Skip tu di aatikl

Skip tu lis a tapik

Jehoava Lov di Wan Dehn Weh Bayr Froot ahn Noh Giv Op

Jehoava Lov di Wan Dehn Weh Bayr Froot ahn Noh Giv Op

“Bot dehn seed weh jrap pahn di gud grong, dehn da laik dehn peepl weh yehr di Werd . . . ahn sayka weh dehn neva giv op, wahn lata gud ting kom owta fi dehn laif.”—LOOK 8:15.

SANG: 68, 72

1, 2. (a) Wai wi feel inkorij fahn di egzampl a faytful bradaz ahn sistaz hoo preech eena teritori weh peepl haadli waahn lisn? (Koment pahn di picha da di biginin a dis aatikl.) (b) Weh Jeezas mi seh bowt ih “hoamtong” wen ih kohn tu di preechin werk? (Koment pahn di futnoat.)

SERGIO AN OLINDA da wahn painyaa kopl weh deh eena dehn 80ʼs; dehn liv eena di United States. Laytli doh, di payn eena dehn fut di mek it haad fi dehn moov rong. Bot stil, eena di maanin dehn waak tu wahn bizi paat a tong. Dehn put dehn lichricha kyaat kloas tu wahn bos terminal an aafa Baibl lichricha tu di peepl weh di paas bai. Moas peepl ignoar dehn, bot di kopl stay rait deh ahn smail wid enibadi hoo luk pahn dehn. Twelv aklak dehn waak bak hoam. Sevn aklak di neks maanin dehn deh rait deh agen, da di saym spat. In fak, siks dayz a week fi di hoal yaa, dis faytful kopl di shayr di Kingdom mesij.

2 Jos laik Sergio an Olinda, wahn lata faytful bradaz ahn  sistaz rong di werl di preech fi yaaz eena teritori weh peepl haadli waahn lisn. If yoo di preech eena wahn teritori laik dis, wi komen yu fi how yu noh giv op. * Yu laayalti eena yu servis tu Jehoava inkorij wahn lata di bradaz; eevn bradaz wid wahn lata ekspeeryens feel inkorij tu. Noatis weh sohn serkit oavaseeya seh. Wan a dehn seh: “Ah geh schrent fahn dehnya faytful bradaz ahn sistaz wen Ah werk wid deh eena di minischri.” Wahn neks wan seh: “Dehn faytful egzampl inkorij mi fi noh giv op ahn fi ga korij eena mi oan minischri.” Ahn wahn nada wan seh: “Fi dehn egzampl waam mi haat.”

3. Weh chree kweschanz wi wahn diskos, ahn wai?

3 Wi need fi schrentn wi disizhan fi finish di preechin werk weh Jeezas mi gi wi fi du. Soh mek wi taak bowt di ansa tu dehnya chree kweschan: Wai wi feel diskorij sohntaim? How wi ku bayr froot? Ahn weh wahn help wi fi kip aan di bayr froot ahn noh giv op?

WEH MAIT MEK WI FEEL DISKORIJ?

4. (a) How Paal mi feel bowt di negitiv rispans a di Jooz? (b) Wai Paal mi feel da way?

4 If yu eva feel diskorij bikaaz wahn lata peepl eena di teritori noh waahn lisn wen yu preech, yu wahn andastan how di apasl Paal mi feel. Hihn mi preech fi nayli 30 yaaz. Ih mi help wahn lata peepl fi bee Krais disaipl. (Aks 14:21; 2 Kor. 3:2, 3) Stil, ih neva ga moch sokses wid som a di Jooz dehn. Az a mata a fak, moas a dehn insolt Paal ahn som a dehn mi eevn persikyoot ahn. (Aks 14:19; 17:1, 4, 5, 13) How Paal mi feel bowt how di Jooz mi-di ak? Ih seh: “Ah di tel unu di chroot kaa Ah bilangz tu Krais. . . . Ah reeli sari fi mi peepl dehn, di peepl a Izrel. Di payn weh Ah feel eena mi haat fi dehn neva stap.” (Roam. 9:1-3) Wai Paal mi feel da way? Ih mi lov di preechin werk. Ih preech tu di Jooz bikaaz ih mi kansaan bowt dehn. Soh ih mi hert ahn fi si how dehn neva waahn Gaad mersi.

5. (a) Wai wi preech tu wi nayba dehn? (b) Wai wi geh diskorij sohntaim?

