Skip tu di aatikl

Skip tu lis a tapik

Kainis—Wahn Kwaliti Weh Wi Shoa Bai Werd an Akshan

Kainis—Wahn Kwaliti Weh Wi Shoa Bai Werd an Akshan

WEN sohnbadi chreet wi kain ih reeli mek wi feel gud. Ih soh inkorijin ahn komfertin! Wi apreeshiayt it wen sohnbadi shoa wi dat dehn kay bowt wi. Sins wee apreeshiayt wen peepl chreet wi wid kainis, how wi ku koltivayt dis byootiful kwaliti?

Wahn kain persn reeli ahn chrooli kay bowt adaz ahn ih wahn shoa it eena weh ih seh ahn du. Chroo kainis kohn fahn di haat. Wi kyaahn klaym seh wi kain ahn maybi jos shoa gud manaz. Wi haftu ga schrang lov fi peepl ahn feel fi dehn. Moa dan dat, chroo kainis da paat a di froot a Gaad hoali spirit weh aal Kristyanz haftu koltivayt. (Gal. 5:22, 23) Jehoava waahn wi bee kain, soh mek wi luk pahn how Jehoava ahn Jeezas shoa kainis ahn how wee ku fala fi dehn egzampl.

JEHOAVA KAIN TU EVRIBADI

Jehoava kain ahn kansidarayt tu evribadi, eevn “dehn wan weh angraytful ahn wikid.” (Look 6:35) Fi egzampl, Jehoava “mek di son shain dong pahn di gud ahn pahn di bad, ahn sayhn way ih mek ih rayn pahn peepl weh du rait ahn peepl weh du rang.” (Mach. 5:45) Soh eevn peepl weh noh bileev dat Jehoava da di Kriyayta benifit fahn fi hihn kainis ahn geh weh dehn need fi liv ahn bee hapi.

Wan a di bes egzampl a how Jehoava shoa kainis da how ih mi chreet Adam ahn Eev. Wahn lee wail afta dehn mi sin, Adam ahn Eev mi “soa sohn fig leef tugeda fi kova dehnself.” Bot Jehoava mi noa dat dehn wuda mi need beta kloaz dan dat fi liv owtsaida Eedn, bikaaz di grong owt deh mi kers an ih mi groa lata “prikl bush ahn brambl.” Soh Jehoava mi mek “sohn lang kloaz fahn animal skin” fi dehn.—Gen. 3:7, 17, 18, 21.

Eevn doa Jehoava kain tu ‘di gud ahn di bad,ʼ ih reeli lov fi shoa kainis tu ih faytful servant dehn. Fi egzampl, joorin di dayz a di prafit Zekaraiya, wahn aynjel mi-di wori bikaaz ih mi si dat di werk fi bil bak di templ da Jeroosalem mi stap. Jehoava mi lisn tu di aynjel an ih mi ansa ahn wid “kain ahn komfertin werdz.” (Zech. 1:12, 13) Jehoava mi du sohnting simila wid di prafit Ilaija. Wan taim, di prafit mi feel soh diskorij dat ih mi aks Jehoava fi kil ahn. Jehoava mi pay atenshan tu how Ilaija mi feel an ih mi sen wahn aynjel fi schrentn ahn. Pahn tap a dat, Gaad mi rimain di prafit dat ih neva dehn pan ih oan. Afta Ilaija mi hyaa dehn kain werdz ahn mi geh di help weh ih mi need, ih mi kantinyu wid ih asainment. (1 Ki. 19:1-18) Bot monks aala Gaad servants, hoo mi fala Jehoava egzampl di moas eena di way ih shoa kainis?

JEEZAS DA-MI WAHN VERI KAIN MAN

Wen Jeezas mi deh ya pahn di ert, peepl mi noa ahn az wahn kain ahn kansidarayt man. Hihn neva chreet peepl bad er rof  dehn op eena eni kaina way. Raada, hihn mi feel fi dehn, an ih mi seh: “Aala unu weh taiyad a kehr unu hevi load, kohn da mee an ahn wahn mek unu res.” (Mach. 11:28-30) Bikaaz Jeezas mi kain, peepl yoostu fala ahn evriway ih goh. Jeezas “mi sari fi dehn,” soh ih mi feed dehn, heel dehn wan weh mi sik, an ih mi teech dehn “lata ting” bowt ih Faada.—Maak 6:34; Mach. 14:14; 15:32-38.

