Skip tu di aatikl

Skip tu lis a tapik

 STODI AATIKL 20

Gi Komfert tu Peepl Weh Geh Abyooz

Gi Komfert tu Peepl Weh Geh Abyooz

“Di Gaad weh gi wi aal di komfert . . . komfert wi eena aala wi chroblz.”—2 KOR. 1:3, 4.

SANG 134 Pikni Da Wahn Rispansabiliti Fahn Gaad

WEH WI WAHN DISKOS? *

1-2. (a) Weh shoa dat hyoomanz baan wid di need fi geh komfert ahn di abiliti fi gi komfert? Yooz di egzampl eena di paragraaf. (b) How sohn pikni geh hert?

AAL hyoomanz baan wid di need fi geh komfert ahn wid di abiliti fi gi komfert. Fi egzampl, wen wahn pikni di play an ih jrap ahn skrayp op ih nee, ih mait ron tu ih Ma er Pa di krai. Di payrents kyaahn heel it, bot dehn ku gi ahn komfert. Dehn mait aks ahn weh hapm, waip ih tyaaz, tel ahn noh fi krai, put sohn medisn pan ih nee, an eevn kis ih nee. Soon afta dat, di pikni stap krai an ih mait eevn staat tu play agen. Wid taim ih nee wahn heel op.

2 Bot sohntaim, pikni geh hert faar wers dan dat. Som a dehn geh abyooz sekshwali. Di pikni mait geh abyooz wan taim er wahn lata taim fi sohn yaaz. Eena eeda sichuwayshan, di abyoos hert dehn wahn lat, ahn di payn weh dehn feel neva disapyaa. Sohntaim, di persn weh abyooz di chail geh kech ahn geh ponish. An eena ada sichuwayshan, ih mait neva geh kech er ponish. Bot eevn if di persn geh ponish rait away, di chail weh geh abyooz mait stil sofa eevn wen ih don groa op.

3. Akaadn tu 2 Korintyanz 1:3, 4, weh Jehoava waahn fi ih servant dehn? Weh kweschanz wi wahn ansa eena dis aatikl?

3 If wahn brada er sista eena di kangrigayshan mi geh abyooz az wahn chail, ahn stil di sofa bikaaz a di abyoos, weh yu ku du fi help? (Reed 2 Korintyanz 1:3, 4.) Ih klyaa fi si dat Jehoava waahn ih servant dehn geh di lov ahn komfert weh dehn need. Soh, mek wi kansida chree kweschan: (1) Wai peepl weh mi gaahn chroo abyoos az wahn chail need komfert? (2) Hoo ku gi dehn di komfert weh dehn need? (3) How wee ku komfert dehn?

 WAI PEEPL WEH GEH ABYOOZ NEED KOMFERT?

4-5. (a) Wai ih impoatant fi si dat chiljren difrent fahn adolts? (b) How abyoos mait afek wahn chail abiliti fi chros adaz?

4 Sohn peepl weh mi geh abyooz az wahn chail mait stil need komfert eevn doa dehn da wahn adolt now. Wai? Fi mek wi andastan, fos wi need fi riyalaiz dat wahn pikni faar difrent fahn wahn adolt. Abyoos naamali afek wahn pikni eena wahn difrent way fahn how ih mait afek wahn adolt hoo geh chreet bad. Mek wi luk pahn sohn egzampl.

5 Chiljren need fi bee kloas tu ahn chros dehn wan weh rayz dehn ahn tek kyaa a dehn. Wen peepl geh kloas tu di chail weh dehn di tek kayr a, ahn di chail chros dehn, ih wahn mek di chail feel sayf an ih wahn mek ih chros di peepl weh lov ahn. (Ps. 22:9) Sad fi seh, moas a di taim sekshwal abyoos hapm eena di hoam, naamali bai wahn kloas famili memba er wahn famili fren. Wen wahn chail geh abyooz bai sombadi weh ih chros, ih haad fi ih chros enibadi agen, eevn afta ih groa op.