5 Jos laik di apasl Paal, wi preech tu peepl kaaz wi waahn help dehn. (Mach. 22:39; 1 Kor. 11:1) Wi noa fahn wi oan ekspeeryens humoch blesinz wi get wen wi serv Jehoava. Wen wi tink bowt di peepl dehn weh liv eena wi teritori, wi tel wiself, ‘If wi kuda onli help dehn fi si weh dehn di mis owt pan!ʼ Soh, wi kip aan di inkorij dehn fi laan di chroot bowt Jehoava an ih perpos fi hyoomanz ahn di ert. Da laik wi di tel dehn: ‘Wi bring wahn byootiful gif fi unu. Pleez aksep it.ʼ Soh wen peepl noh waahn aksep da gif, af koars wi wahn feel ‘payn eena wi haat.ʼ Wen wi feel dis way, ih shoa dat wi lov di preechin werk, ih noh shoa dat wi noh ga fayt. Soh, wi noh giv op eevn if wi feel diskorij sohntaim. Elena, wahn painyaa fi oava 25 yaaz seh: “Tu mee di preechin werk haad. Bot Ah wudn waahn du eni ada werk.” Moas a wi feel jos laik Elena, noh chroo!

HOW WI KU BAYR FROOT?

6. Weh kweschan wi wahn kansida, ahn how wi wahn ansa it?

6 Wai wi ku bee shoar dat noh mata wehpaat wi preech, wi ku stil ga gud rizolts eena wi minischri? Fi ansa da impoatant kweschan, mek wi stodi bowt  too a Jeezas iloschrayshan. Ih mi taak bowt how wi need fi ‘bayr froot.ʼ (Mach. 13:23) Di fos wan da bowt wahn vain.

7. (a) Hoo da “di gyaadna,” “di vain,” ahn “di branch dehn” eena Jeezas iloschrayshan? (b) Weh kweschan wi need fi fain di ansa tu?

7 Reed Jan 15:1-5, 8Jeezas tel ih apasl dehn: “Wen lata gud ting kom owta unu laif, dat wahn shoa dat unu da mi falowa dehn fi chroo, ahn sayka dat, unu wahn di aana mai Faada.” Jeezas seh dat Jehoava da “di gyaadna,” hihn da “di vain,” an ih disaipl dehn da “di branch dehn.” * Wat da di froot weh Jeezas falowaz haftu bayr? Eena dis iloschrayshan, Jeezas neva seh egzakli wat da di froot, bot ih mi menshan sohnting impoatant weh ku help wi noa di ansa.

8. (a) Eena dis iloschrayshan, wai di froot noh di rifaa tu nyoo disaipl? (b) Yu tink Jehoava wuda aks wi fi du sohnting weh wi kyaahn du? Pleez eksplayn yu ansa.

8 Jeezas seh: “Hihn [ih Faada] chap weh eni branch weh noh di bayr.” Soh Jehoava si wee az fi hihn servant dehn onli if wi bayr froot. (Mach. 13:23; 21:43) Soh den, eena dis iloschrayshan, di froot weh aal Kristyanz haftu bayr noh di rifaa tu nyoo disaipl weh wi mek. (Mach. 28:19) If dat da-mi soh, den faytful Witnisiz hoo noh di mek disaipl bikaaz a di teritori weh dehn preech eena wuda bee laik dehn branch weh noh gud. Bot wi noa dat Jeezas ahn Jehoava wudn tink laik dat! Wi kyaahn foas peepl fi bee wahn disaipl a Krais. Jehoava da wahn lovin Gaad. Hihn wudn rijek wi bikaaz wi kyaahn du sohnting weh impasabl fi mek wi du. Wateva Jehoava aks wi fi du, da aalwayz sohnting wi ku du.—Deut. 30:11-14.

9. (a) Weh werk help wi fi bayr froot? (b) Wich iloschrayshan wi wahn kansida, ahn wai?

9 Soh den, wat da di froot weh aala wi haftu bayr? Da di preechin werk. Dat da sohnting weh aala wi ku du. * (Mach. 24:14) Jeezas iloschrayshan bowt wahn faama teech wi da saym ting. Mek wi kansida da iloschrayshan.

10. (a) Eena dis iloschrayshan, weh di seed ahn di grong stan fa? (b) Weh rais shoot projoos?