Jeezas mi andastan how peepl mi feel an ih mi chreet dehn wid kainis. Az a mata a fak, eevn wen Jeezas mi waahn tek wahn brayk fi res, ih mi stil “welkom” di peepl weh mi gaahn luk far ahn. (Look 9:10, 11) Tink bowt weh mi hapm wid wahn uman hoo mi chrobl wid hemrij. Shee mi waahn geh kyoar, soh ih mi toch Jeezas kloaz. Bot akaadn tu di Laa shee neva kleen, soh shee neva sopoas tu deh eena di krowd rong Jeezas. (Lev. 15:25-28) Bot Jeezas neva skoal ahn. Ih kuda mi si dat shee mi fraitn fraitn. Soh ih mi shoa kompashan far ahn bikaaz shee mi sik fi 12 yaaz, an ih mi tel ahn: “Daata, sayka yu fayt, yu geh heel. Goh ahn noh wori bowt notn. Yu free fahn yu sofarin now.” (Maak 5:25-34) Dat da kainis fi chroo!

WAHN KAIN PERSN WAHN HELP PEEPL

Eena di egzampl dehn weh wi jos diskos, wi si dat if wi kain wi wahn du tingz fi help ada peepl. Jeezas mi yooz di iloschrayshan bowt di gud Samaritan fi shoa dat ih impoatant fi du kain tingz fi peepl. Sohn teef mi rab wahn Jooish man, beet ahn op, ahn lef ahn fi ded pahn di roadsaid. Eevn doa di Jooz ahn di Samaritan dehn neva get lang, owta kainis wahn Samaritan man mi tek piti pan ahn. Ih mi ban op di man kot ahn brooz dehn an ih mi kehr ahn da wahn hotel. Den di Samaritan man mi pay di man weh mi oan di hotel fi main di Jooish man an ih mi eevn aafa fi pay moa fi kova eni ada ekspens.—Look 10:29-37.

Kainis noh jos moov wi fi du kain tingz fi adaz, bot ih wahn moov wi fi inkorij adaz bai weh wi seh tu. Soh eevn doa “woriz eena wahn man haat way it dong,” di Baibl seh dat “wahn gud werd mek ih feel hapi.” (Prov. 12:25) Kainis ahn gudnis ku moov wi fi seh tingz weh inkorij ahn bil op adaz. * Wen wi seh kain tingz tu adaz wi shoa dat wi kay bowt dehn. Dat wahn inkorij dehn, ahn dehn wahn feel schrang inof fi deel wid eni chraiyalz weh dehn mait fays eena laif.—Prov. 16:24.

HOW WI KU KOLTIVAYT KAINIS?

Bikaaz Gaad mi mek wi eena fi hihn imij, aal hyoomanz ku koltivayt di kwaliti a kainis. (Gen. 1:27) Fi egzampl, Joolyos, wahn Roaman aami aafisa weh mi rispansabl fi kehr di apasl Paal da Roam, mi “kain tu Paal, soh ih mek Paal gaahn gaahn luk fi ih fren dehn weh liv deh ahn soh geh eniting weh ih mi need” da di siti a Saidan. (Aks 27:3) Laytaraan, di peepl weh mi liv da Malta mi shoa dat dehn mi ‘onli frenliʼ tu Paal ahn di ada peepl weh mi geh shiprek lang wid ahn. Dehn mi eevn mek wahn faiya fi help Paal ahn di adaz geh waam. (Aks 28:1, 2) Da chroo, dehn peepl mi shoa kainis tingz, bot if wi wahn shoa chroo kainis wi haftu du moa. Wi haftu bee kain aal di taim.

Fi reeli pleez Gaad, wi haftu mek kainis bee paat a wi persnaliti ahn paat a how wi liv wi laif. Dat da wai Jehoava tel wi dat ‘wi fi kainʼ tu wan anada. (Kol. 3:12) Bot ih noh aalwayz eezi fi mek dis kwaliti bee paat a  wi. Wai? Sohntaim wi hoal bak fahn shoa kainis bikaaz wi shai, wi noh feel shoar a wiself, er maybi wi stil goh aan wahn lee bit selfish sohntaim. Er wi mait fain it haad fi bee kain tu peepl weh chreet wi bad. Bot, wi ku stil get oava dehn ting if wi pen pahn di hoali spirit ahn fala Jehoava egzampl.—1 Kor. 2:12.

