Skip tu di aatikl

Skip tu lis a tapik

 STODI AATIKL 12

Shoa Kansaan fi How Wi Bradaz ahn Sistaz Feel

Shoa Kansaan fi How Wi Bradaz ahn Sistaz Feel

“Aala unu mos ga . . . kansaan fi wan anada.”—1 PEET. 3:8.

SANG 90 Inkorij Wan Anada

WEH WI WAHN DISKOS? *

1. Akaadn tu 1 Peeta 3:8, wai wi laik deh rong peepl hoo kay bowt wi feelinz ahn wi hapinis?

WI LAIK deh rong peepl hoo kay bowt wi feelinz ahn wi hapinis. Dehn chrai fi put dehnself eena fi wee shooz, ahn chrai fi andastan weh wi di tink ahn feel. Dehn noatis weh wi need ahn help wi bifoa wi eevn aks fi help. Wi apreeshiayt peepl hoo shoa da kaina kyaa, er “kansaan” fi wi.—Reed 1 Peeta 3:8 *.

2. Wai ih noh aalwayz eezi fi mek wi shoa kansaan fi adaz?

2 Aala wi waahn shoa kansaan fi wi bradaz ahn sistaz. Bot wi noh perfek, soh ih noh aalwayz eezi fi mek wi du dis. (Roam. 3:23) Ih soh eezi fi mek wi onli tink bowt wiself, wi baan dis way. Aalso, som a wi mait schrogl fi shoa kansaan fi adaz bikaaz a how wi mi rayz op er weh mi hapm tu wi eena di paas. Ahn fi adaz, di atichood a di peepl rong dehn afek dehn. Eena dehnya laas dayz, wahn lata peepl noh eevn tink bowt di feelinz a adaz. Insted, dehn “jos lov dehnself.” (2 Tim. 3:1, 2) Weh ku help wi fi get oava dehnya chalenjiz ahn shoa kansaan fi di feelinz a adaz?

3. (a) Weh ku help wi fi shoa moa kansaan fi adaz? (b) Weh wi wahn kansida eena dis aatikl?

3 If wi fala Jehoava ahn Jeezas egzampl, wi wahn ku shoa moa kansaan fi adaz. Jehoava da wahn Gaad a lov, ahn fi hihn egzampl da di bes wan fi mek wi fala if wi waahn shoa wi bradaz dat wi kay bowt dehn. (1 Jan 4:8) Jeezas kapi ih Faada persnaliti eena wahn perfek way. (Jan 14:9) Wen hihn mi deh pahn di ert, ih mi shoa how wahn hyooman ga di abiliti fi shoa kompashan. Eena dis aatikl, wi wahn kansida  how Jehoava ahn Jeezas shoa dat dehn kay bowt how ada peepl feel. Den wi wahn kansida how wi ku kapi fi dehn egzampl.

HOW JEHOAVA SHOA KANSAAN FI ADAZ

4. Akaadn tu Isaiah 63:7-9, how Jehoava shoa dat ih kay bowt how ih servant dehn feel?

4 Di Baibl teech wi dat Jehoava kay bowt how ih servant dehn feel. Fi egzampl, tink bowt how Jehoava mi feel wen di Izrelait dehn gaan chroo difrent chraiyalz. Di Baibl seh: “Joorin aala dehn chroblz ih mi feel lata payn.” (Reed Isaiah 63:7-9.) * Laytaraan, chroo di prafit Zakaraiya, Jehoava mi seh dat wen fi hihn peepl mi-di fays persikyooshan, da laik if hihn mi-di goh chroo it tu. Jehoava mi tel ih servant dehn: “Hoosoeva toch yoo, di toch mi aiybaal.” (Zech. 2:8) Wen wi reed dis skripcha, wi si humoch kansaan Jehoava ga fi ih peepl!

Bikaaz Jehoava mi feel kompashan fi di Izrelait dehn da Eejip, ih free dehn fahn slayvri (Paragraaf 5)