6. Wai sekshwal chail abyoos kruwil ahn haamful?

6 Chiljren kyaahn protek dehnself, ahn sekshwal chail abyoos kruwil ahn haamful. Wen sombadi foas wahn chail fi du sekshwal tingz yaaz bifoa dehn da wahn adolt, ih ku reeli haam dehn wahn lat. Dis ku mek di chail ga di rang vyoo a seks. Ih ku aalso mek di chail feel laik ih noh wert notn an ih kyaahn chros nobadi.

7. (a) Wai ih eezi fi sombadi chrik an abyooz wahn chail, ahn how da persn mait du it? (b) Weh ku bee di rizolts a aala dehn lai?

7 Chiljren noh ga di saym abiliti az wahn adolt fi tink, fi reezn, er fi rekonaiz ahn kip weh fahn daynja. (1 Kor. 13:11) Soh ih eezi fi sombadi chrik an abyooz wahn chail. Peepl weh abyooz chiljren tel dehn aal kaina lai. Fi egzampl, dehn mait tel dehn dat di abyoos da di chail faalt, dat dehn fi kip di abyoos wahn seekrit, dat nobadi wahn lisn er kay if dehn ripoat di abyoos, er dat sekshwal abyoos da wahn naamal way fi shoa wahn chail humoch dehn lov dehn. Ih wahn tek di chail wahn lata yaaz fi laan dat aala dehndeh da loan lai. Ih ku eevn kaaz di chail fi groa op di tink dat ih damij ahn dat ih kuda neva ga wahn naamal rilayshanship, nat eevn wid Gaad.

8. Wai wi ku bee shoar dat Jehoava ku gi komfert tu peepl weh geh hert bai sekshwal abyoos?

8 Dis infamayshan help wi fi andastan wai peepl weh geh abyooz sofa fi meni yaaz. Dis da wahn reeli kruwil kraim! Wen wi si abyoos laik dis aal oava di werl, ih gi proof dat wi di liv eena di laas dayz. Wi di liv eena wahn taim wen peepl noh kay “non ataal bowt ada peepl,” ahn wen “wikid peepl ahn dehn wan weh di lai, weh di mek peepl tink seh dehn gud, wahn geh eevn wos.” (2 Tim. 3:1-5, 13) Saytan reeli eevl, an ih sad wen peepl du weh hihn waahn. Bot, Jehoava far moa schranga dan Saytan an fi hihn servants. Hihn noh blain tu Saytan chrik dehn. Wee ku bee shoar dat Jehoava si di payn weh wi di goh chroo, ahn hihn ku gi wi di komfert weh wi need. Wi soh bles dat wi di serv “di Gaad weh gi wi aal di komfert weh wi need. Hihn komfert wi eena aala wi chroblz, soh dat wee ku komfert dehn wan weh di goh chroo fi dehn oan chroblz tu. Wi komfert dehn wid di sayhn komfert weh Gaad gi wee.” (2 Kor. 1:3, 4) Bot, da hoo Jehoava yooz fi gi komfert?

 HOO KU KOMFERT PEEPL WEH GEH ABYOOZ?

9. Akaadn tu weh King Dayvid seh da Psalm 27:10, weh Jehoava wahn du fi dehn wan weh geh abandan bai dehn famili?

9 Chiljren weh geh abandan eena wahn imoashanal way bai dehn payrents er geh abyooz bai peepl weh kloas tu dehn reeli need komfert. King Dayvid mi noa dat wi ku aalwayz chros Jehoava fi komfert wi. (Reed Psalm 27:10.) * Dayvid mi shoar dat Jehoava wahn neva lef dehn wan weh geh abandan bai dehn frenz ahn famili. How Jehoava komfert dehn? Ih yooz ih faytful hyooman servants. Wi bradaz ahn sistaz eena di kangrigayshan da laik wahn famili tu wi. Fi egzampl, Jeezas seh dat enibadi weh wership Jehoava lang wid hihn da ih brada, ih sista, an ih ma.—Mach. 12:48-50.

