Skip tu di aatikl

Skip tu lis a tapik

 STODI AATIKL 21

Noh Geh Fool bai Weh Dis Werl Kaal Wizdom

Noh Geh Fool bai Weh Dis Werl Kaal Wizdom

“Kaa weh di peepl a dis werl tink da wizdom, da noh no wizdom ataal eena Gaad sait.”—1 KOR. 3:19.

SANG 98 Di Baibl Kohn Fahn Gaad

WEH WI WAHN DISKOS? *

1. Weh Gaad Werd teech wi?

WEE ku deel wid eni prablem bikaaz Jehoava da wi Gran Inschrokta. (Isa. 30:20, 21) Fi hihn Werd gi wi evriting weh wi need soh dat wi “ku bee redi fi du evri gud werk jos laik weh [wi] shuda du.” (2 Tim. 3:17) Wen wi liv bai Baibl teechinz, wi geh waiza dan di peepl weh tel wi fi fala weh “dis werl tink da wizdom.”—1 Kor. 3:19; Ps. 119:97-100.

2. Weh wi wahn stodi eena dis aatikl?

2 Wi wahn si how wi selfish dizaiyaz da laik wahn magnet weh jraa wi tu di wizdom a dis werl. Soh dat da wai wi mait fain it haad fi noh tink an ak laik di peepl a dis werl. Wi andastan wai di Baibl seh: “Noh mek nobadi fool yu wid dehn aagyument weh noh mek no sens. Dehn mait song waiz, bot dehn da faals teechin weh han dong fahn hyooman been.” (Kol. 2:8) Eena dis aatikl wi wahn si how peepl staat tu bileev too emti lai weh Saytan teech. Wi wahn ku si wai di wizdom a dis werl da foolishnis ahn how di wizdom a Gaad Werd faar grayta dan eniting weh di werl aafa.

DI WAY HOW PEEPL CHAYNJ DEHN VYOO A SEKS

3-4. How di way peepl vyoo seks mi chaynj eena di erli paat a di 1900ʼs eena di United States?

3 Joorin di erli paat a di 1900ʼs eena di United States, peepl vyoo er standadz bowt seks mi chaynj. Bifoa dat,  peepl mi bileev dat seks da-mi onli fi peepl weh marid. Ahn da-mi sohnting weh yu noh taak bowt eena poblik. Bot wid taim, dehndeh standadz disapyaa, ahn di way peepl tink faar difrent tudeh.

4 Di way peepl mi bihayv ahn dehn atichood tuwaadz seks mi chaynj wahn lat afta di en a Werl Waar I. Wahn magazeen seh: “Moovi, tayta shoa, sangz, buk, an advataizments mi staat tu shoa wahn lata sekshwal tingz.” Joorin dehn yaaz, di way how peepl daans mi mek peepl rait away tink bowt seks ahn di kloaz weh dehn mi wayr mi staat tu shoa moa ahn moa skin. Laik how di Baibl mi prafesai bowt di laas dayz, peepl ‘lov plezha moa dahn how dehn lov Gaad.ʼ—2 Tim. 3:4.

Jehoava peepl noh geh fool op bai di loa moaral standadz a dis werl (Paragraaf 5) *

5. Weh hapm tu di way peepl vyoo moaral standadz sins di 1960ʼs?

5 Afta di 1960ʼs, ih mi kaman fi si moa ahn moa peepl di liv tugeda widowt geh marid. Ih mi aalso kaman tu fi si man di liv wid man ahn uman di liv wid uman ahn peepl mi-di divoas wan anada. Lata moovi ahn TV shoa mi-di shoa seks seenz laik if da notn. Weh aala dis du fi hyoomanz? Wahn raita seh dat di reezn wai di famili dehn di brok op, singl-payrent famili egzis, peepl di sofa imoashanali, peepl adiktid tu poarnografi, ahn tingz laik dehnya, da bikaaz di werl standad a moraliti di geh eevn wos. Ahn dat eksplayn wai AIDS an ada dizeez laik dat soh kaman tudeh. Weh aala dis proov? Ih proov dat weh dis werl kaal wizdom da loan foolishnis.—2 Peet. 2:19.