5. Gi wahn egzampl a how Jehoava du sohnting fi help ih servant dehn hoo di sofa.

5 Jehoava noh jos feel kompashan fi ih servant dehn, ih tek akshan fi help dehn. Fi egzampl, wen di Izrelaits da-mi slayv da Eejip, dehn mi gaan chroo wahn lata sofarin. Bot Jehoava mi andastan dehn payn ahn tek akshan fi help dehn. Jehoava mi tel Moaziz: “Ah si aala di sofarin weh mi peepl di goh chroo da Eejip, an Ah hyaa how dehn di krai owt tu mi sayka aala di haad werk weh dehn di foas dehn fi du; Ah noa di payn weh dehn di sofa. Ah gwehn dong deh an Ah wahn sayv dehn fahn di Eejipshanz.” (Ex. 3:7, 8) Bikaaz Jehoava mi feel kompashan fi ih peepl, ih free dehn fahn slayvri. Honjridz a yaaz layta, da di Pramis Lan, sohn enimiz atak di Izrelait dehn. Weh Jehoava mi du? Hihn “mi feel sari fi dehn kaaz a how dehn mi-di krai fi help. Di peepl mi-di persikyoot dehn ahn chreet dehn eena wahn kruwil way.” Agen, Jehoava shoa dat ih mi kay bowt ih peepl, soh ih mi du sohnting fi help dehn. Hihn  mi sen sohn joj fi sayv dehn fahn dehn enimiz.—Judg. 2:16, 18.

6. Gi wahn egzampl weh shoa dat Jehoava kay bowt how ih peepl feel eevn wen dehn tinkin rang.

6 Jehoava shoa dat ih kay bowt how ih peepl feel, eevn wen dehn tinkin rang. Kansida di egzampl a Joana. Gaad mi sen dis prafit fi preech wahn jojment mesij gens di peepl fahn Niniveh. Wen dehn mi ripent, Gaad neva dischrai dehn. Bot, Joana neva laik da disizhan ataal. Hihn geh beks bikaaz fi hihn prafesi a jojment neva kohn chroo. Bot Jehoava mi payshent wid Joana ahn help ahn fi ajos ih tinkin. (Jonah 3:10–4:11) In taim, Joana mi andastan weh Jehoava mi-di teech ahn. Jehoava mi eevn yooz ahn fi rikaad dis akonk soh dat wi ku benifit fan it.—Roam. 15:4. *

7. How Jehoava deelinz wid ih peepl eena di paas shoa dat ih kay bowt ih servants?

7 Di way Jehoava mi deel wid ih peepl eena di paas shoa dat hihn kay bowt ih servants. Soh wen wee di goh chroo eni kaina payn ahn sofarin, wi noa dat hihn kay bowt wee tu. Jehoava “reeli noa di hyooman haat.” (2 Chron. 6:30) Hihn andastan how wi tink, weh wi feel deep dong eena wi haat, ahn weh wi ku du fahn weh wi kyaahn du. Ahn “hihn noh wahn mek di taim a testin geh soh bad dat [wi] kyaahn bayr it.” (1 Kor. 10:13) Dat da wahn reeli komfertin pramis!

HOW JEEZAS SHOA KANSAAN FI ADAZ

8-10. Wat da sohn tingz weh mi help Jeezas shoa kansaan fi adaz?

8 Jeezas mi kay wahn lat bowt adaz wen ih mi deh pahn di ert az wahn hyooman. Mek wi kansida at lees chree tingz weh mi help hihn fi shoa kansaan. Fos, laik weh wi mi menshan erliya, Jeezas mi kapi ih Faada kwalitiz eena wahn perfek way. Jeezas mi lov peepl, jos laik ih Faada. Eevn doa hihn mi hapi bowt evriting weh ih mi help Jehoava mek, Jeezas “mi espeshali lov hyoomanz.” (Prov. 8:31) Da dis sayhn lov mi mek Jeezas kay bowt how adaz feel.

9 Sekant, jos laik Jehoava, Jeezas ku reed haat tu. Hihn ku noa wai peepl du tingz ahn weh dehn di feel. (Mach. 9:4; Jan 13:10, 11) Soh wen Jeezas mi noatis dat peepl mi sad, ih komfert dehn kaaz ih mi kansaan bowt dehn.—Isa. 61:1, 2; Look 4:17-21.

10 Terd, Jeezas ihself gaan chroo som a di saym chalenjiz weh peepl rong hihn mi-di goh chroo. Fi egzampl, Jeezas mi praabli groa op eena wahn poa famili. Ih mi laan how fi du haad fizikal werk kaaz ih yoostu werk lang wid ih adaptiv pa, Joazef. (Mach. 13:55; Maak 6:3) Ih pasabl dat Joazef mi ded bifoa Jeezas mi don ih minischri. Soh Jeezas mi noa egzakli how ih feel fi looz sombadi weh ih lov eena det. Ahn Jeezas mi noa weh ih feel laik fi bee eena wahn famili weh evribadi noh mi ga di sayhn rilijos bileef. (Jan 7:5) Dehndeh tingz weh Jeezas gaan chroo mi help ahn fi andastan di chalenjiz ahn feelinz a aadineri peepl.

