Skip tu di aatikl

Skip tu lis a tapik

 STODI AATIKL 22

Du Beta Eena di Way Yu Stodi!

Du Beta Eena di Way Yu Stodi!

“Mek shoar a di moa impoatant tingz.”—FIL. 1:10.

SANG 35 Put Impoatant Tingz Fos

WEH WI WAHN DISKOS? *

1. Wai sohn peepl noh laik stodi?

NOWADAYZ, ih noh eezi fi mek wahn livin. Lata wi bradaz haftu werk lata owaz fi provaid food, kloaz, ahn shelta fi dehn famili. Ahn som haftu spen lata taim di chravl tu werk. Wahn lata wi bradaz mek dehn lee moni di du haad werk. Bai di en a di day, dehnya haad werkin bradaz ahn sistaz veri taiyad! Dehn mait feel soh taiyad dat di laas ting weh dehn wuda waahn du da stodi.

2. Wen yoo persnali fain taim fi stodi?

2 Eevn doa ih mait haad, wi haftu fain di taim fi reeli stodi di Werd a Gaad ahn di poblikayshanz weh di aaganaizayshan provaid. Dis reeli nesiseri if wi waahn ga wahn gud rilayshanship wid Jehoava ahn liv fareva! (1 Tim. 4:15,16) Sohn peepl get op erli evri day ahn stodi wen evriting kwaiyet ahn dehn feel rilaks afta wahn gud sleep. Adaz tek wahn fyoo minits afta wahn haad day a werk, wen dehn noh ga no dischrakshan, fi reed ahn meditayt pahn di Baibl an ada poblikayshanz.

3-4. Wat da sohn chaynjiz weh geh mek tu di amonk a infamayshan weh wi need fi reed, ahn wai?

3 Fi shoar yu wuda agree dat ih veri impoatant fi fain taim fi stodi. Bot weh wi shuda stodi? Yu mait seh: ‘Soh moch deh fi reed dat ih haad fi kip op ahn reed evriting.ʼ Som bradaz ku manij fi reed aala di poblikayshan ahn wach aala di veedyo dehn weh kom owt. Bot adaz schrogl fi fain taim fi du it. Di Govanin Badi noa dis. Dat da wai dehn mek sohn ajosment soh dat di amonk a spirichwal food dehn provaid, eeda eena print er dijital faam, jos inof fi mek evribadi ku benifit fan it.

 4 Fi egzampl, wi noh poblish di Yearbook of Jehovahʼs Witnesses nohmoh, kaaz wi ku fain lata inkorijin ekspeeryens pahn jw.org® ahn pahn JW Braadkyaastin evri mont. Now, di poblik kapi a di Wachtowa an Awayk! magazeen geh poblish jos chree taimz fi di yaa. Wi neva geh dehnya ajosment fi mek wi ga les taim fi Jehoava. Insteda dat, di reezn wai di Govanin Badi mek dehndeh chaynjiz da fi mek wi kuda ga moa taim fi foakos pahn “di moa impoatant tingz.” (Fil. 1:10) Mek wi diskos how yu ku disaid weh moa impoatant eena laif ahn how yu ku benifit fahn persnal Baibl stodi.

DISAID WEH MOA IMPOATANT

5-6. Weh poblikayshanz wi shuda mek shoar fi stodi?

5 Weh wi shuda chooz fi stodi fos? Wi fi mek shoar dat wi fain taim evri day fi stodi Gaad Werd. Di amonk a vers weh wi ga fi reed fi di kangrigayshan Baibl reedin evri week da les soh dat wi ga inof taim fi tink bowt weh wi reed ahn du ekschra risaach. Wi goal shudn bee fi jos reed fi reed sayk bot wi shuda alow di mesij fahn di Baibl fi reech deep eena wi haat, soh dat wi ku jraa kloasa tu Jehoava.—Ps. 19:14.