6. How di way di werl vyoo seks mek Saytan hapi?

6 Di way di werl vyoo seks mek Saytan hapi. Wai? Bikaaz hihn lov si wen peepl abyooz di gif weh Gaad gi hyoomanz fi ga seks ahn disrispek di byootiful gif a marij. (Ifee. 2:2) If peepl sekshwali imoaral, dehn shoa dat dehn noh valyu di abiliti weh Jehoava gi hyoomanz fi ga chiljren. An aalso, dehn noh wahn ga di apachooniti fi liv fareva.—1 Kor. 6:9, 10.

WEH DI BAIBL SEH BOWT SEKS?

7-8. Wai di Baibl vyoo a sekshwal bihayvya faar beta dan how dis werl vyoo it?

7 Peepl weh fala di wizdom fahn di werl, mak di hai moaral standadz weh deh eena di Baibl. Dehn seh dat ih noh pasabl fi bee soh moaral. Dehn wuda aks, ‘Wai Gaad wuda mek wi eena wahn way soh dat wi ga di dizaiya fi seks ahn den tel wi  fi kil di dizaiya?ʼ Dehn aks dis kweschan kaaz dehn ga di rang aidyaa dat evri persn ga di rait fi du wateva dehn waahn, ahn weneva dehn waahn. Bot di Baibl seh sohnting difrent. Di Baibl teech dat wi noh haftu obay evri singl dizaiya weh wi badi krayv, insted, wi ga di abiliti fi fait gens weh rang ahn fi kanchroal rang dizaiyaz. (Kol. 3:5) Pahn tap a dat, Jehoava gi wi di byootiful gif a marij, weh da wahn araynjment weh Jehoava provaid fi hyoomanz soh dat dehn ku satisfai dehn dizaiya fi seks. (1 Kor. 7:8, 9) Dis way, wahn hozban ahn waif ku injai seks widowt ga eni rigrets er woriz weh kohn fahn imoraliti.

8 Di difrens bitween di wizdom a dis werl ahn di wizdom fahn di Baibl, da dat di Baibl teech wi di rait vyoo a seks. Ih seh dat seks bring hapinis ahn plezha. (Prov. 5:18, 19) Bot stil, di Baibl seh: “Evri wan a unu man fi laan how fi liv wid unu waif, eena wahn way weh hoali ahn rait. Yu noh fi bee wahn slayv tu yu los, ahn soh liv laik peepl weh noh noa Gaad.”—1 Tes. 4:4, 5.

9. (a) Weh mi help Jehoava peepl eena di erli 1900ʼs fi fala di wizdom eena Gaad Werd? (b) Weh waiz kongsl wi fain da 1 Jan 2:15, 16? (c) Akaadn tu Roamanz 1:24-27, weh kaina imoaral praktis wi fi fait?

9 Joorin di erli 1900ʼs, Jehoava peepl neva geh fool op bai dehn wan weh “noh ga no shaym bowt notn nohmoh.” (Ifee. 4:19) Dehn mi chrai fi stik kloas tu Jehoava standadz. Di May 15, 1926, Watch Tower mi seh: “Wahn man er wahn uman shuda bee kleen ahn pyoar eena weh dehn tink ahn feel, espeshali wen ih ga fi du wid di opozit seks.” Noh mata weh mi-di hapm rong di werl, Jehoava peepl mi fala di wizdom fahn Gaad Werd. (Reed 1 Jan 2:15, 16.) Wi soh tankful fi Gaad Werd! Wi aalso tankful dat Jehoava gi wi spirichwal food da di prapa taim chroo ih aaganaizayshan soh dat wi noh geh fool bai weh dis werl kaal wizdom. *Reed Roamanz 1:24-27.