Jeezas mi shoa kompashan tu wahn def man wen ih kehr ahn faar fahn di krowd fi heel ahn (Paragraaf 11)

11. Wat da-mi wan way Jeezas mi shoa kansaan fi peepl? Pleez eksplayn yu ansa. (Koment pahn di picha pahn di kova.)

11 Wen Jeezas mi du wahn mirakl, peepl kuda mi si di kansaan weh hihn mi gat fi dehn. Jeezas neva du dehndeh mirakl jos bikaaz ih mi feel dat ih haftu, bot ih mi du it bikaaz ih “haat gaan owt tu dehn.” (Mach. 20:29-34; Maak 1:40-42) Fi egzampl, noatis how hihn mi shoa kansaan  fi wahn man weh mi def. Ih mi kehr di man faar fahn di krowd a peepl ahn heel di man. Hihn mi ga da saym kansaan fi wahn wido wen hihn mi rezorek fi shee onli son. (Maak 7:32-35; Look 7:12-15) Jeezas mi andastan weh di peepl dehn mi-di goh chroo ahn ih mi waahn help dehn.

12. Akaadn tu Jan 11:32-35, how Jeezas mi shoa dat hihn mi kay bowt Marta ahn Mayri feelinz?

12 Jeezas mi shoa kansaan fi Marta ahn Mayri. Wen hihn mi si how dehn mi sad bikaaz dehn breda, Lazaros, mi ded, “Jeezas staat tu krai.” (Reed Jan 11:32-35.) Jeezas neva jos krai kaaz ih fren mi ded. Aftaraal, hihn mi noa dat hihn mi wahn rezorek Lazaros. Soh wai ih mi staat tu krai? Bikaaz ih mi andastan di payn weh ih kloas frenz, Mayri ahn Marta, mi-di feel.

13. Wai ih inkorijin fi noa dat Jeezas kay bowt peepl?

13 Eevn doa wi kyaahn bee perfek laik Jeezas, ih reeli inkorij wi fi noa dat hihn kay bowt peepl. Wi lov hihn bikaaz a di way ih mi chreet peepl. (1 Peet. 1:8) Wi feel inkorij fi noa dat hihn di rool az di King a Gaad Kingdom. Hihn wahn soon geh rid a aal sofarin. Bikaaz Jeezas mi liv pahn ert az wahn hyooman, hihn da di bes persn fi help aala wi heel fahn di payn weh Saytan bring pahn wi. Soh, wee bles fi ga wahn Roola, weh reeli “andastan fi wee weeknis dehn.”—Heeb. 2:17, 18; 4:15, 16.

FALA DI EGZAMPL A JEHOAVA AHN JEEZAS

14. Afta wi reed Ifeezhanz 5:1, 2, weh wi shuda waahn du?

14 Wen wi tink bowt how Jehoava ahn Jeezas shoa dat dehn kay bowt peepl, ih mek wi waahn shoa moa kansaan fi wi bradaz. (Reed Ifeezhanz 5:1, 2.) Wi kyaahn reed haat laik dehn. Bot wi ku chrai fi andastan weh adaz feel ahn need. (2 Kor. 11:29) Noh mek wi bee laik di selfish werl rong wi; mek wi chrai fi ‘luk owt fi wan anada, ahn noh onli fi wi oanself.ʼ—Fil. 2:4.

(Paragraaf 15-19) *

15. Hoo espeshali need fi shoa kansaan fi adaz?

15 Di eldaz eena di kangrigayshan espeshali need fi shoa kansaan fi peepl. Dehn noa dat dehn haftu ansa tu Jehoava fi how dehn chreet fi Hihn sheep dehn. (Heeb. 13:17) Eldaz need fi bee andastandin if dehn waahn help dehn bradaz ahn sistaz. How eldaz ku shoa dat dehn kay bowt di sheep dehn?

16. Weh wahn lovin ahn kain elda du, ahn wai dat soh impoatant?

16 Wahn lovin ahn kain elda spen taim wid ih Kristyan bradaz ahn sistaz. Ih aks dehn kweschanz ahn lisn tu dehn. Ih noh geh foschraytid ahn hori dehn op. Dat veri impoatant, espeshali if wahn brada er sista waahn poar owt ih haat bot noh noa egzakli weh fi seh. (Prov. 20:5) Wen wahn elda wilin fi yooz ih taim fi help adaz, ih bil wahn schrang frenship wid ih bradaz. Bradaz lov an chros wahn elda laik dis.—Aks 20:37.

17. Weh wahn lata bradaz ahn sistaz seh da di moas impoatant kwaliti fi mek wahn elda gat? Yooz di egzampl eena di paragraaf.