6 Wat els wi shuda tek taim fi stodi? Af koars, wi waahn pripyaa di Wachtowa Stodi, di Kangrigayshan Baibl Stodi, ahn di ada infamayshan fi di midweek meetin. Wi shuda aalso reed Di Wachtowa ahn di Awayk!

7. Yu tink wi shuda geh diskorij bikaaz wi kyaahn reed er wach evriting weh deh pahn wi websait ahn pahn JW Braadkyaastin?

7 Yu mait seh: ‘Aarait, bot how bowt aala di ada aatikl dehn ahn veedyo dehn weh deh pahn di jw.org websait ahn JW Braadkyaastin? Lata infamayshan deh!ʼ Kansida dis iloschrayshan: Dehn ga wahn lata food avaylabl eena wahn bofay da wahn restorant. Di kostoma dehn kuda neva tays evri singl food weh dehdeh. Soh dehn chooz jos wahn fyoo. Sayhn way soh, if yoo kyaahn kip op wid evri poblikayshan er veedyo weh deh pahn di ap er di websait, noh geh diskorij. Reed er wach weh yu kud. Mek wi diskos weh ih reeli meen fi stodi ahn weh wi ku du soh dat wi ku benifit az moch az pasabl.

STODI MEENZ MOA DAN JOS REED!

8. Weh wi ku du wen wi di stodi Di Wachtowa, ahn how yu wahn benifit wen yu du dat?

8 Fi stodi meenz fi reed ahn foakos pahn weh yu di reed soh dat yu ku laan sohnting. Da noh jos fi reed di infamayshan an andalain di ansaz. Fi egzampl, wen yu di pripyaa fi di Wachtowa Stodi, yu fi luk pahn di paat weh naym ‘Weh wi wahn diskos.ʼ Den, reed ahn tink bowt di taitl a di aatikl, di sobhedin dehn, ahn di rivyoo kweschanz da di en a di aatikl. Den, reed di aatikl sloa inof soh dat yu ku andastan weh yu di reed. Pay atenshan tu di tapik sentens weh tel yu weh di paragraaf bowt. Di tapik sentens da naamali di fos sentens eena evri paragraaf. Az yu di reed chroo di aatikl, tink bowt di way eech paragraaf link wid di sobhedin dehn ahn wid di mayn teem a di aatikl. Maak eni werd ahn lesn weh yu noh noa ahn weh yu wuda waahn laan moa bowt.

9. (a) Wai ahn how wi shuda pay speshal atenshan tu di skripchaz wen wi di stodi Di Wachtowa? (b) Akaadn tu Joshua 1:8, pahn tap a reed di skripchaz, weh wi shuda du?

9 Wen wi stodi di Stodi Kapi a di Wachtowa da wi kangrigayshan meetin, ih help  wi fi andastan di Baibl beta. Pay speshal atenshan tu di skripchaz, espeshali dehn wan weh da fi reed joorin di meetin. Aalso, mek shoar yu noatis how di werdz ahn groop a werdz eena di vers dehn bring owt di mayn aidyaa a di paragraaf. Wen yu reed, mek shoar yu tek di taim fi tink bowt di skripchaz ahn bowt how yoo ku yooz dehn persnali eena yu laif.—Reed Joshua 1:8. *

Payrents, teech yu chiljren how fi stodi (Paragraaf 10) *

10. Bays pahn weh wi laan da Heebrooz 5:14, wai payrents shuda spen taim joorin famili wership fi teech dehn chiljren how fi stodi ahn du risaach?