HOW PEEPL CHAYNJ AHN STAAT TINK ONLI BOWT DEHNSELF

10-11. Weh di Baibl mi waan mi wahn hapm joorin di laas dayz?

10 Di Baibl mi waan wi dat joorin di laas dayz, peepl wuda jos “lov dehnself.” (2 Tim. 3:1, 2) Dat da wai ih noh sopraiz wi fi si dat di werl inkorij peepl fi jos tink bowt dehnself. Wan refrens buk seh dat joorin di 1970ʼs, dehn mi ga wahn lata buks weh mi giv advais bowt how fi ga sokses eena laif. Som a dehn buks mi foas di reeda fi noa an aksep dehnself ahn fi bee hapi bowt hoo dehn, kaaz notn rang wid dat. Noatis weh wahn buk seh: “Bee in lov wid di moas byootiful, di moas eksaitin persn eva—yuself.” Di buk seh dat yu noh fi mek nobadi tel yu weh fi du er how fi bihayv, ih beta fi foakos pahn yuself.

11 Yu eva hyaa dat bifoa? Saytan mi inkorij Eev fi du sohnting simila. Hihn mi seh dat shee ku “bee laik Gaad, ahn [ih] wahn noa weh gud ahn bad.” (Gen. 3:5) Tudeh, lata peepl tink soh moch a dehnself dat dehn bileev dat nobadi, nat eevn Gaad ku tel dehn weh rait fahn weh rang. Fi egzampl, wi ku si da atichood eena peepl jos bai di way dehn vyoo marij.

Wahn Kristyan put di needz a adaz fers —espeshali di needz a ih marij mayt (Paragraaf 12) *

12. How di werl seh peepl fi vyoo marij?

12 Di Baibl koman hozban ahn waif fi  aana eech ada, fi chreet eech ada wid rispek, ahn fi kip di pramis dehn mi mek di day dehn mi geh marid. Di Baibl seh: “Bikaaz a dis, wahn man wahn lef ih pa ahn ih ma, ahn ih wahn marid tu ih waif. Dehn wahn jain tugeda, ahn di man ahn ih waif wahn bee wan.” (Gen. 2:24) Bot di peepl weh fala di werl wizdom promoat sohnting veri difrent, dehn seh dat eech mayt fi foakos pan ihself. Wahn buk bowt divoas seh: “Eena sohn wedn seremoni dehn chaynj di pramis ‘fi az lang az wi livʼ tu ‘fi az lang az wi lov eech ada.ʼ” Bikaaz peepl noh vyoo marij az sohnting permanent, familiz di geh brok op ahn lata dehn feel hert eena dehn haat. Ih veri klyaa fi si dat di way di werl vyoo marij foolish.

13. Wat da wan reezn wai Jehoava hayt peepl weh prowd?

13 Di Baibl seh: “Jehoava hayt evribadi weh prowd.” (Prov. 16:5) Bot wai Jehoava hayt prowd peepl? Wan reezn da bikaaz peepl weh tink onli bowt dehnself ak jos laik Saytan. Jos imajin, Saytan mi tink dat Jeezas—di wan hoo Gaad yooz fi kriyayt evriting—mi wahn bow dong ahn wership hihn! (Mach. 4:8, 9; Kol. 1:15, 16) Peepl weh tink soh moch a dehnself proov dat di wizdom a dis werl da loan foolishnis.

WEH DI BAIBL SEH BOWT PROWD PEEPL?

14. How Roamanz 12:3 help wi fi ga wahn balans vyoo a wiself?

14 Di Baibl help wi fi ga wahn balans vyoo a wiself. An ih aalso seh dat ih okay fi ga wahn sertn amonk a lov fi wiself. Jeezas mi seh: “Lov yu nayba sayhn laik how yu lov yuself,” weh meenz dat wi shuda ga di prapa amonk a lov fi wiself. (Mach. 19:19) Bot now, di Baibl noh teech wi dat wi fi put wiself heda adaz er dat wee moa impoatant dan enibadi els. Insteda dat, ih seh: “Unu mosn du notn owta selfishnis er praid. Unu sopoas tu bee hombl ahn unu noh fi tink dat unu  beta dahn enibadi els.”—Fil. 2:3; reed Roamanz 12:3.