10 Reed Look 8:5-8, 11-15. Eena di iloschrayshan a di faama, di seed da “di Werd a Gaad,” er di Kingdom mesij. Di grong stan fi di “haat,” er hoo wee pahn di eensaid. Di seed weh jrap pahn di gud grong tek root, sprowt, ahn groa intu wahn plaant, mek wi seh rais. Den, ih “bayr wahn honjrid taim moa dahn weh di faama mi plaant.” Bot weh kaina froot ih bayr? Yu tink ih bayr lee rais shoot? No, ih bayr nyoo seed, weh groa intu nyoo shoot. Eena dis iloschrayshan, wan grayn a seed giv wahn honjrid grayn. How da paat a di iloschrayshan aplai tu wi minischri?

Bayr froot ahn noh giv op. How wi ku du dat? (Paragraaf 11)

11. (a) How di iloschrayshan a di faama aplai tu wi minischri? (b) How wi projoos nyoo Kingdom seed?

11 Jos az wahn egzampl, mek wi seh dat yaaz agoa sohn Witnisiz er wi Kristyan payrents mi stodi di Baibl wid wi. Wen wi mi aksep da Kingdom mesij, da-mi laik dehn plaant wahn seed. Dis mi mek dehn feel soh hapi. Jos laik how di seed stay eena di grong, wi mi aksep da mesij ahn hoal aan tu it. Bikaaz a dat,  di Kingdom mesij laik wahn seed tek root ahn groa til ih bayr froot. Jos laik how wahn nyoo rais shoot projoos nyoo seed, wi projoos nyoo Kingdom seed, noh nyoo disaipl. * How wi projoos nyoo Kingdom seed? Eech taim wi taak bowt di Kingdom mesij, wi di projoos ahn skyata di seed weh sombadi els mi plaant eena fi wee haat. (Look 6:45; 8:1) Soh dis iloschrayshan teech wi dat az lang az wi noh giv op ahn kip aan di taak bowt di Kingdom, wi di bayr froot.

12. (a) Weh wi ku laan fahn Jeezas iloschrayshan dehn bowt di vain ahn di faama? (b) How yoo feel dat Jehoava riwaad di werk wi du ahn noh di rizolt a da werk?

12 Weh wi ku laan fahn Jeezas iloschrayshan dehn bowt di vain ahn di faama? Dehn help wi fi andastan dat wen wi bayr froot, ih noh dipen pahn if peepl lisn er nat. Insteda dat, ih dipen pahn wi oan laayalti tu wi werk. Paal mi seh da saym ting wen ih seh: “Gaad wahn gi evribadi dehn riwaad fi di werk weh dehn du.” (1 Kor. 3:8) Di riwaad da akaadn tu di werk, noh akaadn tu di rizolt a da werk. Wahn sista weh di painyaa fi 20 yaaz, weh naym Matilda, seh: “Ih mek Ah feel hapi fi noa dat Jehoava riwaad wi haad werk.”

NOH GIV OP—KANTINYU BAYR FROOT

13, 14. Wai Paal neva giv op pahn dehn wan weh neva waahn hyaa di gud nyooz, akaadn tu Roamanz 10:1, 2?

13 Weh wahn help wi fi kip aan di bayr froot ahn noh giv op? Laik wi mi menshan erliya, Paal mi feel diskorij bikaaz di Jooz neva waahn hyaa di Kingdom mesij. Bot, ih neva giv op pahn dehn. Noatis weh ih seh eena ih leta tu di Kristyanz da Roam bowt how ih mi feel tuwaadz di Jooz dehn: “Wid aal mi haat, Ah wuda waahn Gaad sayv di Jooz dehn. Ah pray tu Gaad fi dat. Ah noa dehn waahn pleez Gaad bad, bot dehn noh andastan di rait way.” (Roam. 10: 1, 2) Wat da-mi Paal reezn fi kantinyu eena ih minischri?

14 Fos, Paal mi seh wai ih mi kip aan di preech tu di Jooz. Ih seh: “Wid aal mi haat, Ah wuda waahn Gaad sayv di Jooz dehn.” Soh hihn mi reeli waahn help som a dehn geh sayv. (Roam. 11:13, 14) Sekant, Paal mi seh: “Ah pray tu Gaad fi dat.” Ih mi bayg Jehoava eena pryaa fi help som a dehn fi aksep di Kingdom mesij. Terd, Paal mi seh: “Ah noa dehn waahn pleez Gaad bad.” Hihn mi si di gud eena peepl. Paal ihself mi noa dat wen wahn persn reeli waahn pleez Gaad, da dizaiya ku chaynj da persn intu wahn faytful disaipl a Krais.