10 Ih nachral fi mek payrents waahn dehn chiljren injai dehn Famili Wership evri week. Bot eevn doa payrents shuda aalwayz plan weh dehn waahn diskos wid dehn chiljren joorin famili wership, dehn noh need fi du speshal an eksaitin proajeks evri week. Joorin wi Famili Wership taim, wi ku wach di proagram pahn JW Braadkyaastin er now an agen wi ku du sohn speshal proajek laik bil wahn modl a di aak weh Noawa mi bil. Bot ih aalso impoatant dat wi teech wi chiljren how fi stodi. Wi ku du dis eena difrent wayz, laik pripyaa fi kangrigayshan meetinz, er du risaach bowt wahn prablem weh kom op da skool. (Reed Heebrooz 5:14.) Moas chiljren rada wach wahn veedyo insteda reed bot if dehn spen taim di stodi Baibl tapiks hoam, ih wahn eeziya fi dehn fi pay atenshan da di meetin, asembli, ahn kanvenshan dehn, weh noh aalwayz inklood wahn veedyo er sohnting eksaitin. Af koars, di amonk a taim wahn payrent disaid fi spen di stodi wid ih chiljren aal dipenz pahn dehn ayj ahn persnaliti.

11. Wai ih impoatant dat wi teech wi Baibl styoodents how fi stodi pahn dehn oan?

11 Wi Baibl styoodents aalso need fi laan how fi stodi. Wen dehn jos staat tu stodi di Baibl, wi hapi if dehn onli andalain di ansaz wen dehn pripyaa fi dehn Baibl stodi er fi di kangrigayshan meetin dehn. Bot wi doo need fi teech wi Baibl styoodents how fi du risaach ahn how fi stodi an andastan pahn dehn oan. Den, wen dehn ga prablemz, dehn noh wahn need fi aks ada membaz a di kangrigayshan weh dehn shuda du. Insteda dat, dehn wahn noa how fi fain infamayshan eena wi poblikayshanz weh wahn help dehn.

 STODI WID WAHN GOAL EENA YU MAIN

12. Weh goalz wi mait ga wen wi di stodi?

12 If yoo da wahn persn weh noh laik stodi, yu mait tink yu wahn ku neva injai stodi. Bot if dat da how yu tink, yu rang. Fos, yu ku staat tu stodi jos fi wahn shaat taim, den yu ku sloali tek lee moa taim fi stodi. Stodi wid wahn goal eena yu main. Af koars, wi mayn goal da fi jraa kloasa tu Jehoava. Wahn nada goal mait bee fi ansa wahn kweschan weh sombadi aks er fi risaach pahn wahn prablem weh wi di goh chroo.

13. (a) Pleez eksplayn weh wahn yong persn ku du fi difen weh ih bileev eena wen ih deh da skool. (b) How wahn yong persn ku aplai di kongsl da Koloashanz 4:6?

13 Jos az wahn egzampl, yoo da wahn yong persn weh di goh da skool? Aala yu klaasmayt dehn mait selibrayt dehn bertday. Fi shoar, yoo wuda waahn eksplayn tu dehn fahn di Baibl wai yu noh jain eena dehn selibrayshan, bot yu mait feel laik yu noh noa how fi du it. Yu noa weh dat meenz? Ih meen dat yu need fi du wahn stodi proajek! Yu ga too reezn: (1) fi schrentn yu fayt dat Gaad noh pleez wid bertday selibrayshan ahn (2) fi laan how fi eksplayn di chroot fahn Gaad Werd beta. (Mach. 14:6-11; 1 Peet. 3:15) Yu mait aks yuself, ‘Wai mi klaasmayt dehn selibrayt bertday?ʼ Den kyaafuli risaach di sobjek eena wi poblikayshan dehn. Yu wahn si dat ih wahn bee eeziya fi eksplayn yu bileef dehn. Moas peepl selibrayt bertday jos bikaaz dehn tink dat evribadi els du it. Yoo ku help sombadi weh reeli waahn laan di chroot if yu fain jos wan er too faks weh yu ku taak tu dehn bowt.—Reed Koloashanz 4:6.

GA DI DIZAIYA FI WAAHN LAAN MOA

14-16. (a) Weh yu ku du fi laan moa bowt wahn buk fahn di Baibl yu noh noa moch bowt? (b) Eksplayn how di skripchaz eena dis paragraaf ku help yu andastan di buk a Amos beta. (Si di baks “ Mek di Baibl Reel tu Yoo!”)