10. How di apasl Paal diskraib ih werk az wahn elda?

10 Mek wi kansida how di Kristyan kangrigayshan ku bee laik wahn famili. Di apasl Paal da-mi wahn faytful elda weh werk haad. Hihn set wahn gud egzampl, ahn Gaad mi eevn tel hihn fi tel adaz fi kapi hihn [Paal] jos laik how hihn [Paal] kapi Krais. (1 Kor. 11:1) Noatis how Paal mi diskraib ih werk az wahn elda: “Wee mi chreet unu saaf-wan, laik wen wahn ma di tek kayr a ih baybi.” (1 Tes. 2:7) Jos laik dat, tudeh laayal eldaz ku yooz jentl werdz wen dehn yooz di Baibl fi gi komfert tu dehn wan weh need it.

Spirichwali machoar sistaz gud fi gi komfert (Paragraaf 11) *

11. Weh shoa dat da noh onli eldaz ku gi komfert?

11 Yu tink eldaz da di onli wan hoo ku gi komfert tu dehn wan weh geh abyooz? No. Aala wi ga di rispansabiliti fi komfert wan anada. (1 Tes. 4:18) Spirichwali machoar Kristyan sistaz ku bee wahn big help fi sistaz weh need komfert. Ih soh komfertin fi si how Jehoava kompyaa ihself tu wahn ma hoo di komfert ih son. Dat da di sayhn kaina komfert weh hihn gi dehn wan weh di sofa. (Isa. 66:13) Di Baibl gat een wahn lata egzampl a uman hoo gi komfert tu  dehn wan weh mi need it. (Job 42:11) Jehoava soh hapi fi si Kristyan sistaz tudeh di gi komfert tu felo sistaz hoo di sofa wid imoashanal payn! Sohntaim, di eldaz mait aks wahn spirichwali machoar sista eena praivit if shee ku help wahn nada sista weh di sofa eena da way. *

HOW WI KU KOMFERT PEEPL WEH GEH ABYOOZ?

12. Weh wi shuda bee kyaaful noh fi du?

12 Wi waahn bee kyaaful noh fi get eena peepl bizniz, espeshali wen ih kohn tu tingz weh sombadi wuda waahn kip praivit. (1 Tes. 4:11) Bot, weh wi ku du fi dehn wan weh need ahn waahn help ahn komfert? Mek wi kansida faiv wayz fahn di Baibl how wi ku komfert adaz.

13. Akaadn tu 1 Kings 19:5-8, weh Jehoava aynjel du fi Ilaija, ahn how wi ku kapi di aynjel egzampl?

13 Du sohnting weh ku help di persn weh di sofa. Wen di prafit Ilaija mi-di ron weh fahn dehn wan weh mi waahn kil ahn, hihn mi soh diskorij dat ih mi waahn ded. Jehoava mi sen wahn maiti aynjel fi vizit ahn. Di aynjel gi Ilaija di help weh ih mi need at di taim. Ih gi ahn wahn hat meel an inkorij ahn fi eet. (Reed 1 Kings 19:5-8.) * Da akonk teech wi sohnting veri impoatant: Sohntaim, di simpl tingz weh wi du fi sombadi ku bee veri helpful. Maybi yu ku gi dehn sohnting fi eet, gi dehn wahn smaal gif, er rait dehn wahn kyaad wid sohn inkorijin werdz. If ih noh eezi fi taak tu sombadi bowt how dehn di feel, wi ku du wan a dehnya helpful tingz fi shoa dat wi kay bowt dehn.

14. Weh lesn wi ku laan fahn di akonk bowt Ilaija?

14 Mek peepl weh di sofa an eena payn feel sayf ahn lov. Wi ku laan wahn nada lesn fahn di akonk bowt Ilaija. Chroo wahn mirakl, Jehoava giv ahn weh ih mi need fi waak aal di way tu Mongt Hoareb. Maybi Ilaija mi feel sayf da da plays wehpaat Jehoava mi mek ih kovenant wid ih peepl honjridz a yaaz erliya. Maybi ih mi feel dat fainali ih mi deh faar fahn wehpaat dehn mi-di chrai kil ahn. Weh wi ku laan fahn dis egzampl? If wi waahn komfert peepl weh geh abyooz, fos wi mait hafu mek dehn feel sayf. Fi egzampl, eldaz mos memba dat wahn sista weh di sofa mait feel moa sayf ahn rilaks fi taak at hoam dan da di Kingdom Haal. Bot wahn nada persn mait feel beta fi taak da di Kingdom Haal insted.