15. How wi ku fala Paal egzampl? Wat da sohn ada egzampl?

15 How wi ku fala Paal egzampl? Fos, wi haftu ga wahn schrang dizaiya fi fain enibadi weh waahn geh evalastin laif. Sekant, wi bayg Jehoava eena pryaa fi oapm di haat a peepl weh sinsyaa. (Aks 13:48; 16:14) Wahn sista weh naym Silvana weh di painyaa fi nayli 30 yaaz now, seh dis: “Bifoa Ah goh tu wahn hows eena di teritori, Ah pray tu Jehoava. Ah aks ahn fi gi mi wahn gud atichood.” Wi aalso pray tu Gaad fi di help a di aynjelz. Dehn ku dairek wi tu peepl wid di rait haat kandishan. (Mach. 10:11-13; Rev. 14:6) Wahn brada weh naym Robert, weh di painyaa fi oava 30 yaaz, seh: “Ih eksaitin fi werk lang wid di aynjelz kaaz dehn noa weh di hapm eena wahn persn laif.” Terd, wi chrai fi si di gud eena peepl. Wahn elda weh naym Karl weh baptaiz fi oava 50 yaaz, seh: “Ah luk fi eni lee ting weh shoa dat da persn hombl, maybi ih smail wid mi, er ih luk frenli, er ih aks wahn kweschan.” Soh, jos laik Paal, wi ku kantinyu bayr froot ahn noh giv op.

“NOH MEK YU HAN RES”

16, 17. (a) Weh wi ku laan fahn Ecclesiastes 11:6? (b) Yooz di egzampl eena di paragraaf, fi shoa how dis werk ku afek dehn wan weh di wach wi.

16 Eevn if ih luk laik di Kingdom mesij weh wi preech noh di reech di haat a di peepl dehn, wi noh fi tink dat di seed weh wi di skyata noh wahn bayr. (Reed Ecclesiastes 11:6.) * Da chroo dat wahn lata peepl noh waahn lisn tu wi, bot dehn di wach evriting wi du. Dehn di wach di kloaz wi gat aan, how wi bihayv, an if wi frenli. In taim, wi kandok ku help som a dehn fi si dat dehn negitiv atichood bowt wi rang. Sergio an Olinda, weh wi mi menshan lee erliya, mi noatis dat dis mi hapm tu dehn.

17 Sergio seh: “Bikaaz a siknis, wi neva du kyaat werk fi wahn wail. Wen wi gaan bak, som a di peepl aks wi, ‘Weh hapm? Wi mi mis unu.ʼ” Olinda seh wid wahn smail pan ih fays: “Di bos jraiva dehn wayv wi ahn som a dehn hala fahn dehn jraiva seet, ‘Gud jab!ʼ Dehn eevn aks wi fi magazeen.” Sergio an Olinda mi sopraiz wen wahn man stap bai di kyaat, gi dehn wahn bokay a flowaz, ahn tank dehn fi di werk dehn di du.

18. Wai yoo waahn kantinyu bayr froot ahn noh giv op?

18 Soh, az lang az wi ‘noh mek wi han resʼ fahn soa di Kingdom seed, wi di du fi wee paat fi ‘preech tu aala di nayshan dehn.ʼ (Mach. 24:14) Ahn moa dan eniting els, wi feel hapi bikaaz wi noa dat Jehoava pleez wid wi. Hihn lov enibadi weh kantinyu fi bayr froot ahn noh giv op!

^ par. 2 Eevn Jeezas mi noa weh ih feel laik fi preech eena ih oan “hoamtong.” Ih mi noa ih ku bee wahn chalenj. Dis da sohnting weh di foa Gaspl menshan.—Mach. 13:57; Maak 6:4; Look 4:24; Jan 4:44.

^ par. 7 Aldoa di branch dehn eena di iloschrayshan di rifaa tu di anointid wan dehn, ih ga lata lesn weh aala Gaad servants ku benifit fram.

^ par. 9 Wi bayr froot wen wi werk fi ga di froot a di spirit eena wi laif. Bot eena dis aatikl ahn di neks wan, wi noh wahn taak bowt dat, wi wahn taak bowt how wi ku bayr froot wid wi mowt—chroo di preechin werk.—Gal. 5:22, 23; Heeb. 13:15.

^ par. 11 Pahn sohn ada taimz, Jeezas mi yooz di egzampl a wen yu plaant ahn reep fi teech weh ih meen fi mek disaipl.—Mach. 9:37; Jan 4:35-38.

^ par. 16 Ecclesiastes 11:6: “Plaant yu seed eena di maanin ahn noh mek yu han res til eevnin; bikaaz yu noh noa weh yu wahn ga sokses, weda da dis wan er da wan, er maybi di too a dehn wahn du gud.”