15. Weh mek yoo tink dat di Baibl kongsl bowt di way wi fi vyoo wiself gud?

15 Tudeh, lata peepl, eevn ejukaytid peepl, seh dat di Baibl advais schupid. Dehn seh dat if yu tink dat adaz moa impoatant dan yoo, dehn wahn tek advantij a yu. Bot wat da di rizolts weh dis atichood projoos? Weh yoo don si fi yuself? Yu tink peepl weh selfish hapi? How bowt dehn famili, dehn hapi? Yu tink dehn ga chroo chroo frenz? Yu tink dehn ga wahn kloas frenship wid Gaad? Fahn weh yu don si fi yuself, weh projoos beta rizolts—fi fala di wizdom a di werl er fi fala di wizdom weh kohn fahn Gaad Werd?

16-17. Weh wi shuda gi tanks fa ahn wai?

16 Peepl weh fala di advais a dehn wan weh di werl si az waiz peepl da laik wahn tooris weh di aks wahn nada tooris fi dairekshan kaaz di too a dehn laas. Dis da weh Jeezas mi seh bowt di soa-kaal “waiz” peepl a fi hihn taim: “Dehn da jos sohn gaid weh blain. Ahn if wahn man weh blain leed rong wahn nada blain man, den too a dehn wahn jrap eena hoal.” (Mach. 15:14) Ih klyaa fi si dat di wizdom a dis werl kyaahn kompyaa wid Gaad wizdom.

Gaad servants luk bak pahn di memriz a dehn laif ahn dehn hapi kaaz dehn fala Jehoava wizdom (Paragraaf 17) *

17 Di Baibl waiz kongsl aalwayz proov fi bee “gud fi mek wi teech di chroot, ahn fi mek wi noa dehn ting weh rang eena wi laif. Ih gud fi skoal wi wen wi need it, ahn fi teech wi how fi liv rait.” (2 Tim. 3:16.) Wi soh tankful tu Jehoava an ih aaganaizayshan weh help wi noh fi fala di wizdom a dis werl! (Ifee. 4:14) Di spirichwal food weh hihn gi wi mek wi ga di schrent fi fala di standadz a ih Werd. Da wahn wandaful privilij fi geh di gaidans a di bes wizdom weh kuda eva egzis; di wizdom fahn di Baibl!

SANG 54 “Jehoava Teech Wi di Way fi Goh”

^ par. 5 Dis aatikl wahn help wi noa fi shoar dat Jehoava da di onli Wan weh ku gaid wi. Ih aalso wahn shoa wi dat wen wi kapi di soa-kaal wizdom fahn dis werl, ih bring lata sad rizolts, bot if wi fala Gaad wizdom fahn ih Werd, di Baibl, wi wahn geh blesinz.

^ par. 9 Fi egzampl, si Questions Young People Ask—Answers That Work, Volume 1, chapta. 24, 25 ahn 26, ahn Volume 2, chapta. 4 ahn 5; an Ansaz tu 10 Kweschanz Weh Yong Peepl Aks, kweschan 7, payj 21-23.

^ par. 50 DI PICHA DEHN: Wi si sohn memriz a di laif a wahn marid Witnis kopl. Di brada ahn sista deh eena di preechin werk joorin di layt 1960ʼs.

^ par. 52 DI PICHA DEHN: Eena di 1980ʼs, di brada di tek kyaa a ih waif wail shee sik ahn dehn lee daata di luk aan.

^ par. 54 DI PICHA DEHN: Tudeh, di saym kopl di luk bak pahn di memriz a dehn laif ahn dehn hapi kaaz dehn mi fala Jehoava wizdom. Dehn daata an ih famili hapi di luk pahn dehn memriz.