14 Imajin dat da wahn kangrigayshan meetin wi wahn reed ahn diskos wan a di Baibl buks fahn Hosea tu Malachi. Di fos ting yu mait waahn du da noa moa bowt weh di prafit mi rait bowt. How yu ku du dat?

15 Fos, aks yuself: ‘Weh Ai noa bowt dis prafit? Da-mi hoo hihn? Wehpaat hihn mi liv? Weh kaina werk hihn yoostu du?ʼ Wen wi laan moa bowt di raita, wi wahn andastan beta wai hihn mi yooz di werdz er iloschrayshan dehn weh wi fain eena da buk. Az yu reed di Baibl, luk fi di points dehn weh help yu imajin weh kaina persn di raita.

16 Neks, yu wahn fain it helpful fi put di difrent paats a di Baibl eena aada akaadn tu wen dehn mi rait it. Yu ku du dat if yu chek da di bak a di New World Translation of the Holy Scriptures anda Table of the Books of the Bible.” * Yu ku aalso luk pahn di chaat a di prafit ahn king dehn anda Appendix A6. If di Baibl buk yu di stodi da bowt prafesi, ih wuda bee gud fi mek yu fain owt how peepl yoostu liv wen di prafit mi rait da buk. Weh bad atichood er praktis a di peepl bak den di prafit mi sopoas tu help dehn wid? Hoo mi liv rong di saym taim laik di raita? Fi mek yu andastan it beta, yu mait haftu luk intu ada Baibl buks. Fi egzampl, fi andastan beta weh mi-di hapm wen di prafit Aymos mi livin, ih wuda help if yu reed sohn vers  fahn di buk a 2 Kings ahn 2 Chronicles, weh deh az kraas refrens * fi Amos 1:1 eena di Baibl. Yu ku aalso reed sohn vers fahn di buk a Hosea sins hihn mi liv rong di saym taim az Aymos. If yu luk intu dehnya ada Baibl buk, yu wahn andastan beta how laif mi stan bak den.—2 Ki. 14:25-28; 2 Chron. 26:1-15; Hos. 1:1-11; Amos 1:1.

PAY ATENSHAN TU DI LEELES A DEETAYL

17-18. Yooz di egzampl dehn eena di paragraaf er shayr wahn egzampl weh yoo mait ga fi shoa how infamayshan weh noh luk laik ih impoatant ku help wi injai wi persnal Baibl stodi eevn moa.

17 Wen wi reed di Baibl, ih gud fi ga wahn schrang dizaiya fi laan moa. Jos az wahn egzampl, seh yu di reed Zechariah chapta 12 weh taak bowt di det a di Mesaiya. (Zech. 12:10) Wen yu reech da vers 12, yu reed dat “di famili a Naytan” wuda baal ahn baal kaaz di Mesaiya ded. Insteda ignoar dis lee deetayl, yu ku stap ahn aks yuself: ‘Weh Naytan famili ga fi du wid di Mesaiya? Weh Ah ku du fi geh moa infamayshan?ʼ Eena dis kays, yoo ku ak laik wahn ditektiv. Dis inchrestin noh chroo? Wahn kraas refrens leed yu tu 2 Samuel 5:13, 14, wehpaat yu laan dat Naytan da-mi wan a King Dayvid son. Wahn sekant kraas refrens deh da Look 3:23, 31, weh seh dat Jeezas da-mi wahn faar relitiv a Naytan chroo Mayri. (Si “Joseph, son of Heli,” stodi noat fi Look 3:23, NW.) Now dis moa inchrestin! Yu praabli mi don noa dat dehn mi ga wahn prafesi weh seh dat Jeezas mi wahn kohn fahn di famili lain a Dayvid. (Mach.  22:42) Bot Dayvid mi ga moa dan 20 son. Ih amayzin fi reed dat Zekaraiya bring owt dat da di famili a Naytan weh mi wahn moarn di det a Jeezas.

