat wi laan now how Jehoava tink? Gi wahn egzampl a wahn sichuwayshan weh wi haftu bee redi fi deel wid.

17 Mek wi kansida wan moa egzampl. Tink bowt how kwik Jeezas mi ansa Peeta wen ih mi tel ahn: “Bee kain tu yuself, Laad.” Ih klyaa dat Jeezas mi don spen lata taim di tink bowt Gaad wil fi hihn ahn bowt di Skripchaz weh taak bowt fi hihn laif ahn det pahn ert. Bikaaz a dat, hihn mi ga di schrent fi stay faytful tu Jehoava noh mata wat, ahn fi giv op ih laif fi wee.—Reed Machyu 16:21-23NW. *

18 Tudeh day, Gaad waahn mek wi bee fi hihn fren an ih waahn wi du wi bes fi preech di gud nyooz. (Mach. 6:33; 28:19, 20; Jay. 4:8) Bot som peepl mait chrai diskorij wi fahn du dat, ahn dehn mait tink dehn di gi wi gud advais, jos laik eena di kays wid Peeta ahn Jeezas. Fi egzampl, sopoaz yu baas aafa yu wahn promoashan wid beta pay, bot di jab wuda intafyaa wid spirichwal tingz. Er if yu di goh da skool, sopoaz yu geh wahn apachooniti fi lef hoam fi geh wahn haiya ejukayshan. If sohnting laik dat wuda hapm tu yoo, yu wuda haftu goh pray, du risaach, chek wid yu famili er maybi di eldaz, an den mek yu disizhan? Wai yu noh laan fahn now how Jehoava tink bowt it ahn laan fi tink di sayhn way fi yuself? Den, if wahn sichuwayshan laik dat eva kom op, yu wahn noa egzakli weh fi du bikaaz yu mi don disaid fi stay faytful tu Jehoava.

19 Yu ku praabli tink bowt ada sichuwayshanz weh ku kom op sodn-wan. Af koars, wi kyaahn pripyaa fi evri sichuwayshan. Bot if wi meditayt pahn Jehoava tinkin wail wi du wi persnal stodi, ih wahn bee eeziya fi memba weh wi mi stodi ahn fi aplai it tu eni sichuwayshan weh wi fays. Soh mek wi aalwayz chrai fain owt how Jehoava si tingz, laan fi si tingz di sayhn way, ahn tink bowt how Jehoava tinkin wahn help wi fi mek waiz disizhanz now an eena di fyoocha.

JEHOAVA TINKIN AHN YU FYOOCHA

20, 21. (a) Wai wi wahn injai wi freedom eena di nyoo werl? (b) How wi ku injai laif now?

20 Wi reeli di luk faawod tu di nyoo werl. Moas a wi di luk faawod tu evalastin laif eena Paradais. Anda Gaad Kingdom, wi wahn bee free fahn aala di payn ahn sofarin weh wi di goh chroo eena dis sistem. An eena di nyoo werl wi wahn ga di freedom fi chooz akaadn tu weh wi laik ahn weh wi waahn.

21 Af koars, eevn eena di nyoo werl, wi freedom wahn ga limit. Soh wen hombl peepl haftu chooz bitween weh rait ahn weh rang, dehn wahn mek dehn disizhan bays pahn Jehoava laa ahn tinkin. Dehn wahn injai dat, an ih wahn mek dehn hapi hapi ahn bring dehn lata pees. (Ps. 37:11) Bot eevn now wail wi di wayt fi da taim, wi ku stil bee hapi az wi laan fi tink laik Jehoava.

^ par. 11 Psalm 97:10: “Yoo weh lov Jehoava, hayt weh bad. Hihn di protek hoo laayal tu hihn; hihn reskyu dehn fahn di han a di wikid.”

^ par. 12 Lap daans da wen “wahn daansa, hoo mait bee haaf naykid, sidong pan ih kostoma lap ahn moov er daans laik if dehn di ga seks.” Evri sichuwayshan difrent, bot sohntaim dis ku involv sekshwal imoraliti ahn di eldaz wuda haftu tek judishal akshan. Wahn Kristyan weh tek paat eena sohnting laik dis shuda goh tu di eldaz fi help.—Jay. 5:14, 15.

^ par. 14 Genesis 39:8, 9: “Bot ih rijek ih maasta waif ahn tel ahn seh: “Mi maasta noh noa weh di hapm wid mee eena dis hows, an ih lef evriting weh da fi hihn anda mai kyaa. Nobadi grayta dan mee eena dis hows, ahn hihn neva hoal bak notn fahn mee eksep yoo, kaaz yoo da fi hihn waif. Soh how Ah ku du sohnting soh bad an akchwali sin gens Gaad?”

^ par. 14 Dis di taak bowt sekstin. Sekstin da wen sohnbadi sen sekshwal mesij, picha, er veedyo fahn ih foan. Sohntaim da kaina kandok kaal fi judishal akshan. Eena som kays, polees mi chaaj sohn yong peepl weh mi tek paat eena sekstin ahn dehn gaahn da koat jos laik if dehn mi komit wahn seks kraim. Fi moa infamayshan, goh pahn di jw.org websait ahn reed di aatikl “Young People Ask—What Should I Know About Sexting?” (Luk anda BIBLE TEACHINGS > TEENAGERS.) Er reed di aatikl “How to Talk to Your Teen About Sexting” eena di Awake! ishu fi Novemba 2013, payj 4-5.

^ par. 16 Wi poblikayshan dehn diskos di Baibl prinsiplz weh aplai tu di yoos a blod. Fi egzampl, si di buk How fi Stay Eena di Lov a Gaad, payj 246-249.

^ par. 17 Machyu 16:21-23: “Fahn den, Jeezas mi staat tu eksplayn tu ih disaipl dehn dat hihn mi haftu goh da Jeroosalem ahn sofa wahn lata tingz fahn di eldaz ahn di cheef prees ahn di skraib dehn. Dehn mi wahn kil ahn, bot pahn di terd day, ih mi wahn rayz op bak. Wen Jeezas seh dat, Peeta tek a wan said an ih mi skoal ahn. Ih mi seh: ‘Bee kain tu yuself, Laad, dehn tingz noh wahn hapm tu yoo at aal.ʼ Bot ih ton ih bak pahn Peeta ahn tel ahn: ‘Get bihain mi, Saytan! Yu wahn stombl mi if Ah lisn tu yu, bikaaz yu noh di tink laik Gaad, yu di tink laik man.ʼ”