Skip tu di aatikl

Skip tu lis a tapik

Pees—How Yu Ku Fain It?

Pees—How Yu Ku Fain It?

BIKAAZ wi di liv eena wahn werl weh ful op a chrobl, wi haftu werk haad fi ga pees. An eevn wen wi ga wahn lee bit a pees eena wi laif, wi stil schrogl fi kip it. Akaadn tu di Baibl, weh ku help wi fain chroo pees weh wahn laas fareva? Ahn how wi ku help adaz fain da saym pees?

WEH WI NEED FI GA CHROO PEES?

Fi mek wi injai chroo pees, wi haftu feel sayf ahn kaam eena wi haat. Wi aalso need fi ga schrang frenship wid adaz. Ahn di moas impoatant ting da fi mek wi ga wahn kloas frenship wid Gaad. How wi ku du dat?

Woriz eena laif ku mek wi looz wi pees

Wen wi obay di koman ahn prinsipl dehn fahn Jehoava, wi shoa dat wi chros hihn ahn dat wi waahn ga wahn peesful rilayshanship wid hihn. (Jer. 17:7, 8; Jay. 2:22, 23) Den, hihn wahn kohn kloas tu wi ahn bles wi wid wahn kaam haat. Isaiah 32:17 seh: “Di rizolt a chroo raichosnis wahn bee pees, ahn bikaaz a chroo raichosnis wi wahn ga kaamnis weh laas fareva ahn wi wahn feel sayf.” Wi ku fain chroo pees wen wi obay Jehoava fahn wi haat.—Isa. 48:18, 19.

Jehoava, wi hevnli Faada, gi wi ih hoali spirit weh ku help wi ga pees.—Aks 9:31.

GAAD SPIRIT KU HELP WI GA PEES

Di apasl Paal mi menshan pees az di terd kwaliti weh kohn fahn Gaad spirit. (Gal. 5:22, 23) Sins chroo pees da fahn Gaad spirit, wi haftu alow di hoali spirit fi gaid wi if wi waahn ga chroo pees. Mek wi laan bowt  too wayz how Gaad spirit ku help wi fain pees.

Fos, wi ku ga pees if wi reed di Baibl evri day. (Ps. 1:2, 3) Wen wi stap ahn tink bowt weh di Baibl di seh, Gaad spirit help wi fi andastan how Jehoava tink. Fi egzampl, wi laan how hihn stay peesabl ahn wai pees soh impoatant tu hihn. Wen wi aplai weh wi laan fahn di Baibl eena wi laif, wi wahn ga moa pees.—Prov. 3:1, 2.

Sekant, wi haftu pray fi Gaad hoali spirit. (Look 11:13) Jehoava pramis dat if wi aks ahn fi help, fi hihn pees, ‘weh nobadi kyaahn andastan, wahn wach oava wi haat ahn main.ʼ (Fil. 4:6, 7) Wen wi aalwayz pray fi Jehoava spirit, wi Gaad wahn gi wi pees eena wi haat. Dis kaina pees da onli fi dehn wan weh ga wahn preshos frenship wid hihn.—Roam. 15:13.

How sohn peepl mi aplai dis kongsl fahn di Baibl? Weh chaynjiz dehn mi mek fi ga pees wid Jehoava, wid dehnself, ahn wid adaz?

HOW DEHN MI FAIN CHROO PEES

Eena di Kristyan kangrigayshan tudeh, wi ga som a wi bradaz ahn sistaz hoo mi haftu deel wid anga eena di paas. Bot now dehn moa kain, payshent, ahn peesabl wid adaz. * (Prov. 29:22) Mek wi luk pahn di egzampl a wahn brada ahn sista ahn si how dehn mi geh help fi deel wid dehn anga ahn how dehn di injai pees wid adaz now.

Wen wi aplai Baibl prinsiplz ahn pray fi Gaad spirit, wi wahn ga pees

David yoostu ga wahn bad atichood weh mi mek ih taak tu ih famili eena wahn rof way. Bifoa ih mi staat serv Jehoava, ih yoostu tink negitiv bowt adaz. David riyalaiz, doh, dat ih mi need fi chaynj ahn bee moa peesabl. Weh mi help ahn fain pees? Ih seh: “Ah staat tu aplai di prinsipl dehn fahn di Baibl eena mi laif, ahn bikaaz a dat, wi ga moa rispek fi wan anada eena wi famili.”