18 Kansida wahn neks egzampl. Eena di fos chapta a Look, wi reed dat di aynjel Gaybral mi tel Mayri sohnting amayzin bowt di son weh shee mi wahn gi bert tu: “Hihn wahn bee grayt, ahn dehn wahn kaal ahn di Son a di moas hai Gaad. Di Laad Gaad wahn gi ahn ih grayt-grayt-grayt-granfaada Dayvid chroan, Ih wahn rool [az King] oava di peepl a Izrel dehn fareva.” (Look 1:32, 33) Ih mait bee nachral fi mek wi foakos onli pahn di fos ting weh Gaybral mi taak bowt. Di paat weh seh: “Son a di moas hai Gaad.” Bot Gaybral mi aalso prafesai dat Jeezas mi wahn “rool az King.” Soh wi mait wanda weh Mayri mosi mi tink Gaybral mi-di taak bowt. Yu tink shee mi tink dat Gaybral mi-di seh dat Jeezas mi wahn tek di plays a King Herod—er tek di plays a wan a di ada roolaz a Izrel? If Jeezas da-mi di king, den Mayri wuda bee di ma a di king ahn fi shee famili mi wahn liv eena di raayal palis. Bot di Baibl noh seh dat Mayri mi seh eniting laik dis tu Gaybral, ner dat Mayri mi aks fi wahn gud pozishan eena di Kingdom laik weh too a Jeezas disaipl mi aks. (Mach. 20:20-23) Dis deetayl kanvins wi dat Mayri da-mi wahn reeli hombl uman!

19-20. Akaadn tu Jaymz 1:22-25 ahn 4:8, weh shuda bee wi foakos wen wi stodi?

19 Wi shuda aalwayz memba dat di mayn reezn wai wi stodi Gaad Werd ahn wi Kristyan poblikayshanz da bikaaz wi waahn jraa kloasa tu Jehoava. Wi wahn ku si beta hoo wee pahn di eensaid ahn weh chaynjiz wi need fi mek soh dat wi ku pleez Gaad. (Reed Jaymz 1:22-25; 4:8.) Evritaim wi staat tu stodi, wi shuda aks Jehoava fi ih hoali spirit. Wi shuda bayg ahn fi help wi benifit fahn aal di infamayshan weh wi stodi ahn fi mek wi ku si wiself di way hihn si wi ahn mek di nesiseri chaynjiz fi improov.

20 Aala wi shuda bee laik di faytful servant a Gaad weh di saamis taak bowt: “Bot fi hihn jai deh eena di laa a Jehoava, an ih reed it ahn stodi it day ahn nait. . . . Evriting weh ih du wahn ga sokses.”—Ps. 1:2, 3.

SANG 88 Teech Mi Yu Wayz

^ par. 5 Jehoava gi wi lata infamayshan fi wach, fi reed, ahn fi stodi. Dis aatikl gi praktikal sojeshanz weh ku help yu fi benifit az moch az pasabl fahn yu persnal stodi.

^ par. 9 Joshua 1:8: “Dis buk a di Laa fi aalwayz bee pahn yu haat, ahn yu fi reed it day ahn nait, soh yu ku tek kyaa fi du aal weh deh een deh. Den yu wahn ga sokses ahn yu wahn ak wid wizdom.”

^ par. 16 Yu ku aalso si di inchrodokshan veedyo dehn pahn jw.org/bzj fi get fi noa wahn buk a di Baibl. Luk anda POBLIKAYSHANZ > VEEDYO > DI BAIBL.

^ par. 16 Kraas refrens da sohn ada Baibl vers weh kanek tu di skripcha weh yu di reed. Dehn deh da di midl a di payj dehn eena di New World Translation of the Holy Scriptures.

^ par. 64 DI PICHA DEHN: Payrents di teech dehn pikni how fi pripyaa fi di Wachtowa Stodi.

^ par. 66 DI PICHA DEHN: Wahn brada di du risaach bowt di Baibl raita Aymos. Di picha dehn eena di bakgrong gi wahn aidyaa a weh di brada di imajin az hihn reed chroo di Baibl akonk dehn ahn tink bowt weh ih di reed.