17 Wahn lata bradaz ahn sistaz seh dat di moas impoatant kwaliti fi wahn elda gat, da fi shoa dat dehn kay bowt how adaz feel. Wai? Wahn sista weh naym Adelaide seh: “Ih eeziya fi taak tu dehn, bikaaz yu noa dat dehn wahn andastan yu. Yu ku tel dat dehn kay bowt di way yu feel jos fahn di way dehn ansa yu wen yu taak wid dehn.” Wahn brada hoo apreeshiayt di way wahn elda mi chreet ahn seh: “Ah mi si tyaaz kohn tu wahn elda aiy wen Ah tel ahn bowt weh Ah di goh chroo. Dat da  sohnting weh Ah wahn aalwayz memba.”—Roam. 12:15.

18. Weh ku help wi shoa kansaan fi wi bradaz ahn sistaz?

18 Af koars, eldaz da noh di onli wan dehn weh need fi shoa kansaan tu adaz. Aala wi ku shoa dat wi kay bowt wan anada. How wi ku du dis? Chrai fi andastan weh wi bradaz ahn sistaz eena di kangrigayshan ahn wi famili membaz di goh chroo. Shoa dat yu kay fi di yong wanz, fi di bradaz ahn sistaz weh sik, fi di oalda wan dehn, ahn fi di bradaz weh looz wahn lov wan eena det. Aks dehn how dehn di du. Reeli lisn wen dehn di seh how dehn feel. Di tingz weh yu du er seh ku help dehn fi si dat yu reeli andastan weh dehn di deel wid. Aafa fi help eena wateva way yu kud. Wen wi du dis, wi di shoa chroo chroo lov.—1 Jan 3:18.

19. Wai wi need fi bee wilin fi ajos wen wi chrai help adaz?

19 Wi need fi ajos wen wi di chrai help adaz. Wai? Bikaaz peepl rispan tu chraiyalz eena difrent wayz. Som waahn taak bowt it, wail adaz noh laik taak bowt dehn prablemz. Soh aldoa wi waahn help, wi shudn aks kweschanz weh tu persnal. (1 Tes. 4:11) Eevn wen wi bradaz tel wi how dehn di feel, wi mait noh aalwayz gree wid weh dehn tel wi. Bot, wi need fi memba dat dis da how dehn feel. Soh, wi fi hori fi lisn ahn tek wi taim bifoa wi taak.—Mach. 7:1; Jay. 1:19.

20. Weh wi wahn stodi eena di neks aatikl?

20 Wi waahn shoa wi Kristyan bradaz ahn sistaz dat wi kay bowt dehn. Bot wi fi aalso wahn shoa di peepl weh wi meet eena di minischri dat wi kay bowt dehn tu. How wi ku shoa kansaan wen wi di mek disaipl? Wi wahn kansida dat eena di neks aatikl.

SANG 130 Fagiv Adaz

^ par. 5 Jehoava ahn Jeezas kansaan, er kay bowt how ada peepl feel. Dis aatikl wahn kansida weh wi ku laan fahn fi dehn egzampl. Wi wahn aalso diskos wai wi need fi shoa kansaan ahn how wi ku du it.

^ par. 1 WEH IH MEEN? Fi shoa “kansaan” meen dat wi chrai fi andastan weh ada peepl di feel ahn fi feel di saym way laik dehn.—Roam. 12:15.

^ par. 4 Isaiah 63:7-9: “Ah wahn taak bowt Jehoava laayal lov, di tingz weh Jehoava du weh dizerv prayz, bikaaz a evriting weh Jehoava don du fi wi, an aala di gud tingz weh hihn don du fi di hows a Izrel, akaadn tu fi hihn mersi an ih grayt laayal lov. Hihn mi seh: ‘Fi shoar dehn da mai peepl, mi son dehn weh wahn bee laayal.ʼ Hihn da dehn Sayvya now. Joorin aala dehn chroblz ih mi feel lata payn. Ahn fi hihn oan mesinja mi sayv dehn. Sayka ih lov ahn mersi ih mi bai dehn bak, An ih mi lif dehn op ahn kehr dehn fahn way bak eena di dayz.”

^ par. 6 Jehoava mi aalso shoa kompashan fi ada faytful servants hoo mi diskorij er frayd. Tink bowt di akonk a Hana (1 Sam. 1:10-20), Ilaija (1 Ki. 19:1-18), an Eebed-melek (Jer. 38:7-13; 39:15-18).

^ par. 66 DI PICHA DEHN: Di meetin dehn da di Kingdom Haal gi wi lata apachooniti fi spen taim wid wi bradaz. Wi si (1) wahn elda di taak tu wahn yong poblisha an ih ma eena wahn kain way, (2) wahn pa an ih daata di help wahn oalda sista get tu di kaar, ahn (3) too elda reeli di lisn tu wahn sista hoo di aks fi advais.