Wee ku help wi bradaz heel fahn dehn payn wen wi lisn payshent-wan, wen wi pray fahn wi haat, ahn wen wi chooz di rait werdz (Paragraaf 15-20) *

15-16. Weh ih meen fi lisn gud?

15 Lisn gud. Di Baibl gi wi dis klyaa advais: “Eech wan a unu shuda hori fi lisn. Tek yu taim bifoa yu taak.” (Jaymz. 1:19) Yoo lisn gud? Wi mait tink dat fi lisn gud meenz dat wi haftu luk pahn di persn weh di taak ahn noh seh notn. Bot fi lisn gud meen moch moa dan dat. Fi egzampl, wen Ilaija mi fainali poar owt ih haat tu Jehoava, ahn tel ahn how bad ih mi feel, Jehoava mi reeli lisn. Hihn mi andastan dat Ilaija mi frayd, dat ih mi feel laik ih deh bai ihself, an dat ih mi tink dat aal di werk weh ih mi du da-mi fi notn. Jehoava shoa dat hihn mi reeli lisn tu Ilaija.—1 Ki. 19:9-11, 15-18.

 16 Wen wi lisn tu di brada er sista weh di sofa, how wi ku shoa kompashan ahn lov fi dehn? Sohntaim, wahn fyoo kain werdz ku shoa how wi feel. Yu mait seh sohnting laik: “Ah soh sari bowt weh hapm tu yu! No chail shuda eva haftu goh chroo dat!” Maybi yu ku aks wahn kopl kweschan fi andastan weh di persn di seh. Yu mait aks, “Yu ku pleez help mi fi andastan weh yu meen?” er “Wen yu seh dat, Ai andastan dat . . . Dat da weh yu meen?” Wen yu du dat, yu mait kanvins di persn dat yu reeli di lisn ahn yu di mek shoar dat yu andastan.—1 Kor. 13:4, 7.

17. Wai yu shuda bee payshent ahn “tek yu taim bifoa yu taak”?

17 Memba fi aalwayz “tek yu taim bifoa yu taak.” Noh intarop di persn fi gi dehn advais er fi karek di way dehn di tink. Ahn bee payshent! Wen Ilaija mi fainali poar owt ih haat tu Jehoava, hihn mi eena payn an ih mi taak wid deep sadnis eena ih haat. Laytaraan, afta Jehoava mi schrentn Ilaija fayt, Ilaija poar owt ih haat tu Jehoava agen an ih mi yooz di sayhn werdz. (1 Ki. 19:9, 10, 13, 14) Weh dat teech wi? Sohntaim peepl weh eena payn ahn di sofa need fi poar owt dehn haat moa dan wan taim. Laik Jehoava, wi waahn lisn wid payshens. Rada dan chrai fi tel dehn how fi solv dehn prablemz, wi waahn shoa dehn lov ahn kompashan.—1 Peet. 3:8.

18. How wi pryaaz ku komfert sombadi weh di sofa ahn deh eena payn?

18 Pray wid di persn weh eena payn. Peepl weh dipres mait fain it haad fi pray. Dehn mait feel laik dehn noh kwalifai fi taak tu Jehoava. Wan way wi ku komfert dehn da if wi pray wid dehn, ahn yooz dehn naym wen wi di pray. Eena di pryaa wi ku tel Jehoava humoch wee ahn di kangrigayshan lov di persn. Wi mait aks Jehoava fi mek di persn weh di  sofa feel sayf ahn geh di komfert weh ih need. Pryaaz laik dehnya ku reeli komfert dehn.—Jay. 5:16.

19. Weh ku help wi pripyaa fi komfert sombadi?

19 Pik werdz weh heel ahn gi komfert. Tink bifoa yu taak. Wen yu haysti fi taak, yu ku en op di hert di persn. Bot kain werdz ku heel. (Prov. 12:18) Soh pray tu Jehoava fi help yu fain kain ahn komfertin werdz fi yooz. Memba dat di bes way fi komfert sombadi da if wi yooz Gaad Werd, di Baibl.—Heeb. 4:12.