How wi ku fain moa wayz fi shoa kainis? Wi ku aks wiself: ‘Ai wilin fi lisn tu peepl ahn chrai fi andastan how dehn feel? Ai noatis wen ada peepl need help? Wen laas Ai mi shoa kainis tu sohnbadi weh da noh mi faamli er kloas fren?ʼ Den wi ku set goalz fi wiself. Fi egzampl, wi ku get fi noa moa bowt di peepl weh deh rong wi, espeshali dehn wan eena di Kristyan kangrigayshan. If wi du dat, wi wahn ku fain owt weh kaina prablemz dehn di deel wid ahn weh dehn need. Den, wi ku chrai shoa kainis tu adaz eena wayz weh wi wuda laik ada peepl chreet wee. (Mach. 7:12) Ahn wi ku bee shoar dat Jehoava wahn bles wi wen wi aks ahn fi help wi fi koltivayt kainis.—Look 11:13.

KAINIS JRAA PEEPL

Wen di apasl Paal mi lis aaf di tingz weh mi aidentifai hihn az Gaad minista, ih mi inklood “kainis.” (2 Kor. 6:3-6) Peepl mi laik deh rong Paal bikaaz ih mi kain tu dehn, an ih mi shoa it eena di way ih taak tu dehn ahn how ih mi chreet dehn. (Aks 28:30, 31) Sayhn way, wee ku jraa peepl tu di chroot if wi kain tu dehn. Wen wi shoa kainis tu evribadi, eevn tu peepl weh chreet wi bad, wi mait waam dehn haat ahn maybi dehn wahn ku bee wi fren. (Roam. 12:20) Az taim paas, maybi dehn eevn laan fi lov di Baibl mesij.

Eena di Paradais lata peepl wahn geh rezorek. Imajin how hapi dehn wahn bee wen evribadi kain tu dehn. Maybi som a dehn wahn ekspeeryens dis fi di fos taim. If dehn apreeshiayt how evribadi soh kain, dehn wahn shoa kainis tu. Enibadi weh rifyooz fi shoa kainis ahn help adaz noh ga no plays eena Gaad Kingdom. Pahn di ada han, di wan dehn weh pleez Gaad wahn liv fareva ahn dehn wahn chreet wan anada wid lov ahn kainis. (Ps. 37:9-11) Tink bowt how di werl wahn ful op a pees ahn how evribadi wahn feel sayf! Bot bifoa da wandaful day kom, how wi ku benifit wen wi shoa kainis?

WI BENIFIT WEN WI SHOA KAINIS

Di Baibl seh: “Wahn man weh kain benifit ihself.” (Prov. 11:17) Wen wahn persn kain, ada peepl laik deh rong ahn, an dehn chreet ahn kain tu. Jeezas mi seh: “Di sayhn way how yu gi, dat da how yu wahn geh bak.” (Look 6:38) Soh ih eezi fi wahn kain persn mek ahn kip nyoo frenz.

Di apasl Paal mi inkorij di bradaz ahn sistaz eena di kangrigayshan da Efisos fi ga “wahn waam, kain haat fi wan anada, ahn fi fagiv wan anada.” (Ifee. 4:32) Wen evribadi eena di kangrigayshan kain tu wan anada ahn luk owt fi wan anada, evribadi benifit. Wi feel fi wan anada ahn wi neva chrai hert enibadi wid weh wi seh er du. Wi noh gasip, bot weh wi seh ahn how wi seh it shuda aalwayz bee inkorijin. (Prov. 12:18) Sayka dat, di kangrigayshan geh schrang ahn dehn serv Jehoava wid jai.

Kainis da wahn kwaliti weh wi shoa bai werd ahn bai akshan. Wen wi kain tu adaz, wi shoa dat wi di fala Jehoava egzampl ahn dat wi di chrai wi bes fi bee lovin ahn jenaros laik hihn. (Ifee. 5:1) Dis wahn schrentn di bradaz ahn sistaz eena di kangrigayshan ahn jraa adaz tu di chroot. Mek wi du aal weh wi kud fi mek evribadi noa dat Jehoava Witnisiz da kain peepl!

^ par. 13 Wi wahn taak bowt gudnis eena di neks aatikl eena dis seeriz pahn di froot a Gaad hoali spirit.