 Rachel yoostu schrogl wid ih atichood. Shee seh: “Op tu now, Ah stil schrogl wid anga bikaaz Ah mi groa op eena wahn famili weh mi aalwayz beks wid wan anada.” Weh mi help ahn fi bee moa peesabl? Shee seh: “Ah pray aal di taim tu Jehoava.”

Di egzampl a David ahn Rachel shoa wi dat wen wi aplai di prinsipl dehn fahn di Baibl an aks Gaad fi ih spirit, wi wahn ga pees eena wi laif. Soh eevn doa wi di liv eena wahn vailent werl, wi ku stil ga pees eena wi haat. Dis pees help wi fi ga yooniti eena wi famili ahn wid wi spirichwal bradaz ahn sistaz. Bot Jehoava tel wi fi “liv peesabl wid evribadi.” (Roam. 12:18) Yu tink dat reeli pasabl? Ahn wat da di benifits wen wi mek di efoat fi ga pees wid adaz?

WERK FI GA PEES WID ADAZ

Chroo wi preechin werk, wi invait peepl fi benifit fahn wi peesful mesij bowt di Kingdom a Gaad. (Isa. 9:6, 7; Mach. 24:14) Wi hapi fi si dat lata peepl waahn dis pees. Now, dehn noh feel anga wen dehn si weh di hapm rong dehn, ahn dehn noh feel laik no hoap deh. Insteda dat, dehn ga wahn reel hoap fi di fyoocha ahn werk fi ga pees wid adaz.—Ps. 34:14.

Noh evribadi waahn hyaa wi mesij, at lees noh fi di fos taim. (Jan 3:19) Bot, Gaad spirit help wi fi shayr di gud nyooz tu dehn eena wahn peesful way weh shoa rispek. Dis help wi fi fala Jeezas werdz da Machyu 10:11-13, weh ih seh: “Wen unu goh da sohnbadi hows, pay yu rispek. If di peepl dehn deh dizerv it, mek unu blesin [pees] stay wid dehn. Bot if dehn noh dizerv it, tek bak unu blesin [pees].” Wen wi fala Jeezas advais, wi wahn lef fahn wahn persn hoam wid wahn peesful feelin ahn hoap dat di persn wahn lisn neks taim.

Wen wi meet peepl weh deh eena govament, eevn dehn wan weh deh gens wi werk, wi chreet dehn wid rispek. Wen wi du dis, wi di shoa dat wee da peesabl peepl. Fi egzampl, di govament fahn wan a di konchri dehn da Africa mek prejudis stap dehn fahn gi wi permishan fi bil wi Kingdom Haal. Wahn brada weh mi serv az wahn mishineri eena da saym konchri da Africa, mi geh asain fi vizit di Hai Komishana da London, England. Ih mi-di hoap dehn ku setl di mata eena wahn peesful way. Ih mi fi menshan tu di ofishal bowt di peesful werk a Jehoava Witnisiz eena fi hihn konchri. How da vizit mi gaan?

Di brada seh: “Wen Ah get da di front des, Ah noatis rait away dat di laydi weh di werk deh, da fahn wahn chraib da Africa, an Ai noa di langwij. Soh, Ah greet ahn eena ih oan langwij. Shee mi sopraiz, soh ih aks mi, ‘Wat da di perpos a yu vizit?ʼ Ah tel ahn eena wahn kaam way dat Ah mi waahn si di Hai Komishana. Shee foan di ofishal. Ih kom owt fi meet mi ahn greet mi eena di loakal langwij. Afta dat, ih lisn tu mi az Ah mi-di eksplayn tu ahn bowt di peesful werk a di Witnisiz.”

Bikaaz di brada eksplayn ihself wid rispek, di Komishana chaynj ih atichood tuwaadz di Witnisiz. Laytaraan, di govament eena da konchri da Africa mi gi di bradaz permishan fi bil dehn Kingdom Haal. Di bradaz mi soh hapi bowt di peesful rizolt!. Soh wen wi chreet adaz wid rispek, wi ekspeeryens pazitiv benifits—inkloodin pees.

INJAI PEES FAREVA

Tudeh, Jehoava peepl di liv eena wahn peesful spirichwal paradais. Yu wahn ad tu da pees di moa yu werk fi ga dis kwaliti a di froot a di spirit eena yu laif. Den Jehoava wahn pleez wid yu, an eena fi hihn nyoo werl, yu wahn ga pees weh wahn laas fareva.—2 Peet. 3:13, 14.

^ par. 13 Wi wahn taak bowt kainis eena di neks aatikl a dis seeriz.