20. Weh sohn bradaz er sistaz mait tink bikaaz dehn geh abyooz, ahn weh wi waahn dehn noa?

20 Sohn bradaz ahn sistaz weh mi geh abyooz mait bee kanvins dat dehn doti, er dat dehn noh gud inof fi enibadi lov dehn. Dat da wahn big lai! Soh yooz di Skripchaz fi rimain dehn dat Jehoava lov dehn wahn lat. (Si di baks “ Wi Ku Geh Komfert Fahn di Baibl.”) Memba how Jehoava yooz wahn aynjel fi schrentn di prafit Danyel wen ih mi-di feel week ahn loa. Di aynjel mi kain tu Danyel an ih mi rimain ahn dat hihn preshos tu Jehoava. Da-mi akchwali Jehoava hoo mi waahn mek Danyel noa dat. (Dan. 10:2, 11, 19) Sayhn way soh, fi wee bradaz ahn sistaz weh di sofa an eena payn preshos tu Jehoava!

21. Weh wahn hapm tu evribadi weh du bad tingz ahn noh ripent, bot weh wi shuda waahn du fi peepl weh neva geh chreet eena wahn fyaa way?

21 Wen wi komfert adaz, wi rimain dehn dat Jehoava lov dehn. Ahn wi mos neva faget dat Jehoava da aalso wahn Gaad a Jostis. Eevn if nobadi els noh si, Jehoava noa bowt evri kaina wikidnis. Hihn si evriting, ahn hihn wahn mek shoar dat evribadi weh abyooz wahn chail ahn noh ripent geh ponish. (Num. 14:18) Eena di meentaim, mek wi du aal weh wi kud fi shoa dehn wan weh geh abyooz dat wi lov dehn. Ih soh komfertin fi noa dat Jehoava wahn tek ih taim ahn heel aala dehn wan hoo mi geh abyooz eena Saytan werl! Soon, dehnya paynful tingz wahn neva eva kom op eena wi haat er main agen.—Isa. 65:17.

SANG 109 Lov Wan Anada Fahn di Haat

^ par. 5 Peepl weh gaahn chroo sekshwal abyoos wen dehn da-mi wahn chail mait fays wahn lata chalenjiz, eevn yaaz layta. Dis aatikl wahn help wi fi andastan wai. Wi wahn aalso laan hoo mait ku komfert dehn. Ahn fainali, wi wahn aalso laan sohn gud wayz how wi ku gi dehn komfert.

^ par. 9 Psalm 27:10: “Eevn if mi oan pa ahn ma abandan mi, Jehoava wahn neva lef mi.”

^ par. 11 Wahn persn weh geh abyooz ku disaid fi ihself weda er nat ih gwehn da wahn dakta fi help.

^ par. 13 1 Kings 19:5-8: “Den hihn lidong ahn faal asleep anda di broom chree. Bot sodn-wan wahn aynjel mi toch ahn an tel ahn: ‘Get op an eet.’ Wen ih oapm ih aiy, ih si wahn rong loaf a bred pahn sohn hat stoan ahn wahn jaar a waata kloas tu ih hed. Ih mi eet ahn jrink an ih gaahn bak gaahn sleep. Layta, Jehoava aynjel mi kohn bak wahn sekant taim ahn toch ahn an tel ahn: ‘Get op an eet, kaaz di jerni wahn bee tu moch fi yu.’ Soh hihn get op an eet ahn jrink, ahn di schrent weh ih geh fahn da food mi nof fi 40 dayz ahn 40 naits til ih reech Hoareb, di mongtin a di chroo Gaad.”

^ par. 78 DI PICHA DEHN: Wahn spirichwali machoar sista di komfert wahn sista weh di sofa fahn imoashanal payn.

^ par. 80 DI PICHA DEHN: Too eldaz vizit wahn sista weh di sofa fahn imoashanal payn. Shee invait wahn spirichwali machoar sista fi dehdeh wid ahn.